| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
11. ஆபாயிகஸுத்தவண்ணனா
11. Āpāyikasuttavaṇṇanā
48. ஏகாத³ஸமே ஆபாயிகாதி அபாயே நிப்³ப³த்திஸ்ஸந்தீதி ஆபாயிகா. தத்தா²பி நிரயே நிப்³ப³த்திஸ்ஸந்தீதி நேரயிகா. இத³மப்பஹாயாதி இத³ங் இதா³னி வக்க²மானங் து³வித⁴ங் பாபஸமாசாரங் அப்பஜஹித்வா, ததா²படிபத்திததா²பக்³க³ஹணவஸேன பவத்தங் வாசங் சித்தங் தி³ட்டி²ஞ்ச அப்படினிஸ்ஸஜ்ஜித்வாதி அத்தோ². அப்³ரஹ்மசாரீதி ப்³ரஹ்மஸெட்ட²ங் சரதீதி ப்³ரஹ்மசாரீ, ப்³ரஹ்மா வா ஸெட்டோ² ஆசாரோ ஏதஸ்ஸ அத்தீ²தி ப்³ரஹ்மசாரீ, ந ப்³ரஹ்மசாரீதி அப்³ரஹ்மசாரீ, ப்³ரஹ்மசாரிபடிரூபகோ து³ஸ்ஸீலோதி அத்தோ². ப்³ரஹ்மசாரிபடிஞ்ஞோதி ‘‘ப்³ரஹ்மசாரீ அஹ’’ந்தி ஏவங்படிஞ்ஞோ. பரிபுண்ணந்தி அக²ண்டா³தி³பா⁴வேன அவிகலங். பரிஸுத்³த⁴ந்தி உபக்கிலேஸாபா⁴வேன பரிஸுத்³த⁴ங். அமூலகேனாதி தி³ட்டா²தி³மூலவிரஹிதேன, தி³ட்ட²ங் ஸுதங் பரிஸங்கிதந்தி இமேஹி சோத³னாமூலேஹி வஜ்ஜிதேன. அப்³ரஹ்மசரியேன அஸெட்ட²சரியேன. அனுத்³த⁴ங்ஸேதீதி ‘‘பரிஸுத்³தோ⁴ அய’’ந்தி ஜானந்தோவ பாராஜிகவத்து²னா த⁴ங்ஸேதி பத⁴ங்ஸேதி, சோதே³தி அக்கோஸதி வா.
48. Ekādasame āpāyikāti apāye nibbattissantīti āpāyikā. Tatthāpi niraye nibbattissantīti nerayikā. Idamappahāyāti idaṃ idāni vakkhamānaṃ duvidhaṃ pāpasamācāraṃ appajahitvā, tathāpaṭipattitathāpaggahaṇavasena pavattaṃ vācaṃ cittaṃ diṭṭhiñca appaṭinissajjitvāti attho. Abrahmacārīti brahmaseṭṭhaṃ caratīti brahmacārī, brahmā vā seṭṭho ācāro etassa atthīti brahmacārī, na brahmacārīti abrahmacārī, brahmacāripaṭirūpako dussīloti attho. Brahmacāripaṭiññoti ‘‘brahmacārī aha’’nti evaṃpaṭiñño. Paripuṇṇanti akhaṇḍādibhāvena avikalaṃ. Parisuddhanti upakkilesābhāvena parisuddhaṃ. Amūlakenāti diṭṭhādimūlavirahitena, diṭṭhaṃ sutaṃ parisaṅkitanti imehi codanāmūlehi vajjitena. Abrahmacariyena aseṭṭhacariyena. Anuddhaṃsetīti ‘‘parisuddho aya’’nti jānantova pārājikavatthunā dhaṃseti padhaṃseti, codeti akkosati vā.
கா³தா²ஸு அபூ⁴தவாதீ³தி பரஸ்ஸ தோ³ஸங் அதி³ஸ்வாவ அபூ⁴தேன துச்சே²ன முஸாவாத³ங் கத்வா பரங் அப்³பா⁴சிக்க²ந்தோ. கத்வாதி யோ வா பன பாபகம்மங் கத்வா ‘‘நாஹங் ஏதங் கரோமீ’’தி ஆஹ. உபோ⁴பி தே பேச்ச ஸமா ப⁴வந்தீதி தே உபோ⁴பி ஜனா இதோ பரலோகங் க³ந்த்வா நிரயங் உபக³மனதோ க³தியா ஸமானா ப⁴வந்தி. தத்த² க³தியேவ நேஸங் பரிச்சி²ன்னா, ந பன ஆயு. ப³ஹுஞ்ஹி பாபங் கத்வா சிரங் நிரயே பச்சதி, பரித்தங் கத்வா அப்பமத்தகமேவ காலங். யஸ்மா பன தேஸங் உபி⁴ன்னம்பி கம்மங் லாமகமேவ. தேன வுத்தங் ‘‘நிஹீனகம்மா மனுஜா பரத்தா²’’தி. ‘‘பரத்தா²’’தி பன பத³ஸ்ஸ புரதோ ‘‘பேச்சா’’தி பதே³ன ஸம்ப³ந்தோ⁴ – பரத்த² பேச்ச இதோ க³ந்த்வா தே நிஹீனகம்மா ஸமா ப⁴வந்தீதி.
