| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. அருணவதீஸுத்தவண்ணனா
4. Aruṇavatīsuttavaṇṇanā
185. அபி⁴பூ⁴ ஸம்ப⁴வோதி தேஸங் த்³வின்னங் மஹாதே²ரானங் நாமானி. தேஸங் விபா⁴க³ங் த³ஸ்ஸேதுங் ‘‘தேஸூ’’திஆதி³ வுத்தங். ஏதே த்³வே தஸ்ஸ ப⁴க³வதோ அக்³க³ஸாவகாதி த³ஸ்ஸேதி. அவஜ்ஜா²யந்தீதி ஹெட்டா² கத்வா சிந்தெந்தி. கி²ய்யந்தி தங் லாமகதோ சிந்தேதப்³ப³தங் பாபெந்தி பாபகதங் கரொந்தி. வித்தா²ரயந்தாதி தமேவ லாமகதோ சிந்தேதப்³ப³தங் வேபுல்லங் பாபெந்தா. ஸப்³பே³ பாஸண்டா³ அத்தனோ அத்தனோ ஸமயே ஸித்³த⁴ந்தே ஸப்³பே³ தே³வமனுஸ்ஸா அத்தனோ அத்தனோ ஸமயே படிலாபே⁴ படிலத்³த⁴அத்தே² புரிஸகாரங் வண்ணயந்தீதி யோஜனா.
185.Abhibhū sambhavoti tesaṃ dvinnaṃ mahātherānaṃ nāmāni. Tesaṃ vibhāgaṃ dassetuṃ ‘‘tesū’’tiādi vuttaṃ. Ete dve tassa bhagavato aggasāvakāti dasseti. Avajjhāyantīti heṭṭhā katvā cintenti. Khiyyanti taṃ lāmakato cintetabbataṃ pāpenti pāpakataṃ karonti. Vitthārayantāti tameva lāmakato cintetabbataṃ vepullaṃ pāpentā. Sabbe pāsaṇḍā attano attano samaye siddhante sabbe devamanussā attano attano samaye paṭilābhe paṭiladdhaatthe purisakāraṃ vaṇṇayantīti yojanā.
ஆரம்ப⁴வீரியந்தி மச்சுஸேனாஸங்கா²தகிலேஸது⁴னநே ஆரம்ப⁴வீரியங், யா ‘‘ஆரம்ப⁴தா⁴தூ’’தி வுச்சதி . நிக்கமவீரியந்தி கோஸஜ்ஜபடிபக்க²பூ⁴தங் வீரியங், யா ‘‘நிக்கமதா⁴தூ’’தி வுச்சதி. பயோக³ங் கரோதா²தி பரங் பரங் டா²னங் அக்கமனதோ ததோபி ப³லவதரங் பா⁴வனாபி⁴யோக³ங் பவத்தேதா²தி அத்தோ². தேனாஹ ‘‘பரக்கமதா²’’தி. கிலேஸஸேனா நாம ராகா³தி³கிலேஸஸமூஹோ, ஸோ மரணபச்சயபா⁴வதோ ‘‘மச்சுனோ ஸேனா’’தி வுச்சதி. தஞ்ஹி ஸந்தா⁴ய வுத்தங் ‘‘மஹாஸேனேன மச்சுனா’’தி (ம॰ நி॰ 3.272, 275, 276). க²ந்தா⁴னங் பட²மாபி⁴னிப்³ப³த்தி ஜாதி, தத³ஞ்ஞங் பன தேஸங் படிபாடி பவத்தங் ஸங்ஸாரோதி அதி⁴ப்பாயேனாஹ ‘‘ஜாதிஞ்ச ஸங்ஸாரஞ்சா’’தி. யஸ்மா ‘‘ஏகம்பி ஜாதிங் த்³வேபி ஜாதியோ’’திஆதீ³ஸு தஸ்மிங் தஸ்மிங் ப⁴வே ஆதா³னநிக்கே²பபரிச்சி²ன்னக²ந்த⁴ப்பவத்தி ‘‘ஜாதீ’’தி வுச்சதி, ஸா ஏவ யாவ பரினிப்³பா³னா அபராபரங் பவத்தமானோ ஸங்ஸாரோ ‘‘இதோ சிதோ ஸங்ஸரண’’ந்தி கத்வா, தஸ்மா ஆஹ ‘‘ஜாதிஸங்கா²தங் வா ஸங்ஸார’’ந்தி. பரிச்சே²த³ந்தி பரியோஸானங். ஓபா⁴ஸங் ப²ரீதி ஸம்ப³ந்தோ⁴. ஆலோகட்டா²னேதி அத்தனா கதஆலோகட்டா²னே. ஆலோககிச்சங் நத்தீ²தி அந்த⁴காரட்டா²னே ஆலோகத³ஸ்ஸனங் விய ஆலோகட்டா²னே ஆலோகத³ஸ்ஸனகிச்சங் நத்தி². தஸ்மா