| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૨. દુતિયવગ્ગો
2. Dutiyavaggo
૧-૩૩. અસઙ્ખતસુત્તાદિવણ્ણના
1-33. Asaṅkhatasuttādivaṇṇanā
૩૭૭-૪૦૯. કાયે કાયાનુપસ્સીતિઆદીસુ યં વત્તબ્બં, તં પરતો વક્ખામ.
377-409.Kāyekāyānupassītiādīsu yaṃ vattabbaṃ, taṃ parato vakkhāma.
અનતન્તિઆદીસુ તણ્હાનતિયા અભાવેન અનતં. ચતુન્નં આસવાનં અભાવેન અનાસવં. પરમત્થસચ્ચતાય સચ્ચં. વટ્ટસ્સ પરભાગટ્ઠેન પારં. સણ્હટ્ઠેન નિપુણં. સુટ્ઠુ દુદ્દસતાય સુદુદ્દસં. જરાય અજરિતત્તા અજજ્જરં. થિરટ્ઠેન ધુવં. અપલુજ્જનતાય અપલોકિતં. ચક્ખુવિઞ્ઞાણેન અપસ્સિતબ્બત્તા અનિદસ્સનં. તણ્હામાનદિટ્ઠિપપઞ્ચાનં અભાવેન નિપ્પપઞ્ચં.
Anatantiādīsu taṇhānatiyā abhāvena anataṃ. Catunnaṃ āsavānaṃ abhāvena anāsavaṃ. Paramatthasaccatāya saccaṃ. Vaṭṭassa parabhāgaṭṭhena pāraṃ. Saṇhaṭṭhena nipuṇaṃ. Suṭṭhu duddasatāya sududdasaṃ. Jarāya ajaritattā ajajjaraṃ. Thiraṭṭhena dhuvaṃ. Apalujjanatāya apalokitaṃ. Cakkhuviññāṇena apassitabbattā anidassanaṃ. Taṇhāmānadiṭṭhipapañcānaṃ abhāvena nippapañcaṃ.
સન્તભાવટ્ઠેન સન્તં. મરણાભાવેન અમતં. ઉત્તમટ્ઠેન પણીતં. સસ્સિરિકટ્ઠેન સિવં. નિરુપદ્દવતાય ખેમં. તણ્હાક્ખયસ્સ પચ્ચયત્તા તણ્હક્ખયં.
Santabhāvaṭṭhena santaṃ. Maraṇābhāvena amataṃ. Uttamaṭṭhena paṇītaṃ. Sassirikaṭṭhena sivaṃ. Nirupaddavatāya khemaṃ. Taṇhākkhayassa paccayattā taṇhakkhayaṃ.
વિમ્હાપનીયટ્ઠેન અચ્છરં પહરિતબ્બયુત્તકન્તિ અચ્છરિયં. અભૂતમેવ ભૂતં અજાતં હુત્વા અત્થીતિ વા અબ્ભુતં. નિદ્દુક્ખત્તા અનીતિકં. નિદ્દુક્ખસભાવત્તા અનીતિકધમ્મં. વાનાભાવેન નિબ્બાનં. બ્યાબજ્ઝાભાવેનેવ અબ્યાબજ્ઝં. વિરાગાધિગમસ્સ પચ્ચયતો વિરાગં. પરમત્થસુદ્ધિતાય સુદ્ધિ. તીહિ ભવેહિ મુત્તતાય મુત્તિ. કામાલયાનં અભાવેન અનાલયં. પતિટ્ઠટ્ઠેન દીપં. અલ્લીયિતબ્બયુત્તટ્ઠેન લેણં. તાયનટ્ઠેન તાણં. ભયસરણટ્ઠેન સરણં, ભયનાસનન્તિ અત્થો. પરં અયનં ગતિ પતિટ્ઠાતિ પરાયણં. સેસમેત્થ વુત્તનયમેવાતિ.
Vimhāpanīyaṭṭhena accharaṃ paharitabbayuttakanti acchariyaṃ. Abhūtameva bhūtaṃ ajātaṃ hutvā atthīti vā abbhutaṃ. Niddukkhattā anītikaṃ. Niddukkhasabhāvattā anītikadhammaṃ. Vānābhāvena nibbānaṃ. Byābajjhābhāveneva abyābajjhaṃ. Virāgādhigamassa paccayato virāgaṃ. Paramatthasuddhitāya suddhi. Tīhi bhavehi muttatāya mutti. Kāmālayānaṃ abhāvena anālayaṃ. Patiṭṭhaṭṭhena dīpaṃ. Allīyitabbayuttaṭṭhena leṇaṃ. Tāyanaṭṭhena tāṇaṃ. Bhayasaraṇaṭṭhena saraṇaṃ, bhayanāsananti attho. Paraṃ ayanaṃ gati patiṭṭhāti parāyaṇaṃ. Sesamettha vuttanayamevāti.
અસઙ્ખતસંયુત્તવણ્ણના નિટ્ઠિતા.
Asaṅkhatasaṃyuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya
૧. અસઙ્ખતસુત્તં • 1. Asaṅkhatasuttaṃ
૨. અનતસુત્તં • 2. Anatasuttaṃ
૩-૩૨. અનાસવાદિસુત્તં • 3-32. Anāsavādisuttaṃ
૩૩. પરાયનસુત્તં • 33. Parāyanasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૨૩-૩૩. અસઙ્ખતસુત્તાદિવણ્ણના • 23-33. Asaṅkhatasuttādivaṇṇanā
