| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૬. અપ્પકસુત્તં
6. Appakasuttaṃ
૧૧૭. સાવત્થિનિદાનં. એકમન્તં નિસિન્નો ખો રાજા પસેનદિ કોસલો ભગવન્તં એતદવોચ – ‘‘ઇધ મય્હં, ભન્તે, રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ – ‘અપ્પકા તે સત્તા લોકસ્મિં યે ઉળારે ઉળારે ભોગે લભિત્વા ન ચેવ મજ્જન્તિ, ન ચ પમજ્જન્તિ, ન ચ કામેસુ ગેધં આપજ્જન્તિ, ન ચ સત્તેસુ વિપ્પટિપજ્જન્તિ. અથ ખો એતેવ બહુતરા સત્તા લોકસ્મિં યે ઉળારે ઉળારે ભોગે લભિત્વા મજ્જન્તિ ચેવ પમજ્જન્તિ , ચ કામેસુ ચ ગેધં આપજ્જન્તિ, સત્તેસુ ચ વિપ્પટિપજ્જન્તી’’’તિ.
117. Sāvatthinidānaṃ. Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘appakā te sattā lokasmiṃ ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṃ āpajjanti, na ca sattesu vippaṭipajjanti. Atha kho eteva bahutarā sattā lokasmiṃ ye uḷāre uḷāre bhoge labhitvā majjanti ceva pamajjanti , ca kāmesu ca gedhaṃ āpajjanti, sattesu ca vippaṭipajjantī’’’ti.
‘‘એવમેતં, મહારાજ, એવમેતં, મહારાજ! અપ્પકા તે, મહારાજ, સત્તા લોકસ્મિં, યે ઉળારે ઉળારે ભોગે લભિત્વા ન ચેવ મજ્જન્તિ, ન ચ પમજ્જન્તિ, ન ચ કામેસુ ગેધં આપજ્જન્તિ, ન ચ સત્તેસુ વિપ્પટિપજ્જન્તિ. અથ ખો એતેવ બહુતરા સત્તા લોકસ્મિં, યે ઉળારે ઉળારે ભોગે લભિત્વા મજ્જન્તિ ચેવ પમજ્જન્તિ ચ કામેસુ ચ ગેધં આપજ્જન્તિ, સત્તેસુ ચ વિપ્પટિપજ્જન્તી’’તિ. ઇદમવોચ…પે॰…
‘‘Evametaṃ, mahārāja, evametaṃ, mahārāja! Appakā te, mahārāja, sattā lokasmiṃ, ye uḷāre uḷāre bhoge labhitvā na ceva majjanti, na ca pamajjanti, na ca kāmesu gedhaṃ āpajjanti, na ca sattesu vippaṭipajjanti. Atha kho eteva bahutarā sattā lokasmiṃ, ye uḷāre uḷāre bhoge labhitvā majjanti ceva pamajjanti ca kāmesu ca gedhaṃ āpajjanti, sattesu ca vippaṭipajjantī’’ti. Idamavoca…pe…
‘‘સારત્તા કામભોગેસુ, ગિદ્ધા કામેસુ મુચ્છિતા;
‘‘Sārattā kāmabhogesu, giddhā kāmesu mucchitā;
અતિસારં ન બુજ્ઝન્તિ, મિગા કૂટંવ ઓડ્ડિતં;
Atisāraṃ na bujjhanti, migā kūṭaṃva oḍḍitaṃ;
પચ્છાસં કટુકં હોતિ, વિપાકો હિસ્સ પાપકો’’તિ.
Pacchāsaṃ kaṭukaṃ hoti, vipāko hissa pāpako’’ti.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૬. અપ્પકસુત્તવણ્ણના • 6. Appakasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૬. અપ્પકસુત્તવણ્ણના • 6. Appakasuttavaṇṇanā
