| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
2. அனுபத³வக்³கோ³
2. Anupadavaggo
1. அனுபத³ஸுத்தவண்ணனா
1. Anupadasuttavaṇṇanā
93. ஏவங் மே ஸுதந்தி அனுபத³ஸுத்தங். தத்த² ஏதத³வோசாதி ஏதங் (படி॰ ம॰ 3.4) ‘‘பண்டி³தோ’’திஆதி³னா நயேன த⁴ம்மஸேனாபதிஸாரிபுத்தத்தே²ரஸ்ஸ கு³ணகத²ங் அவோச. கஸ்மா? அவஸேஸத்தே²ரேஸு ஹி மஹாமொக்³க³ல்லானத்தே²ரஸ்ஸ இத்³தி⁴மாதி கு³ணோ பாகடோ, மஹாகஸ்ஸபஸ்ஸ து⁴தவாதோ³தி, அனுருத்³த⁴த்தே²ரஸ்ஸ தி³ப்³ப³சக்கு²கோதி, உபாலித்தே²ரஸ்ஸ வினயத⁴ரோதி, ரேவதத்தே²ரஸ்ஸ ஜா²யீ ஜா²னாபி⁴ரதோதி, ஆனந்த³த்தே²ரஸ்ஸ ப³ஹுஸ்ஸுதோதி. ஏவங் தேஸங் தேஸங் தே²ரானங் தே தே கு³ணா பாகடா, ஸாரிபுத்தத்தே²ரஸ்ஸ பன அபாகடா. கஸ்மா? பஞ்ஞவதோ ஹி கு³ணா ந ஸக்கா அகதி²தா ஜானிதுங். இதி ப⁴க³வா ‘‘ஸாரிபுத்தஸ்ஸ கு³ணே கதெ²ஸ்ஸாமீ’’தி ஸபா⁴க³பரிஸாய ஸன்னிபாதங் ஆக³மேஸி. விஸபா⁴க³புக்³க³லானஞ்ஹி ஸந்திகே வண்ணங் கதே²துங் ந வட்டதி, தே வண்ணே கதி²யமானே அவண்ணமேவ கதெ²ந்தி. இமஸ்மிங் பன தி³வஸே தே²ரஸ்ஸ ஸபா⁴க³பரிஸா ஸன்னிபதி, தஸ்ஸா ஸன்னிபதிதபா⁴வங் தி³ஸ்வா ஸத்தா² வண்ணங் கதெ²ந்தோ இமங் தே³ஸனங் ஆரபி⁴.
93.Evaṃme sutanti anupadasuttaṃ. Tattha etadavocāti etaṃ (paṭi. ma. 3.4) ‘‘paṇḍito’’tiādinā nayena dhammasenāpatisāriputtattherassa guṇakathaṃ avoca. Kasmā? Avasesattheresu hi mahāmoggallānattherassa iddhimāti guṇo pākaṭo, mahākassapassa dhutavādoti, anuruddhattherassa dibbacakkhukoti, upālittherassa vinayadharoti, revatattherassa jhāyī jhānābhiratoti, ānandattherassa bahussutoti. Evaṃ tesaṃ tesaṃ therānaṃ te te guṇā pākaṭā, sāriputtattherassa pana apākaṭā. Kasmā? Paññavato hi guṇā na sakkā akathitā jānituṃ. Iti bhagavā ‘‘sāriputtassa guṇe kathessāmī’’ti sabhāgaparisāya sannipātaṃ āgamesi. Visabhāgapuggalānañhi santike vaṇṇaṃ kathetuṃ na vaṭṭati, te vaṇṇe kathiyamāne avaṇṇameva kathenti. Imasmiṃ pana divase therassa sabhāgaparisā sannipati, tassā sannipatitabhāvaṃ disvā satthā vaṇṇaṃ kathento imaṃ desanaṃ ārabhi.
தத்த² பண்டி³தோதி தா⁴துகுஸலதா ஆயதனகுஸலதா படிச்சஸமுப்பாத³குஸலதா டா²னாட்டா²னகுஸலதாதி இமேஹி சதூஹி காரணேஹி பண்டி³தோ. மஹாபஞ்ஞோதிஆதீ³ஸு மஹாபஞ்ஞாதீ³ஹி ஸமன்னாக³தோதி அத்தோ².
Tattha paṇḍitoti dhātukusalatā āyatanakusalatā paṭiccasamuppādakusalatā ṭhānāṭṭhānakusalatāti imehi catūhi kāraṇehi paṇḍito. Mahāpaññotiādīsu mahāpaññādīhi samannāgatoti attho.
தத்ரித³ங் மஹாபஞ்ஞாதீ³னங் நானத்தங் – தத்த² கதமா மஹாபஞ்ஞா? மஹந்தே ஸீலக்க²ந்தே⁴ பரிக்³க³ண்ஹாதீதி மஹாபஞ்ஞா, மஹந்தே ஸமாதி⁴க்க²ந்தே⁴, பஞ்ஞாக்க²ந்தே⁴, விமுத்திக்க²ந்தே⁴, விமுத்திஞாணத³ஸ்ஸனக்க²ந்தே⁴ பரிக்³க³ண்ஹாதீதி மஹாபஞ்ஞா, மஹந்தானி டா²னாட்டா²னானி, மஹந்தா விஹாரஸமாபத்தியோ , மஹந்தானி அரியஸச்சானி, மஹந்தே ஸதிபட்டா²னே, ஸம்மப்பதா⁴னே, இத்³தி⁴பாதே³, மஹந்தானி இந்த்³ரியானி, ப³லானி, பொ³ஜ்ஜ²ங்கா³னி, மஹந்தே அரியமக்³கே³, மஹந்தானி ஸாமஞ்ஞப²லானி, மஹந்தா அபி⁴ஞ்ஞாயோ, மஹந்தங் பரமத்த²ங் நிப்³பா³னங் பரிக்³க³ண்ஹாதீதி மஹாபஞ்ஞா.
Tatridaṃ mahāpaññādīnaṃ nānattaṃ – tattha katamā mahāpaññā? Mahante sīlakkhandhe pariggaṇhātīti mahāpaññā, mahante samādhikkhandhe, paññākkhandhe, vimuttikkhandhe, vimuttiñāṇadassanakkhandhe pariggaṇhātīti mahāpaññā, mahantāni ṭhānāṭṭhānāni, mahantā vihārasamāpattiyo , mahantāni ariyasaccāni, mahante satipaṭṭhāne, sammappadhāne, iddhipāde, mahantāni indriyāni, balāni, bojjhaṅgāni, mahante ariyamagge, mahantāni sāmaññaphalāni, mahantā abhiññāyo, mahantaṃ paramatthaṃ nibbānaṃ pariggaṇhātīti mahāpaññā.
