| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. அனுருத்³த⁴ஸுத்தவண்ணனா
7. Anuruddhasuttavaṇṇanā
230. ஏவங் மே ஸுதந்தி அனுருத்³த⁴ஸுத்தங். தத்த² ஏவமாஹங்ஸூதி தஸ்ஸ உபாஸகஸ்ஸ அபா²ஸுககாலோ அஹோஸி, ததா³ உபஸங்கமித்வா ஏவமாஹங்ஸு. அபண்ணகந்தி அவிராதி⁴தங். ஏகத்தா²தி அப்பமாணாதி வா மஹக்³க³தாதி வா ஜா²னமேவ சித்தேகக்³க³தாயேவ ஏவங் வுச்சதீதி இமங் ஸந்தா⁴ய ஏவமாஹ.
230.Evaṃme sutanti anuruddhasuttaṃ. Tattha evamāhaṃsūti tassa upāsakassa aphāsukakālo ahosi, tadā upasaṅkamitvā evamāhaṃsu. Apaṇṇakanti avirādhitaṃ. Ekatthāti appamāṇāti vā mahaggatāti vā jhānameva cittekaggatāyeva evaṃ vuccatīti imaṃ sandhāya evamāha.
231. யாவதா ஏகங் ருக்க²மூலங் மஹக்³க³தந்தி ப²ரித்வா அதி⁴முச்சித்வா விஹரதீதி ஏகருக்க²மூலபமாணட்டா²னங் கஸிணனிமித்தேன ஒத்த²ரித்வா தஸ்மிங் கஸிணனிமித்தே மஹக்³க³தஜ்ஜா²னங் ப²ரித்வா அதி⁴முச்சித்வா விஹரதி. மஹக்³க³தந்தி பனஸ்ஸ ஆபோ⁴கோ³ நத்தி², கேவலங் மஹக்³க³தஜ்ஜா²னபவத்திவஸேன பனேதங் வுத்தங். ஏஸ நயோ ஸப்³ப³த்த². இமினா கோ² ஏதங் க³ஹபதி பரியாயேனாதி இமினா காரணேன. எத்த² ஹி அப்பமாணாதி வுத்தானங் ப்³ரஹ்மவிஹாரானங் நிமித்தங் ந வட்³ட⁴தி, உக்³கா⁴டனங் ந ஜாயதி, தானி ஜா²னானி அபி⁴ஞ்ஞானங் வா நிரோத⁴ஸ்ஸ வா பாத³கானி ந ஹொந்தி, விபஸ்ஸனாபாத³கானி பன வட்டபாத³கானி ப⁴வோக்கமனானி ச ஹொந்தி. ‘‘மஹக்³க³தா’’தி வுத்தானங் பன கஸிணஜ்ஜா²னானங் நிமித்தங் வட்³ட⁴தி, உக்³கா⁴டனங் ஜாயதி, ஸமதிக்கமா ஹொந்தி, அபி⁴ஞ்ஞாபாத³கானி நிரோத⁴பாத³கானி வட்டபாத³கானி ப⁴வோக்கமனானி ச ஹொந்தி. ஏவமிமே த⁴ம்மா நானத்தா², அப்பமாணா மஹக்³க³தாதி ஏவங் நானாப்³யஞ்ஜனா ச.
231.Yāvatāekaṃ rukkhamūlaṃ mahaggatanti pharitvā adhimuccitvā viharatīti ekarukkhamūlapamāṇaṭṭhānaṃ kasiṇanimittena ottharitvā tasmiṃ kasiṇanimitte mahaggatajjhānaṃ pharitvā adhimuccitvā viharati. Mahaggatanti panassa ābhogo natthi, kevalaṃ mahaggatajjhānapavattivasena panetaṃ vuttaṃ. Esa nayo sabbattha. Iminā kho etaṃ gahapati pariyāyenāti iminā kāraṇena. Ettha hi appamāṇāti vuttānaṃ brahmavihārānaṃ nimittaṃ na vaḍḍhati, ugghāṭanaṃ na jāyati, tāni jhānāni abhiññānaṃ vā nirodhassa vā pādakāni na honti, vipassanāpādakāni pana vaṭṭapādakāni bhavokkamanāni ca honti. ‘‘Mahaggatā’’ti vuttānaṃ pana kasiṇajjhānānaṃ nimittaṃ vaḍḍhati, ugghāṭanaṃ jāyati, samatikkamā honti, abhiññāpādakāni nirodhapādakāni vaṭṭapādakāni bhavokkamanāni ca honti. Evamime dhammā nānatthā, appamāṇā mahaggatāti evaṃ nānābyañjanā ca.
