| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. அரணவிப⁴ங்க³ஸுத்தவண்ணனா
9. Araṇavibhaṅgasuttavaṇṇanā
323. ஏவங் மே ஸுதந்தி அரணவிப⁴ங்க³ஸுத்தங். தத்த² நேவுஸ்ஸாதெ³ய்ய ந அபஸாதெ³ய்யாதி கே³ஹஸிதவஸேன கஞ்சி புக்³க³லங் நேவ உக்கி²பெய்ய ந அவக்கி²பெய்ய. த⁴ம்மமேவ தே³ஸெய்யாதி ஸபா⁴வமேவ கதெ²ய்ய. ஸுக²வினிச்ச²யந்தி வினிச்சி²தஸுக²ங். ரஹோ வாத³ந்தி பரம்முகா² அவண்ணங், பிஸுணவாசந்தி அத்தோ². ஸம்முகா² ந கீ²ணந்தி ஸம்முகா²பி கீ²ணங் ஆகிண்ணங் ஸங்கிலிட்ட²ங் வாசங் ந ப⁴ணெய்ய. நாபி⁴னிவேஸெய்யாதி ந அதி⁴ட்ட²ஹித்வா ஆதா³ய வோஹரெய்ய. ஸமஞ்ஞந்தி லோகஸமஞ்ஞங் லோகபண்ணத்திங். நாதிதா⁴வெய்யாதி நாதிக்கமெய்ய.
323.Evaṃme sutanti araṇavibhaṅgasuttaṃ. Tattha nevussādeyya na apasādeyyāti gehasitavasena kañci puggalaṃ neva ukkhipeyya na avakkhipeyya. Dhammameva deseyyāti sabhāvameva katheyya. Sukhavinicchayanti vinicchitasukhaṃ. Raho vādanti parammukhā avaṇṇaṃ, pisuṇavācanti attho. Sammukhā na khīṇanti sammukhāpi khīṇaṃ ākiṇṇaṃ saṃkiliṭṭhaṃ vācaṃ na bhaṇeyya. Nābhiniveseyyāti na adhiṭṭhahitvā ādāya vohareyya. Samaññanti lokasamaññaṃ lokapaṇṇattiṃ. Nātidhāveyyāti nātikkameyya.
324. காமபடிஸந்தி⁴ஸுகி²னோதி காமபடிஸந்தி⁴னா காமூபஸங்ஹிதேன ஸுகே²ன ஸுகி²தஸ்ஸ. ஸது³க்கோ²தி விபாகது³க்கே²ன ஸங்கிலேஸது³க்கே²னபி ஸது³க்கோ². ஸஉபகா⁴தோதி விபாகூபகா⁴தகிலேஸூபகா⁴தேஹேவ ஸஉபகா⁴தோ. ததா² ஸபரிளாஹோ. மிச்சா²படிபதா³தி அயாதா²வபடிபதா³ அகுஸலபடிபதா³.
324.Kāmapaṭisandhisukhinoti kāmapaṭisandhinā kāmūpasaṃhitena sukhena sukhitassa. Sadukkhoti vipākadukkhena saṃkilesadukkhenapi sadukkho. Saupaghātoti vipākūpaghātakilesūpaghāteheva saupaghāto. Tathā sapariḷāho. Micchāpaṭipadāti ayāthāvapaṭipadā akusalapaṭipadā.
326. இத்தே²கே அபஸாதே³தீதி ஏவங் கே³ஹஸிதவஸேன ஏகச்சே புக்³க³லே அபஸாதே³தி. உஸ்ஸாத³னேபி ஏஸேவ நயோ. ப⁴வஸங்யோஜனந்தி ப⁴வப³ந்த⁴னங், தண்ஹாயேதங் நாமங்.
326.Ittheke apasādetīti evaṃ gehasitavasena ekacce puggale apasādeti. Ussādanepi eseva nayo. Bhavasaṃyojananti bhavabandhanaṃ, taṇhāyetaṃ nāmaṃ.
ஸுபூ⁴தித்தே²ரோ கிர இமங் சதுக்கங் நிஸ்ஸாய ஏதத³க்³கே³ ட²பிதோ. ப⁴க³வதோ ஹி த⁴ம்மங் தே³ஸெந்தஸ்ஸ புக்³க³லானங் உஸ்ஸாத³னாஅபஸாத³னா பஞ்ஞாயந்தி, ததா² ஸாரிபுத்தத்தே²ராதீ³னங். ஸுபூ⁴தித்தே²ரஸ்ஸ பன த⁴ம்மதே³ஸனாய ‘‘அயங் புக்³க³லோ அப்படிபன்னகோ அனாராத⁴கோ’’தி வா, ‘‘அயங் ஸீலவா கு³ணவா லஜ்ஜிபேஸலோ ஆசாரஸம்பன்னோ’’தி வா நத்தி², த⁴ம்மதே³ஸனாய பனஸ்ஸ ‘‘அயங் மிச்சா²படிபதா³, அயங் ஸம்மாபடிபதா³’’த்வேவ பஞ்ஞாயதி. தஸ்மா ப⁴க³வா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் அரணவிஹாரீனங் யதி³த³ங் ஸுபூ⁴தீ’’தி ஆஹ.
