| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
10. அபண்ணகஸுத்தவண்ணனா
10. Apaṇṇakasuttavaṇṇanā
92. ஏவங் மே ஸுதந்தி அபண்ணகஸுத்தங். தத்த² சாரிகந்தி அதுரிதசாரிகங்.
92.Evaṃme sutanti apaṇṇakasuttaṃ. Tattha cārikanti aturitacārikaṃ.
93. அத்தி² பன வோ க³ஹபதயோதி கஸ்மா ஆஹ? ஸோ கிர கா³மோ அடவித்³வாரே நிவிட்டோ². நானாவிதா⁴ ஸமணப்³ராஹ்மணா தி³வஸங் மக்³க³ங் க³ந்த்வா ஸாயங் தங் கா³மங் வாஸத்தா²ய உபெந்தி, தேஸங் தே மனுஸ்ஸா மஞ்சபீடா²னி பத்த²ரித்வா பாதே³ தோ⁴வித்வா பாதே³ மக்கெ²த்வா கப்பியபானகானி த³த்வா புனதி³வஸே நிமந்தெத்வா தா³னங் தெ³ந்தி. தே பஸன்னசித்தா தேஹி ஸத்³தி⁴ங் ஸம்மந்தயமானா ஏவங் வத³ந்தி ‘‘அத்தி² பன வோ க³ஹபதயோ கிஞ்சி த³ஸ்ஸனங் க³ஹித’’ந்தி? நத்தி², ப⁴ந்தேதி. ‘‘க³ஹபதயோ வினா த³ஸ்ஸனேன லோகோ ந நிய்யாதி, ஏகங் த³ஸ்ஸனங் ருச்சித்வா க²மாபெத்வா க³ஹேதுங் வட்டதி, ‘ஸஸ்ஸதோ லோகோ’தி த³ஸ்ஸனங் க³ண்ஹதா²’’தி வத்வா பக்கந்தா. அபரதி³வஸே அஞ்ஞே ஆக³தா. தேபி ததே²வ புச்சி²ங்ஸு. தே தேஸங் ‘‘ஆம, ப⁴ந்தே, புரிமேஸு தி³வஸேஸு தும்ஹாதி³ஸா ஸமணப்³ராஹ்மணா ஆக³ந்த்வா ‘ஸஸ்ஸதோ லோகோ’தி அம்ஹே இத³ங் த³ஸ்ஸனங் கா³ஹாபெத்வா க³தா’’தி ஆரோசேஸுங். ‘‘தே பா³லா கிங் ஜானந்தி? ‘உச்சி²ஜ்ஜதி அயங் லோகோ’தி உச்சே²த³த³ஸ்ஸனங் க³ண்ஹதா²’’தி ஏவங் தேபி உச்சே²த³த³ஸ்ஸனங் க³ண்ஹாபெத்வா பக்கந்தா. ஏதேனுபாயேன அஞ்ஞே ஏகச்சஸஸ்ஸதங், அஞ்ஞே அந்தானந்தங் , அஞ்ஞே அமராவிக்கே²பந்தி ஏவங் த்³வாஸட்டி² தி³ட்டி²யோ உக்³க³ண்ஹாபேஸுங். தே பன ஏகதி³ட்டி²யம்பி பதிட்டா²துங் நாஸக்கி²ங்ஸு. ஸப்³ப³பச்சா² ப⁴க³வா அக³மாஸி. ஸோ தேஸங் ஹிதத்தா²ய புச்ச²ந்தோ ‘‘அத்தி² பன வோ க³ஹபதயோ’’திஆதி³மாஹ. தத்த² ஆகாரவதீதி காரணவதீ ஸஹேதுகா. அபண்ணகோதி அவிரத்³தோ⁴ அத்³வெஜ்ஜ²கா³மீ ஏகங்ஸகா³ஹிகோ.
93.Atthi pana vo gahapatayoti kasmā āha? So kira gāmo aṭavidvāre niviṭṭho. Nānāvidhā samaṇabrāhmaṇā divasaṃ maggaṃ gantvā sāyaṃ taṃ gāmaṃ vāsatthāya upenti, tesaṃ te manussā mañcapīṭhāni pattharitvā pāde dhovitvā pāde makkhetvā kappiyapānakāni datvā punadivase nimantetvā dānaṃ denti. Te pasannacittā tehi saddhiṃ sammantayamānā evaṃ vadanti ‘‘atthi pana vo gahapatayo kiñci dassanaṃ gahita’’nti? Natthi, bhanteti. ‘‘Gahapatayo vinā dassanena loko na niyyāti, ekaṃ dassanaṃ ruccitvā khamāpetvā gahetuṃ vaṭṭati, ‘sassato loko’ti dassanaṃ gaṇhathā’’ti vatvā pakkantā. Aparadivase aññe āgatā. Tepi tatheva pucchiṃsu. Te tesaṃ ‘‘āma, bhante, purimesu divasesu tumhādisā samaṇabrāhmaṇā āgantvā ‘sassato loko’ti amhe idaṃ dassanaṃ gāhāpetvā gatā’’ti ārocesuṃ. ‘‘Te bālā kiṃ jānanti? ‘Ucchijjati ayaṃ loko’ti ucchedadassanaṃ gaṇhathā’’ti evaṃ tepi ucchedadassanaṃ gaṇhāpetvā pakkantā. Etenupāyena aññe ekaccasassataṃ, aññe antānantaṃ , aññe amarāvikkhepanti evaṃ dvāsaṭṭhi diṭṭhiyo uggaṇhāpesuṃ. Te pana ekadiṭṭhiyampi patiṭṭhātuṃ nāsakkhiṃsu. Sabbapacchā bhagavā agamāsi. So tesaṃ hitatthāya pucchanto ‘‘atthi pana vo gahapatayo’’tiādimāha. Tattha ākāravatīti kāraṇavatī sahetukā. Apaṇṇakoti aviraddho advejjhagāmī ekaṃsagāhiko.
