| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. அபண்ணகஸுத்தங்
6. Apaṇṇakasuttaṃ
119. ‘‘திஸ்ஸோ இமா, பி⁴க்க²வே, விபத்தியோ. கதமா திஸ்ஸோ? ஸீலவிபத்தி, சித்தவிபத்தி, தி³ட்டி²விபத்தி. கதமா ச, பி⁴க்க²வே, ஸீலவிபத்தி? இத⁴, பி⁴க்க²வே, ஏகச்சோ பாணாதிபாதீ ஹோதி…பே॰… ஸம்ப²ப்பலாபீ ஹோதி. அயங் வுச்சதி, பி⁴க்க²வே, ஸீலவிபத்தி.
119. ‘‘Tisso imā, bhikkhave, vipattiyo. Katamā tisso? Sīlavipatti, cittavipatti, diṭṭhivipatti. Katamā ca, bhikkhave, sīlavipatti? Idha, bhikkhave, ekacco pāṇātipātī hoti…pe… samphappalāpī hoti. Ayaṃ vuccati, bhikkhave, sīlavipatti.
‘‘கதமா ச, பி⁴க்க²வே, சித்தவிபத்தி? இத⁴, பி⁴க்க²வே, ஏகச்சோ அபி⁴ஜ்ஜா²லு ஹோதி ப்³யாபன்னசித்தோ. அயங் வுச்சதி, பி⁴க்க²வே, சித்தவிபத்தி.
‘‘Katamā ca, bhikkhave, cittavipatti? Idha, bhikkhave, ekacco abhijjhālu hoti byāpannacitto. Ayaṃ vuccati, bhikkhave, cittavipatti.
‘‘கதமா ச, பி⁴க்க²வே, தி³ட்டி²விபத்தி? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி விபரீதத³ஸ்ஸனோ – ‘நத்தி² தி³ன்னங், நத்தி² யிட்ட²ங்…பே॰… யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’தி. அயங் வுச்சதி, பி⁴க்க²வே, தி³ட்டி²விபத்தி. ஸீலவிபத்திஹேது வா, பி⁴க்க²வே…பே॰… தி³ட்டி²விபத்திஹேது வா, பி⁴க்க²வே, ஸத்தா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜந்தி. ஸெய்யதா²பி, பி⁴க்க²வே, அபண்ணகோ மணி உத்³த⁴ங் கி²த்தோ யேன யேனேவ பதிட்டா²தி ஸுப்பதிட்டி²தங்யேவ பதிட்டா²தி; ஏவமேவங் கோ², பி⁴க்க²வே, ஸீலவிபத்திஹேது வா ஸத்தா…பே॰… உபபஜ்ஜந்தி. இமா கோ², பி⁴க்க²வே, திஸ்ஸோ விபத்தியோதி.
‘‘Katamā ca, bhikkhave, diṭṭhivipatti? Idha, bhikkhave, ekacco micchādiṭṭhiko hoti viparītadassano – ‘natthi dinnaṃ, natthi yiṭṭhaṃ…pe… ye imañca lokaṃ parañca lokaṃ sayaṃ abhiññā sacchikatvā pavedentī’ti. Ayaṃ vuccati, bhikkhave, diṭṭhivipatti. Sīlavipattihetu vā, bhikkhave…pe… diṭṭhivipattihetu vā, bhikkhave, sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti. Seyyathāpi, bhikkhave, apaṇṇako maṇi uddhaṃ khitto yena yeneva patiṭṭhāti suppatiṭṭhitaṃyeva patiṭṭhāti; evamevaṃ kho, bhikkhave, sīlavipattihetu vā sattā…pe… upapajjanti. Imā kho, bhikkhave, tisso vipattiyoti.
‘‘திஸ்ஸோ இமா, பி⁴க்க²வே, ஸம்பதா³. கதமா திஸ்ஸோ? ஸீலஸம்பதா³, சித்தஸம்பதா³, தி³ட்டி²ஸம்பதா³ . கதமா ச, பி⁴க்க²வே, ஸீலஸம்பதா³? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி…பே॰… அயங் வுச்சதி, பி⁴க்க²வே, ஸீலஸம்பதா³.