கதமா புது²பஞ்ஞா, புது² நானாக²ந்தே⁴ஸு ஞாணங் பவத்ததீதி புது²பஞ்ஞா. புது² நானாதா⁴தூஸு, புது² நானாஆயதனேஸு, புது² நானாஅத்தே²ஸு, புது² நானாபடிச்சஸமுப்பாதே³ஸு, புது² நானாஸுஞ்ஞதமனுபலப்³பே⁴ஸு, புது² நானாஅத்தே²ஸு, த⁴ம்மேஸு, நிருத்தீஸு, படிபா⁴னேஸு, புது² நானாஸீலக்க²ந்தே⁴ஸு, புது² நானாஸமாதி⁴-பஞ்ஞா-விமுத்தி-விமுத்திஞாணத³ஸ்ஸனக்க²ந்தே⁴ஸு, புது² நானாடா²னாட்டா²னேஸு, புது² நானாவிஹாரஸமாபத்தீஸு, புது² நானாஅரியஸச்சேஸு, புது² நானாஸதிபட்டா²னேஸு, ஸம்மப்பதா⁴னேஸு, இத்³தி⁴பாதே³ஸு, இந்த்³ரியேஸு, ப³லேஸு, பொ³ஜ்ஜ²ங்கே³ஸு, புது² நானாஅரியமக்³கே³ஸு, ஸாமஞ்ஞப²லேஸு, அபி⁴ஞ்ஞாஸு, புது² நானாஜனஸாதா⁴ரணே த⁴ம்மே ஸமதிக்கம்ம பரமத்தே² நிப்³பா³னே ஞாணங் பவத்ததீதி புது²பஞ்ஞா.
Katamā puthupaññā, puthu nānākhandhesu ñāṇaṃ pavattatīti puthupaññā. Puthu nānādhātūsu, puthu nānāāyatanesu, puthu nānāatthesu, puthu nānāpaṭiccasamuppādesu, puthu nānāsuññatamanupalabbhesu, puthu nānāatthesu, dhammesu, niruttīsu, paṭibhānesu, puthu nānāsīlakkhandhesu, puthu nānāsamādhi-paññā-vimutti-vimuttiñāṇadassanakkhandhesu, puthu nānāṭhānāṭṭhānesu, puthu nānāvihārasamāpattīsu, puthu nānāariyasaccesu, puthu nānāsatipaṭṭhānesu, sammappadhānesu, iddhipādesu, indriyesu, balesu, bojjhaṅgesu, puthu nānāariyamaggesu, sāmaññaphalesu, abhiññāsu, puthu nānājanasādhāraṇe dhamme samatikkamma paramatthe nibbāne ñāṇaṃ pavattatīti puthupaññā.
கதமா ஹாஸபஞ்ஞா, இதே⁴கச்சோ ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ ஸீலங் பரிபூரேதி, இந்த்³ரியஸங்வரங் பரிபூரேதி, போ⁴ஜனே மத்தஞ்ஞுதங், ஜாக³ரியானுயோக³ங், ஸீலக்க²ந்த⁴ங், ஸமாதி⁴க்க²ந்த⁴ங், பஞ்ஞாக்க²ந்த⁴ங், விமுத்திக்க²ந்த⁴ங், விமுத்திஞாணத³ஸ்ஸனக்க²ந்த⁴ங் பரிபூரேதீதி ஹாஸபஞ்ஞா. ஹாஸப³ஹுலோ பாமோஜ்ஜப³ஹுலோ டா²னாட்டா²னங் படிவிஜ்ஜ²தி, ஹாஸப³ஹுலோ விஹாரஸமாபத்தியோ பரிபூரேதீதி ஹாஸபஞ்ஞா, ஹாஸப³ஹுலோ அரியஸச்சானி படிவிஜ்ஜ²தி. ஸதிபட்டா²னே, ஸம்மப்பதா⁴னே, இத்³தி⁴பாதே³, இந்த்³ரியானி, ப³லானி, பொ³ஜ்ஜ²ங்கா³னி, அரியமக்³க³ங் பா⁴வேதீதி ஹாஸபஞ்ஞா, ஹாஸப³ஹுலோ ஸாமஞ்ஞப²லானி ஸச்சி²கரோதி, அபி⁴ஞ்ஞாயோ படிவிஜ்ஜ²தீதி ஹாஸபஞ்ஞா, ஹாஸப³ஹுலோ வேத³துட்டி²பாமோஜ்ஜப³ஹுலோ பரமத்த²ங் நிப்³பா³னங் ஸச்சி²கரோதீதி ஹாஸபஞ்ஞா.
Katamā hāsapaññā, idhekacco hāsabahulo vedabahulo tuṭṭhibahulo pāmojjabahulo sīlaṃ paripūreti, indriyasaṃvaraṃ paripūreti, bhojane mattaññutaṃ, jāgariyānuyogaṃ, sīlakkhandhaṃ, samādhikkhandhaṃ, paññākkhandhaṃ, vimuttikkhandhaṃ, vimuttiñāṇadassanakkhandhaṃ paripūretīti hāsapaññā. Hāsabahulo pāmojjabahulo ṭhānāṭṭhānaṃ paṭivijjhati, hāsabahulo vihārasamāpattiyo paripūretīti hāsapaññā, hāsabahulo ariyasaccāni paṭivijjhati. Satipaṭṭhāne, sammappadhāne, iddhipāde, indriyāni, balāni, bojjhaṅgāni, ariyamaggaṃ bhāvetīti hāsapaññā, hāsabahulo sāmaññaphalāni sacchikaroti, abhiññāyo paṭivijjhatīti hāsapaññā, hāsabahulo vedatuṭṭhipāmojjabahulo paramatthaṃ nibbānaṃ sacchikarotīti hāsapaññā.