94. நத்தி² தி³ன்னந்திஆதி³ த³ஸவத்து²கா மிச்சா²தி³ட்டி² ஹெட்டா² ஸாலெய்யகஸுத்தே வித்தா²ரிதா. ததா² தப்³பி³பச்சனீகபூ⁴தா ஸம்மாதி³ட்டி².
94.Natthi dinnantiādi dasavatthukā micchādiṭṭhi heṭṭhā sāleyyakasutte vitthāritā. Tathā tabbipaccanīkabhūtā sammādiṭṭhi.
95. நெக்க²ம்மே ஆனிஸங்ஸந்தி யோ நேஸங் அகுஸலதோ நிக்க²ந்தபா⁴வே ஆனிஸங்ஸோ, யோ ச வோதா³னபக்கோ² விஸுத்³தி⁴பக்கோ², தங் ந பஸ்ஸந்தீதி அத்தோ². அஸத்³த⁴ம்மஸஞ்ஞத்தீதி அபூ⁴தத⁴ம்மஸஞ்ஞாபனா . அத்தானுக்கங்ஸேதீதி ட²பெத்வா மங் கோ அஞ்ஞோ அத்தனோ த³ஸ்ஸனங் பரே க³ண்ஹாபேதுங் ஸக்கோதீதி அத்தானங் உக்கி²பதி. பரங் வம்பே⁴தீதி எத்தகேஸு ஜனேஸு ஏகோபி அத்தனோ த³ஸ்ஸனங் பரே க³ண்ஹாபேதுங் ந ஸக்கோதீதி ஏவங் பரங் ஹெட்டா² கி²பதி. புப்³பே³வ கோ² பனாதி புப்³பே³ மிச்சா²த³ஸ்ஸனங் க³ண்ஹந்தஸ்ஸேவ ஸுஸீல்யங் பஹீனங் ஹோதி, து³ஸ்ஸீலபா⁴வோ பச்சுபட்டி²தோ. ஏவமஸ்ஸிமேதி ஏவங் அஸ்ஸ இமே மிச்சா²தி³ட்டி²ஆத³யோ ஸத்த. அபராபரங் உப்பஜ்ஜனவஸேன பன தேயேவ மிச்சா²தி³ட்டி²பச்சயா அனேகே பாபகா அகுஸலா த⁴ம்மா உப்பஜ்ஜந்தி நாம.
95.Nekkhamme ānisaṃsanti yo nesaṃ akusalato nikkhantabhāve ānisaṃso, yo ca vodānapakkho visuddhipakkho, taṃ na passantīti attho. Asaddhammasaññattīti abhūtadhammasaññāpanā . Attānukkaṃsetīti ṭhapetvā maṃ ko añño attano dassanaṃ pare gaṇhāpetuṃ sakkotīti attānaṃ ukkhipati. Paraṃ vambhetīti ettakesu janesu ekopi attano dassanaṃ pare gaṇhāpetuṃ na sakkotīti evaṃ paraṃ heṭṭhā khipati. Pubbeva kho panāti pubbe micchādassanaṃ gaṇhantasseva susīlyaṃ pahīnaṃ hoti, dussīlabhāvo paccupaṭṭhito. Evamassimeti evaṃ assa ime micchādiṭṭhiādayo satta. Aparāparaṃ uppajjanavasena pana teyeva micchādiṭṭhipaccayā aneke pāpakā akusalā dhammā uppajjanti nāma.
தத்ராதி தாஸு தேஸங் ஸமணப்³ராஹ்மணானங் லத்³தீ⁴ஸு. கலிக்³க³ஹோதி பராஜயக்³கா³ஹோ. து³ஸ்ஸமத்தோ ஸமாதி³ன்னோதி து³க்³க³ஹிதோ து³ப்பராமட்டோ². ஏகங்ஸங் ப²ரித்வா திட்ட²தீதி ஏகந்தங் ஏககொட்டா²ஸங் ஸகவாத³மேவ ப²ரித்வா அதி⁴முச்சித்வா திட்ட²தி, ‘‘ஸசே கோ² நத்தி² பரோ லோகோ’’தி ஏவங் ஸந்தேயேவ ஸொத்தி²பா⁴வாவஹோ ஹோதி. ரிஞ்சதீதி வஜ்ஜேதி.
Tatrāti tāsu tesaṃ samaṇabrāhmaṇānaṃ laddhīsu. Kaliggahoti parājayaggāho. Dussamatto samādinnoti duggahito dupparāmaṭṭho. Ekaṃsaṃ pharitvā tiṭṭhatīti ekantaṃ ekakoṭṭhāsaṃ sakavādameva pharitvā adhimuccitvā tiṭṭhati, ‘‘sace kho natthi paro loko’’ti evaṃ santeyeva sotthibhāvāvaho hoti. Riñcatīti vajjeti.
96. ஸத்³த⁴ம்மஸஞ்ஞத்தீதி பூ⁴தத⁴ம்மஸஞ்ஞாபனா.
96.Saddhammasaññattīti bhūtadhammasaññāpanā.
