| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. அனுமானஸுத்தவண்ணனா
5. Anumānasuttavaṇṇanā
181. ஏவங் மே ஸுதந்தி அனுமானஸுத்தங். தத்த² ப⁴க்³கே³ஸூதி ஏவங்னாமகே ஜனபதே³, வசனத்தோ² பனெத்த² வுத்தானுஸாரேனேவ வேதி³தப்³போ³. ஸுஸுமாரகி³ரேதி ஏவங்னாமகே நக³ரே. தஸ்ஸ கிர நக³ரஸ்ஸ வத்து²பரிக்³க³ஹதி³வஸே அவிதூ³ரே உத³கரஹதே³ ஸுங்ஸுமாரோ ஸத்³த³மகாஸி, கி³ரங் நிச்சா²ரேஸி. அத² நக³ரே நிட்டி²தே ஸுங்ஸுமாரகி³ரங் த்வேவஸ்ஸ நாமங் அகங்ஸு. பே⁴ஸகளாவனேதி பே⁴ஸகளானாமகே வனே. ‘‘பே⁴ஸக³ளாவனே’’திபி பாடோ². மிக³தா³யேதி தங் வனங் மிக³பக்கீ²னங் அப⁴யதி³ன்னட்டா²னே ஜாதங், தஸ்மா மிக³தா³யோதி வுச்சதி.
181.Evaṃme sutanti anumānasuttaṃ. Tattha bhaggesūti evaṃnāmake janapade, vacanattho panettha vuttānusāreneva veditabbo. Susumāragireti evaṃnāmake nagare. Tassa kira nagarassa vatthupariggahadivase avidūre udakarahade suṃsumāro saddamakāsi, giraṃ nicchāresi. Atha nagare niṭṭhite suṃsumāragiraṃ tvevassa nāmaṃ akaṃsu. Bhesakaḷāvaneti bhesakaḷānāmake vane. ‘‘Bhesagaḷāvane’’tipi pāṭho. Migadāyeti taṃ vanaṃ migapakkhīnaṃ abhayadinnaṭṭhāne jātaṃ, tasmā migadāyoti vuccati.
பவாரேதீதி இச்சா²பேதி. வத³ந்தூதி ஓவாதா³னுஸாஸனிவஸேன வத³ந்து, அனுஸாஸந்தூதி அத்தோ². வசனீயொம்ஹீதி அஹங் தும்ஹேஹி வத்தப்³போ³, அனுஸாஸிதப்³போ³ ஓவதி³தப்³போ³தி அத்தோ². ஸோ ச ஹோதி து³ப்³ப³சோதி ஸோ ச து³க்கே²ன வத்தப்³போ³ ஹோதி, வுத்தோ ந ஸஹதி. தோ³வசஸ்ஸகரணேஹீதி து³ப்³ப³சபா⁴வகாரகேஹி உபரி ஆக³தேஹி ஸோளஸஹி த⁴ம்மேஹி. அப்பத³க்கி²ணக்³கா³ஹீ அனுஸாஸனிந்தி யோ ஹி வுச்சமானோ தும்ஹே மங் கஸ்மா வத³த², அஹங் அத்தனோ கப்பியாகப்பியங் ஸாவஜ்ஜானவஜ்ஜங் அத்தா²னத்த²ங் ஜானாமீதி வத³தி. அயங் அனுஸாஸனிங் பத³க்கி²ணதோ ந க³ண்ஹாதி, வாமதோ க³ண்ஹாதி, தஸ்மா அப்பத³க்கி²ணக்³கா³ஹீதி வுச்சதி.
Pavāretīti icchāpeti. Vadantūti ovādānusāsanivasena vadantu, anusāsantūti attho. Vacanīyomhīti ahaṃ tumhehi vattabbo, anusāsitabbo ovaditabboti attho. So ca hoti dubbacoti so ca dukkhena vattabbo hoti, vutto na sahati. Dovacassakaraṇehīti dubbacabhāvakārakehi upari āgatehi soḷasahi dhammehi. Appadakkhiṇaggāhī anusāsaninti yo hi vuccamāno tumhe maṃ kasmā vadatha, ahaṃ attano kappiyākappiyaṃ sāvajjānavajjaṃ atthānatthaṃ jānāmīti vadati. Ayaṃ anusāsaniṃ padakkhiṇato na gaṇhāti, vāmato gaṇhāti, tasmā appadakkhiṇaggāhīti vuccati.
