| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. அரஞ்ஞஸுத்தவண்ணனா
10. Araññasuttavaṇṇanā
10. ஸந்தகிலேஸானந்தி வூபஸந்தகிலேஸபரிளாஹானங். யஸ்மா ஸீலாதி³கு³ணஸம்ப⁴வங் ததோ ஏவ ப⁴யஸந்தஞ்ச உபாதா³ய பண்டி³தா ‘‘ஸந்தோ’’தி வுச்சந்தி, தஸ்மா வுத்தங் ‘‘பண்டி³தானங் வா’’தி. தேனாஹ ‘‘ஸந்தோ ஹவே’’திஆதி³. ஸெட்ட²சாரீனந்தி ஸெட்ட²சரியங் சரந்தானங். யஸ்மா புது²ஜ்ஜனகல்யாணதோ பட்டா²ய பி⁴க்கு² மக்³க³ப்³ரஹ்மசரியவாஸங் வஸதி நாம, தஸ்மா ஆஹ ‘‘மக்³க³ப்³ரஹ்மசரியவாஸங் வஸந்தான’’ந்தி. அரியானங் பன முக²வண்ணஸ்ஸ பஸீத³னே வத்தப்³ப³மேவ நத்தி². மூலகம்மட்டா²னந்தி பாரிஹாரியகம்மட்டா²னங். விஸபா⁴க³ஸந்ததீதி நானாரம்மணேஸு பவத்தசித்தஸந்ததி. ஸா ஹி விக்கே²பப்³யாகுலதாய அப்பஸன்னா ஸமாஹிதசித்தஸந்ததியா விஸபா⁴க³ஸந்ததி. ஓக்கமதீதி ஸமாதி⁴ஸபா⁴கா³ சித்தஸந்ததி ஸமத²வீதி²ங் அனுபவிஸதி. சித்தங் பஸீத³தீதி கம்மட்டா²னநிரதங் பா⁴வனாசித்தங் ஸந்தா⁴யாஹ, தங் பஸன்னங் ஹுத்வா பவத்ததி. லோஹிதங் பஸீத³தீதி சித்தகாலுஸ்ஸியஸ்ஸாபா⁴வதோ லோஹிதங் அனாவிலங் ஹோதி. பரிஸுத்³தா⁴னி ஹொந்தி காரணஸ்ஸ பரிஸுத்³த⁴பா⁴வதோ. தாலப²லமுக²ஸ்ஸ விய முக²ஸ்ஸ வண்ணோ ஹோதீதி முக²-ஸத்³த³ஸ்ஸ ஆதி³ம்ஹி பமுத்தபதே³ன யோஜேதப்³போ³. ஏவஞ்ஹி சஸ்ஸ பமுத்தக்³க³ஹணங் ஸமத்தி²தங் ஹோதி தாலப²லமுக²ஸ்ஸ வண்ணஸம்பதா³ஸதி³ஸத்தா. திபூ⁴மகோ ஏவ தேபூ⁴மகோ.
10.Santakilesānanti vūpasantakilesapariḷāhānaṃ. Yasmā sīlādiguṇasambhavaṃ tato eva bhayasantañca upādāya paṇḍitā ‘‘santo’’ti vuccanti, tasmā vuttaṃ ‘‘paṇḍitānaṃ vā’’ti. Tenāha ‘‘santo have’’tiādi. Seṭṭhacārīnanti seṭṭhacariyaṃ carantānaṃ. Yasmā puthujjanakalyāṇato paṭṭhāya bhikkhu maggabrahmacariyavāsaṃ vasati nāma, tasmā āha ‘‘maggabrahmacariyavāsaṃ vasantāna’’nti. Ariyānaṃ pana mukhavaṇṇassa pasīdane vattabbameva natthi. Mūlakammaṭṭhānanti pārihāriyakammaṭṭhānaṃ. Visabhāgasantatīti nānārammaṇesu pavattacittasantati. Sā hi vikkhepabyākulatāya appasannā samāhitacittasantatiyā visabhāgasantati. Okkamatīti samādhisabhāgā cittasantati samathavīthiṃ anupavisati. Cittaṃ pasīdatīti kammaṭṭhānanirataṃ bhāvanācittaṃ sandhāyāha, taṃ pasannaṃ hutvā pavattati. Lohitaṃ pasīdatīti cittakālussiyassābhāvato lohitaṃ anāvilaṃ hoti. Parisuddhāni honti kāraṇassa parisuddhabhāvato. Tālaphalamukhassa viya mukhassa vaṇṇo hotīti mukha-saddassa ādimhi pamuttapadena yojetabbo. Evañhi cassa pamuttaggahaṇaṃ samatthitaṃ hoti tālaphalamukhassa vaṇṇasampadāsadisattā. Tibhūmako eva tebhūmako.
அதீதங் நானுஸோசந்தி அதீதங் பச்சயலாப⁴ங் லக்க²ணங் கத்வா ந ஸோசந்தி ந அனுத்து²னந்தி. ஜப்பனதண்ஹாய வஸேன ந பரிகப்பந்தீதி ஆஹ ‘‘ந பத்தெ²ந்தீ’’தி . யேன கேனசீதி இதரீதரேன. தங்க²ணே லத்³தே⁴னாதி ஸன்னிதி⁴காரபரிபோ⁴கா³பா⁴வமாஹ. திவிதே⁴னபி காரணேனாதி திப்பகாரேன ஹேதுனா, திலக்க²ணஸந்தோஸனிமித்தந்தி அத்தோ².
Atītaṃ nānusocanti atītaṃ paccayalābhaṃ lakkhaṇaṃ katvā na socanti na anutthunanti. Jappanataṇhāya vasena na parikappantīti āha ‘‘na patthentī’’ti . Yena kenacīti itarītarena. Taṅkhaṇe laddhenāti sannidhikāraparibhogābhāvamāha. Tividhenapi kāraṇenāti tippakārena hetunā, tilakkhaṇasantosanimittanti attho.
வினாஸந்தி வினாஸனஹேதுங். வினஸ்ஸந்தி ஏதேஹீதி வினாஸோ, லோப⁴தோ³ஸா ததே³கட்டா² ச பாபத⁴ம்மா . அரூபகாயஸ்ஸ விய ரூபகாயஸ்ஸபி விஸேஸதோ ஸுக்க²பா⁴வகாரணந்தி ஆஹ ‘‘ஏதேன காரணத்³வயேனா’’தி. லுதோதி லூனோ.
Vināsanti vināsanahetuṃ. Vinassanti etehīti vināso, lobhadosā tadekaṭṭhā ca pāpadhammā . Arūpakāyassa viya rūpakāyassapi visesato sukkhabhāvakāraṇanti āha ‘‘etena kāraṇadvayenā’’ti. Lutoti lūno.
அரஞ்ஞஸுத்தவண்ணனா நிட்டி²தா.
Araññasuttavaṇṇanā niṭṭhitā.
நளவக்³க³வண்ணனா நிட்டி²தா.
Naḷavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. அரஞ்ஞஸுத்தங் • 10. Araññasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. அரஞ்ஞஸுத்தவண்ணனா • 10. Araññasuttavaṇṇanā