கடக்³க³ஹோதி ஜயக்³கா³ஹோ. ஸுஸமத்தோ ஸமாதி³ன்னோதி ஸுக்³க³ஹிதோ ஸுபராமட்டோ². உப⁴யங்ஸங் ப²ரித்வா திட்ட²தீதி உப⁴யந்தங் உப⁴யகொட்டா²ஸங் ஸகவாத³ங் பரவாத³ஞ்ச ப²ரித்வா அதி⁴முச்சித்வா திட்ட²தி ‘‘ஸசே கோ² அத்தி² பரோ லோகோ’’தி ஏவங் ஸந்தேபி ‘‘ஸசே கோ² நத்தி² பரோ லோகோ’’தி ஏவங் ஸந்தேபி ஸொத்தி²பா⁴வாவஹோ ஹோதி. பரதோபி ஏகங்ஸஉப⁴யங்ஸேஸு இமினாவ நயேன அத்தோ² வேதி³தப்³போ³.
Kaṭaggahoti jayaggāho. Susamatto samādinnoti suggahito suparāmaṭṭho. Ubhayaṃsaṃpharitvā tiṭṭhatīti ubhayantaṃ ubhayakoṭṭhāsaṃ sakavādaṃ paravādañca pharitvā adhimuccitvā tiṭṭhati ‘‘sace kho atthi paro loko’’ti evaṃ santepi ‘‘sace kho natthi paro loko’’ti evaṃ santepi sotthibhāvāvaho hoti. Paratopi ekaṃsaubhayaṃsesu imināva nayena attho veditabbo.
97. கரோதோதி ஸஹத்தா² கரொந்தஸ்ஸ. காரயதோதி ஆணத்தியா காரெந்தஸ்ஸ. சி²ந்த³தோதி பரேஸங் ஹத்தா²தீ³னி சி²ந்த³ந்தஸ்ஸ. பசதோதி த³ண்டே³ன பீளெந்தஸ்ஸ வா தஜ்ஜெந்தஸ்ஸ வா. ஸோசயதோதி பரஸ்ஸ ப⁴ண்ட³ஹரணாதீ³ஹி ஸோகங் ஸயங் கரொந்தஸ்ஸபி பரேஹி காரெந்தஸ்ஸபி. கிலமதோதி ஆஹாரூபச்சே²த³-ப³ந்த⁴னாகா³ரப்பவேஸனாதீ³ஹி ஸயங் கிலமந்தஸ்ஸாபி பரேஹி கிலமாபெந்தஸ்ஸாபி. ப²ந்த³தோ ப²ந்தா³பயதோதி பரங் ப²ந்த³ந்தங் ப²ந்த³னகாலே ஸயம்பி ப²ந்த³தோ பரம்பி ப²ந்தா³பயதோ. பாணமதிபாதயதோதி பாணங் ஹனந்தஸ்ஸபி ஹனாபெந்தஸ்ஸபி. ஏவங் ஸப்³ப³த்த² கரணகாராபனவஸேனேவ அத்தோ² வேதி³தப்³போ³.
97.Karototi sahatthā karontassa. Kārayatoti āṇattiyā kārentassa. Chindatoti paresaṃ hatthādīni chindantassa. Pacatoti daṇḍena pīḷentassa vā tajjentassa vā. Socayatoti parassa bhaṇḍaharaṇādīhi sokaṃ sayaṃ karontassapi parehi kārentassapi. Kilamatoti āhārūpaccheda-bandhanāgārappavesanādīhi sayaṃ kilamantassāpi parehi kilamāpentassāpi. Phandato phandāpayatoti paraṃ phandantaṃ phandanakāle sayampi phandato parampi phandāpayato. Pāṇamatipātayatoti pāṇaṃ hanantassapi hanāpentassapi. Evaṃ sabbattha karaṇakārāpanavaseneva attho veditabbo.
ஸந்தி⁴ந்தி க⁴ரஸந்தி⁴ங். நில்லோபந்தி மஹாவிலோபங். ஏகாகா³ரிகந்தி ஏகமேவ க⁴ரங் பரிவாரெத்வா விலும்பனங். பரிபந்தே² திட்ட²தோதி ஆக³தாக³தானங் அச்சி²ந்த³னத்த²ங் மக்³கே³ திட்ட²தோ. கரோதோ ந கரீயதி பாபந்தி யங்கிஞ்சி பாபங் கரோமீதி ஸஞ்ஞாய கரோதோபி பாபங் ந கரீயதி, நத்தி² பாபங். ஸத்தா பன கரோமாதி ஏவங்ஸஞ்ஞினோ ஹொந்தீதி அத்தோ². கு²ரபரியந்தேனாதி கு²ரனேமினா, கு²ரதா⁴ரஸதி³ஸபரியந்தேன வா. ஏகங் மங்ஸக²லந்தி ஏகங் மங்ஸராஸிங். புஞ்ஜந்தி தஸ்ஸேவ வேவசனங். ததோனிதா³னந்தி ஏகமங்ஸக²லகரணனிதா³னங். த³க்கி²ணதீரே மனுஸ்ஸா கக்க²ளா தா³ருணா, தே ஸந்தா⁴ய ஹனந்தோதிஆதி³ வுத்தங். உத்தரதீரே ஸத்³தா⁴ ஹொந்தி பஸன்னா பு³த்³த⁴மாமகா த⁴ம்மமாமகா ஸங்க⁴மாமகா, தே ஸந்தா⁴ய த³த³ந்தோதிஆதி³ வுத்தங்.