Gāthāsu abhūtavādīti parassa dosaṃ adisvāva abhūtena tucchena musāvādaṃ katvā paraṃ abbhācikkhanto. Katvāti yo vā pana pāpakammaṃ katvā ‘‘nāhaṃ etaṃ karomī’’ti āha. Ubhopi te pecca samā bhavantīti te ubhopi janā ito paralokaṃ gantvā nirayaṃ upagamanato gatiyā samānā bhavanti. Tattha gatiyeva nesaṃ paricchinnā, na pana āyu. Bahuñhi pāpaṃ katvā ciraṃ niraye paccati, parittaṃ katvā appamattakameva kālaṃ. Yasmā pana tesaṃ ubhinnampi kammaṃ lāmakameva. Tena vuttaṃ ‘‘nihīnakammā manujā paratthā’’ti. ‘‘Paratthā’’ti pana padassa purato ‘‘peccā’’ti padena sambandho – parattha pecca ito gantvā te nihīnakammā samā bhavantīti.
ஏவங் ப⁴க³வா அபூ⁴தப்³ப⁴க்கா²னவஸேன பூ⁴ததோ³ஸபடிச்சா²த³னவஸேன ச பவத்தஸ்ஸ முஸாவாத³ஸ்ஸ விபாகங் த³ஸ்ஸெத்வா இதா³னி தஸ்மிங் டா²னே நிஸின்னானங் ப³ஹூனங் பாபபி⁴க்கூ²னங் து³ச்சரிதகம்மஸ்ஸ விபாகத³ஸ்ஸனேன ஸங்வேஜனத்த²ங் த்³வே கா³தா² அபா⁴ஸி. தத்த² காஸாவகண்டா²தி கஸாவரஸபீதத்தா காஸாவேன வத்தே²ன பலிவேடி²தகண்டா². பாபத⁴ம்மாதி லாமகத⁴ம்மா. அஸஞ்ஞதாதி காயாதீ³ஹி ஸஞ்ஞமரஹிதா. பாபாதி ததா²ரூபா பாபபுக்³க³லா, பாபேஹி கம்மேஹி உபபஜ்ஜித்வா ‘‘தஸ்ஸ காயோபி ஆதி³த்தோ ஸம்பஜ்ஜலிதோ ஸஜோதிபூ⁴தோ, ஸங்கா⁴டிபி ஆதி³த்தா’’திஆதி³னா (ஸங்॰ நி॰ 2.218-219; பாரா॰ 230) லக்க²ணஸங்யுத்தே வுத்தனயேன மஹாது³க்க²ங் அனுப⁴வந்தியேவ.
Evaṃ bhagavā abhūtabbhakkhānavasena bhūtadosapaṭicchādanavasena ca pavattassa musāvādassa vipākaṃ dassetvā idāni tasmiṃ ṭhāne nisinnānaṃ bahūnaṃ pāpabhikkhūnaṃ duccaritakammassa vipākadassanena saṃvejanatthaṃ dve gāthā abhāsi. Tattha kāsāvakaṇṭhāti kasāvarasapītattā kāsāvena vatthena paliveṭhitakaṇṭhā. Pāpadhammāti lāmakadhammā. Asaññatāti kāyādīhi saññamarahitā. Pāpāti tathārūpā pāpapuggalā, pāpehi kammehi upapajjitvā ‘‘tassa kāyopi āditto sampajjalito sajotibhūto, saṅghāṭipi ādittā’’tiādinā (saṃ. ni. 2.218-219; pārā. 230) lakkhaṇasaṃyutte vuttanayena mahādukkhaṃ anubhavantiyeva.
ததியகா³தா²ய அயங் ஸங்கே²பத்தோ² – யஞ்சே பு⁴ஞ்ஜெய்ய து³ஸ்ஸீலோ நிஸ்ஸீலபுக்³க³லோ காயாதீ³ஹி அஸஞ்ஞதோ ரட்ட²வாஸீஹி ஸத்³தா⁴ய தி³ன்னங் யங் ரட்ட²பிண்ட³ங் ‘‘ஸமணொம்ஹீ’’தி படிஜானந்தோ க³ஹெத்வா பு⁴ஞ்ஜெய்ய, ததோ ஆதி³த்தோ அக்³கி³வண்ணோ அயோகு³ளோவ பு⁴த்தோ ஸெய்யோ ஸுந்த³ரதரோ. கிங்காரணா? தப்பச்சயா ஹிஸ்ஸ ஏகோவ அத்தபா⁴வோ ஜா²யெய்ய, து³ஸ்ஸீலோ பன ஹுத்வா ஸத்³தா⁴தெ³ய்யங் பு⁴ஞ்ஜித்வா அனேகானிபி ஜாதிஸதானி நிரயே உப்பஜ்ஜெய்யாதி.
Tatiyagāthāya ayaṃ saṅkhepattho – yañce bhuñjeyya dussīlo nissīlapuggalo kāyādīhi asaññato raṭṭhavāsīhi saddhāya dinnaṃ yaṃ raṭṭhapiṇḍaṃ ‘‘samaṇomhī’’ti paṭijānanto gahetvā bhuñjeyya, tato āditto aggivaṇṇo ayoguḷova bhutto seyyo sundarataro. Kiṃkāraṇā? Tappaccayā hissa ekova attabhāvo jhāyeyya, dussīlo pana hutvā saddhādeyyaṃ bhuñjitvā anekānipi jātisatāni niraye uppajjeyyāti.
ஏகாத³ஸமஸுத்தவண்ணனா நிட்டி²தா.
Ekādasamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 11. ஆபாயிகஸுத்தங் • 11. Āpāyikasuttaṃ
