| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. அரஹந்தஸுத்தவண்ணனா
4. Arahantasuttavaṇṇanā
76. யத்தகா ஸத்தாவாஸாதி தஸ்மிங் தஸ்மிங் ஸத்தனிகாயே ஆவஸனட்டே²ன ஸத்தா ஏவ ஸத்தாவாஸா. தேன யத்தகா ஸத்தாவாஸா, தேஹி ஸப்³பே³ஹிபி ஏதே அக்³கா³ ஏதே ஸெட்டா², யே இமே அரஹந்தாதி த³ஸ்ஸேதி. புரிமனயேனேவாதி புரிமஸ்மிங் ஸத்தட்டா²னகோஸல்லஸுத்தே வுத்தனயேன.
76.Yattakā sattāvāsāti tasmiṃ tasmiṃ sattanikāye āvasanaṭṭhena sattā eva sattāvāsā. Tena yattakā sattāvāsā, tehi sabbehipi ete aggā ete seṭṭhā, ye ime arahantāti dasseti. Purimanayenevāti purimasmiṃ sattaṭṭhānakosallasutte vuttanayena.
தத³த்த²பரிதீ³பனாஹீதி ‘‘பஞ்சக்க²ந்தே⁴ பரிஞ்ஞாய. தண்ஹா தேஸங் ந விஜ்ஜதி. அஸ்மிமானோ ஸமுச்சி²ன்னோ’’திஆதி³னா தஸ்ஸ யதா²னித்³தி³ட்ட²ஸ்ஸ ஸுத்தஸ்ஸ அத்த²தீ³பனாஹி சேவ ‘‘அனேஜங் தே அனுப்பத்தா, சித்தங் தேஸங் அனாவில’’ந்திஆதி³னா விஸேஸத்த²பரிதீ³பனாஹி ச. ஜா²னமக்³க³ப²லபரியாபன்னங் அதிஸயிதஸுக²ங் ஏதேஸமத்தீ²தி ஸுகி²னோதி ஆஹ ‘‘ஜா²ன…பே॰… ஸுகி²தா’’தி. தண்ஹா தேஸங் ந விஜ்ஜதீதி எத்த² தேஸங் அபாயது³க்க²ஜனிகா தண்ஹா ந விஜ்ஜதீதி வுத்தங். வட்டமூலிகாய தண்ஹாய அபா⁴வா ‘‘நந்தீ³ தேஸங் ந விஜ்ஜதீ’’தி எத்த² வுச்சதீதி. இமஸ்ஸபீதி பி-ஸத்³தே³ன து³க்க²ஸ்ஸாபா⁴வேனபீதி து³க்கா²பா⁴வோ விய வட்டமூலிகதண்ஹாபா⁴வோ ஸம்பிண்டீ³யதீதி த³ட்ட²ப்³ப³ங். தேன ஹி தே அனுபாதி³ஸேஸனிப்³பா³னப்பத்தியா அச்சந்தஸுகி²தா ஏவாதி வுச்சந்தீதி. ‘‘ஸெய்யோஹமஸ்மீ’’திஆதி³னயப்பவத்தியா நவவிதோ⁴. ஞாணேனாதி அக்³க³மக்³க³ஞ்ஞாணேன.
Tadatthaparidīpanāhīti ‘‘pañcakkhandhe pariññāya. Taṇhā tesaṃ na vijjati. Asmimāno samucchinno’’tiādinā tassa yathāniddiṭṭhassa suttassa atthadīpanāhi ceva ‘‘anejaṃ te anuppattā, cittaṃ tesaṃ anāvila’’ntiādinā visesatthaparidīpanāhi ca. Jhānamaggaphalapariyāpannaṃ atisayitasukhaṃ etesamatthīti sukhinoti āha ‘‘jhāna…pe… sukhitā’’ti. Taṇhā tesaṃ na vijjatīti ettha tesaṃ apāyadukkhajanikā taṇhā na vijjatīti vuttaṃ. Vaṭṭamūlikāya taṇhāya abhāvā ‘‘nandī tesaṃ na vijjatī’’ti ettha vuccatīti. Imassapīti pi-saddena dukkhassābhāvenapīti dukkhābhāvo viya vaṭṭamūlikataṇhābhāvo sampiṇḍīyatīti daṭṭhabbaṃ. Tena hi te anupādisesanibbānappattiyā accantasukhitā evāti vuccantīti. ‘‘Seyyohamasmī’’tiādinayappavattiyā navavidho. Ñāṇenāti aggamaggaññāṇena.