Sandhinti gharasandhiṃ. Nillopanti mahāvilopaṃ. Ekāgārikanti ekameva gharaṃ parivāretvā vilumpanaṃ. Paripanthetiṭṭhatoti āgatāgatānaṃ acchindanatthaṃ magge tiṭṭhato. Karoto na karīyati pāpanti yaṃkiñci pāpaṃ karomīti saññāya karotopi pāpaṃ na karīyati, natthi pāpaṃ. Sattā pana karomāti evaṃsaññino hontīti attho. Khurapariyantenāti khuraneminā, khuradhārasadisapariyantena vā. Ekaṃ maṃsakhalanti ekaṃ maṃsarāsiṃ. Puñjanti tasseva vevacanaṃ. Tatonidānanti ekamaṃsakhalakaraṇanidānaṃ. Dakkhiṇatīre manussā kakkhaḷā dāruṇā, te sandhāya hanantotiādi vuttaṃ. Uttaratīre saddhā honti pasannā buddhamāmakā dhammamāmakā saṅghamāmakā, te sandhāya dadantotiādi vuttaṃ.
தத்த² யஜந்தோதி மஹாயாக³ங் கரொந்தோ. த³மேனாதி இந்த்³ரியத³மேன உபோஸத²கம்மேன. ஸங்யமேனாதி ஸீலஸங்யமேன. ஸச்சவஜ்ஜேனாதி ஸச்சவசனேன. ஆக³மோதி ஆக³மனங், பவத்தீதி அத்தோ². ஸப்³ப³தா²பி பாபபுஞ்ஞானங் கிரியமேவ படிக்கி²பந்தி. ஸுக்கபக்கோ²பி வுத்தனயேனேவ வேதி³தப்³போ³. ஸேஸமெத்த² புரிமவாரே வுத்தஸதி³ஸமேவ.
Tattha yajantoti mahāyāgaṃ karonto. Damenāti indriyadamena uposathakammena. Saṃyamenāti sīlasaṃyamena. Saccavajjenāti saccavacanena. Āgamoti āgamanaṃ, pavattīti attho. Sabbathāpi pāpapuññānaṃ kiriyameva paṭikkhipanti. Sukkapakkhopi vuttanayeneva veditabbo. Sesamettha purimavāre vuttasadisameva.
100. நத்தி² ஹேது நத்தி² பச்சயோதி எத்த² பச்சயோ ஹேதுவேவசனங். உப⁴யேனாபி விஜ்ஜமானகமேவ காயது³ச்சரிதாதி³ஸங்கிலேஸபச்சயங் காயஸுசரிதாதி³விஸுத்³தி⁴பச்சயங் படிக்கி²பந்தி. நத்தி² ப³லங், நத்தி² வீரியங், நத்தி² புரிஸதா²மோ, நத்தி² புரிஸபரக்கமோதி ஸத்தானங் ஸங்கிலேஸிதுங் வா விஸுஜ்ஜி²துங் வா ப³லங் வா வீரியங் வா புரிஸேன காதப்³போ³ நாம புரிஸதா²மோ வா புரிஸபரக்கமோ வா நத்தி².
100.Natthi hetu natthi paccayoti ettha paccayo hetuvevacanaṃ. Ubhayenāpi vijjamānakameva kāyaduccaritādisaṃkilesapaccayaṃ kāyasucaritādivisuddhipaccayaṃ paṭikkhipanti. Natthibalaṃ, natthi vīriyaṃ, natthi purisathāmo, natthi purisaparakkamoti sattānaṃ saṃkilesituṃ vā visujjhituṃ vā balaṃ vā vīriyaṃ vā purisena kātabbo nāma purisathāmo vā purisaparakkamo vā natthi.
ஸப்³பே³ ஸத்தாதி ஒட்ட²கோ³ணக³த்³ரபா⁴த³யோ அனவஸேஸே நித³ஸ்ஸெந்தி. ஸப்³பே³ பாணாதி ஏகிந்த்³ரியோ பாணோ த்³விந்த்³ரியோ பாணோதி ஆதி³வஸேன வத³ந்தி. ஸப்³பே³ பூ⁴தாதி அண்ட³கோஸவத்தி²கோஸேஸு பூ⁴தே ஸந்தா⁴ய வத³ந்தி. ஸப்³பே³ ஜீவாதி ஸாலியவகோ³து⁴மாத³யோ ஸந்தா⁴ய வத³ந்தி. தேஸு ஹேதே விருஹனபா⁴வேன ஜீவஸஞ்ஞினோ. அவஸா அப³லா அவீரியாதி தேஸங் அத்தனோ வஸோ வா ப³லங் வா வீரியங் வா நத்தி². நியதிஸங்க³திபா⁴வபரிணதாதி எத்த² நியதீதி நியததா. ஸங்க³தீதி ச²ன்னங் அபி⁴ஜாதீனங் தத்த² தத்த² க³மனங். பா⁴வோதி ஸபா⁴வோயேவ. ஏவங் நியதியா ச ஸங்க³தியா ச பா⁴வேன ச பரிணதா நானப்பகாரதங் பத்தா. யேன ஹி யதா² ப⁴விதப்³ப³ங், ஸோ ததே²வ ப⁴வதி. யேன நோ ப⁴விதப்³ப³ங், ஸோ ந ப⁴வதீதி த³ஸ்ஸெந்தி. ச²ஸ்வேவாபி⁴ஜாதீஸூதி ச²ஸு ஏவ அபி⁴ஜாதீஸு ட²த்வா ஸுக²ஞ்ச து³க்க²ஞ்ச படிஸங்வேதெ³ந்தி, அஞ்ஞா ஸுக²து³க்க²பூ⁴மி நத்தீ²தி த³ஸ்ஸெந்தி.