பாபிகானங் இச்சா²னந்தி லாமகானங் அஸந்தஸம்ப⁴வனபத்த²னானங். படிப்ப²ரதீதி படிவிருத்³தோ⁴, பச்சனீகோ ஹுத்வா திட்ட²தி, அபஸாதே³தீதி கிங் நு கோ² துய்ஹங் பா³லஸ்ஸ அப்³யத்தஸ்ஸ ப⁴ணிதேன, த்வம்பி நாம ப⁴ணிதப்³ப³ங் மஞ்ஞிஸ்ஸஸீதி ஏவங் க⁴ட்டேதி. பச்சாரோபேதீதி, த்வம்பி கோ²ஸி இத்த²ன்னாமங் ஆபத்திங் ஆபன்னோ, தங் தாவ படிகரோஹீதி ஏவங் படிஆரோபேதி.
Pāpikānaṃ icchānanti lāmakānaṃ asantasambhavanapatthanānaṃ. Paṭippharatīti paṭiviruddho, paccanīko hutvā tiṭṭhati, apasādetīti kiṃ nu kho tuyhaṃ bālassa abyattassa bhaṇitena, tvampi nāma bhaṇitabbaṃ maññissasīti evaṃ ghaṭṭeti. Paccāropetīti, tvampi khosi itthannāmaṃ āpattiṃ āpanno, taṃ tāva paṭikarohīti evaṃ paṭiāropeti.
அஞ்ஞேனஞ்ஞங் படிசரதீதி அஞ்ஞேன காரணேன வசனேன வா அஞ்ஞங் காரணங் வசனங் வா படிச்சா²தே³தி. ‘‘ஆபத்திங் ஆபன்னோஸீ’’தி வுத்தே ‘‘கோ ஆபன்னோ, கிங் ஆபன்னோ, கிஸ்மிங் ஆபன்னோ, கங் ப⁴ணத², கிங் ப⁴ணதா²’’தி வா வத³தி. ‘‘ஏவரூபங் கிஞ்சி தயா தி³ட்ட²’’ந்தி வுத்தே ‘‘ந ஸுணாமீ’’தி ஸோதங் வா உபனேதி. ப³ஹித்³தா⁴ கத²ங் அபனாமேதீதி ‘‘இத்த²ன்னாமங் ஆபத்திங் ஆபன்னோஸீ’’தி புட்டோ² ‘‘பாடலிபுத்தங் க³தொம்ஹீ’’தி வத்வா புன ‘‘ந தவ பாடலிபுத்தக³மனங் புச்சா²ம, ஆபத்திங் புச்சா²மா’’தி வுத்தே ‘‘ததோ ராஜகே³ஹங் க³தொம்ஹீ’’தி, ராஜகே³ஹங் வா யாஹி ப்³ராஹ்மணகே³ஹங் வா, ஆபத்திங் ஆபன்னோஸீதி. தத்த² மே ஸூகரமங்ஸங் லத்³த⁴ந்திஆதீ³னி வத³ந்தோ கத²ங் ப³ஹித்³தா⁴ விக்கி²பதி.
Aññenaññaṃ paṭicaratīti aññena kāraṇena vacanena vā aññaṃ kāraṇaṃ vacanaṃ vā paṭicchādeti. ‘‘Āpattiṃ āpannosī’’ti vutte ‘‘ko āpanno, kiṃ āpanno, kismiṃ āpanno, kaṃ bhaṇatha, kiṃ bhaṇathā’’ti vā vadati. ‘‘Evarūpaṃ kiñci tayā diṭṭha’’nti vutte ‘‘na suṇāmī’’ti sotaṃ vā upaneti. Bahiddhā kathaṃ apanāmetīti ‘‘itthannāmaṃ āpattiṃ āpannosī’’ti puṭṭho ‘‘pāṭaliputtaṃ gatomhī’’ti vatvā puna ‘‘na tava pāṭaliputtagamanaṃ pucchāma, āpattiṃ pucchāmā’’ti vutte ‘‘tato rājagehaṃ gatomhī’’ti, rājagehaṃ vā yāhi brāhmaṇagehaṃ vā, āpattiṃ āpannosīti. Tattha me sūkaramaṃsaṃ laddhantiādīni vadanto kathaṃ bahiddhā vikkhipati.