‘‘Tisso imā, bhikkhave, sampadā. Katamā tisso? Sīlasampadā, cittasampadā, diṭṭhisampadā . Katamā ca, bhikkhave, sīlasampadā? Idha, bhikkhave, ekacco pāṇātipātā paṭivirato hoti…pe… ayaṃ vuccati, bhikkhave, sīlasampadā.
‘‘கதமா ச, பி⁴க்க²வே, சித்தஸம்பதா³? இத⁴, பி⁴க்க²வே, ஏகச்சோ அனபி⁴ஜ்ஜா²லு ஹோதி அப்³யாபன்னசித்தோ. அயங் வுச்சதி, பி⁴க்க²வே, சித்தஸம்பதா³.
‘‘Katamā ca, bhikkhave, cittasampadā? Idha, bhikkhave, ekacco anabhijjhālu hoti abyāpannacitto. Ayaṃ vuccati, bhikkhave, cittasampadā.
‘‘கதமா ச, பி⁴க்க²வே, தி³ட்டி²ஸம்பதா³? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி அவிபரீதத³ஸ்ஸனோ – ‘அத்தி² தி³ன்னங், அத்தி² யிட்ட²ங்…பே॰… யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’தி. அயங் வுச்சதி, பி⁴க்க²வே, தி³ட்டி²ஸம்பதா³. ஸீலஸம்பதா³ஹேது வா , பி⁴க்க²வே, ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. சித்தஸம்பதா³ஹேது வா…பே॰… தி³ட்டி²ஸம்பதா³ஹேது வா, பி⁴க்க²வே, ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. ஸெய்யதா²பி, பி⁴க்க²வே, அபண்ணகோ மணி உத்³த⁴ங் கி²த்தோ யேன யேனேவ பதிட்டா²தி ஸுப்பதிட்டி²தங்யேவ பதிட்டா²தி; ஏவமேவங் கோ², பி⁴க்க²வே, ஸீலஸம்பதா³ஹேது வா ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி, சித்தஸம்பதா³ஹேது வா ஸத்தா…பே॰… தி³ட்டி²ஸம்பதா³ஹேது வா ஸத்தா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. இமா கோ², பி⁴க்க²வே, திஸ்ஸோ ஸம்பதா³’’தி. ச²ட்ட²ங்.
‘‘Katamā ca, bhikkhave, diṭṭhisampadā? Idha, bhikkhave, ekacco sammādiṭṭhiko hoti aviparītadassano – ‘atthi dinnaṃ, atthi yiṭṭhaṃ…pe… ye imañca lokaṃ parañca lokaṃ sayaṃ abhiññā sacchikatvā pavedentī’ti. Ayaṃ vuccati, bhikkhave, diṭṭhisampadā. Sīlasampadāhetu vā , bhikkhave, sattā kāyassa bhedā paraṃ maraṇā sugatiṃ saggaṃ lokaṃ upapajjanti. Cittasampadāhetu vā…pe… diṭṭhisampadāhetu vā, bhikkhave, sattā kāyassa bhedā paraṃ maraṇā sugatiṃ saggaṃ lokaṃ upapajjanti. Seyyathāpi, bhikkhave, apaṇṇako maṇi uddhaṃ khitto yena yeneva patiṭṭhāti suppatiṭṭhitaṃyeva patiṭṭhāti; evamevaṃ kho, bhikkhave, sīlasampadāhetu vā sattā kāyassa bhedā paraṃ maraṇā sugatiṃ saggaṃ lokaṃ upapajjanti, cittasampadāhetu vā sattā…pe… diṭṭhisampadāhetu vā sattā kāyassa bhedā paraṃ maraṇā sugatiṃ saggaṃ lokaṃ upapajjanti. Imā kho, bhikkhave, tisso sampadā’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. அபண்ணகஸுத்தவண்ணனா • 6. Apaṇṇakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6-7. அபண்ணகஸுத்தாதி³வண்ணனா • 6-7. Apaṇṇakasuttādivaṇṇanā
