| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. அஞ்ஞதரப்³ரஹ்மஸுத்தவண்ணனா
5. Aññatarabrahmasuttavaṇṇanā
176. தேஜோகஸிணபரிகம்மங் கத்வாதி ‘‘தேஜோகஸிணபரிகம்மஜ்ஜா²னங் ஸமாபஜ்ஜிஸ்ஸாமீ’’தி சித்துப்பாதோ³ ஏவெத்த² தேஜோகஸிணபரிகம்மங். ந ஹி பு³த்³தா⁴னங் அஞ்ஞேஸங் விய தத்த² ஜா²னஸமாபஜ்ஜனேன பரிகம்மபபஞ்சோ அத்தி² ஸப்³ப³த்தே²வ சிண்ணவஸீபா⁴வஸ்ஸ பரமுக்கங்ஸபா⁴வப்பத்தத்தா. தஸ்ஸ கிர ப்³ரஹ்முனோ ‘‘யதா²ஹங் ஏவங் மஹானுபா⁴வோ அஞ்ஞோ நத்தீ²’’தி லத்³தி⁴, யங் ஸந்தா⁴ய வுத்தங் – ‘‘நத்தி² ஸோ ஸமணோ வா ப்³ராஹ்மணோ வா, யோ இத⁴ ஆக³ச்செ²ய்யா’’தி. ப⁴க³வா தஸ்ஸ தங் லத்³தி⁴ங் விஸ்ஸஜ்ஜேதுங் தேஜோதா⁴துங் ஸமாபஜ்ஜித்வா தஸ்ஸ உபரி ஆகாஸே நிஸீதி³. தேன வுத்தங் ‘‘தேஜோதா⁴துங்…பே॰… ததா²க³தங் தி³ஸ்வா’’தி. அட்டி²வேத⁴ங் வியங் விஜ்ஜி²தப்³போ³ அட்டி²வேதீ⁴, யதா² அட்டி²ங் விஜ்ஜி²த்வா அட்டி²மிஞ்ஜங் ஆஹச்ச திட்ட²தி, ஏவங் விஜ்ஜி²தப்³போ³தி அத்தோ². அயங் பன அட்டி²வேதீ⁴ விய அட்டி²வேதீ⁴, யதா² ஸோ லத்³தி⁴ங் விஸ்ஸஜ்ஜேதி, ஏவங் படிபஜ்ஜிதப்³போ³தி அத்தோ². ஸேஸானந்தி மஹாகஸ்ஸபமஹாகப்பினஅனுருத்³த⁴த்தே²ரானங்.
176.Tejokasiṇaparikammaṃkatvāti ‘‘tejokasiṇaparikammajjhānaṃ samāpajjissāmī’’ti cittuppādo evettha tejokasiṇaparikammaṃ. Na hi buddhānaṃ aññesaṃ viya tattha jhānasamāpajjanena parikammapapañco atthi sabbattheva ciṇṇavasībhāvassa paramukkaṃsabhāvappattattā. Tassa kira brahmuno ‘‘yathāhaṃ evaṃ mahānubhāvo añño natthī’’ti laddhi, yaṃ sandhāya vuttaṃ – ‘‘natthi so samaṇo vā brāhmaṇo vā, yo idha āgaccheyyā’’ti. Bhagavā tassa taṃ laddhiṃ vissajjetuṃ tejodhātuṃ samāpajjitvā tassa upari ākāse nisīdi. Tena vuttaṃ ‘‘tejodhātuṃ…pe… tathāgataṃ disvā’’ti. Aṭṭhivedhaṃ viyaṃ vijjhitabbo aṭṭhivedhī, yathā aṭṭhiṃ vijjhitvā aṭṭhimiñjaṃ āhacca tiṭṭhati, evaṃ vijjhitabboti attho. Ayaṃ pana aṭṭhivedhī viya aṭṭhivedhī, yathā so laddhiṃ vissajjeti, evaṃ paṭipajjitabboti attho. Sesānanti mahākassapamahākappinaanuruddhattherānaṃ.