அபதா³னேதி அத்தனோ சரியாய. ந ஸம்பாயதீதி, ஆவுஸோ, த்வங் குஹிங் வஸஸி, கங் நிஸ்ஸாய வஸஸீதி வா, யங் த்வங் வதே³ஸி ‘‘மயா ஏஸ ஆபத்திங் ஆபஜ்ஜன்னோ தி³ட்டோ²’’தி. த்வங் தஸ்மிங் ஸமயே கிங் கரோஸி, அயங் கிங் கரோதி, கத்த² வா த்வங் அச்ச²ஸி கத்த² வா அயந்திஆதி³னா நயேன சரியங் புட்டோ² ஸம்பாதெ³த்வா கதே²துங் ந ஸக்கோதி.
Apadāneti attano cariyāya. Na sampāyatīti, āvuso, tvaṃ kuhiṃ vasasi, kaṃ nissāya vasasīti vā, yaṃ tvaṃ vadesi ‘‘mayā esa āpattiṃ āpajjanno diṭṭho’’ti. Tvaṃ tasmiṃ samaye kiṃ karosi, ayaṃ kiṃ karoti, kattha vā tvaṃ acchasi kattha vā ayantiādinā nayena cariyaṃ puṭṭho sampādetvā kathetuṃ na sakkoti.
183. தத்ராவுஸோதி , ஆவுஸோ, தேஸு ஸோளஸஸு த⁴ம்மேஸு. அத்தனாவ அத்தானங் ஏவங் அனுமினிதப்³ப³ந்தி ஏவங் அத்தனாவ அத்தா அனுமேதப்³போ³ துலேதப்³போ³ தீரேதப்³போ³.
183.Tatrāvusoti , āvuso, tesu soḷasasu dhammesu. Attanāva attānaṃ evaṃ anuminitabbanti evaṃ attanāva attā anumetabbo tuletabbo tīretabbo.
184. பச்சவெக்கி²தப்³ப³ந்தி பச்சவெக்கி²தப்³போ³. அஹோரத்தானுஸிக்கி²னாதி தி³வாபி ரத்திம்பி ஸிக்க²ந்தேன, ரதிஞ்ச தி³வா ச குஸலேஸு த⁴ம்மேஸு ஸிக்க²ந்தேன பீதிபாமோஜ்ஜமேவ உப்பாதே³தப்³ப³ந்தி அத்தோ².
184.Paccavekkhitabbanti paccavekkhitabbo. Ahorattānusikkhināti divāpi rattimpi sikkhantena, ratiñca divā ca kusalesu dhammesu sikkhantena pītipāmojjameva uppādetabbanti attho.
அச்சே² வா உத³கபத்தேதி பஸன்னே வா உத³கபா⁴ஜனே. முக²னிமித்தந்தி முக²படிபி³ம்ப³ங். ரஜந்தி ஆக³ந்துகரஜங். அங்க³ணந்தி தத்த² ஜாதகங் திலகங் வா பிளகங் வா. ஸப்³பே³பிமே பாபகே அகுஸலே த⁴ம்மே பஹீனேதி இமினா ஸப்³ப³ப்பஹானங் கதே²ஸி. கத²ங்? எத்தகா அகுஸலா த⁴ம்மா பப்³ப³ஜிதஸ்ஸ நானுச்ச²விகாதி படிஸங்கா²னங் உப்பாத³யதோ ஹி படிஸங்கா²னப்பஹானங்கதி²தங் ஹோதி. ஸீலங் பத³ட்டா²னங் கத்வா கஸிணபரிகம்மங் ஆரபி⁴த்வா அட்ட² ஸமாபத்தியோ நிப்³ப³த்தெந்தஸ்ஸ விக்க²ம்ப⁴னப்பஹானங் கதி²தங். ஸமாபத்திங் பத³ட்டா²னங் கத்வா விபஸ்ஸனங் வட்³டெ⁴ந்தஸ்ஸ தத³ங்க³ப்பஹானங் கதி²தங். விபஸ்ஸனங் வட்³டெ⁴த்வா மக்³க³ங் பா⁴வெந்தஸ்ஸ ஸமுச்சே²த³ப்பஹானங் கதி²தங். ப²லே ஆக³தே படிப்பஸ்ஸத்³தி⁴ப்பஹானங், நிப்³பா³னே ஆக³தே நிஸ்ஸரணப்பஹானந்தி ஏவங் இமஸ்மிங் ஸுத்தே ஸப்³ப³ப்பஹானங் கதி²தங்வ ஹோதி.