கதமா ஜவனபஞ்ஞா, யங்கிஞ்சி ரூபங் அதீதானாக³தபச்சுப்பன்னங்…பே॰… யங் தூ³ரே ஸந்திகே வா, ஸப்³ப³ங் ரூபங் அனிச்சதோ கி²ப்பங் ஜவதீதி ஜவனபஞ்ஞா. து³க்க²தோ கி²ப்பங்… அனத்ததோ கி²ப்பங் ஜவதீதி ஜவனபஞ்ஞா. யா காசி வேத³னா…பே॰… யங்கிஞ்சி விஞ்ஞாணங் அதீதானாக³தபச்சுப்பன்னங்…பே॰… ஸப்³ப³ங் விஞ்ஞாணங் அனிச்சதோ து³க்க²தோ அனத்ததோ கி²ப்பங் ஜவதீதி ஜவனபஞ்ஞா. சக்கு²…பே॰… ஜராமரணங் அதீதானாக³தபச்சுப்பன்னங் அனிச்சதோ து³க்க²தோ அனத்ததோ கி²ப்பங் ஜவதீதி ஜவனபஞ்ஞா. ரூபங் அதீதானாக³தபச்சுப்பன்னங் அனிச்சங் க²யட்டே²ன, து³க்க²ங் ப⁴யட்டே²ன, அனத்தா அஸாரகட்டே²னாதி துலயித்வா தீரயித்வா விபா⁴வயித்வா விபூ⁴தங் கத்வா ரூபனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா. வேத³னா, ஸஞ்ஞா, ஸங்கா²ரா, விஞ்ஞாணங் , சக்கு²…பே॰… ஜராமரணங் அதீதானாக³தபச்சுப்பன்னங் அனிச்சங் க²யட்டே²ன…பே॰… விபூ⁴தங் கத்வா ஜராமரணனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா. ரூபங் அதீதானாக³தபச்சுப்பன்னங்…பே॰… விஞ்ஞாணங். சக்கு²…பே॰… ஜராமரணங் அதீதானாக³தபச்சுப்பன்னங் அனிச்சங் ஸங்க²தங் படிச்சஸமுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி துலயித்வா தீரயித்வா விபா⁴வயித்வா விபூ⁴தங் கத்வா ஜராமரணனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா.
Katamā javanapaññā, yaṃkiñci rūpaṃ atītānāgatapaccuppannaṃ…pe… yaṃ dūre santike vā, sabbaṃ rūpaṃ aniccato khippaṃ javatīti javanapaññā. Dukkhato khippaṃ… anattato khippaṃ javatīti javanapaññā. Yā kāci vedanā…pe… yaṃkiñci viññāṇaṃ atītānāgatapaccuppannaṃ…pe… sabbaṃ viññāṇaṃ aniccato dukkhato anattato khippaṃ javatīti javanapaññā. Cakkhu…pe… jarāmaraṇaṃ atītānāgatapaccuppannaṃ aniccato dukkhato anattato khippaṃ javatīti javanapaññā. Rūpaṃ atītānāgatapaccuppannaṃ aniccaṃ khayaṭṭhena, dukkhaṃ bhayaṭṭhena, anattā asārakaṭṭhenāti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti javanapaññā. Vedanā, saññā, saṅkhārā, viññāṇaṃ , cakkhu…pe… jarāmaraṇaṃ atītānāgatapaccuppannaṃ aniccaṃ khayaṭṭhena…pe… vibhūtaṃ katvā jarāmaraṇanirodhe nibbāne khippaṃ javatīti javanapaññā. Rūpaṃ atītānāgatapaccuppannaṃ…pe… viññāṇaṃ. Cakkhu…pe… jarāmaraṇaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā jarāmaraṇanirodhe nibbāne khippaṃ javatīti javanapaññā.
கதமா திக்க²பஞ்ஞா, கி²ப்பங் கிலேஸே சி²ந்த³தீதி திக்க²பஞ்ஞா. உப்பன்னங் காமவிதக்கங் நாதி⁴வாஸேதி, உப்பன்னங் ப்³யாபாத³விதக்கங், உப்பன்னங் விஹிங்ஸாவிதக்கங், உப்பன்னுப்பன்னே பாபகே அகுஸலே த⁴ம்மே, உப்பன்னங் ராக³ங், தோ³ஸங், மோஹங், கோத⁴ங், உபனாஹங், மக்க²ங், பளாஸங், இஸ்ஸங், மச்ச²ரியங், மாயங், ஸாடெ²ய்யங், த²ம்ப⁴ங், ஸாரம்ப⁴ங், மானங், அதிமானங், மத³ங், பமாத³ங், ஸப்³பே³ கிலேஸே, ஸப்³பே³ து³ச்சரிதே, ஸப்³பே³ அபி⁴ஸங்கா²ரே, ஸப்³பே³ ப⁴வகா³மிகம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வங் க³மேதீதி திக்க²பஞ்ஞா. ஏகஸ்மிங் ஆஸனே சத்தாரோ அரியமக்³கா³, சத்தாரி ஸாமஞ்ஞப²லானி, சதஸ்ஸோ படிஸம்பி⁴தா³யோ, ச² ச அபி⁴ஞ்ஞாயோ அதி⁴க³தா ஹொந்தி ஸச்சி²கதா பஸ்ஸிதா பஞ்ஞாயாதி திக்க²பஞ்ஞா.
Katamā tikkhapaññā, khippaṃ kilese chindatīti tikkhapaññā. Uppannaṃ kāmavitakkaṃ nādhivāseti, uppannaṃ byāpādavitakkaṃ, uppannaṃ vihiṃsāvitakkaṃ, uppannuppanne pāpake akusale dhamme, uppannaṃ rāgaṃ, dosaṃ, mohaṃ, kodhaṃ, upanāhaṃ, makkhaṃ, paḷāsaṃ, issaṃ, macchariyaṃ, māyaṃ, sāṭheyyaṃ, thambhaṃ, sārambhaṃ, mānaṃ, atimānaṃ, madaṃ, pamādaṃ, sabbe kilese, sabbe duccarite, sabbe abhisaṅkhāre, sabbe bhavagāmikamme nādhivāseti pajahati vinodeti byantīkaroti anabhāvaṃ gametīti tikkhapaññā. Ekasmiṃ āsane cattāro ariyamaggā, cattāri sāmaññaphalāni, catasso paṭisambhidāyo, cha ca abhiññāyo adhigatā honti sacchikatā passitā paññāyāti tikkhapaññā.