அஞ்ஞப்³ரஹ்மஸரீரவிமானாலங்காராதீ³னங் பபா⁴தி ப்³ரஹ்மானங் ஸரீரப்பபா⁴ விமானப்பபா⁴ அலங்காரவத்தா²தீ³னங் பபா⁴தி இமஸ்மிங் ப்³ரஹ்மலோகே இமா ஸப்³பா³ பபா⁴ அத்தனோ பப⁴ஸ்ஸரபா⁴வேன அபி⁴ப⁴வந்தங். நத்தி² மே ஸாதி இதா³னி மே ஸா தி³ட்டி² நத்தி², ‘‘நத்தி² ஸோ ஸமணோ வா ப்³ராஹ்மணோ வா, யோ இத⁴ ஆக³ச்செ²ய்யா’’தி அயங் லத்³தி⁴ நத்தி². தேனாஹ ‘‘தத்ராஸ்ஸ…பே॰… பஹீனா’’தி. எத்தா²தி ஏதஸ்மிங் ஸமாக³மே. யதா² தஸ்ஸ ப்³ரஹ்முனோ ஸப்³ப³ஸோ தி³ட்டி²க³தங் விமுச்சதி த⁴ம்மசக்கு² உப்பஜ்ஜதி, ஏவங் மஹந்தங் த⁴ம்மதே³ஸனங் தே³ஸேஸி.
Aññabrahmasarīravimānālaṅkārādīnaṃ pabhāti brahmānaṃ sarīrappabhā vimānappabhā alaṅkāravatthādīnaṃ pabhāti imasmiṃ brahmaloke imā sabbā pabhā attano pabhassarabhāvena abhibhavantaṃ. Natthi me sāti idāni me sā diṭṭhi natthi, ‘‘natthi so samaṇo vā brāhmaṇo vā, yo idha āgaccheyyā’’ti ayaṃ laddhi natthi. Tenāha ‘‘tatrāssa…pe… pahīnā’’ti. Etthāti etasmiṃ samāgame. Yathā tassa brahmuno sabbaso diṭṭhigataṃ vimuccati dhammacakkhu uppajjati, evaṃ mahantaṃ dhammadesanaṃ desesi.
‘‘அஜ்ஜாபி தே, ஆவுஸோ’’திஆதி³னா வுத்தேன தத்தகேனேவ. ஸரூபேன வுத்தாதி பட²மேன பாதே³ன சதஸ்ஸோ, து³தியேன ஏகந்தி ஏவங் பஞ்ச அபி⁴ஞ்ஞா ஸரூபேன வுத்தா. கஸ்மா எத்த² தி³ப்³ப³ஸோதங் நாக³தந்தி? ஆஹ ‘‘தாஸங் வஸேன ஆக³தமேவா’’தி. யேன இமா லோகுத்தரா அபி⁴ஞ்ஞா அதி⁴க³தா, ந தஸ்ஸ தி³ப்³ப³ஸோதஸம்பாத³னங் பா⁴ரியங் படிபக்க²விக³மேன ஸுகே²னேவ இஜ்ஜ²னதோ.
‘‘Ajjāpi te, āvuso’’tiādinā vuttena tattakeneva. Sarūpena vuttāti paṭhamena pādena catasso, dutiyena ekanti evaṃ pañca abhiññā sarūpena vuttā. Kasmā ettha dibbasotaṃ nāgatanti? Āha ‘‘tāsaṃ vasena āgatamevā’’ti. Yena imā lokuttarā abhiññā adhigatā, na tassa dibbasotasampādanaṃ bhāriyaṃ paṭipakkhavigamena sukheneva ijjhanato.
அஞ்ஞதரப்³ரஹ்மஸுத்தவண்ணனா நிட்டி²தா.
Aññatarabrahmasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. அஞ்ஞதரப்³ரஹ்மஸுத்தங் • 5. Aññatarabrahmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. அஞ்ஞதரப்³ரஹ்மஸுத்தவண்ணனா • 5. Aññatarabrahmasuttavaṇṇanā