232. இதா³னி மஹக்³க³தஸமாபத்திதோ நீஹரித்வா ப⁴வூபபத்திகாரணங் த³ஸ்ஸெந்தோ சதஸ்ஸோ கோ² இமாதிஆதி³மாஹ. பரித்தாபா⁴தி ப²ரித்வா ஜானந்தஸ்ஸ அயமாபோ⁴கோ³ அத்தி², பரித்தாபே⁴ஸு பன தே³வேஸு நிப்³ப³த்திகாரணங் ஜா²னங் பா⁴வெந்தோ ஏவங் வுத்தோ. ஏஸ நயோ ஸப்³ப³த்த². பரித்தாபா⁴ ஸியா ஸங்கிலிட்டா²பா⁴ ஹொந்தி ஸியா பரிஸுத்³தா⁴பா⁴, அப்பமாணாபா⁴ ஸியா ஸங்கிலிட்டா²பா⁴ ஹொந்தி ஸியா பரிஸுத்³தா⁴பா⁴. கத²ங்? ஸுப்பமத்தே வா ஸராவமத்தே வா கஸிணபரிகம்மங் கத்வா ஸமாபத்திங் நிப்³ப³த்தெத்வா பஞ்சஹாகாரேஹி ஆசிண்ணவஸிபா⁴வோ பச்சனீகத⁴ம்மானங் ஸுட்டு² அபரிஸோதி⁴தத்தா து³ப்³ப³லமேவ ஸமாபத்திங் வளஞ்ஜித்வா அப்பகு³ணஜ்ஜா²னே டி²தோ காலங் கத்வா பரித்தாபே⁴ஸு நிப்³ப³த்ததி, வண்ணோ பனஸ்ஸ பரித்தோ சேவ ஹோதி ஸங்கிலிட்டோ² ச. பஞ்சஹி பனாகாரேஹி ஆசிண்ணவஸிபா⁴வோ பச்சனீகத⁴ம்மானங் ஸுட்டு² பரிஸோதி⁴தத்தா ஸுவிஸுத்³த⁴ங் ஸமாபத்திங் வளஞ்ஜித்வா பகு³ணஜ்ஜா²னே டி²தோ காலங் கத்வா பரித்தாபே⁴ஸு நிப்³ப³த்ததி, வண்ணோ பனஸ்ஸ பரித்தோ சேவ ஹோதி பரிஸுத்³தோ⁴ ச. ஏவங் பரித்தாபா⁴ ஸியா ஸங்கிலிட்டா²பா⁴ ஹொந்தி ஸியா பரிஸுத்³தா⁴பா⁴. கஸிணே பன விபுலபரிகம்மங் கத்வா ஸமாபத்திங் நிப்³ப³த்தெத்வா பஞ்சஹாகாரேஹி ஆசிண்ணவஸிபா⁴வோதி ஸப்³ப³ங் புரிமஸதி³ஸமேவ வேதி³தப்³ப³ங். ஏவங் அப்பமாணாபா⁴ ஸியா ஸங்கிலிட்டா²பா⁴ ஹொந்தி ஸியா பரிஸுத்³தா⁴பா⁴தி.
232. Idāni mahaggatasamāpattito nīharitvā bhavūpapattikāraṇaṃ dassento catasso kho imātiādimāha. Parittābhāti pharitvā jānantassa ayamābhogo atthi, parittābhesu pana devesu nibbattikāraṇaṃ jhānaṃ bhāvento evaṃ vutto. Esa nayo sabbattha. Parittābhā siyā saṃkiliṭṭhābhā honti siyā parisuddhābhā, appamāṇābhā siyā saṃkiliṭṭhābhā honti siyā parisuddhābhā. Kathaṃ? Suppamatte vā sarāvamatte vā kasiṇaparikammaṃ katvā samāpattiṃ nibbattetvā pañcahākārehi āciṇṇavasibhāvo paccanīkadhammānaṃ suṭṭhu aparisodhitattā dubbalameva samāpattiṃ vaḷañjitvā appaguṇajjhāne ṭhito kālaṃ katvā parittābhesu nibbattati, vaṇṇo panassa paritto ceva hoti saṃkiliṭṭho ca. Pañcahi panākārehi āciṇṇavasibhāvo paccanīkadhammānaṃ suṭṭhu parisodhitattā suvisuddhaṃ samāpattiṃ vaḷañjitvā paguṇajjhāne ṭhito kālaṃ katvā parittābhesu nibbattati, vaṇṇo panassa paritto ceva hoti parisuddho ca. Evaṃ parittābhā siyā saṃkiliṭṭhābhā honti siyā parisuddhābhā. Kasiṇe pana vipulaparikammaṃ katvā samāpattiṃ nibbattetvā pañcahākārehi āciṇṇavasibhāvoti sabbaṃ purimasadisameva veditabbaṃ. Evaṃ appamāṇābhā siyā saṃkiliṭṭhābhā honti siyā parisuddhābhāti.
வண்ணனானத்தந்தி ஸரீரவண்ணஸ்ஸ நானத்தங். நோ ச ஆபா⁴னானத்தந்தி ஆலோகே நானத்தங் ந பஞ்ஞாயதி. அச்சினானத்தந்தி தீ³க⁴ரஸ்ஸஅணுதூ²லவஸேன அச்சியா நானத்தங்.
Vaṇṇanānattanti sarīravaṇṇassa nānattaṃ. No ca ābhānānattanti āloke nānattaṃ na paññāyati. Accinānattanti dīgharassaaṇuthūlavasena acciyā nānattaṃ.