தேஸங் ஸத்தானங் ‘‘கிங் ஆலோகோ அயங், கஸ்ஸ நு கோ² அயங் ஆலோகோ’’தி? விசினந்தானங் சிந்தெந்தானங். ஸப்³பே³தி ஸஹஸ்ஸிலோகதா⁴துயங் ஸப்³பே³ தே³வமனுஸ்ஸா. ஓஸடாய பரிஸாயாதி த⁴ம்மஸ்ஸவனத்த²ங் ஸப்³போ³ஸடாய பரிசிதபரிச்சி²ன்னாய பரிஸாய. ஸத்³த³ங் ஸுணிங்ஸூதி ந கேவலங் ஸத்³த³மேவ ஸுணிங்ஸு, அத² கோ² அத்தோ²பீதி யதா²தி⁴ப்பேதோ தேஸங் பகதிஸவனுபசாரே விய பாகடோ அஹோஸி, திஸஹஸ்ஸிலோகதா⁴துங் விஞ்ஞாபேஸீதி.
Ārambhavīriyanti maccusenāsaṅkhātakilesadhunane ārambhavīriyaṃ, yā ‘‘ārambhadhātū’’ti vuccati . Nikkamavīriyanti kosajjapaṭipakkhabhūtaṃ vīriyaṃ, yā ‘‘nikkamadhātū’’ti vuccati. Payogaṃ karothāti paraṃ paraṃ ṭhānaṃ akkamanato tatopi balavataraṃ bhāvanābhiyogaṃ pavattethāti attho. Tenāha ‘‘parakkamathā’’ti. Kilesasenā nāma rāgādikilesasamūho, so maraṇapaccayabhāvato ‘‘maccuno senā’’ti vuccati. Tañhi sandhāya vuttaṃ ‘‘mahāsenena maccunā’’ti (ma. ni. 3.272, 275, 276). Khandhānaṃ paṭhamābhinibbatti jāti, tadaññaṃ pana tesaṃ paṭipāṭi pavattaṃ saṃsāroti adhippāyenāha ‘‘jātiñca saṃsārañcā’’ti. Yasmā ‘‘ekampi jātiṃ dvepi jātiyo’’tiādīsu tasmiṃ tasmiṃ bhave ādānanikkhepaparicchinnakhandhappavatti ‘‘jātī’’ti vuccati, sā eva yāva parinibbānā aparāparaṃ pavattamāno saṃsāro ‘‘ito cito saṃsaraṇa’’nti katvā, tasmā āha ‘‘jātisaṅkhātaṃ vā saṃsāra’’nti. Paricchedanti pariyosānaṃ. Obhāsaṃ pharīti sambandho. Ālokaṭṭhāneti attanā kataālokaṭṭhāne. Ālokakiccaṃ natthīti andhakāraṭṭhāne ālokadassanaṃ viya ālokaṭṭhāne ālokadassanakiccaṃ natthi. Tasmā tesaṃ sattānaṃ ‘‘kiṃ āloko ayaṃ, kassa nu kho ayaṃ āloko’’ti? Vicinantānaṃ cintentānaṃ. Sabbeti sahassilokadhātuyaṃ sabbe devamanussā. Osaṭāya parisāyāti dhammassavanatthaṃ sabbosaṭāya paricitaparicchinnāya parisāya. Saddaṃ suṇiṃsūti na kevalaṃ saddameva suṇiṃsu, atha kho atthopīti yathādhippeto tesaṃ pakatisavanupacāre viya pākaṭo ahosi, tisahassilokadhātuṃ viññāpesīti.
அருணவதீஸுத்தவண்ணனா நிட்டி²தா.
Aruṇavatīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அருணவதீஸுத்தங் • 4. Aruṇavatīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அருணவதீஸுத்தவண்ணனா • 4. Aruṇavatīsuttavaṇṇanā
