| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૫. અન્નસંસાવકત્થેરઅપદાનવણ્ણના
5. Annasaṃsāvakattheraapadānavaṇṇanā
સુવણ્ણવણ્ણં સમ્બુદ્ધન્તિઆદિકં આયસ્મતો અન્નસંસાવકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે એકસ્મિં કુલગેહે નિબ્બત્તો પિણ્ડાય ચરન્તં દ્વત્તિંસમહાપુરિસલક્ખણબ્યામપ્પભામણ્ડલોપસોભિતં ભગવન્તં દિસ્વા પસન્નમાનસો ભગવન્તં નિમન્તેત્વા ગેહં નેત્વા વરઅન્નપાનેન સન્તપ્પેત્વા સમ્પવારેત્વા ભોજેસિ. સો તેનેવ ચિત્તપ્પસાદેન તતો ચુતો દેવલોકે નિબ્બત્તિત્વા દિબ્બસમ્પત્તિં અનુભવિત્વા તતો ચવિત્વા મનુસ્સલોકે નિબ્બત્તિત્વા મનુસ્સસમ્પત્તિં અનુભવિત્વા તતો અપરાપરં દેવમનુસ્સસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તો સાસને પસીદિત્વા પબ્બજિત્વા વિપસ્સનં વડ્ઢેત્વા અરહત્તં પાપુણિ. સો પુબ્બે કતપુઞ્ઞનામવસેન અન્નસંસાવકત્થેરોતિ પાકટનામો અહોસિ.
Suvaṇṇavaṇṇaṃ sambuddhantiādikaṃ āyasmato annasaṃsāvakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto piṇḍāya carantaṃ dvattiṃsamahāpurisalakkhaṇabyāmappabhāmaṇḍalopasobhitaṃ bhagavantaṃ disvā pasannamānaso bhagavantaṃ nimantetvā gehaṃ netvā varaannapānena santappetvā sampavāretvā bhojesi. So teneva cittappasādena tato cuto devaloke nibbattitvā dibbasampattiṃ anubhavitvā tato cavitvā manussaloke nibbattitvā manussasampattiṃ anubhavitvā tato aparāparaṃ devamanussasampattiyo anubhavitvā imasmiṃ buddhuppāde ekasmiṃ kule nibbatto sāsane pasīditvā pabbajitvā vipassanaṃ vaḍḍhetvā arahattaṃ pāpuṇi. So pubbe katapuññanāmavasena annasaṃsāvakattheroti pākaṭanāmo ahosi.
૧૫૫-૬. સો અપરભાગે અત્તનો પુબ્બકમ્મં સરિત્વા સોમનસ્સજાતો ‘‘એવં મયા ઇમિના પુઞ્ઞસમ્ભારાનુભાવેન પત્તં અરહત્ત’’ન્તિ અત્તનો પુબ્બચરિતાપદાનં ઉદાનવસેન પકાસેન્તો સુવણ્ણવણ્ણન્તિઆદિમાહ . તત્થ સુવણ્ણસ્સ વણ્ણો વિય વણ્ણો યસ્સ ભગવતો સોયં સુવણ્ણવણ્ણો, તં સુવણ્ણવણ્ણં સમ્બુદ્ધં સિદ્ધત્થન્તિ અત્થો. ગચ્છન્તં અન્તરાપણેતિ વેસ્સાનં આપણપન્તીનં અન્તરવીથિયં ગચ્છમાનં. કઞ્ચનગ્ઘિયસંકાસન્તિ સુવણ્ણતોરણસદિસં બાત્તિંસવરલક્ખણં દ્વત્તિંસવરલક્ખણેહિ સમ્પન્નં લોકપજ્જોતં સકલલોકદીપભૂતં અપ્પમેય્યં પમાણવિરહિતં અનોપમં ઉપમાવિરહિતં જુતિન્ધરં પભાધારં નીલપીતાદિછબ્બણ્ણબુદ્ધરંસિયો ધારકં સિદ્ધત્થં દિસ્વા પરમં ઉત્તમં પીતિં અલત્થં અલભિન્તિ સમ્બન્ધો. સેસં સુવિઞ્ઞેય્યમેવાતિ.
155-6. So aparabhāge attano pubbakammaṃ saritvā somanassajāto ‘‘evaṃ mayā iminā puññasambhārānubhāvena pattaṃ arahatta’’nti attano pubbacaritāpadānaṃ udānavasena pakāsento suvaṇṇavaṇṇantiādimāha . Tattha suvaṇṇassa vaṇṇo viya vaṇṇo yassa bhagavato soyaṃ suvaṇṇavaṇṇo, taṃ suvaṇṇavaṇṇaṃ sambuddhaṃ siddhatthanti attho. Gacchantaṃ antarāpaṇeti vessānaṃ āpaṇapantīnaṃ antaravīthiyaṃ gacchamānaṃ. Kañcanagghiyasaṃkāsanti suvaṇṇatoraṇasadisaṃ bāttiṃsavaralakkhaṇaṃ dvattiṃsavaralakkhaṇehi sampannaṃ lokapajjotaṃ sakalalokadīpabhūtaṃ appameyyaṃ pamāṇavirahitaṃ anopamaṃ upamāvirahitaṃ jutindharaṃ pabhādhāraṃ nīlapītādichabbaṇṇabuddharaṃsiyo dhārakaṃ siddhatthaṃ disvā paramaṃ uttamaṃ pītiṃ alatthaṃ alabhinti sambandho. Sesaṃ suviññeyyamevāti.
અન્નસંસાવકત્થેરઅપદાનવણ્ણના સમત્તા.
Annasaṃsāvakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૫. અન્નસંસાવકત્થેરઅપદાનં • 5. Annasaṃsāvakattheraapadānaṃ