Sabbe sattāti oṭṭhagoṇagadrabhādayo anavasese nidassenti. Sabbe pāṇāti ekindriyo pāṇo dvindriyo pāṇoti ādivasena vadanti. Sabbe bhūtāti aṇḍakosavatthikosesu bhūte sandhāya vadanti. Sabbe jīvāti sāliyavagodhumādayo sandhāya vadanti. Tesu hete viruhanabhāvena jīvasaññino. Avasā abalā avīriyāti tesaṃ attano vaso vā balaṃ vā vīriyaṃ vā natthi. Niyatisaṅgatibhāvapariṇatāti ettha niyatīti niyatatā. Saṅgatīti channaṃ abhijātīnaṃ tattha tattha gamanaṃ. Bhāvoti sabhāvoyeva. Evaṃ niyatiyā ca saṅgatiyā ca bhāvena ca pariṇatā nānappakārataṃ pattā. Yena hi yathā bhavitabbaṃ, so tatheva bhavati. Yena no bhavitabbaṃ, so na bhavatīti dassenti. Chasvevābhijātīsūti chasu eva abhijātīsu ṭhatvā sukhañca dukkhañca paṭisaṃvedenti, aññā sukhadukkhabhūmi natthīti dassenti.
தத்த² ச² அபி⁴ஜாதியோ நாம கண்ஹாபி⁴ஜாதி நீலாபி⁴ஜாதி லோஹிதாபி⁴ஜாதி ஹலித்³தா³பி⁴ஜாதி ஸுக்காபி⁴ஜாதி பரமஸுக்காபி⁴ஜாதீதி. தத்த² ஸாகுணிகோ ஸூகரிகோ லுத்³தோ³ மச்ச²கா⁴தகோ சோரோ சோரகா⁴தகோ, யே வா பனஞ்ஞேபி கேசி குரூரகம்மந்தா, அயங் கண்ஹாபி⁴ஜாதி நாம. பி⁴க்கூ² நீலாபி⁴ஜாதீதி வத³ந்தி. தே கிர சதூஸு பச்சயேஸு கண்டகே பக்கி²பித்வா கா²த³ந்தி. ‘‘பி⁴க்கூ² ச கண்டகவுத்தினோ’’தி அயஞ்ஹி நேஸங் பாளியேவ. அத² வா கண்டகவுத்திகா ஏவங் நாம ஏகே பப்³ப³ஜிதாதி வத³ந்தி. ‘‘ஸமணகண்டகவுத்திகா’’திபி ஹி நேஸங் பாளி. லோஹிதாபி⁴ஜாதி நாம நிக³ண்டா² ஏகஸாடகாதி வத³ந்தி. இமே கிர புரிமேஹி த்³வீஹி பண்ட³ரதரா. கி³ஹீ அசேலகஸாவகா ஹலித்³தா³பி⁴ஜாதீதி வத³ந்தி. இதி அத்தனோ பச்சயதா³யகே நிக³ண்டே²ஹிபி ஜெட்ட²கதரே கரொந்தி. நந்தோ³, வச்சோ², ஸங்கிச்சோ, அயங் ஸுக்காபி⁴ஜாதீதி வத³ந்தி. தே கிர புரிமேஹி சதூஹி பண்ட³ரதரா. ஆஜீவகே பன பரமஸுக்காபி⁴ஜாதீதி வத³ந்தி. தே கிர ஸப்³பே³ஹி பண்ட³ரதரா.
Tattha cha abhijātiyo nāma kaṇhābhijāti nīlābhijāti lohitābhijāti haliddābhijāti sukkābhijāti paramasukkābhijātīti. Tattha sākuṇiko sūkariko luddo macchaghātako coro coraghātako, ye vā panaññepi keci kurūrakammantā, ayaṃ kaṇhābhijāti nāma. Bhikkhū nīlābhijātīti vadanti. Te kira catūsu paccayesu kaṇṭake pakkhipitvā khādanti. ‘‘Bhikkhū ca kaṇṭakavuttino’’ti ayañhi nesaṃ pāḷiyeva. Atha vā kaṇṭakavuttikā evaṃ nāma eke pabbajitāti vadanti. ‘‘Samaṇakaṇṭakavuttikā’’tipi hi nesaṃ pāḷi. Lohitābhijāti nāma nigaṇṭhā ekasāṭakāti vadanti. Ime kira purimehi dvīhi paṇḍaratarā. Gihī acelakasāvakā haliddābhijātīti vadanti. Iti attano paccayadāyake nigaṇṭhehipi jeṭṭhakatare karonti. Nando, vaccho, saṅkicco, ayaṃ sukkābhijātīti vadanti. Te kira purimehi catūhi paṇḍaratarā. Ājīvake pana paramasukkābhijātīti vadanti. Te kira sabbehi paṇḍaratarā.
தத்த² ஸப்³பே³ ஸத்தா பட²மங் ஸாகுணிகாத³யோவ ஹொந்தி, ததோ விஸுஜ்ஜ²மானா ஸக்யஸமணா ஹொந்தி, ததோ விஸுஜ்ஜ²மானா நிக³ண்டா², ததோ ஆஜீவகஸாவகா, ததோ நந்தா³த³யோ, ததோ ஆஜீவகாதி அயமேதேஸங் லத்³தி⁴. ஸுக்கபக்கோ² வுத்தபச்சனீகேன வேதி³தப்³போ³. ஸேஸமிதா⁴பி புரிமவாரே வுத்தஸதி³ஸமேவ.
Tattha sabbe sattā paṭhamaṃ sākuṇikādayova honti, tato visujjhamānā sakyasamaṇā honti, tato visujjhamānā nigaṇṭhā, tato ājīvakasāvakā, tato nandādayo, tato ājīvakāti ayametesaṃ laddhi. Sukkapakkho vuttapaccanīkena veditabbo. Sesamidhāpi purimavāre vuttasadisameva.