கதமா நிப்³பே³தி⁴கபஞ்ஞா, இதே⁴கச்சோ ஸப்³ப³ஸங்கா²ரேஸு உப்³பே³க³ப³ஹுலோ ஹோதி உத்தாஸப³ஹுலோ உக்கண்ட²னப³ஹுலோ அரதிப³ஹுலோ அனபி⁴ரதிப³ஹுலோ ப³ஹிமுகோ² ந ரமதி ஸப்³ப³ஸங்கா²ரேஸு, அனிப்³பி³த்³த⁴புப்³ப³ங் அப்பதா³லிதபுப்³ப³ங் லோப⁴க்க²ந்த⁴ங் நிப்³பி³ஜ்ஜ²தி பதா³லேதீதி நிப்³பே³தி⁴கபஞ்ஞா. அனிப்³பி³த்³த⁴புப்³ப³ங் அப்பதா³லிதபுப்³ப³ங் தோ³ஸக்க²ந்த⁴ங், மோஹக்க²ந்த⁴ங், கோத⁴ங், உபனாஹங்…பே॰… ஸப்³பே³ ப⁴வகா³மிகம்மே நிப்³பி³ஜ்ஜ²தி பதா³லேதீதி நிப்³பே³தி⁴கபஞ்ஞா.
Katamā nibbedhikapaññā, idhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo bahimukho na ramati sabbasaṅkhāresu, anibbiddhapubbaṃ appadālitapubbaṃ lobhakkhandhaṃ nibbijjhati padāletīti nibbedhikapaññā. Anibbiddhapubbaṃ appadālitapubbaṃ dosakkhandhaṃ, mohakkhandhaṃ, kodhaṃ, upanāhaṃ…pe… sabbe bhavagāmikamme nibbijjhati padāletīti nibbedhikapaññā.
அனுபத³த⁴ம்மவிபஸ்ஸனந்தி ஸமாபத்திவஸேன வா ஜா²னங்க³வஸேன வா அனுபடிபாடியா த⁴ம்மவிபஸ்ஸனங் விபஸ்ஸதி, ஏவங் விபஸ்ஸந்தோ அத்³த⁴மாஸேன அரஹத்தங் பத்தோ. மஹாமொக்³க³ல்லானத்தே²ரோ பன ஸத்தஹி தி³வஸேஹி. ஏவங் ஸந்தேபி ஸாரிபுத்தத்தே²ரோ மஹாபஞ்ஞவந்ததரோ. மஹாமொக்³க³ல்லானத்தே²ரோ ஹி ஸாவகானங் ஸம்மஸனசாரங் யட்டி²கோடியா உப்பீளெந்தோ விய ஏகதே³ஸமேவ ஸம்மஸந்தோ ஸத்த தி³வஸே வாயமித்வா அரஹத்தங் பத்தோ. ஸாரிபுத்தத்தே²ரோ ட²பெத்வா பு³த்³தா⁴னங் பச்சேகபு³த்³தா⁴னஞ்ச ஸம்மஸனசாரங் ஸாவகானங் ஸம்மஸனசாரங் நிப்பதே³ஸங் ஸம்மஸி. ஏவங் ஸம்மஸந்தோ அத்³த⁴மாஸங் வாயமி. அரஹத்தஞ்ச கிர பத்வா அஞ்ஞாஸி – ‘‘ட²பெத்வா பு³த்³தே⁴ ச பச்சேகபு³த்³தே⁴ ச அஞ்ஞோ ஸாவகோ நாம பஞ்ஞாய மயா பத்தப்³ப³ங் பத்துங் ஸமத்தோ² நாம ந ப⁴விஸ்ஸதீ’’தி. யதா² ஹி புரிஸோ வேளுயட்டி²ங் க³ண்ஹிஸ்ஸாமீதி மஹாஜடங் வேளுங் தி³ஸ்வா ஜடங் சி²ந்த³ந்தஸ்ஸ பபஞ்சோ ப⁴விஸ்ஸதீதி அந்தரேன ஹத்த²ங் பவேஸெத்வா ஸம்பத்தமேவ யட்டி²ங் மூலே ச அக்³கே³ ச சி²ந்தி³த்வா ஆதா³ய பக்கமெய்ய, ஸோ கிஞ்சாபி பட²மதரங் க³ச்ச²தி, யட்டி²ங் பன ஸாரங் வா உஜுங் வா ந லப⁴தி. அபரோ ச ததா²ரூபமேவ வேணுங் தி³ஸ்வா ‘‘ஸசே ஸம்பத்தங் யட்டி²ங் க³ண்ஹிஸ்ஸாமி, ஸாரங் வா உஜுங் வா ந லபி⁴ஸ்ஸாமீ’’தி கச்ச²ங் ப³ந்தி⁴த்வா மஹந்தேன ஸத்தே²ன வேணுஜடங் சி²ந்தி³த்வா ஸாரா சேவ உஜூ ச யட்டி²யோ உச்சினித்வா ஆதா³ய பக்கமெய்ய. அயங் கிஞ்சாபி பச்சா² க³ச்ச²தி, யட்டி²யோ பன ஸாரா சேவ உஜூ ச லப⁴தி. ஏவங்ஸம்பத³மித³ங் வேதி³தப்³ப³ங் இமேஸங் த்³வின்னங் தே²ரானங் பதா⁴னங்.
Anupadadhammavipassananti samāpattivasena vā jhānaṅgavasena vā anupaṭipāṭiyā dhammavipassanaṃ vipassati, evaṃ vipassanto addhamāsena arahattaṃ patto. Mahāmoggallānatthero pana sattahi divasehi. Evaṃ santepi sāriputtatthero mahāpaññavantataro. Mahāmoggallānatthero hi sāvakānaṃ sammasanacāraṃ yaṭṭhikoṭiyā uppīḷento viya ekadesameva sammasanto satta divase vāyamitvā arahattaṃ patto. Sāriputtatthero ṭhapetvā buddhānaṃ paccekabuddhānañca sammasanacāraṃ sāvakānaṃ sammasanacāraṃ nippadesaṃ sammasi. Evaṃ sammasanto addhamāsaṃ vāyami. Arahattañca kira patvā aññāsi – ‘‘ṭhapetvā buddhe ca paccekabuddhe ca añño sāvako nāma paññāya mayā pattabbaṃ pattuṃ samattho nāma na bhavissatī’’ti. Yathā hi puriso veḷuyaṭṭhiṃ gaṇhissāmīti mahājaṭaṃ veḷuṃ disvā jaṭaṃ chindantassa papañco bhavissatīti antarena hatthaṃ pavesetvā sampattameva yaṭṭhiṃ mūle ca agge ca chinditvā ādāya pakkameyya, so kiñcāpi paṭhamataraṃ gacchati, yaṭṭhiṃ pana sāraṃ vā ujuṃ vā na labhati. Aparo ca tathārūpameva veṇuṃ disvā ‘‘sace sampattaṃ yaṭṭhiṃ gaṇhissāmi, sāraṃ vā ujuṃ vā na labhissāmī’’ti kacchaṃ bandhitvā mahantena satthena veṇujaṭaṃ chinditvā sārā ceva ujū ca yaṭṭhiyo uccinitvā ādāya pakkameyya. Ayaṃ kiñcāpi pacchā gacchati, yaṭṭhiyo pana sārā ceva ujū ca labhati. Evaṃsampadamidaṃ veditabbaṃ imesaṃ dvinnaṃ therānaṃ padhānaṃ.
