| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. தே³வதாவக்³கோ³
4. Devatāvaggo
1. அப்பமாத³கா³ரவஸுத்தங்
1. Appamādagāravasuttaṃ
32. அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் ஜேதவனங் ஓபா⁴ஸெத்வா யேன ப⁴க³வா தேனுபஸங்கமி ; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ² ஸா தே³வதா ப⁴க³வந்தங் ஏதத³வோச –
32. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca –
‘‘ஸத்திமே, ப⁴ந்தே, த⁴ம்மா பி⁴க்கு²னோ அபரிஹானாய ஸங்வத்தந்தி. கதமே ஸத்த? ஸத்து²கா³ரவதா, த⁴ம்மகா³ரவதா, ஸங்க⁴கா³ரவதா, ஸிக்கா²கா³ரவதா, ஸமாதி⁴கா³ரவதா, அப்பமாத³கா³ரவதா, படிஸந்தா²ரகா³ரவதா. இமே கோ², ப⁴ந்தே, ஸத்த த⁴ம்மா பி⁴க்கு²னோ அபரிஹானாய ஸங்வத்தந்தீ’’தி. இத³மவோச ஸா தே³வதா. ஸமனுஞ்ஞோ ஸத்தா² அஹோஸி. அத² கோ² ஸா தே³வதா ‘‘ஸமனுஞ்ஞோ மே ஸத்தா²’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யி.
‘‘Sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, appamādagāravatā, paṭisanthāragāravatā. Ime kho, bhante, satta dhammā bhikkhuno aparihānāya saṃvattantī’’ti. Idamavoca sā devatā. Samanuñño satthā ahosi. Atha kho sā devatā ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyi.
அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘இமங், பி⁴க்க²வே, ரத்திங் அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பங் ஜேதவனங் ஓபா⁴ஸெத்வா யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ², பி⁴க்க²வே, ஸா தே³வதா மங் ஏதத³வோச – ‘ஸத்திமே, ப⁴ந்தே, த⁴ம்மா பி⁴க்கு²னோ அபரிஹானாய ஸங்வத்தந்தி. கதமே ஸத்த? ஸத்து²கா³ரவதா, த⁴ம்மகா³ரவதா, ஸங்க⁴கா³ரவதா, ஸிக்கா²கா³ரவதா, ஸமாதி⁴கா³ரவதா, அப்பமாத³கா³ரவதா, படிஸந்தா²ரகா³ரவதா – இமே கோ², ப⁴ந்தே, ஸத்த த⁴ம்மா பி⁴க்கு²னோ அபரிஹானாய ஸங்வத்தந்தீ’தி. இத³மவோச, பி⁴க்க²வே, ஸா தே³வதா. இத³ங் வத்வா மங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யீ’’தி.
Atha kho bhagavā tassā rattiyā accayena bhikkhū āmantesi – ‘‘imaṃ, bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, appamādagāravatā, paṭisanthāragāravatā – ime kho, bhante, satta dhammā bhikkhuno aparihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
‘‘ஸத்து²க³ரு த⁴ம்மக³ரு, ஸங்கே⁴ ச திப்³ப³கா³ரவோ;
‘‘Satthugaru dhammagaru, saṅghe ca tibbagāravo;
‘‘அப்பமாத³க³ரு பி⁴க்கு², படிஸந்தா²ரகா³ரவோ;
‘‘Appamādagaru bhikkhu, paṭisanthāragāravo;
அப⁴ப்³போ³ பரிஹானாய, நிப்³பா³னஸ்ஸேவ ஸந்திகே’’தி. பட²மங்;
Abhabbo parihānāya, nibbānasseva santike’’ti. paṭhamaṃ;
Footnotes:
