| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. அரதிஸுத்தவண்ணனா
2. Aratisuttavaṇṇanā
210. விஹாரக³ருகோ கிரேஸ தே²ரோதி ஏதேன தே²ரோ அத்தனோ ஸத்³தி⁴விஹாரிகங் வங்கீ³ஸங் ஓவதி³துங் அனவஸரோ. தேன அந்தரந்தரா தஸ்ஸ சித்தங் ராகோ³ அனுத்³த⁴ங்ஸேதீதி த³ஸ்ஸேதி. ஸாஸனே அரதிந்தி ஸீலபரிபூரணே ஸமத²விபஸ்ஸனாபா⁴வனாய ச அனபி⁴ரதிங். காமகு³ணேஸு ச ரதிந்தி பஞ்சஸு காமகொட்டா²ஸேஸு அஸ்ஸாத³ங். பாபவிதக்கந்தி காமஸங்கப்பங். ஸப்³பா³காரேனாதி ஸப்³பே³ தத³ங்க³விக்க²ம்ப⁴னஸமுச்சி²ந்த³னாகாரேன. யதா² மஹந்தங் அரஞ்ஞங் வனத²ந்தி, ஏவங் மஹந்தங் கிலேஸவனங் ‘‘வனத²’’ந்தி வுத்தங்.
210.Vihāragarukokiresa theroti etena thero attano saddhivihārikaṃ vaṅgīsaṃ ovadituṃ anavasaro. Tena antarantarā tassa cittaṃ rāgo anuddhaṃsetīti dasseti. Sāsane aratinti sīlaparipūraṇe samathavipassanābhāvanāya ca anabhiratiṃ. Kāmaguṇesu ca ratinti pañcasu kāmakoṭṭhāsesu assādaṃ. Pāpavitakkanti kāmasaṅkappaṃ. Sabbākārenāti sabbe tadaṅgavikkhambhanasamucchindanākārena. Yathā mahantaṃ araññaṃ vanathanti, evaṃ mahantaṃ kilesavanaṃ ‘‘vanatha’’nti vuttaṃ.
பத²விஞ்ச வேஹாஸந்தி பு⁴ம்மத்தே² பச்சத்தவசனங், தஸ்மா பத²வியங் ஆகாஸே சாதி அத்தோ². தேனாஹ ‘‘பத²விட்டி²த’’ந்திஆதி³. ஜக³தீதி ச பத²வியா வேவசனங். தேனாஹ ‘‘அந்தோபத²விய’’ந்தி. பரிஜீரதீதி ஸப்³ப்³ப³ஸோ ஜரங் பாபுணாதி. ஸமாக³ந்த்வாதி ஞாணேன ஸமாக³ந்த்வாதி அத்தோ². தேனாஹ ‘‘முதத்தாதி விஞ்ஞாதத்தபா⁴வா’’தி.
Pathaviñca vehāsanti bhummatthe paccattavacanaṃ, tasmā pathaviyaṃ ākāse cāti attho. Tenāha ‘‘pathaviṭṭhita’’ntiādi. Jagatīti ca pathaviyā vevacanaṃ. Tenāha ‘‘antopathaviya’’nti. Parijīratīti sabbbaso jaraṃ pāpuṇāti. Samāgantvāti ñāṇena samāgantvāti attho. Tenāha ‘‘mutattāti viññātattabhāvā’’ti.
படிக⁴பதே³ன க³ந்த⁴ரஸா க³ஹிதா கா⁴னஜிவ்ஹானங் படிஹனநவஸேன பவத்தனதோ. முதபதே³ன பொ²ட்ட²ப்³பா³ரம்மணங் க³ஹிதங் முத்வா க³ஹேதப்³ப³தோ. ந லிப்பதீதி ந மக்கீ²யதி.
Paṭighapadena gandharasā gahitā ghānajivhānaṃ paṭihananavasena pavattanato. Mutapadena phoṭṭhabbārammaṇaṃ gahitaṃ mutvā gahetabbato. Na lippatīti na makkhīyati.
ஸட்டி²-ஸத்³தோ³ ச²-ஸத்³தே³ன ஸமானத்தோ²தி ‘‘ஸட்டி²னிஸ்ஸிதா’’தி பத³ஸ்ஸ ‘‘ச²ஆரம்மணனிஸ்ஸிதா’’தி அத்தோ² வுத்தோ. புதூ² அத⁴ம்மவிதக்காதி ரூபவிதக்காதி³வஸேன ப³ஹூ நானாவிதக்கா மிச்சா²ஸங்கப்பா. ஜனதாய நிவிட்டா²தி மஹாஜனே பதிட்டி²தா. தேஸங் வஸேனாதி தேஸம்பி மிச்சா²விதக்கானங் வஸேன. ந கத்த²சி ஆரம்மணே. கிலேஸவக்³க³க³தோதி கிலேஸஸங்க³ணிகங் உபக³தோ ந ப⁴வெய்ய, கிலேஸவிதக்கா ந உப்பாதே³தப்³பா³தி அத்தோ². து³ட்டு²ல்லவசனங் காமபடிஸங்யுத்தகதா².
Saṭṭhi-saddo cha-saddena samānatthoti ‘‘saṭṭhinissitā’’ti padassa ‘‘chaārammaṇanissitā’’ti attho vutto. Puthū adhammavitakkāti rūpavitakkādivasena bahū nānāvitakkā micchāsaṅkappā. Janatāya niviṭṭhāti mahājane patiṭṭhitā. Tesaṃ vasenāti tesampi micchāvitakkānaṃ vasena. Na katthaci ārammaṇe. Kilesavaggagatoti kilesasaṅgaṇikaṃ upagato na bhaveyya, kilesavitakkā na uppādetabbāti attho. Duṭṭhullavacanaṃ kāmapaṭisaṃyuttakathā.
த³ப்³ப³ஜாதிகோதி த³ப்³ப³ரூபோ. நேபக்கேனாதி கோஸல்லேன. நிப்³பா³னங் படிச்சாதி அஸங்க²ததா⁴துங் ஆரம்மணவஸேன படிச்ச. பரினிப்³பா³னகாலந்தி அனுபாதி³ஸேஸனிப்³பா³னகாலங்.
Dabbajātikoti dabbarūpo. Nepakkenāti kosallena. Nibbānaṃ paṭiccāti asaṅkhatadhātuṃ ārammaṇavasena paṭicca. Parinibbānakālanti anupādisesanibbānakālaṃ.
அரதிஸுத்தவண்ணனா நிட்டி²தா.
Aratisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. அரதிஸுத்தங் • 2. Aratisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. அரதீஸுத்தவண்ணனா • 2. Aratīsuttavaṇṇanā