ஏவங் பன அத்³த⁴மாஸங் வாயமித்வா த⁴ம்மஸேனாபதி ஸாரிபுத்தத்தே²ரோ ஸூகரக²தலேணத்³வாரே பா⁴கி³னெய்யஸ்ஸ தீ³க⁴னக²பரிப்³பா³ஜகஸ்ஸ வேத³னாபரிக்³க³ஹஸுத்தந்தே தே³ஸியமானே த³ஸப³லங் பீ³ஜயமானோ டி²தோ தே³ஸனானுஸாரேன ஞாணங் பேஸெத்வா பப்³ப³ஜிததி³வஸதோ பன்னரஸமே தி³வஸே ஸாவகபாரமிஞாணஸ்ஸ மத்த²கங் பத்வா ஸத்தஸட்டி² ஞாணானி படிவிஜ்ஜி²த்வா ஸோளஸவித⁴ங் பஞ்ஞங் அனுப்பத்தோ.
Evaṃ pana addhamāsaṃ vāyamitvā dhammasenāpati sāriputtatthero sūkarakhataleṇadvāre bhāgineyyassa dīghanakhaparibbājakassa vedanāpariggahasuttante desiyamāne dasabalaṃ bījayamāno ṭhito desanānusārena ñāṇaṃ pesetvā pabbajitadivasato pannarasame divase sāvakapāramiñāṇassa matthakaṃ patvā sattasaṭṭhi ñāṇāni paṭivijjhitvā soḷasavidhaṃ paññaṃ anuppatto.
தத்ரித³ங், பி⁴க்க²வே, ஸாரிபுத்தஸ்ஸ அனுபத³த⁴ம்மவிபஸ்ஸனாயாதி யா அனுபத³த⁴ம்மவிபஸ்ஸனங் விபஸ்ஸதீதி அனுபத³த⁴ம்மவிபஸ்ஸனா வுத்தா, தத்ர அனுபத³த⁴ம்மவிபஸ்ஸனாய ஸாரிபுத்தஸ்ஸ இத³ங் ஹோதி. இதா³னி வத்தப்³ப³ங் தங் தங் விபஸ்ஸனாகொட்டா²ஸங் ஸந்தா⁴யேதங் வுத்தங்.
Tatridaṃ, bhikkhave, sāriputtassa anupadadhammavipassanāyāti yā anupadadhammavipassanaṃ vipassatīti anupadadhammavipassanā vuttā, tatra anupadadhammavipassanāya sāriputtassa idaṃ hoti. Idāni vattabbaṃ taṃ taṃ vipassanākoṭṭhāsaṃ sandhāyetaṃ vuttaṃ.
94. பட²மே ஜா²னேதி யே பட²மே ஜா²னே அந்தோஸமாபத்தியங் த⁴ம்மா. த்யாஸ்ஸாதி தே அஸ்ஸ. அனுபத³வவத்தி²தா ஹொந்தீதி அனுபடிபாடியா வவத்தி²தா பரிச்சி²ன்னா ஞாதா விதி³தா ஹொந்தி. கத²ங்? தே²ரோ ஹி தே த⁴ம்மே ஓலோகெந்தோ அபி⁴னிரோபனலக்க²ணோ விதக்கோ வத்ததீதி ஜானாதி. ததா² அனுமஜ்ஜனலக்க²ணோ விசாரோ, ப²ரணலக்க²ணா பீதி, ஸாதலக்க²ணங் ஸுக²ங், அவிக்கே²பலக்க²ணா சித்தேகக்³க³தா, பு²ஸனலக்க²ணோ ப²ஸ்ஸோ வேத³யிதலக்க²ணா வேத³னா, ஸஞ்ஜானநலக்க²ணா ஸஞ்ஞா, சேதயிதலக்க²ணா சேதனா, விஜானநலக்க²ணங் விஞ்ஞாணங், கத்துகம்யதாலக்க²ணோ ச²ந்தோ³, அதி⁴மொக்க²லக்க²ணோ அதி⁴மொக்கோ², பக்³கா³ஹலக்க²ணங் வீரியங் உபட்டா²னலக்க²ணா ஸதி, மஜ்ஜ²த்தலக்க²ணா உபெக்கா², அனுனயமனஸிகாரலக்க²ணோ மனஸிகாரோ வத்ததீதி ஜானாதி. ஏவங் ஜானங் அபி⁴னிரோபனட்டே²ன விதக்கங் ஸபா⁴வதோ வவத்த²பேதி…பே॰… அனுனயமனஸிகாரணட்டே²ன மனஸிகாரங் ஸபா⁴வபா⁴வதோ வவத்த²பேதி. தேன வுத்தங் ‘‘த்யாஸ்ஸ த⁴ம்மா அனுபத³வவத்தி²தா ஹொந்தீ’’தி.
94.Paṭhame jhāneti ye paṭhame jhāne antosamāpattiyaṃ dhammā. Tyāssāti te assa. Anupadavavatthitā hontīti anupaṭipāṭiyā vavatthitā paricchinnā ñātā viditā honti. Kathaṃ? Thero hi te dhamme olokento abhiniropanalakkhaṇo vitakko vattatīti jānāti. Tathā anumajjanalakkhaṇo vicāro, pharaṇalakkhaṇā pīti, sātalakkhaṇaṃ sukhaṃ, avikkhepalakkhaṇā cittekaggatā, phusanalakkhaṇo phasso vedayitalakkhaṇā vedanā, sañjānanalakkhaṇā saññā, cetayitalakkhaṇā cetanā, vijānanalakkhaṇaṃ viññāṇaṃ, kattukamyatālakkhaṇo chando, adhimokkhalakkhaṇo adhimokkho, paggāhalakkhaṇaṃ vīriyaṃ upaṭṭhānalakkhaṇā sati, majjhattalakkhaṇā upekkhā, anunayamanasikāralakkhaṇo manasikāro vattatīti jānāti. Evaṃ jānaṃ abhiniropanaṭṭhena vitakkaṃ sabhāvato vavatthapeti…pe… anunayamanasikāraṇaṭṭhena manasikāraṃ sabhāvabhāvato vavatthapeti. Tena vuttaṃ ‘‘tyāssa dhammā anupadavavatthitā hontī’’ti.