Acche vā udakapatteti pasanne vā udakabhājane. Mukhanimittanti mukhapaṭibimbaṃ. Rajanti āgantukarajaṃ. Aṅgaṇanti tattha jātakaṃ tilakaṃ vā piḷakaṃ vā. Sabbepime pāpake akusale dhamme pahīneti iminā sabbappahānaṃ kathesi. Kathaṃ? Ettakā akusalā dhammā pabbajitassa nānucchavikāti paṭisaṅkhānaṃ uppādayato hi paṭisaṅkhānappahānaṃkathitaṃ hoti. Sīlaṃ padaṭṭhānaṃ katvā kasiṇaparikammaṃ ārabhitvā aṭṭha samāpattiyo nibbattentassa vikkhambhanappahānaṃ kathitaṃ. Samāpattiṃ padaṭṭhānaṃ katvā vipassanaṃ vaḍḍhentassa tadaṅgappahānaṃ kathitaṃ. Vipassanaṃ vaḍḍhetvā maggaṃ bhāventassa samucchedappahānaṃ kathitaṃ. Phale āgate paṭippassaddhippahānaṃ, nibbāne āgate nissaraṇappahānanti evaṃ imasmiṃ sutte sabbappahānaṃ kathitaṃva hoti.
இத³ஞ்ஹி ஸுத்தங் பி⁴க்கு²பாதிமொக்க²ங் நாமாதி போராணா வத³ந்தி. இத³ங் தி³வஸஸ்ஸ திக்க²த்துங் பச்சவெக்கி²தப்³ப³ங். பாதோ ஏவ வஸனட்டா²னங் பவிஸித்வா நிஸின்னேன ‘‘இமே எத்தகா கிலேஸா அத்தி² நு கோ² மய்ஹங் நத்தீ²’’தி பச்சவெக்கி²தப்³பா³. ஸசே அத்தீ²தி பஸ்ஸதி, தேஸங் பஹானாய வாயமிதப்³ப³ங். நோ சே பஸ்ஸதி, ஸுபப்³ப³ஜிதொஸ்மீதி அத்தமனேன ப⁴விதப்³ப³ங். ப⁴த்தகிச்சங் கத்வா ரத்திட்டா²னே வா தி³வாட்டா²னே வா நிஸீதி³த்வாபி பச்சவெக்கி²தப்³ப³ங். ஸாயங் வஸனட்டா²னே நிஸீதி³த்வாபி பச்சவெக்கி²தப்³ப³ங். திக்க²த்துங் அஸக்கொந்தேன த்³வே வாரே பச்சவெக்கி²தப்³ப³ங். த்³வே வாரே அஸக்கொந்தேன பன அவஸ்ஸங் ஏகவாரங் பச்சவெக்கி²தப்³ப³ங், அப்பச்சவெக்கி²துங் ந வட்டதீதி வத³ந்தி. ஸேஸங் ஸப்³ப³த்த² உத்தானத்த²மேவாதி.
Idañhi suttaṃ bhikkhupātimokkhaṃ nāmāti porāṇā vadanti. Idaṃ divasassa tikkhattuṃ paccavekkhitabbaṃ. Pāto eva vasanaṭṭhānaṃ pavisitvā nisinnena ‘‘ime ettakā kilesā atthi nu kho mayhaṃ natthī’’ti paccavekkhitabbā. Sace atthīti passati, tesaṃ pahānāya vāyamitabbaṃ. No ce passati, supabbajitosmīti attamanena bhavitabbaṃ. Bhattakiccaṃ katvā rattiṭṭhāne vā divāṭṭhāne vā nisīditvāpi paccavekkhitabbaṃ. Sāyaṃ vasanaṭṭhāne nisīditvāpi paccavekkhitabbaṃ. Tikkhattuṃ asakkontena dve vāre paccavekkhitabbaṃ. Dve vāre asakkontena pana avassaṃ ekavāraṃ paccavekkhitabbaṃ, appaccavekkhituṃ na vaṭṭatīti vadanti. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அனுமானஸுத்தவண்ணனா நிட்டி²தா.
Anumānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. அனுமானஸுத்தங் • 5. Anumānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. அனுமானஸுத்தவண்ணனா • 5. Anumānasuttavaṇṇanā
