| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. ஆரக்க²ஸுத்தங்
7. Ārakkhasuttaṃ
117. ‘‘சதூஸு, பி⁴க்க²வே, டா²னேஸு அத்தரூபேன அப்பமாதோ³ ஸதி சேதஸோ ஆரக்கோ² கரணீயோ. கதமேஸு சதூஸு? ‘மா மே ரஜனீயேஸு த⁴ம்மேஸு சித்தங் ரஜ்ஜீ’தி அத்தரூபேன அப்பமாதோ³ ஸதி சேதஸோ ஆரக்கோ² கரணீயோ; ‘மா மே தோ³ஸனீயேஸு த⁴ம்மேஸு சித்தங் து³ஸ்ஸீ’தி அத்தரூபேன அப்பமாதோ³ ஸதி சேதஸோ ஆரக்கோ² கரணீயோ; ‘மா மே மோஹனீயேஸு த⁴ம்மேஸு சித்தங் முய்ஹீ’தி அத்தரூபேன அப்பமாதோ³ ஸதி சேதஸோ ஆரக்கோ² கரணீயோ; ‘மா மே மத³னீயேஸு த⁴ம்மேஸு சித்தங் மஜ்ஜீ’தி அத்தரூபேன அப்பமாதோ³ ஸதி சேதஸோ ஆரக்கோ² கரணீயோ.
117. ‘‘Catūsu, bhikkhave, ṭhānesu attarūpena appamādo sati cetaso ārakkho karaṇīyo. Katamesu catūsu? ‘Mā me rajanīyesu dhammesu cittaṃ rajjī’ti attarūpena appamādo sati cetaso ārakkho karaṇīyo; ‘mā me dosanīyesu dhammesu cittaṃ dussī’ti attarūpena appamādo sati cetaso ārakkho karaṇīyo; ‘mā me mohanīyesu dhammesu cittaṃ muyhī’ti attarūpena appamādo sati cetaso ārakkho karaṇīyo; ‘mā me madanīyesu dhammesu cittaṃ majjī’ti attarūpena appamādo sati cetaso ārakkho karaṇīyo.
‘‘யதோ கோ², பி⁴க்க²வே, பி⁴க்கு²னோ ரஜனீயேஸு த⁴ம்மேஸு சித்தங் ந ரஜ்ஜதி வீதராக³த்தா, தோ³ஸனீயேஸு த⁴ம்மேஸு சித்தங் ந து³ஸ்ஸதி வீததோ³ஸத்தா, மோஹனீயேஸு த⁴ம்மேஸு சித்தங் ந முய்ஹதி வீதமோஹத்தா, மத³னீயேஸு த⁴ம்மேஸு சித்தங் ந மஜ்ஜதி வீதமத³த்தா, ஸோ ந ச²ம்ப⁴தி ந கம்பதி ந வேத⁴தி ந ஸந்தாஸங் ஆபஜ்ஜதி, ந ச பன ஸமணவசனஹேதுபி க³ச்ச²தீ’’தி. ஸத்தமங்.
‘‘Yato kho, bhikkhave, bhikkhuno rajanīyesu dhammesu cittaṃ na rajjati vītarāgattā, dosanīyesu dhammesu cittaṃ na dussati vītadosattā, mohanīyesu dhammesu cittaṃ na muyhati vītamohattā, madanīyesu dhammesu cittaṃ na majjati vītamadattā, so na chambhati na kampati na vedhati na santāsaṃ āpajjati, na ca pana samaṇavacanahetupi gacchatī’’ti. Sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. ஆரக்க²ஸுத்தவண்ணனா • 7. Ārakkhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. கேஸிஸுத்தாதி³வண்ணனா • 1-7. Kesisuttādivaṇṇanā