விதி³தா உப்பஜ்ஜந்தீதி உப்பஜ்ஜமானா விதி³தா பாகடாவ ஹுத்வா உப்பஜ்ஜந்தி. விதி³தா உபட்ட²ஹந்தீதி திட்ட²மானாபி விதி³தா பாகடாவ ஹுத்வா திட்ட²ந்தி. விதி³தா அப்³ப⁴த்த²ங் க³ச்ச²ந்தீதி நிருஜ்ஜ²மானாபி விதி³தா பாகடாவ ஹுத்வா நிருஜ்ஜ²ந்தி. எத்த² பன தங்ஞாணதா சேவ ஞாணப³ஹுதா ச மோசேதப்³பா³. யதா² ஹி தேனேவ அங்கு³லக்³கே³ன தங் அங்கு³லக்³க³ங் ந ஸக்கா பு²ஸிதுங், ஏவமேவ தேனேவ சித்தேன தஸ்ஸ சித்தஸ்ஸ உப்பாதோ³ வா டி²தி வா ப⁴ங்கோ³ வா ந ஸக்கா ஜானிதுந்தி. ஏவங் தாவ தங்ஞாணதா மோசேதப்³பா³. யதி³ பன த்³வே சித்தானி ஏகதோ உப்பஜ்ஜெய்யுங், ஏகேன சித்தேன ஏகஸ்ஸ உப்பாதோ³ வா டி²தி வா ப⁴ங்கோ³ வா ஸக்கா ப⁴வெய்ய ஜானிதுங். த்³வே பன ப²ஸ்ஸா வா வேத³னா வா ஸஞ்ஞா வா சேதனா வா சித்தானி வா ஏகதோ உப்பஜ்ஜனகானி நாம நத்தி², ஏகேகமேவ உப்பஜ்ஜதி. ஏவங் ஞாணப³ஹுதா மோசேதப்³பா³. ஏவங் ஸந்தே கத²ங்? மஹாதே²ரஸ்ஸ அந்தோஸமாபத்தியங் ஸோளஸ த⁴ம்மா விதி³தா பாகடா ஹொந்தீதி. வத்தா²ரம்மணானங் பரிக்³க³ஹிததாய. தே²ரேன ஹி வத்து² சேவ ஆரம்மணஞ்ச பரிக்³க³ஹிதங், தேனஸ்ஸ தேஸங் த⁴ம்மானங் உப்பாத³ங் ஆவஜ்ஜந்தஸ்ஸ உப்பாதோ³ பாகடோ ஹோதி, டா²னங் ஆவஜ்ஜந்தஸ்ஸ டா²னங் பாகடங் ஹோதி, பே⁴த³ங் ஆவஜ்ஜந்தஸ்ஸ பே⁴தோ³ பாகடோ ஹோதி. தேன வுத்தங் ‘‘விதி³தா உப்பஜ்ஜந்தி விதி³தா உபட்ட²ஹந்தி விதி³தா அப்³ப⁴த்த²ங் க³ச்ச²ந்தீ’’தி. அஹுத்வா ஸம்பொ⁴ந்தீதி இமினா உத³யங் பஸ்ஸதி. ஹுத்வா படிவெந்தீதி இமினா வயங் பஸ்ஸதி.
Viditā uppajjantīti uppajjamānā viditā pākaṭāva hutvā uppajjanti. Viditā upaṭṭhahantīti tiṭṭhamānāpi viditā pākaṭāva hutvā tiṭṭhanti. Viditā abbhatthaṃ gacchantīti nirujjhamānāpi viditā pākaṭāva hutvā nirujjhanti. Ettha pana taṃñāṇatā ceva ñāṇabahutā ca mocetabbā. Yathā hi teneva aṅgulaggena taṃ aṅgulaggaṃ na sakkā phusituṃ, evameva teneva cittena tassa cittassa uppādo vā ṭhiti vā bhaṅgo vā na sakkā jānitunti. Evaṃ tāva taṃñāṇatā mocetabbā. Yadi pana dve cittāni ekato uppajjeyyuṃ, ekena cittena ekassa uppādo vā ṭhiti vā bhaṅgo vā sakkā bhaveyya jānituṃ. Dve pana phassā vā vedanā vā saññā vā cetanā vā cittāni vā ekato uppajjanakāni nāma natthi, ekekameva uppajjati. Evaṃ ñāṇabahutā mocetabbā. Evaṃ sante kathaṃ? Mahātherassa antosamāpattiyaṃ soḷasa dhammā viditā pākaṭā hontīti. Vatthārammaṇānaṃ pariggahitatāya. Therena hi vatthu ceva ārammaṇañca pariggahitaṃ, tenassa tesaṃ dhammānaṃ uppādaṃ āvajjantassa uppādo pākaṭo hoti, ṭhānaṃ āvajjantassa ṭhānaṃ pākaṭaṃ hoti, bhedaṃ āvajjantassa bhedo pākaṭo hoti. Tena vuttaṃ ‘‘viditā uppajjanti viditā upaṭṭhahanti viditā abbhatthaṃ gacchantī’’ti. Ahutvā sambhontīti iminā udayaṃ passati. Hutvā paṭiventīti iminā vayaṃ passati.
அனுபாயோதி ராக³வஸேன அனுபக³மனோ ஹுத்வா. அனபாயோதி படிக⁴வஸேன அனபக³தோ. அனிஸ்ஸிதோதி தண்ஹாதி³ட்டி²னிஸ்ஸயேஹி அனிஸ்ஸிதோ. அப்படிப³த்³தோ⁴தி ச²ந்த³ராகே³ன அப³த்³தோ⁴. விப்பமுத்தோதி காமராக³தோ விப்பமுத்தோ. விஸங்யுத்தோதி சதூஹி யோகே³ஹி ஸப்³ப³கிலேஸேஹி வா விஸங்யுத்தோ. விமரியாதீ³கதேனாதி நிம்மரியாதீ³கதேன. சேதஸாதி ஏவங்விதே⁴ன சித்தேன விஹரதி.
