| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૩. અન્ધકવિન્દસુત્તવણ્ણના
3. Andhakavindasuttavaṇṇanā
૧૮૪. તતિયે અન્ધકવિન્દન્તિ એવંનામકં ગામં. ઉપસઙ્કમીતિ ‘‘સત્થા ઇદાનિપિ વીરિયં કરોતિ પધાનમનુયુઞ્જતિ, ગચ્છામિસ્સ સન્તિકે ઠત્વા સાસનાનુચ્છવિકં વીરિયપટિસંયુત્તં ગાથં વક્ખામી’’તિ ઉપસઙ્કમિ.
184. Tatiye andhakavindanti evaṃnāmakaṃ gāmaṃ. Upasaṅkamīti ‘‘satthā idānipi vīriyaṃ karoti padhānamanuyuñjati, gacchāmissa santike ṭhatvā sāsanānucchavikaṃ vīriyapaṭisaṃyuttaṃ gāthaṃ vakkhāmī’’ti upasaṅkami.
પન્તાનીતિ જનતં અતિક્કમિત્વા મનુસ્સાનં અનુપચારે ઠિતાનિ. સંયોજનવિપ્પમોક્ખાતિ તાનિ ચ સેનાસનાનિ સેવમાનો ન ચીવરાદીનં અત્થાય સેવેય્ય, અથ ખો દસસંયોજનવિપ્પમોક્ખત્થાય ચરેય્ય. સઙ્ઘે વસેતિ તેસુ સેનાસનેસુ રતિં અલભન્તો ઉપટ્ઠાકાદીનં ચિત્તાનુરક્ખણત્થં ગદ્રભપિટ્ઠે રજં વિય ઉપ્પતન્તો અરઞ્ઞે અચરિત્વા સઙ્ઘમજ્ઝે વસેય્ય. રક્ખિતત્તો સતીમાતિ તત્થ ચ વસન્તો સગવચણ્ડો ગોણો વિય સબ્રહ્મચારિનો અવિજ્ઝન્તો અઘટ્ટેન્તો રક્ખિતત્તો સતિપટ્ઠાનપરાયણો હુત્વા વસેય્ય.
Pantānīti janataṃ atikkamitvā manussānaṃ anupacāre ṭhitāni. Saṃyojanavippamokkhāti tāni ca senāsanāni sevamāno na cīvarādīnaṃ atthāya seveyya, atha kho dasasaṃyojanavippamokkhatthāya careyya. Saṅghe vaseti tesu senāsanesu ratiṃ alabhanto upaṭṭhākādīnaṃ cittānurakkhaṇatthaṃ gadrabhapiṭṭhe rajaṃ viya uppatanto araññe acaritvā saṅghamajjhe vaseyya. Rakkhitatto satīmāti tattha ca vasanto sagavacaṇḍo goṇo viya sabrahmacārino avijjhanto aghaṭṭento rakkhitatto satipaṭṭhānaparāyaṇo hutvā vaseyya.
ઇદાનિ સઙ્ઘે વસમાનસ્સ ભિક્ખુનો ભિક્ખાચારવત્તં આચિક્ખન્તો કુલાકુલન્તિઆદિમાહ. તત્થ પિણ્ડિકાય ચરન્તોતિ પિણ્ડત્થાય ચરમાનો. સેવેથ પન્તાનિ સેનાસનાનીતિ સઙ્ઘમજ્ઝં ઓતરિત્વા વસમાનોપિ ધુરપરિવેણે તાલનાળિકેરઆદીનિ રોપેત્વા ઉપટ્ઠાકાદિસંસટ્ઠો ન વસેય્ય, ચિત્તકલ્લતં પન જનેત્વા ચિત્તં હાસેત્વા તોસેત્વા પુન પન્તસેનાસને વસેય્યાતિ અરઞ્ઞસ્સેવ વણ્ણં કથેતિ. ભયાતિ વટ્ટભયતો. અભયેતિ નિબ્બાને. વિમુત્તોતિ અધિમુત્તો હુત્વા વસેય્ય.
Idāni saṅghe vasamānassa bhikkhuno bhikkhācāravattaṃ ācikkhanto kulākulantiādimāha. Tattha piṇḍikāya carantoti piṇḍatthāya caramāno. Sevetha pantāni senāsanānīti saṅghamajjhaṃ otaritvā vasamānopi dhurapariveṇe tālanāḷikeraādīni ropetvā upaṭṭhākādisaṃsaṭṭho na vaseyya, cittakallataṃ pana janetvā cittaṃ hāsetvā tosetvā puna pantasenāsane vaseyyāti araññasseva vaṇṇaṃ katheti. Bhayāti vaṭṭabhayato. Abhayeti nibbāne. Vimuttoti adhimutto hutvā vaseyya.