அரஹத்தங் அனுப்பத்தா. அலித்தாதி அமக்கி²தா. ப்³ரஹ்மபூ⁴தாதி ப்³ரஹ்மபா⁴வங் பத்தா, ப்³ரஹ்மதோ வா அரியமக்³க³ஞாணதோ பூ⁴தா அரியாய ஜாதியா ஜாதா. ஸத்த ஸத்³த⁴ம்மா கோ³சரோ பவத்திட்டா²னங் ஏதேஸந்தி ஸத்தஸத்³த⁴ம்மகோ³சரா.
Arahattaṃ anuppattā. Alittāti amakkhitā. Brahmabhūtāti brahmabhāvaṃ pattā, brahmato vā ariyamaggañāṇato bhūtā ariyāya jātiyā jātā. Satta saddhammā gocaro pavattiṭṭhānaṃ etesanti sattasaddhammagocarā.
நிராஸங்கசாரோ நாம க³ஹிதோ குதோசிபி தேஸங் ஆஸங்காய அபா⁴வதோ. ஸம்மாதி³ட்டி²ஆதீ³ஹி த³ஸஹி அங்கே³ஹி ஸம்மாவிமுத்தி-ஸம்மாஞாணபரியோஸானேஹி. ‘‘ஆகு³ங் ந கரோதீ’’திஆதீ³ஹி சதூஹி காரணேஹி. தண்ஹா தேஸங் ந விஜ்ஜதீதி இத³ம்பி தண்ஹாபஹானஸ்ஸ ப³ஹூபகாரதாத³ஸ்ஸனங். தேனாஹ ‘‘தா³ஸகாரிகா தண்ஹாபி தேஸங் நத்தீ²’’தி.
Nirāsaṅkacāro nāma gahito kutocipi tesaṃ āsaṅkāya abhāvato. Sammādiṭṭhiādīhi dasahi aṅgehi sammāvimutti-sammāñāṇapariyosānehi. ‘‘Āguṃ na karotī’’tiādīhi catūhi kāraṇehi. Taṇhā tesaṃ na vijjatīti idampi taṇhāpahānassa bahūpakāratādassanaṃ. Tenāha ‘‘dāsakārikā taṇhāpi tesaṃ natthī’’ti.
ந விகம்பந்தி ‘‘ஸெய்யோஹமஸ்மீ’’திஆதி³னா.
Navikampanti ‘‘seyyohamasmī’’tiādinā.
உத்³த⁴ங் திரியங் அபாசீனந்தி எத்த² ‘‘உத்³த⁴ங் வுச்சதீ’’திஆதி³னா ரூபமுகே²ன அத்தபா⁴வங் க³ஹெத்வா பவத்தோ பட²மனயோ. காலத்தயவஸேன த⁴ம்மப்பவத்திங் க³ஹெத்வா பவத்தோ து³தியனயோ. டா²னவஸேன ஸகலலோகதா⁴துங் க³ஹெத்வா பவத்தோ ததியனயோ. பு³த்³தா⁴தி சத்தாரி ஸச்சானி பு³த்³த⁴வந்தோ.
Uddhaṃtiriyaṃ apācīnanti ettha ‘‘uddhaṃ vuccatī’’tiādinā rūpamukhena attabhāvaṃ gahetvā pavatto paṭhamanayo. Kālattayavasena dhammappavattiṃ gahetvā pavatto dutiyanayo. Ṭhānavasena sakalalokadhātuṃ gahetvā pavatto tatiyanayo. Buddhāti cattāri saccāni buddhavanto.
ஸீஹனாத³ஸமோதா⁴னந்தி ஸீஹனாதா³னங் ஸங்கலனங். லோகே அத்தனோ உத்தரிதரஸ்ஸாபா⁴வா அனுத்தரா. உத்தரோ தாவ திட்ட²து புரிஸோ, ஸதி³ஸோபி தாவ நத்தீ²தி அஸதி³ஸா. ஸகலம்பி ப⁴வங் உத்தரித்வா ப⁴வபிட்டே² ட²த்வா விமுத்திஸுகே²ன ஸுகி²தத்தாதி³வஸேன ஏகவீஸதியாகாரேஹி ஸீஹனாத³ங் நத³ந்தி.
Sīhanādasamodhānanti sīhanādānaṃ saṃkalanaṃ. Loke attano uttaritarassābhāvā anuttarā. Uttaro tāva tiṭṭhatu puriso, sadisopi tāva natthīti asadisā. Sakalampi bhavaṃ uttaritvā bhavapiṭṭhe ṭhatvā vimuttisukhena sukhitattādivasena ekavīsatiyākārehi sīhanādaṃ nadanti.
அரஹந்தஸுத்தவண்ணனா நிட்டி²தா.
Arahantasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அரஹந்தஸுத்தங் • 4. Arahantasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அரஹந்தஸுத்தவண்ணனா • 4. Arahantasuttavaṇṇanā
