| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. அனிச்சஸஞ்ஞாஸுத்தவண்ணனா
10. Aniccasaññāsuttavaṇṇanā
102. பா⁴வெந்தஸ்ஸாதி விபஸ்ஸனாய மக்³க³ங் பா⁴வெந்தஸ்ஸ உப்பன்னஸஞ்ஞா. தேனாஹ – ‘‘ஸப்³ப³ங் காமராக³ங் பரியாதி³யதீ’’திஆதி³. ஸந்தானெத்வாதி கஸனட்டா²னங் ஸப்³ப³ஸோ விதனெத்வா பத்த²ரித்வா. கிலேஸாதி உபக்கிலேஸப்பபே⁴தா³ கிலேஸா. அனிச்சஸஞ்ஞாஞாணேனாதி அனிச்சஸஞ்ஞாஸஹக³தேன ஞாணேன.
102.Bhāventassāti vipassanāya maggaṃ bhāventassa uppannasaññā. Tenāha – ‘‘sabbaṃ kāmarāgaṃ pariyādiyatī’’tiādi. Santānetvāti kasanaṭṭhānaṃ sabbaso vitanetvā pattharitvā. Kilesāti upakkilesappabhedā kilesā. Aniccasaññāñāṇenāti aniccasaññāsahagatena ñāṇena.
லாயனந்தி லாயனங் விய நயனங் விய நிச்சோ²டனங் விய ச அனிச்சஸஞ்ஞாஞாணங். இமினா அத்தே²னாதி இமினா யதா²வுத்தேன பாளியா அத்தே²ன, உபமா ஸங்ஸந்தே³தப்³பா³தி எத்த² பப்³ப³ஜலாயகோ விய யோகா³வசரோ. லாயனாதி³னா தஸ்ஸ தத்த² கதகிச்சதாய பரிதுட்டி² விய இமஸ்ஸ கிலேஸே ஸப்³ப³ஸோ சி²ந்தி³த்வா ப²லஸமாபத்திஸுகே²ன காலஸ்ஸ வீதினாமனா.
Lāyananti lāyanaṃ viya nayanaṃ viya nicchoṭanaṃ viya ca aniccasaññāñāṇaṃ. Iminā atthenāti iminā yathāvuttena pāḷiyā atthena, upamā saṃsandetabbāti ettha pabbajalāyako viya yogāvacaro. Lāyanādinā tassa tattha katakiccatāya parituṭṭhi viya imassa kilese sabbaso chinditvā phalasamāpattisukhena kālassa vītināmanā.
கூடங் க³ச்ச²ந்தீதி பாரிமந்தேன கூடங் க³ச்ச²ந்தி. கூடங் பவிஸனபா⁴வேனாதி கூடச்சி²த்³த³ங் அக்³கே³ன பவிஸனவஸேன. ஸமோஸரித்வாதி சி²த்³தே³ அனுபவிஸனவஸேன ச ஆஹச்ச அவட்டா²னேன ச ஸமோஸரித்வா டி²தா. கூடங் விய அனிச்சஸஞ்ஞா அனிச்சானுபஸ்ஸனாவஸேன அவட்டா²னஸ்ஸ மூலபா⁴வதோ. கோ³பானஸியோ விய சதுபூ⁴மககுஸலா த⁴ம்மா அனிச்சஸஞ்ஞாமூலகத்தா. கூடங் அக்³க³ங் ஸப்³ப³கோ³பானஸீனங் ததா²அதி⁴ட்டா²னஸ்ஸ பதா⁴னகாரணத்தா. அனிச்சஸஞ்ஞா அக்³கா³தி எத்தா²பி ஏஸேவ நயோ. அனிச்சஸஞ்ஞா லோகியாதி இத³ங் அனிச்சஸஞ்ஞானுபஸ்ஸனங் ஸந்தா⁴ய வுத்தங். அனிச்சானுபஸ்ஸனாமுகே²ன அதி⁴க³தஅரியமக்³கே³ உப்பன்னஸஞ்ஞா அனிச்சஸஞ்ஞாதி வத்தப்³ப³தங் லப⁴தீதி ‘‘அனிச்சஸஞ்ஞா, பி⁴க்க²வே, பா⁴விதா ப³ஹுலீகதா ஸப்³ப³ங் காமராக³ங் பரியாதி³யதீ’’திஆதி³ வுத்தங். ததா² ஹி த⁴ம்மஸங்க³ஹே (த⁴॰ ஸ॰ 357, 360) ‘‘யஸ்மிங் ஸமயே லோகுத்தரங் ஸஞ்ஞங் பா⁴வேதீ’’திஆதி³னா ஸஞ்ஞாபி உத்³த⁴டா. ஸப்³பா³ஸு உபமாஸூதி மூலஸந்தானஉபமாதீ³ஸு பஞ்சஸு உபமாஸு. புரிமாஹீதி கஸ்ஸகபப்³ப³ஜலாயனஅம்ப³பிண்டி³உபமாஹி அனிச்சஸஞ்ஞாய கிச்சங் வுத்தங் மூலஸந்தானகபதா³லனபப்³ப³ஜலாயனவண்டச்சே²த³னபதே³ஸேன அனிச்சஸஞ்ஞாய படிபக்க²பச்சே²த³னஸ்ஸ த³ஸ்ஸிதத்தா. பச்சி²மாஹி ப³லங் த³ஸ்ஸிதங் படிபக்கா²திபா⁴வஸ்ஸ ஜோதிதத்தா.
Kūṭaṃ gacchantīti pārimantena kūṭaṃ gacchanti. Kūṭaṃ pavisanabhāvenāti kūṭacchiddaṃ aggena pavisanavasena. Samosaritvāti chidde anupavisanavasena ca āhacca avaṭṭhānena ca samosaritvā ṭhitā. Kūṭaṃ viya aniccasaññā aniccānupassanāvasena avaṭṭhānassa mūlabhāvato. Gopānasiyo viya catubhūmakakusalā dhammā aniccasaññāmūlakattā. Kūṭaṃ aggaṃ sabbagopānasīnaṃ tathāadhiṭṭhānassa padhānakāraṇattā. Aniccasaññā aggāti etthāpi eseva nayo. Aniccasaññā lokiyāti idaṃ aniccasaññānupassanaṃ sandhāya vuttaṃ. Aniccānupassanāmukhena adhigataariyamagge uppannasaññā aniccasaññāti vattabbataṃ labhatīti ‘‘aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’tiādi vuttaṃ. Tathā hi dhammasaṅgahe (dha. sa. 357, 360) ‘‘yasmiṃ samaye lokuttaraṃ saññaṃ bhāvetī’’tiādinā saññāpi uddhaṭā. Sabbāsu upamāsūti mūlasantānaupamādīsu pañcasu upamāsu. Purimāhīti kassakapabbajalāyanaambapiṇḍiupamāhi aniccasaññāya kiccaṃ vuttaṃ mūlasantānakapadālanapabbajalāyanavaṇṭacchedanapadesena aniccasaññāya paṭipakkhapacchedanassa dassitattā. Pacchimāhi balaṃ dassitaṃ paṭipakkhātibhāvassa jotitattā.
அனிச்சஸஞ்ஞாஸுத்தவண்ணனா நிட்டி²தா.
Aniccasaññāsuttavaṇṇanā niṭṭhitā.
புப்ப²வக்³க³வண்ணனா நிட்டி²தா.
Pupphavaggavaṇṇanā niṭṭhitā.
மஜ்ஜி²மபண்ணாஸகோ ஸமத்தோ.
Majjhimapaṇṇāsako samatto.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. அனிச்சஸஞ்ஞாஸுத்தங் • 10. Aniccasaññāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. அனிச்சஸஞ்ஞாஸுத்தவண்ணனா • 10. Aniccasaññāsuttavaṇṇanā
