| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૧૦. અસનબોધિયત્થેરઅપદાનવણ્ણના
10. Asanabodhiyattheraapadānavaṇṇanā
જાતિયા સત્તવસ્સોહન્તિઆદિકં આયસ્મતો અસનબોધિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે અઞ્ઞતરસ્મિં કુલગેહે નિબ્બત્તો વુદ્ધિપ્પત્તો સુખપ્પત્તો સાસને પસન્નો અસનબોધિતો ફલં ગહેત્વા તતો વુટ્ઠિતબોધિતરુણે ગહેત્વા બોધિં રોપેસિ, યથા ન વિનસ્સતિ તથા ઉદકાસિઞ્ચનાદિકમ્મેન રક્ખિત્વા પૂજેસિ. સો તેન પુઞ્ઞેન દેવમનુસ્સેસુ સમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો પરિપક્કસમ્ભારત્તા સત્તવસ્સિકોવ સમાનો પબ્બજિત્વા ખુરગ્ગેયેવ અરહત્તં પાપુણિ, પુરાકતપુઞ્ઞનામેન અસનબોધિયત્થેરોતિ પાકટો.
Jātiyā sattavassohantiādikaṃ āyasmato asanabodhiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle aññatarasmiṃ kulagehe nibbatto vuddhippatto sukhappatto sāsane pasanno asanabodhito phalaṃ gahetvā tato vuṭṭhitabodhitaruṇe gahetvā bodhiṃ ropesi, yathā na vinassati tathā udakāsiñcanādikammena rakkhitvā pūjesi. So tena puññena devamanussesu sampattiyo anubhavitvā imasmiṃ buddhuppāde kulagehe nibbatto paripakkasambhārattā sattavassikova samāno pabbajitvā khuraggeyeva arahattaṃ pāpuṇi, purākatapuññanāmena asanabodhiyattheroti pākaṭo.
૭૮. સો પુબ્બસમ્ભારમનુસ્સરિત્વા સોમનસ્સજાતો પુબ્બચરિતાપદાનં પકાસેન્તો જાતિયા સત્તવસ્સોહન્તિઆદિમાહ. તત્થ જાતિયાતિ માતુગબ્ભતો નિક્ખન્તકાલતો પટ્ઠાયાતિ અત્થો. સત્તવસ્સો પરિપુણ્ણસરદો અહં લોકનાયકં તિસ્સં ભગવન્તં અદ્દસન્તિ સમ્બન્ધો. પસન્નચિત્તો સુમનોતિ પકારેન પસન્નઅનાલુળિતઅવિકમ્પિતચિત્તો, સુમનો સુન્દરમનો સોમનસ્સસહગતચિત્તોતિ અત્થો.
78. So pubbasambhāramanussaritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyāti mātugabbhato nikkhantakālato paṭṭhāyāti attho. Sattavasso paripuṇṇasarado ahaṃ lokanāyakaṃ tissaṃ bhagavantaṃ addasanti sambandho. Pasannacitto sumanoti pakārena pasannaanāluḷitaavikampitacitto, sumano sundaramano somanassasahagatacittoti attho.
૭૯. તિસ્સસ્સાહં ભગવતોતિ તિક્ખત્તું જાતોતિ તિસ્સો, સો માતુગબ્ભતો, મનુસ્સજાતિતો, પઞ્ચક્ખન્ધતો ચ મુત્તો હુત્વા જાતો નિબ્બત્તો બુદ્ધો જાતોતિ અત્થો. તસ્સ તિસ્સસ્સ ભગવતો તાદિનો, લોકજેટ્ઠસ્સ અસનબોધિં ઉત્તમં રોપયિન્તિ સમ્બન્ધો.
79.Tissassāhaṃ bhagavatoti tikkhattuṃ jātoti tisso, so mātugabbhato, manussajātito, pañcakkhandhato ca mutto hutvā jāto nibbatto buddho jātoti attho. Tassa tissassa bhagavato tādino, lokajeṭṭhassa asanabodhiṃ uttamaṃ ropayinti sambandho.
૮૦. અસનો નામધેય્યેનાતિ નામપઞ્ઞત્તિયા નામસઞ્ઞાય અસનો નામ અસનરુક્ખો બોધિ અહોસીતિ અત્થો. ધરણીરુહપાદપોતિ વલ્લિરુક્ખપબ્બતગઙ્ગાસાગરાદયો ધારેતીતિ ધરણી, કા સા? પથવી, તસ્સં રુહતિ પતિટ્ઠહતીતિ ધરણીરુહો, પાદેન પિવતીતિ પાદપો, પાદસઙ્ખાતેન મૂલેન સિઞ્ચિતોદકં પિવતિ આપોરસં સિનેહં ધારેતીતિ અત્થો. ધરણીરુહો ચ સો પાદપો ચાતિ ધરણીરુહપાદપો, તં ઉત્તમં અસનં બોધિં પઞ્ચ વસ્સાનિ પરિચરિં પોસેસિન્તિ અત્થો.
80.Asano nāmadheyyenāti nāmapaññattiyā nāmasaññāya asano nāma asanarukkho bodhi ahosīti attho. Dharaṇīruhapādapoti vallirukkhapabbatagaṅgāsāgarādayo dhāretīti dharaṇī, kā sā? Pathavī, tassaṃ ruhati patiṭṭhahatīti dharaṇīruho, pādena pivatīti pādapo, pādasaṅkhātena mūlena siñcitodakaṃ pivati āporasaṃ sinehaṃ dhāretīti attho. Dharaṇīruho ca so pādapo cāti dharaṇīruhapādapo, taṃ uttamaṃ asanaṃ bodhiṃ pañca vassāni paricariṃ posesinti attho.
૮૧. પુપ્ફિતં પાદપં દિસ્વાતિ તં મયા પોસિતં અસનબોધિરુક્ખં પુપ્ફિતં અચ્છરયોગ્ગભૂતપુપ્ફત્તા અબ્ભુતં લોમહંસકરણં દિસ્વા સકં કમ્મં અત્તનો કમ્મં પકિત્તેન્તો પકારેન કથયન્તો બુદ્ધસેટ્ઠસ્સ સન્તિકં અગમાસિન્તિ અત્થો. સેસં સબ્બત્થ ઉત્તાનત્થમેવાતિ.
81.Pupphitaṃ pādapaṃ disvāti taṃ mayā positaṃ asanabodhirukkhaṃ pupphitaṃ accharayoggabhūtapupphattā abbhutaṃ lomahaṃsakaraṇaṃ disvā sakaṃkammaṃ attano kammaṃ pakittento pakārena kathayanto buddhaseṭṭhassa santikaṃ agamāsinti attho. Sesaṃ sabbattha uttānatthamevāti.
અસનબોધિયત્થેરઅપદાનવણ્ણના સમત્તા.
Asanabodhiyattheraapadānavaṇṇanā samattā.
છટ્ઠવગ્ગવણ્ણના સમત્તા.
Chaṭṭhavaggavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૧૦. અસનબોધિયત્થેરઅપદાનં • 10. Asanabodhiyattheraapadānaṃ