யத்த² யத்தா²தி உய்யானவிமானகப்பருக்க²னதீ³தீரபொக்க²ரணீதீரேஸு யத்த² யத்த². அபி⁴னிவிஸந்தீதி வஸந்தி. அபி⁴ரமந்தீதி ரமந்தி ந உக்கண்ட²ந்தி. காஜேனாதி யாகு³ப⁴த்ததேலபா²ணிதமச்ச²மங்ஸகாஜேஸு யேன கேனசி காஜேன. ‘‘காசேனாதி’’பி பாடோ², அயமேவ அத்தோ². பிடகேனாதி பச்சி²யா. தத்த² தத்தே²வாதி ஸப்பிமது⁴பா²ணிதாதீ³னங் ஸுலப⁴ட்டா²னதோ லோணபூதிமச்சா²தீ³னங் உஸ்ஸன்னட்டா²னங் நீதா ‘‘புப்³பே³ அம்ஹாகங் வஸனட்டா²னங் பா²ஸுகங், தத்த² ஸுக²ங் வஸிம்ஹா, இத⁴ லோணங் வா நோ பா³த⁴தி பூதிமச்ச²க³ந்தோ⁴ வா ஸீஸரோக³ங் உப்பாதே³தீ’’தி ஏவங் சித்தங் அனுப்பாதெ³த்வா தத்த² தத்தே²வ ரமந்தி.
Yattha yatthāti uyyānavimānakapparukkhanadītīrapokkharaṇītīresu yattha yattha. Abhinivisantīti vasanti. Abhiramantīti ramanti na ukkaṇṭhanti. Kājenāti yāgubhattatelaphāṇitamacchamaṃsakājesu yena kenaci kājena. ‘‘Kācenāti’’pi pāṭho, ayameva attho. Piṭakenāti pacchiyā. Tattha tatthevāti sappimadhuphāṇitādīnaṃ sulabhaṭṭhānato loṇapūtimacchādīnaṃ ussannaṭṭhānaṃ nītā ‘‘pubbe amhākaṃ vasanaṭṭhānaṃ phāsukaṃ, tattha sukhaṃ vasimhā, idha loṇaṃ vā no bādhati pūtimacchagandho vā sīsarogaṃ uppādetī’’ti evaṃ cittaṃ anuppādetvā tattha tattheva ramanti.
234. ஆபா⁴தி ஆபா⁴ஸம்பன்னா. தத³ங்கே³னாதி தஸ்ஸா ப⁴வூபபத்தியா அங்கே³ன, ப⁴வூபபத்திகாரணேனாதி அத்தோ². இதா³னி தங் காரணங் புச்ச²ந்தோ கோ நு கோ², ப⁴ந்தேதிஆதி³மாஹ.
234.Ābhāti ābhāsampannā. Tadaṅgenāti tassā bhavūpapattiyā aṅgena, bhavūpapattikāraṇenāti attho. Idāni taṃ kāraṇaṃ pucchanto ko nu kho, bhantetiādimāha.
காயது³ட்டு²ல்லந்தி காயாலஸியபா⁴வோ. ஜா²யதோதி ஜலதோ.
Kāyaduṭṭhullanti kāyālasiyabhāvo. Jhāyatoti jalato.
235. தீ³க⁴ரத்தங் கோ² மேதி தே²ரோ கிர பாரமியோ பூரெந்தோ இஸிபப்³ப³ஜ்ஜங் பப்³ப³ஜித்வா ஸமாபத்திங் நிப்³ப³த்தெத்வா நிரந்தரங் தீணி அத்தபா⁴வஸதானி ப்³ரஹ்மலோகே படிலபி⁴, தங் ஸந்தா⁴யேதங் ஆஹ. வுத்தம்பி சேதங் –
235.Dīgharattaṃ kho meti thero kira pāramiyo pūrento isipabbajjaṃ pabbajitvā samāpattiṃ nibbattetvā nirantaraṃ tīṇi attabhāvasatāni brahmaloke paṭilabhi, taṃ sandhāyetaṃ āha. Vuttampi cetaṃ –
‘‘அவோகிண்ணங் தீணி ஸதங், யங் பப்³ப³ஜிங் இஸிபப்³ப³ஜ்ஜங்;
‘‘Avokiṇṇaṃ tīṇi sataṃ, yaṃ pabbajiṃ isipabbajjaṃ;
அஸங்க²தங் க³வேஸந்தோ, புப்³பே³ ஸஞ்சரிதங் மம’’ந்தி.
Asaṅkhataṃ gavesanto, pubbe sañcaritaṃ mama’’nti.
ஸேஸங் ஸப்³ப³த்த² உத்தானமேவாதி.
Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அனுருத்³த⁴ஸுத்தவண்ணனா நிட்டி²தா.
Anuruddhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. அனுருத்³த⁴ஸுத்தங் • 7. Anuruddhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. அனுருத்³த⁴ஸுத்தவண்ணனா • 7. Anuruddhasuttavaṇṇanā