இமாஸு பன தீஸு தி³ட்டீ²ஸு நத்தி²கதி³ட்டி² விபாகங் படிபா³ஹதி, அகிரியதி³ட்டி² கம்மங் படிபா³ஹதி, அஹேதுகதி³ட்டி² உப⁴யம்பி படிபா³ஹதி. தத்த² கம்மங் படிபா³ஹந்தேனாபி விபாகோ படிபா³ஹிதோ ஹோதி, விபாகங் படிபா³ஹந்தேனாபி கம்மங் படிபா³ஹிதங். இதி ஸப்³பே³பேதே அத்த²தோ உப⁴யபடிபா³ஹகா நத்தி²கவாதா³ சேவ அஹேதுகவாதா³ அகிரியவாதா³ ச ஹொந்தி. யே பன தேஸங் லத்³தி⁴ங் க³ஹெத்வா ரத்திட்டா²னே தி³வாட்டா²னே நிஸின்னா ஸஜ்ஜா²யந்தி வீமங்ஸந்தி, தேஸங் – ‘‘நத்தி² தி³ன்னங் நத்தி² யிட்ட²ங், கரோதோ ந கரியதி பாபங், நத்தி² ஹேது நத்தி² பச்சயோ’’தி தஸ்மிங் ஆரம்மணே மிச்சா²ஸதி ஸந்திட்ட²தி , சித்தங் ஏகக்³க³ங் ஹோதி, ஜவனானி ஜவந்தி, பட²மஜவனே ஸதேகிச்சா² ஹொந்தி, ததா² து³தியாதீ³ஸு. ஸத்தமே பு³த்³தா⁴னம்பி அதேகிச்சா² அனிவத்தினோ அரிட்ட²கண்டகஸதி³ஸா.
Imāsu pana tīsu diṭṭhīsu natthikadiṭṭhi vipākaṃ paṭibāhati, akiriyadiṭṭhi kammaṃ paṭibāhati, ahetukadiṭṭhi ubhayampi paṭibāhati. Tattha kammaṃ paṭibāhantenāpi vipāko paṭibāhito hoti, vipākaṃ paṭibāhantenāpi kammaṃ paṭibāhitaṃ. Iti sabbepete atthato ubhayapaṭibāhakā natthikavādā ceva ahetukavādā akiriyavādā ca honti. Ye pana tesaṃ laddhiṃ gahetvā rattiṭṭhāne divāṭṭhāne nisinnā sajjhāyanti vīmaṃsanti, tesaṃ – ‘‘natthi dinnaṃ natthi yiṭṭhaṃ, karoto na kariyati pāpaṃ, natthi hetu natthi paccayo’’ti tasmiṃ ārammaṇe micchāsati santiṭṭhati , cittaṃ ekaggaṃ hoti, javanāni javanti, paṭhamajavane satekicchā honti, tathā dutiyādīsu. Sattame buddhānampi atekicchā anivattino ariṭṭhakaṇṭakasadisā.
தத்த² கோசி ஏகங் த³ஸ்ஸனங் ஓக்கமதி, கோசி த்³வே, கோசி தீணிபி, ஏகஸ்மிங் ஓக்கந்தேபி த்³வீஸு தீஸு ஓக்கந்தேஸுபி நியதமிச்சா²தி³ட்டி²கோவ ஹோதி, பத்தோ ஸக்³க³மக்³கா³வரணஞ்சேவ மொக்க²மக்³கா³வரணஞ்ச, அப⁴ப்³போ³ தஸ்ஸ அத்தபா⁴வஸ்ஸ அனந்தரங் ஸக்³க³ம்பி க³ந்துங், பகே³வ மொக்க²ங். வட்டகா²ணு நாமேஸ ஸத்தோ பத²வீகோ³பகோ. கிங் பனேஸ ஏகஸ்மிங்யேவ அத்தபா⁴வே நியதோ ஹோதி, உதா³ஹு அஞ்ஞஸ்மிம்பீதி? ஏகஸ்மிஞ்ஞேவ நியதோ, ஆஸேவனவஸேன பன ப⁴வந்தரேபி தங் தங் தி³ட்டி²ங் ரோசேதியேவ. ஏவரூபஸ்ஸ ஹி யேபு⁴ய்யேன ப⁴வதோ வுட்டா²னங் நாம நத்தி².
Tattha koci ekaṃ dassanaṃ okkamati, koci dve, koci tīṇipi, ekasmiṃ okkantepi dvīsu tīsu okkantesupi niyatamicchādiṭṭhikova hoti, patto saggamaggāvaraṇañceva mokkhamaggāvaraṇañca, abhabbo tassa attabhāvassa anantaraṃ saggampi gantuṃ, pageva mokkhaṃ. Vaṭṭakhāṇu nāmesa satto pathavīgopako. Kiṃ panesa ekasmiṃyeva attabhāve niyato hoti, udāhu aññasmimpīti? Ekasmiññeva niyato, āsevanavasena pana bhavantarepi taṃ taṃ diṭṭhiṃ rocetiyeva. Evarūpassa hi yebhuyyena bhavato vuṭṭhānaṃ nāma natthi.
தஸ்மா அகல்யாணஜனங், ஆஸீவிஸமிவோரக³ங்;
Tasmā akalyāṇajanaṃ, āsīvisamivoragaṃ;
ஆரகா பரிவஜ்ஜெய்ய, பூ⁴திகாமோ விசக்க²ணோதி.
Ārakā parivajjeyya, bhūtikāmo vicakkhaṇoti.
