| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. அப்பமாத³ஸுத்தவண்ணனா
7. Appamādasuttavaṇṇanā
128. ஸமதி⁴க்³க³ய்ஹாதி ஸம்மா அதிவிய க³ஹெத்வா, ஞாயேன விஸேஸதோ க³ண்ஹித்வா. காராபகஅப்பமாதோ³தி திண்ணங் புஞ்ஞகிரியவத்தூ²னங் பவத்தகஅப்பமாதோ³. ஸமவதா⁴னந்தி ஸமவரோத⁴ங் அந்தோக³த⁴ங். உபக்கே²பந்தி ப³ஹி அஹுத்வா பக்கி²பிதப்³ப³தங். ஸேஸபத³ஜாதானி விய அவ…பே॰… த⁴ம்மா ஸப்பதே³ஸத்தா. அப்பமாதே³ ஸமோதா⁴னங் க³ச்ச²ந்தி தஸ்ஸ நிப்பதே³ஸத்தா. அக்³க³ங் ஸெட்ட²ங் மஹந்தங் ஸேஸத⁴ம்மானங் அப்பமாதோ³. படிலாப⁴கட்டே²னாதி அதி⁴க³மஹேதுதாய. லோகியோபி ஸமானோதி காமாவசரோபி ஸமானோ. மஹக்³க³தானுத்தரானங் புப்³ப³பா⁴கே³ பவத்தஅப்பமாதோ³ ஹி இதா⁴தி⁴ப்பேதோ.
128.Samadhiggayhāti sammā ativiya gahetvā, ñāyena visesato gaṇhitvā. Kārāpakaappamādoti tiṇṇaṃ puññakiriyavatthūnaṃ pavattakaappamādo. Samavadhānanti samavarodhaṃ antogadhaṃ. Upakkhepanti bahi ahutvā pakkhipitabbataṃ. Sesapadajātāni viya ava…pe… dhammā sappadesattā. Appamāde samodhānaṃ gacchanti tassa nippadesattā. Aggaṃ seṭṭhaṃ mahantaṃ sesadhammānaṃappamādo. Paṭilābhakaṭṭhenāti adhigamahetutāya. Lokiyopi samānoti kāmāvacaropi samāno. Mahaggatānuttarānaṃ pubbabhāge pavattaappamādo hi idhādhippeto.
பஸங்ஸந்தி பண்டி³தாதி யோஜனா. அப்பமாத³ஸ்ஸ பாஸங்ஸபா⁴வே ஏகந்ததோ கத்தப்³ப³தாய பன ‘‘ஏதானீ’’திஆதி³னா காரணங் ஆஹ. இமிஸ்ஸா யோஜனாய ‘‘புஞ்ஞகிரியாஸூ’’தி பத³ஸ்ஸ ‘‘அப்பமத்தோ’’தி இமினா ஸம்ப³ந்தோ⁴. யஸ்மா பண்டி³தா அப்பமாத³ங் பஸங்ஸந்தி, யஸ்மா ச புஞ்ஞகிரியாஸு அப்பமத்தோ உபோ⁴ அத்தே² அதி⁴க்³க³ண்ஹாதி, தஸ்மா ஆயுஆதீ³னி பத்த²யந்தேன அப்பமாதோ³வ காதப்³போ³தி. து³தியயோஜனாய பன பண்டி³தா அப்பமாத³ங் பஸங்ஸந்தி. கத்த²? புஞ்ஞகிரியாஸு. கஸ்மாதி சே? அப்பமத்தோதிஆதி³. தேனாஹ ‘‘யஸ்மா…பே॰… அத்தோ²’’தி. அத்த²படிலாபா⁴தி தி³ட்ட²த⁴ம்மிகாதி³ஹிதபடிலாபா⁴.
Pasaṃsanti paṇḍitāti yojanā. Appamādassa pāsaṃsabhāve ekantato kattabbatāya pana ‘‘etānī’’tiādinā kāraṇaṃ āha. Imissā yojanāya ‘‘puññakiriyāsū’’ti padassa ‘‘appamatto’’ti iminā sambandho. Yasmā paṇḍitā appamādaṃ pasaṃsanti, yasmā ca puññakiriyāsu appamatto ubho atthe adhiggaṇhāti, tasmā āyuādīni patthayantena appamādova kātabboti. Dutiyayojanāya pana paṇḍitā appamādaṃ pasaṃsanti. Kattha? Puññakiriyāsu. Kasmāti ce? Appamattotiādi. Tenāha ‘‘yasmā…pe… attho’’ti. Atthapaṭilābhāti diṭṭhadhammikādihitapaṭilābhā.
அப்பமாத³ஸுத்தவண்ணனா நிட்டி²தா.
Appamādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. அப்பமாத³ஸுத்தங் • 7. Appamādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. அப்பமாத³ஸுத்தவண்ணனா • 7. Appamādasuttavaṇṇanā