Anupāyoti rāgavasena anupagamano hutvā. Anapāyoti paṭighavasena anapagato. Anissitoti taṇhādiṭṭhinissayehi anissito. Appaṭibaddhoti chandarāgena abaddho. Vippamuttoti kāmarāgato vippamutto. Visaṃyuttoti catūhi yogehi sabbakilesehi vā visaṃyutto. Vimariyādīkatenāti nimmariyādīkatena. Cetasāti evaṃvidhena cittena viharati.
தத்த² த்³வே மரியாதா³ கிலேஸமரியாதா³ ச ஆரம்மணமரியாதா³ ச. ஸசே ஹிஸ்ஸ அந்தோஸமாபத்தியங் பவத்தே ஸோளஸ த⁴ம்மே ஆரப்³ப⁴ ராகா³த³யோ உப்பஜ்ஜெய்யுங், கிலேஸமரியாதா³ தேன கதா ப⁴வெய்ய, தேஸு பனஸ்ஸ ஏகோபி ந உப்பன்னோதி கிலேஸமரியாதா³ நத்தி². ஸசே பனஸ்ஸ அந்தோஸமாபத்தியங் பவத்தே ஸோளஸ த⁴ம்மே ஆவஜ்ஜந்தஸ்ஸ ஏகச்சே ஆபாத²ங் நாக³ச்செ²ய்யுங். ஏவமஸ்ஸ ஆரம்மணமரியாதா³ ப⁴வெய்யுங். தே பனஸ்ஸ ஸோளஸ த⁴ம்மே ஆவஜ்ஜந்தஸ்ஸ ஆபாத²ங் அனாக³தத⁴ம்மோ நாம நத்தீ²தி ஆரம்மணமரியாதா³பி நத்தி².
Tattha dve mariyādā kilesamariyādā ca ārammaṇamariyādā ca. Sace hissa antosamāpattiyaṃ pavatte soḷasa dhamme ārabbha rāgādayo uppajjeyyuṃ, kilesamariyādā tena katā bhaveyya, tesu panassa ekopi na uppannoti kilesamariyādā natthi. Sace panassa antosamāpattiyaṃ pavatte soḷasa dhamme āvajjantassa ekacce āpāthaṃ nāgaccheyyuṃ. Evamassa ārammaṇamariyādā bhaveyyuṃ. Te panassa soḷasa dhamme āvajjantassa āpāthaṃ anāgatadhammo nāma natthīti ārammaṇamariyādāpi natthi.
அபராபி த்³வே மரியாதா³ விக்க²ம்ப⁴னமரியாதா³ ச ஸமுச்சே²த³மரியாதா³ ச. தாஸு ஸமுச்சே²த³மரியாதா³ உபரி ஆக³மிஸ்ஸதி, இமஸ்மிங் பன டா²னே விக்க²ம்ப⁴னமரியாதா³ அதி⁴ப்பேதா. தஸ்ஸ விக்க²ம்பி⁴தபச்சனீகத்தா நத்தீ²தி விமரியாதி³கதேன சேதஸா விஹரதி.
Aparāpi dve mariyādā vikkhambhanamariyādā ca samucchedamariyādā ca. Tāsu samucchedamariyādā upari āgamissati, imasmiṃ pana ṭhāne vikkhambhanamariyādā adhippetā. Tassa vikkhambhitapaccanīkattā natthīti vimariyādikatena cetasā viharati.
உத்தரி நிஸ்ஸரணந்தி இதோ உத்தரி நிஸ்ஸரணங். அஞ்ஞேஸு ச ஸுத்தேஸு ‘‘உத்தரி நிஸ்ஸரண’’ந்தி நிப்³பா³னங் வுத்தங், இத⁴ பன அனந்தரோ விஸேஸோ அதி⁴ப்பேதோதி வேதி³தப்³போ³. தப்³ப³ஹுலீகாராதி தஸ்ஸ பஜானநஸ்ஸ ப³ஹுலீகரணேன. அத்தி²த்வேவஸ்ஸ ஹோதீதி தஸ்ஸ தே²ரஸ்ஸ அத்தீ²தியேவ த³ள்ஹதரங் ஹோதி. இமினா நயேன ஸேஸவாரேஸுபி அத்தோ² வேதி³தப்³போ³.
Uttarinissaraṇanti ito uttari nissaraṇaṃ. Aññesu ca suttesu ‘‘uttari nissaraṇa’’nti nibbānaṃ vuttaṃ, idha pana anantaro viseso adhippetoti veditabbo. Tabbahulīkārāti tassa pajānanassa bahulīkaraṇena. Atthitvevassa hotīti tassa therassa atthītiyeva daḷhataraṃ hoti. Iminā nayena sesavāresupi attho veditabbo.
து³தியவாரே பன ஸம்பஸாத³னட்டே²ன ஸம்பஸாதோ³. ஸபா⁴வதோ வவத்த²பேதி.
Dutiyavāre pana sampasādanaṭṭhena sampasādo. Sabhāvato vavatthapeti.
சதுத்த²வாரே உபெக்கா²தி ஸுக²ட்டா²னே வேத³னுபெக்கா²வ. பஸ்ஸத்³த⁴த்தா சேதஸோ அனாபோ⁴கோ³தி யோ ஸோ ‘‘யதே³வ தத்த² ஸுக²’’ந்தி சேதஸோ ஆபோ⁴கோ³, ஏதேனேதங் ஓளாரிகமக்கா²யதீதி ஏவங் பஸ்ஸத்³த⁴த்தா சேதஸோ அனாபோ⁴கோ³ வுத்தோ, தஸ்ஸ அபா⁴வாதி அத்தோ². ஸதிபாரிஸுத்³தீ⁴தி பரிஸுத்³தா⁴ஸதியேவ. உபெக்கா²பி பாரிஸுத்³தி⁴உபெக்கா².
Catutthavāre upekkhāti sukhaṭṭhāne vedanupekkhāva. Passaddhattā cetaso anābhogoti yo so ‘‘yadeva tattha sukha’’nti cetaso ābhogo, etenetaṃ oḷārikamakkhāyatīti evaṃ passaddhattā cetaso anābhogo vutto, tassa abhāvāti attho. Satipārisuddhīti parisuddhāsatiyeva. Upekkhāpi pārisuddhiupekkhā.
95. ஸதோ வுட்ட²ஹதீதி ஸதியா ஸமன்னாக³தோ ஞாணேன ஸம்பஜானோ ஹுத்வா வுட்டா²தி. தே த⁴ம்மே ஸமனுபஸ்ஸதீதி யஸ்மா நேவஸஞ்ஞானாஸஞ்ஞாயதனே பு³த்³தா⁴னங்யேவ அனுபத³த⁴ம்மவிபஸ்ஸனா ஹோதி, ந ஸாவகானங், தஸ்மா எத்த² கலாபவிபஸ்ஸனங் த³ஸ்ஸெந்தோ ஏவமாஹ.
95.Sato vuṭṭhahatīti satiyā samannāgato ñāṇena sampajāno hutvā vuṭṭhāti. Te dhamme samanupassatīti yasmā nevasaññānāsaññāyatane buddhānaṃyeva anupadadhammavipassanā hoti, na sāvakānaṃ, tasmā ettha kalāpavipassanaṃ dassento evamāha.
பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹொந்தீதி மக்³க³பஞ்ஞாய சத்தாரி ஸச்சானி தி³ஸ்வா சத்தாரோ ஆஸவா கீ²ணா ஹொந்தி. ஸாரிபுத்தத்தே²ரஸ்ஸ ஸமத²விபஸ்ஸனங் யுக³னத்³த⁴ங் ஆஹரித்வா அரஹத்தங் பத்தவாரோபி அத்தி², நிரோத⁴ஸமாபத்திஸமாபன்னவாரோபி. அரஹத்தங் பத்தவாரோ இத⁴ க³ஹிதோ, நிரோத⁴ங் பன சிண்ணவஸிதாய அபராபரங் ஸமாபஜ்ஜிஸ்ஸதீதி வத³ந்தி.
Paññāyacassa disvā āsavā parikkhīṇā hontīti maggapaññāya cattāri saccāni disvā cattāro āsavā khīṇā honti. Sāriputtattherassa samathavipassanaṃ yuganaddhaṃ āharitvā arahattaṃ pattavāropi atthi, nirodhasamāpattisamāpannavāropi. Arahattaṃ pattavāro idha gahito, nirodhaṃ pana ciṇṇavasitāya aparāparaṃ samāpajjissatīti vadanti.
தத்த²ஸ்ஸ யஸ்மிங் காலே நிரோத⁴ஸமாபத்தி ஸீஸங் ஹோதி, நிரோத⁴ஸ்ஸ வாரோ ஆக³ச்ச²தி, ப²லஸமாபத்தி கூ³ள்ஹா ஹோதி. யஸ்மிங் காலே ப²லஸமாபத்தி ஸீஸங் ஹோதி, ப²லஸமாபத்தியா வாரோ ஆக³ச்ச²தி, நிரோத⁴ஸமாபத்தி கூ³ள்ஹா ஹோதி. ஜம்பு³தீ³பவாஸினோ தே²ரா பன வத³ந்தி ‘‘ஸாரிபுத்தத்தே²ரோ ஸமத²விபஸ்ஸனங் யுக³னத்³த⁴ங் ஆஹரித்வா அனாகா³மிப²லங் ஸச்சி²கத்வா நிரோத⁴ங் ஸமாபஜ்ஜி, நிரோதா⁴ வுட்டா²ய அரஹத்தங் பத்தோ’’தி. தே த⁴ம்மேதி அந்தோஸமாபத்தியங் பவத்தே திஸமுட்டா²னிகரூபத⁴ம்மே, ஹெட்டா² நேவஸஞ்ஞானாஸஞ்ஞாயதனஸமாபத்தியங் பவத்தத⁴ம்மே வா. தேபி ஹி இமஸ்மிங் வாரே விபஸ்ஸிதப்³ப³த⁴ம்மாவ, தஸ்மா தே வா விபஸ்ஸதீதி த³ஸ்ஸேதுங் இத³ங் வுத்தந்தி வேதி³தப்³ப³ங்.
Tatthassa yasmiṃ kāle nirodhasamāpatti sīsaṃ hoti, nirodhassa vāro āgacchati, phalasamāpatti gūḷhā hoti. Yasmiṃ kāle phalasamāpatti sīsaṃ hoti, phalasamāpattiyā vāro āgacchati, nirodhasamāpatti gūḷhā hoti. Jambudīpavāsino therā pana vadanti ‘‘sāriputtatthero samathavipassanaṃ yuganaddhaṃ āharitvā anāgāmiphalaṃ sacchikatvā nirodhaṃ samāpajji, nirodhā vuṭṭhāya arahattaṃ patto’’ti. Te dhammeti antosamāpattiyaṃ pavatte tisamuṭṭhānikarūpadhamme, heṭṭhā nevasaññānāsaññāyatanasamāpattiyaṃ pavattadhamme vā. Tepi hi imasmiṃ vāre vipassitabbadhammāva, tasmā te vā vipassatīti dassetuṃ idaṃ vuttanti veditabbaṃ.
97. வஸிப்பதோதி சிண்ணவஸிதங் பத்தோ. பாரமிப்பத்தோதி நிப்ப²த்திங் பத்தோ. ஓரஸோதிஆதீ³ஸு தே²ரோ ப⁴க³வதோ உரே நிப்³ப³த்தஸத்³த³ங் ஸுத்வா ஜாதோதி ஓரஸோ, முகே²ன பபா⁴விதங் ஸத்³த³ங் ஸுத்வா ஜாதோதி முக²தோ ஜாதோ, த⁴ம்மேன பன ஜாதத்தா நிம்மிதத்தா த⁴ம்மஜோ த⁴ம்மனிம்மிதோ, த⁴ம்மதா³யஸ்ஸ ஆதி³யனதோ த⁴ம்மதா³யாதோ³, ஆமிஸதா³யஸ்ஸ அனாதி³யனதோ நோ ஆமிஸதா³யாதோ³தி வேதி³தப்³போ³. ஸேஸங் ஸப்³ப³த்த² உத்தானமேவாதி.
97.Vasippatoti ciṇṇavasitaṃ patto. Pāramippattoti nipphattiṃ patto. Orasotiādīsu thero bhagavato ure nibbattasaddaṃ sutvā jātoti oraso, mukhena pabhāvitaṃ saddaṃ sutvā jātoti mukhato jāto, dhammena pana jātattā nimmitattā dhammajo dhammanimmito, dhammadāyassa ādiyanato dhammadāyādo, āmisadāyassa anādiyanato no āmisadāyādoti veditabbo. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அனுபத³ஸுத்தவண்ணனா நிட்டி²தா.
Anupadasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. அனுபத³ஸுத்தங் • 1. Anupadasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 1. அனுபத³ஸுத்தவண்ணனா • 1. Anupadasuttavaṇṇanā