103. நத்தி² ஸப்³ப³ஸோ ஆருப்பாதி அரூபப்³ரஹ்மலோகோ நாம ஸப்³பா³காரேன நத்தி². மனோமயாதி ஜா²னசித்தமயா. ஸஞ்ஞாமயாதி அரூபஜ்ஜா²னஸஞ்ஞாய ஸஞ்ஞாமயா. ரூபானங்யேவ நிப்³பி³தா³ய விராகா³ய நிரோதா⁴ய படிபன்னோ ஹோதீதி அயங் லாபீ⁴ வா ஹோதி தக்கீ வா. லாபீ⁴ நாம ரூபாவசரஜ்ஜா²னலாபீ⁴. தஸ்ஸ ரூபாவசரே கங்கா² நத்தி², அரூபாவசரலோகே அத்தி² . ஸோ – ‘‘அஹங் ஆருப்பா அத்தீ²தி வத³ந்தானம்பி நத்தீ²தி வத³ந்தானம்பி ஸுணாமி, அத்தி² நத்தீ²தி பன ந ஜானாமி. சதுத்த²ஜ்ஜா²னங் பத³ட்டா²னங் கத்வா அரூபாவசரஜ்ஜா²னங் நிப்³ப³த்தெஸ்ஸாமி. ஸசே ஆருப்பா அத்தி², தத்த² நிப்³ப³த்திஸ்ஸாமி, ஸசே நத்தி², ரூபாவசரப்³ரஹ்மலோகே நிப்³ப³த்திஸ்ஸாமி. ஏவங் மே அபண்ணகோ த⁴ம்மோ அபண்ணகோவ அவிரத்³தோ⁴வ ப⁴விஸ்ஸதீ’’தி ததா² படிபஜ்ஜதி. தக்கீ பன அப்படிலத்³த⁴ஜ்ஜா²னோ, தஸ்ஸாபி ரூபஜ்ஜா²னே கங்கா² நத்தி², அரூபலோகே பன அத்தி². ஸோ – ‘‘அஹங் ஆருப்பா அத்தீ²தி வத³ந்தானம்பி நத்தீ²தி வத³ந்தானம்பி ஸுணாமி, அத்தி² நத்தீ²தி பன ந ஜானாமி. கஸிணபரிகம்மங் கத்வா சதுத்த²ஜ்ஜா²னங் நிப்³ப³த்தெத்வா தங் பத³ட்டா²னங் கத்வா அரூபாவசரஜ்ஜா²னங் நிப்³ப³த்தெஸ்ஸாமி. ஸசே ஆருப்பா அத்தி², தத்த² நிப்³ப³த்திஸ்ஸாமி. ஸசே நத்தி², ரூபாவசரப்³ரஹ்மலோகே நிப்³ப³த்திஸ்ஸாமி. ஏவங் மே அபண்ணகோ த⁴ம்மோ அபண்ணகோவ அவிரத்³தோ⁴வ ப⁴விஸ்ஸதீ’’தி ததா² படிபஜ்ஜதி.
103.Natthi sabbaso āruppāti arūpabrahmaloko nāma sabbākārena natthi. Manomayāti jhānacittamayā. Saññāmayāti arūpajjhānasaññāya saññāmayā. Rūpānaṃyeva nibbidāya virāgāya nirodhāya paṭipanno hotīti ayaṃ lābhī vā hoti takkī vā. Lābhī nāma rūpāvacarajjhānalābhī. Tassa rūpāvacare kaṅkhā natthi, arūpāvacaraloke atthi . So – ‘‘ahaṃ āruppā atthīti vadantānampi natthīti vadantānampi suṇāmi, atthi natthīti pana na jānāmi. Catutthajjhānaṃ padaṭṭhānaṃ katvā arūpāvacarajjhānaṃ nibbattessāmi. Sace āruppā atthi, tattha nibbattissāmi, sace natthi, rūpāvacarabrahmaloke nibbattissāmi. Evaṃ me apaṇṇako dhammo apaṇṇakova aviraddhova bhavissatī’’ti tathā paṭipajjati. Takkī pana appaṭiladdhajjhāno, tassāpi rūpajjhāne kaṅkhā natthi, arūpaloke pana atthi. So – ‘‘ahaṃ āruppā atthīti vadantānampi natthīti vadantānampi suṇāmi, atthi natthīti pana na jānāmi. Kasiṇaparikammaṃ katvā catutthajjhānaṃ nibbattetvā taṃ padaṭṭhānaṃ katvā arūpāvacarajjhānaṃ nibbattessāmi. Sace āruppā atthi, tattha nibbattissāmi. Sace natthi, rūpāvacarabrahmaloke nibbattissāmi. Evaṃ me apaṇṇako dhammo apaṇṇakova aviraddhova bhavissatī’’ti tathā paṭipajjati.
