| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. அரக்கெ²ய்யஸுத்தங்
5. Arakkheyyasuttaṃ
58. ‘‘சத்தாரிமானி, பி⁴க்க²வே, ததா²க³தஸ்ஸ அரக்கெ²ய்யானி, தீஹி ச அனுபவஜ்ஜோ. கதமானி சத்தாரி ததா²க³தஸ்ஸ அரக்கெ²ய்யானி? பரிஸுத்³த⁴காயஸமாசாரோ, பி⁴க்க²வே, ததா²க³தோ; நத்தி² ததா²க³தஸ்ஸ காயது³ச்சரிதங் யங் ததா²க³தோ ரக்கெ²ய்ய – ‘மா மே இத³ங் பரோ அஞ்ஞாஸீ’தி. பரிஸுத்³த⁴வசீஸமாசாரோ, பி⁴க்க²வே, ததா²க³தோ; நத்தி² ததா²க³தஸ்ஸ வசீது³ச்சரிதங் யங் ததா²க³தோ ரக்கெ²ய்ய – ‘மா மே இத³ங் பரோ அஞ்ஞாஸீ’தி. பரிஸுத்³த⁴மனோஸமாசாரோ, பி⁴க்க²வே, ததா²க³தோ; நத்தி² ததா²க³தஸ்ஸ மனோது³ச்சரிதங் யங் ததா²க³தோ ரக்கெ²ய்ய – ‘மா மே இத³ங் பரோ அஞ்ஞாஸீ’தி. பரிஸுத்³தா⁴ஜீவோ, பி⁴க்க²வே, ததா²க³தோ; நத்தி² ததா²க³தஸ்ஸ மிச்சா²ஆஜீவோ யங் ததா²க³தோ ரக்கெ²ய்ய – ‘மா மே இத³ங் பரோ அஞ்ஞாஸீ’தி. இமானி சத்தாரி ததா²க³தஸ்ஸ அரக்கெ²ய்யானி.
58. ‘‘Cattārimāni, bhikkhave, tathāgatassa arakkheyyāni, tīhi ca anupavajjo. Katamāni cattāri tathāgatassa arakkheyyāni? Parisuddhakāyasamācāro, bhikkhave, tathāgato; natthi tathāgatassa kāyaduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhavacīsamācāro, bhikkhave, tathāgato; natthi tathāgatassa vacīduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhamanosamācāro, bhikkhave, tathāgato; natthi tathāgatassa manoduccaritaṃ yaṃ tathāgato rakkheyya – ‘mā me idaṃ paro aññāsī’ti. Parisuddhājīvo, bhikkhave, tathāgato; natthi tathāgatassa micchāājīvo yaṃ tathāgato rakkheyya – ‘mā me idaṃ paro aññāsī’ti. Imāni cattāri tathāgatassa arakkheyyāni.
‘‘கதமேஹி தீஹி அனுபவஜ்ஜோ? ஸ்வாக்கா²தத⁴ம்மோ , பி⁴க்க²வே, ததா²க³தோ. தத்ர வத மங் ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மிங் ஸஹத⁴ம்மேன படிசோதெ³ஸ்ஸதி – ‘இதிபி த்வங் ந ஸ்வாக்கா²தத⁴ம்மோ’தி. நிமித்தமேதங், பி⁴க்க²வே, ந ஸமனுபஸ்ஸாமி. ஏதமஹங் 1, பி⁴க்க²வே , நிமித்தங் அஸமனுபஸ்ஸந்தோ கே²மப்பத்தோ அப⁴யப்பத்தோ வேஸாரஜ்ஜப்பத்தோ விஹராமி.
‘‘Katamehi tīhi anupavajjo? Svākkhātadhammo , bhikkhave, tathāgato. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi tvaṃ na svākkhātadhammo’ti. Nimittametaṃ, bhikkhave, na samanupassāmi. Etamahaṃ 2, bhikkhave , nimittaṃ asamanupassanto khemappatto abhayappatto vesārajjappatto viharāmi.