Subhūtitthero kira imaṃ catukkaṃ nissāya etadagge ṭhapito. Bhagavato hi dhammaṃ desentassa puggalānaṃ ussādanāapasādanā paññāyanti, tathā sāriputtattherādīnaṃ. Subhūtittherassa pana dhammadesanāya ‘‘ayaṃ puggalo appaṭipannako anārādhako’’ti vā, ‘‘ayaṃ sīlavā guṇavā lajjipesalo ācārasampanno’’ti vā natthi, dhammadesanāya panassa ‘‘ayaṃ micchāpaṭipadā, ayaṃ sammāpaṭipadā’’tveva paññāyati. Tasmā bhagavā ‘‘etadaggaṃ, bhikkhave, mama sāvakānaṃ bhikkhūnaṃ araṇavihārīnaṃ yadidaṃ subhūtī’’ti āha.
329. காலஞ்ஞூ அஸ்ஸாதி அஸம்பத்தே ச அதிக்கந்தே ச காலே அகதெ²த்வா ‘‘இதா³னி வுச்சமானங் மஹாஜனோ க³ண்ஹிஸ்ஸதீ’’தி யுத்தபத்தகாலங் ஞத்வாவ பரம்முகா² அவண்ணங் பா⁴ஸெய்ய. கீ²ணவாதே³பி ஏஸேவ நயோ.
329.Kālaññūassāti asampatte ca atikkante ca kāle akathetvā ‘‘idāni vuccamānaṃ mahājano gaṇhissatī’’ti yuttapattakālaṃ ñatvāva parammukhā avaṇṇaṃ bhāseyya. Khīṇavādepi eseva nayo.
330. உபஹஞ்ஞதீதி கா⁴தியதி. ஸரோபி உபஹஞ்ஞதீதி ஸத்³தோ³பி பி⁴ஜ்ஜதி. ஆதுரீயதீதி ஆதுரோ ஹோதி கே³லஞ்ஞப்பத்தோ ஸாபா³தோ⁴. அவிஸ்ஸட்ட²ந்தி விஸ்ஸட்ட²ங் அபலிபு³த்³த⁴ங் ந ஹோதி.
330.Upahaññatīti ghātiyati. Saropi upahaññatīti saddopi bhijjati. Āturīyatīti āturo hoti gelaññappatto sābādho. Avissaṭṭhanti vissaṭṭhaṃ apalibuddhaṃ na hoti.
331. ததே³வாதி தங்யேவ பா⁴ஜனங். அபி⁴னிவிஸ்ஸ வோஹரதீதி பத்தந்தி ஸஞ்ஜானநஜனபத³ங் க³ந்த்வா ‘‘பத்தங் ஆஹரத² தோ⁴வதா²’’தி ஸுத்வா ‘‘அந்த⁴பா³லபுது²ஜ்ஜனோ, நயித³ங் பத்தங், பாதி நமேஸா, ஏவங் வதா³ஹீ’’தி அபி⁴னிவிஸ்ஸ வோஹரதி. ஏவங் ஸப்³ப³பதே³ஹி யோஜேதப்³ப³ங். அதிஸாரோதி அதிதா⁴வனங்.
331.Tadevāti taṃyeva bhājanaṃ. Abhinivissa voharatīti pattanti sañjānanajanapadaṃ gantvā ‘‘pattaṃ āharatha dhovathā’’ti sutvā ‘‘andhabālaputhujjano, nayidaṃ pattaṃ, pāti namesā, evaṃ vadāhī’’ti abhinivissa voharati. Evaṃ sabbapadehi yojetabbaṃ. Atisāroti atidhāvanaṃ.
332. ததா² ததா² வோஹரதி அபராமஸந்தி அம்ஹாகங் ஜனபதே³ பா⁴ஜனங் பாதீதி வுச்சதி, இமே பன நங் பத்தந்தி வத³ந்தீதி ததோ பட்டா²ய ஜனபத³வோஹாரங் முஞ்சித்வா பத்தங் பத்தந்தேவ அபராமஸந்தோ வோஹரதி. ஸேஸபதே³ஸுபி ஏஸேவ நயோ.
332.Tathā tathā voharati aparāmasanti amhākaṃ janapade bhājanaṃ pātīti vuccati, ime pana naṃ pattanti vadantīti tato paṭṭhāya janapadavohāraṃ muñcitvā pattaṃ pattanteva aparāmasanto voharati. Sesapadesupi eseva nayo.