104. ப⁴வனிரோதோ⁴தி நிப்³பா³னங். ஸாராகா³ய ஸந்திகேதி ராக³வஸேன வட்டே ரஜ்ஜனஸ்ஸ ஸந்திகே. ஸங்யோகா³யாதி தண்ஹாவஸேன ஸங்யோஜனத்தா²ய. அபி⁴னந்த³னாயாதி தண்ஹாதி³ட்டி²வஸேன அபி⁴னந்த³னாய. படிபன்னோ ஹோதீதி அயம்பி லாபீ⁴ வா ஹோதி தக்கீ வா. லாபீ⁴ நாம அட்ட²ஸமாபத்திலாபீ⁴. தஸ்ஸ ஆருப்பே கங்கா² நத்தி², நிப்³பா³னே அத்தி². ஸோ – ‘‘அஹங் நிரோதோ⁴ அத்தீ²திபி நத்தீ²திபி ஸுணாமி, ஸயங் ந ஜானாமி. ஸமாபத்திங் பாத³கங் கத்வா விபஸ்ஸனங் வட்³டெ⁴ஸ்ஸாமி. ஸசே நிரோதோ⁴ ப⁴விஸ்ஸதி, அரஹத்தங் பத்வா பரினிப்³பா³யிஸ்ஸாமி. நோ சே ப⁴விஸ்ஸதி, ஆருப்பே நிப்³ப³த்திஸ்ஸாமீ’’தி ஏவங் படிபஜ்ஜதி. தக்கீ பன ஏகஸமாபத்தியாபி ந லாபீ⁴, ஆருப்பே பனஸ்ஸ கங்கா² நத்தி², ப⁴வனிரோதே⁴ அத்தி². ஸோ – ‘‘அஹங் நிரோதோ⁴ அத்தீ²திபி நத்தீ²திபி ஸுணாமி, ஸயங் ந ஜானாமி, கஸிணபரிகம்மங் கத்வா அட்ட²ஸமாபத்தியோ நிப்³ப³த்தெத்வா ஸமாபத்திபத³ட்டா²னங் விபஸ்ஸனங் வட்³டெ⁴ஸ்ஸாமி. ஸசே நிரோதோ⁴ ப⁴விஸ்ஸதி, அரஹத்தங் பத்வா பரினிப்³பா³யிஸ்ஸாமி. நோ சே ப⁴விஸ்ஸதி, ஆருப்பே நிப்³ப³த்திஸ்ஸாமீ’’தி ஏவங் படிபஜ்ஜதி. எத்தா²ஹ – ‘‘அத்தி² தி³ன்னந்திஆதீ³னி தாவ அபண்ணகானி ப⁴வந்து, நத்தி² தி³ன்னந்திஆதீ³னி பன கத²ங் அபண்ணகானீ’’தி. க³ஹணவஸேன. தானி ஹி அபண்ணகங் அபண்ணகந்தி ஏவங் க³ஹிதத்தா அபண்ணகானி நாம ஜாதானி.
104.Bhavanirodhoti nibbānaṃ. Sārāgāya santiketi rāgavasena vaṭṭe rajjanassa santike. Saṃyogāyāti taṇhāvasena saṃyojanatthāya. Abhinandanāyāti taṇhādiṭṭhivasena abhinandanāya. Paṭipanno hotīti ayampi lābhī vā hoti takkī vā. Lābhī nāma aṭṭhasamāpattilābhī. Tassa āruppe kaṅkhā natthi, nibbāne atthi. So – ‘‘ahaṃ nirodho atthītipi natthītipi suṇāmi, sayaṃ na jānāmi. Samāpattiṃ pādakaṃ katvā vipassanaṃ vaḍḍhessāmi. Sace nirodho bhavissati, arahattaṃ patvā parinibbāyissāmi. No ce bhavissati, āruppe nibbattissāmī’’ti evaṃ paṭipajjati. Takkī pana ekasamāpattiyāpi na lābhī, āruppe panassa kaṅkhā natthi, bhavanirodhe atthi. So – ‘‘ahaṃ nirodho atthītipi natthītipi suṇāmi, sayaṃ na jānāmi, kasiṇaparikammaṃ katvā aṭṭhasamāpattiyo nibbattetvā samāpattipadaṭṭhānaṃ vipassanaṃ vaḍḍhessāmi. Sace nirodho bhavissati, arahattaṃ patvā parinibbāyissāmi. No ce bhavissati, āruppe nibbattissāmī’’ti evaṃ paṭipajjati. Etthāha – ‘‘atthi dinnantiādīni tāva apaṇṇakāni bhavantu, natthi dinnantiādīni pana kathaṃ apaṇṇakānī’’ti. Gahaṇavasena. Tāni hi apaṇṇakaṃ apaṇṇakanti evaṃ gahitattā apaṇṇakāni nāma jātāni.
105. சத்தாரோமேதி அயங் பாடிஏக்கோ அனுஸந்தி⁴. நத்தி²கவாதோ³, அஹேதுகவாதோ³ அகிரியவாதோ³, ஆருப்பா நத்தி² நிரோதோ⁴ நத்தீ²தி ஏவங்வாதி³னோ ச த்³வேதி இமே பஞ்ச புக்³க³லா ஹெட்டா² தயோ புக்³க³லாவ ஹொந்தி. அத்தி²கவாதா³த³யோ பஞ்ச ஏகோ சதுத்த²புக்³க³லோவ ஹோதி. ஏதமத்த²ங் த³ஸ்ஸேதுங் ப⁴க³வா இமங் தே³ஸனங் ஆரபி⁴. தத்த² ஸப்³ப³ங் அத்த²தோ உத்தானமேவாதி.
105.Cattārometi ayaṃ pāṭiekko anusandhi. Natthikavādo, ahetukavādo akiriyavādo, āruppā natthi nirodho natthīti evaṃvādino ca dveti ime pañca puggalā heṭṭhā tayo puggalāva honti. Atthikavādādayo pañca eko catutthapuggalova hoti. Etamatthaṃ dassetuṃ bhagavā imaṃ desanaṃ ārabhi. Tattha sabbaṃ atthato uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அபண்ணகஸுத்தவண்ணனா நிட்டி²தா.
Apaṇṇakasuttavaṇṇanā niṭṭhitā.
பட²மவக்³க³வண்ணனா நிட்டி²தா.
Paṭhamavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. அபண்ணகஸுத்தங் • 10. Apaṇṇakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 10. அபண்ணகஸுத்தவண்ணனா • 10. Apaṇṇakasuttavaṇṇanā