‘‘ஸுபஞ்ஞத்தா கோ² பன மே, பி⁴க்க²வே, ஸாவகானங் நிப்³பா³னகா³மினீ படிபதா³. யதா²படிபன்னா மம ஸாவகா ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. தத்ர வத மங் ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மிங் ஸஹத⁴ம்மேன படிசோதெ³ஸ்ஸதி – ‘இதிபி தே ந ஸுபஞ்ஞத்தா ஸாவகானங் நிப்³பா³னகா³மினீ படிபதா³. யதா²படிபன்னா தவ ஸாவகா ஆஸவானங் க²யா…பே॰… ஸச்சி²கத்வா உபஸம்பஜ்ஜ விஹரந்தீ’தி. நிமித்தமேதங், பி⁴க்க²வே, ந ஸமனுபஸ்ஸாமி . ஏதமஹங், பி⁴க்க²வே, நிமித்தங் அஸமனுபஸ்ஸந்தோ கே²மப்பத்தோ அப⁴யப்பத்தோ வேஸாரஜ்ஜப்பத்தோ விஹராமி.
‘‘Supaññattā kho pana me, bhikkhave, sāvakānaṃ nibbānagāminī paṭipadā. Yathāpaṭipannā mama sāvakā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi te na supaññattā sāvakānaṃ nibbānagāminī paṭipadā. Yathāpaṭipannā tava sāvakā āsavānaṃ khayā…pe… sacchikatvā upasampajja viharantī’ti. Nimittametaṃ, bhikkhave, na samanupassāmi . Etamahaṃ, bhikkhave, nimittaṃ asamanupassanto khemappatto abhayappatto vesārajjappatto viharāmi.
‘‘அனேகஸதா கோ² பன மே, பி⁴க்க²வே, ஸாவகபரிஸா ஆஸவானங் க²யா…பே॰… ஸச்சி²கத்வா உபஸம்பஜ்ஜ விஹரந்தி. தத்ர வத மங் ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மிங் ஸஹத⁴ம்மேன படிசோதெ³ஸ்ஸதி – ‘இதிபி தே ந அனேகஸதா ஸாவகபரிஸா ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’தி. நிமித்தமேதங், பி⁴க்க²வே, ந ஸமனுபஸ்ஸாமி. ஏதமஹங், பி⁴க்க²வே, நிமித்தங் அஸமனுபஸ்ஸந்தோ கே²மப்பத்தோ அப⁴யப்பத்தோ வேஸாரஜ்ஜப்பத்தோ விஹராமி. இமேஹி தீஹி அனுபவஜ்ஜோ.
‘‘Anekasatā kho pana me, bhikkhave, sāvakaparisā āsavānaṃ khayā…pe… sacchikatvā upasampajja viharanti. Tatra vata maṃ samaṇo vā brāhmaṇo vā devo vā māro vā brahmā vā koci vā lokasmiṃ sahadhammena paṭicodessati – ‘itipi te na anekasatā sāvakaparisā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharantī’ti. Nimittametaṃ, bhikkhave, na samanupassāmi. Etamahaṃ, bhikkhave, nimittaṃ asamanupassanto khemappatto abhayappatto vesārajjappatto viharāmi. Imehi tīhi anupavajjo.
‘‘இமானி கோ², பி⁴க்க²வே, சத்தாரி ததா²க³தஸ்ஸ அரக்கெ²ய்யானி, இமேஹி ச தீஹி அனுபவஜ்ஜோ’’தி. பஞ்சமங்.
‘‘Imāni kho, bhikkhave, cattāri tathāgatassa arakkheyyāni, imehi ca tīhi anupavajjo’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. அரக்கெ²ய்யஸுத்தவண்ணனா • 5. Arakkheyyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-7. ஸீஹஸேனாபதிஸுத்தாதி³வண்ணனா • 4-7. Sīhasenāpatisuttādivaṇṇanā