યત્થ ભેરવાતિ યસ્મિં ઠાને ભયજનકા સવિઞ્ઞાણકા સીહબ્યગ્ઘાદયો, અવિઞ્ઞાણકા રત્તિભાગે ખાણુવલ્લિઆદયો બહૂ અત્થિ. સરીસપાતિ દીઘજાતિકાદિસરીસપા. નિસીદિ તત્થ ભિક્ખૂતિ તાદિસે ઠાને ભિક્ખુ નિસિન્નો. ઇમિના ઇદં દીપેતિ – ભગવા યથા તુમ્હે એતરહિ તત્રટ્ઠકભેરવારમ્મણાનિ ચેવ સરીસપે ચ વિજ્જુનિચ્છારણાદીનિ ચ અમનસિકત્વા નિસિન્ના, એવમેવં પધાનમનુયુત્તા ભિક્ખૂ નિસીદન્તીતિ.
Yattha bheravāti yasmiṃ ṭhāne bhayajanakā saviññāṇakā sīhabyagghādayo, aviññāṇakā rattibhāge khāṇuvalliādayo bahū atthi. Sarīsapāti dīghajātikādisarīsapā. Nisīdi tattha bhikkhūti tādise ṭhāne bhikkhu nisinno. Iminā idaṃ dīpeti – bhagavā yathā tumhe etarahi tatraṭṭhakabheravārammaṇāni ceva sarīsape ca vijjunicchāraṇādīni ca amanasikatvā nisinnā, evamevaṃ padhānamanuyuttā bhikkhū nisīdantīti.
જાતુ મે દિટ્ઠન્તિ એકંસેન મયા દિટ્ઠં. ન યિદં ઇતિહીતિહન્તિ ઇદં ઇતિહ ઇતિહાતિ ન તક્કહેતુ વા નયહેતુ વા પિટકસમ્પદાનેન વા અહં વદામિ. એકસ્મિં બ્રહ્મચરિયસ્મિન્તિ એકાય ધમ્મદેસનાય. ધમ્મદેસના હિ ઇધ બ્રહ્મચરિયન્તિ અધિપ્પેતા. મચ્ચુહાયિનન્તિ મરણપરિચ્ચાગિનં ખીણાસવાનં.
Jātu me diṭṭhanti ekaṃsena mayā diṭṭhaṃ. Na yidaṃ itihītihanti idaṃ itiha itihāti na takkahetu vā nayahetu vā piṭakasampadānena vā ahaṃ vadāmi. Ekasmiṃ brahmacariyasminti ekāya dhammadesanāya. Dhammadesanā hi idha brahmacariyanti adhippetā. Maccuhāyinanti maraṇapariccāginaṃ khīṇāsavānaṃ.
દસા ચ દસધા દસાતિ એત્થ દસાતિ દસેવ, દસધા દસાતિ સતં, અઞ્ઞે ચ દસુત્તરં સેખસતં પસ્સામીતિ વદતિ. સોતસમાપન્નાતિ મગ્ગસોતં સમાપન્ના. અતિરચ્છાનગામિનોતિ દેસનામત્તમેતં, અવિનિપાતધમ્માતિ અત્થો. સઙ્ખાતું નોપિ સક્કોમીતિ મુસાવાદભયેન એત્તકા નામ પુઞ્ઞભાગિનો સત્તાતિ ગણેતું ન સક્કોમીતિ બહું બ્રહ્મધમ્મદેસનં સન્ધાય એવમાહ. તતિયં.
Dasā ca dasadhā dasāti ettha dasāti daseva, dasadhā dasāti sataṃ, aññe ca dasuttaraṃ sekhasataṃ passāmīti vadati. Sotasamāpannāti maggasotaṃ samāpannā. Atiracchānagāminoti desanāmattametaṃ, avinipātadhammāti attho. Saṅkhātuṃ nopi sakkomīti musāvādabhayena ettakā nāma puññabhāgino sattāti gaṇetuṃ na sakkomīti bahuṃ brahmadhammadesanaṃ sandhāya evamāha. Tatiyaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. અન્ધકવિન્દસુત્તં • 3. Andhakavindasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૩. અન્ધકવિન્દસુત્તવણ્ણના • 3. Andhakavindasuttavaṇṇanā