333. இதா³னி மரியாத³பா⁴ஜனீயங் கரொந்தோ தத்ர, பி⁴க்க²வேதிஆதி³மாஹ. தத்த² ஸரணோதி ஸரஜோ ஸகிலேஸோ. அரணோதி அரஜோ நிக்கிலேஸோ. ஸுபூ⁴தி ச பன, பி⁴க்க²வேதி அயங் தே²ரோ த்³வீஸு டா²னேஸு ஏதத³க்³க³ங் ஆருள்ஹோ ‘‘அரணவிஹாரீனங் யதி³த³ங் ஸுபூ⁴தி, த³க்கி²ணெய்யானங் யதி³த³ங் ஸுபூ⁴தீ’’தி (அ॰ நி॰ 1.202).
333. Idāni mariyādabhājanīyaṃ karonto tatra, bhikkhavetiādimāha. Tattha saraṇoti sarajo sakileso. Araṇoti arajo nikkileso. Subhūti ca pana, bhikkhaveti ayaṃ thero dvīsu ṭhānesu etadaggaṃ āruḷho ‘‘araṇavihārīnaṃ yadidaṃ subhūti, dakkhiṇeyyānaṃ yadidaṃ subhūtī’’ti (a. ni. 1.202).
த⁴ம்மஸேனாபதி கிர வத்து²ங் ஸோதே⁴தி, ஸுபூ⁴தித்தே²ரோ த³க்கி²ணங் ஸோதே⁴தி. ததா² ஹி த⁴ம்மஸேனாபதி பிண்டா³ய சரந்தோ கே³ஹத்³வாரே டி²தோ யாவ பி⁴க்க²ங் ஆஹரந்தி, தாவ புப்³ப³பா⁴கே³ பரிச்சி²ந்தி³த்வா நிரோத⁴ங் ஸமாபஜ்ஜதி, நிரோதா⁴ வுட்டா²ய தெ³ய்யத⁴ம்மங் படிக்³க³ண்ஹாதி. ஸுபூ⁴தித்தே²ரோ ச ததே²வ மெத்தாஜா²னங் ஸமாபஜ்ஜதி, மெத்தாஜா²னா வுட்டா²ய தெ³ய்யத⁴ம்மங் படிக்³க³ண்ஹாதி. ஏவங் பன காதுங் ஸக்காதி. ஆம ஸக்கா, நேவ அச்ச²ரியஞ்சேதங், யங் மஹாபி⁴ஞ்ஞப்பத்தா ஸாவகா ஏவங் கரெய்யுங். இமஸ்மிம்பி ஹி தம்ப³பண்ணிதீ³பே போராணகராஜகாலே பிங்க³லபு³த்³த⁴ரக்கி²தத்தே²ரோ நாம உத்தரகா³மங் நிஸ்ஸாய விஹாஸி. தத்த² ஸத்த குலஸதானி ஹொந்தி, ஏகம்பி தங் குலத்³வாரங் நத்தி², யத்த² தே²ரோ ஸமாபத்திங் ந ஸமாபஜ்ஜி. ஸேஸங் ஸப்³ப³த்த² உத்தானமேவாதி.
Dhammasenāpati kira vatthuṃ sodheti, subhūtitthero dakkhiṇaṃ sodheti. Tathā hi dhammasenāpati piṇḍāya caranto gehadvāre ṭhito yāva bhikkhaṃ āharanti, tāva pubbabhāge paricchinditvā nirodhaṃ samāpajjati, nirodhā vuṭṭhāya deyyadhammaṃ paṭiggaṇhāti. Subhūtitthero ca tatheva mettājhānaṃ samāpajjati, mettājhānā vuṭṭhāya deyyadhammaṃ paṭiggaṇhāti. Evaṃ pana kātuṃ sakkāti. Āma sakkā, neva acchariyañcetaṃ, yaṃ mahābhiññappattā sāvakā evaṃ kareyyuṃ. Imasmimpi hi tambapaṇṇidīpe porāṇakarājakāle piṅgalabuddharakkhitatthero nāma uttaragāmaṃ nissāya vihāsi. Tattha satta kulasatāni honti, ekampi taṃ kuladvāraṃ natthi, yattha thero samāpattiṃ na samāpajji. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அரணவிப⁴ங்க³ஸுத்தவண்ணனா நிட்டி²தா.
Araṇavibhaṅgasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. அரணவிப⁴ங்க³ஸுத்தங் • 9. Araṇavibhaṅgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. அரணவிப⁴ங்க³ஸுத்தவண்ணனா • 9. Araṇavibhaṅgasuttavaṇṇanā
