| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૨. અનોત્તપ્પીસુત્તવણ્ણના
2. Anottappīsuttavaṇṇanā
૧૪૫. તેન રહિતોતિ તેન સમ્માવાયામેન રહિતો. નિબ્ભયોતિ ભયરહિતો. કુસલાનુપ્પાદનમ્પિ હિ સાવજ્જમેવ અઞ્ઞાણાલસિયહેતુકત્તા. સમ્બુજ્ઝનત્થાયાતિ અરિયમગ્ગેહિ સમ્બુજ્ઝનાય. યોગેહિ ખેમં તેહિ અનુપદ્દુતત્તા.
145.Tena rahitoti tena sammāvāyāmena rahito. Nibbhayoti bhayarahito. Kusalānuppādanampi hi sāvajjameva aññāṇālasiyahetukattā. Sambujjhanatthāyāti ariyamaggehi sambujjhanāya. Yogehi khemaṃ tehi anupaddutattā.
મનુઞ્ઞવત્થુન્તિ મનોરમં લોભુપ્પત્તિકારણં. યથા વા તથા વાતિ સુભસુખાદિવસેન. તેતિ લોભાદયો. અનુપ્પન્નાતિ વેદિતબ્બા તથારૂપે વત્થારમ્મણે તથા અનુપ્પન્નપુબ્બત્તા. અઞ્ઞથાતિ વુત્તનયેનેવ વત્થારમ્મણેહિ અયોજેત્વા ગય્હમાને. વત્થુમ્હીતિ ઉપટ્ઠાકાદિચીવરાદિવત્થુમ્હિ. આરમ્મણેતિ મનાપિયાદિભેદે આરમ્મણે. તાદિસેન પચ્ચયેનાતિ અયોનિસોમનસિકારસતિવોસ્સગ્ગાદિપચ્ચયેન . ઇમેતિ વુત્તનયેન પચ્ચયલાભેન પચ્છા ઉપ્પજ્જમાના પાળિયં તથા વુત્તાતિ દટ્ઠબ્બં. એવં ઉપ્પજ્જમાનતાય નપ્પહીયન્તિ નામ. અનુપ્પાદો હિ પરમત્થતો પહાનં કથિતં, તસ્મા તત્થ કથિતનયેનેવ ગહેતબ્બન્તિ અધિપ્પાયો.
Manuññavatthunti manoramaṃ lobhuppattikāraṇaṃ. Yathā vā tathā vāti subhasukhādivasena. Teti lobhādayo. Anuppannāti veditabbā tathārūpe vatthārammaṇe tathā anuppannapubbattā. Aññathāti vuttanayeneva vatthārammaṇehi ayojetvā gayhamāne. Vatthumhīti upaṭṭhākādicīvarādivatthumhi. Ārammaṇeti manāpiyādibhede ārammaṇe. Tādisena paccayenāti ayonisomanasikārasativossaggādipaccayena . Imeti vuttanayena paccayalābhena pacchā uppajjamānā pāḷiyaṃ tathā vuttāti daṭṭhabbaṃ. Evaṃ uppajjamānatāya nappahīyanti nāma. Anuppādo hi paramatthato pahānaṃ kathitaṃ, tasmā tattha kathitanayeneva gahetabbanti adhippāyo.
અપ્પટિલદ્ધાતિ અનુપ્પત્તિયા. તેતિ યથાવુત્તસીલાદિઅનવજ્જધમ્મા. પટિલદ્ધાતિ અધિગતા. ‘‘સીલાદિધમ્મા’’તિ એત્થ યદિ મગ્ગફલાનિપિ ગહિતાનિ, અથ કસ્મા ‘‘પરિહાનિવસેના’’તિ વુત્તન્તિ આહ ‘‘એત્થ ચા’’તિઆદિ. ઇમસ્સ પન સમ્મપ્પધાનસ્સાતિ ચતુત્થસ્સ સમ્મપ્પધાનસ્સ વસેન. અયં દેસનાતિ ‘‘ઉપ્પન્ના મે કુસલા ધમ્મા નિરુજ્ઝમાના અનત્થાય સંવત્તેય્યુ’’ન્તિ અયં દેસના કતા. દુતિયમગ્ગો વા…પે॰… સંવત્તેય્યાતિ ઇદં આયતિં સત્તસુ અત્તભાવેસુ ઉપ્પજ્જમાનદુક્ખસઙ્ખાતઅનત્થુપ્પત્તિં સન્ધાય વુત્તં. ‘‘આતાપી ઓત્તપ્પી ભબ્બો સમ્બોધાયા’’તિઆદિવચનતો ‘‘ઇમે ચત્તારો સમ્મપ્પધાના પુબ્બભાગવિપસ્સનાવસેન કથિતા’’તિ વુત્તં.
Appaṭiladdhāti anuppattiyā. Teti yathāvuttasīlādianavajjadhammā. Paṭiladdhāti adhigatā. ‘‘Sīlādidhammā’’ti ettha yadi maggaphalānipi gahitāni, atha kasmā ‘‘parihānivasenā’’ti vuttanti āha ‘‘ettha cā’’tiādi. Imassa pana sammappadhānassāti catutthassa sammappadhānassa vasena. Ayaṃ desanāti ‘‘uppannā me kusalā dhammā nirujjhamānā anatthāya saṃvatteyyu’’nti ayaṃ desanā katā. Dutiyamaggo vā…pe… saṃvatteyyāti idaṃ āyatiṃ sattasu attabhāvesu uppajjamānadukkhasaṅkhātaanatthuppattiṃ sandhāya vuttaṃ. ‘‘Ātāpī ottappī bhabbo sambodhāyā’’tiādivacanato ‘‘ime cattāro sammappadhānā pubbabhāgavipassanāvasena kathitā’’ti vuttaṃ.
અનોત્તપ્પીસુત્તવણ્ણના નિટ્ઠિતા.
Anottappīsuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૨. અનોત્તપ્પીસુત્તં • 2. Anottappīsuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૨. અનોત્તપ્પીસુત્તવણ્ણના • 2. Anottappīsuttavaṇṇanā
