| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૨. દુતિયવગ્ગો
2. Dutiyavaggo
૨૩-૩૩. અસઙ્ખતસુત્તાદિવણ્ણના
23-33. Asaṅkhatasuttādivaṇṇanā
૩૭૭-૪૦૯. તત્થ ચ નત્થિ એત્થ તણ્હાસઙ્ખાતં નતં, નત્થિ એતસ્મિં વા અધિગતે પુગ્ગલભાવોતિ અનતં. અનાસવન્તિ એત્થાપિ એસેવ નયો. સચ્ચધમ્મતાય સચ્ચં. વટ્ટદુક્ખતો પારમેતીતિ પારં. સણ્હટ્ઠેનાતિ સુખુમટ્ઠેન નિપુણં. તતો એવ દુદ્દસતાય. અજજ્જરં નિચ્ચસભાવત્તા. નત્થિ એતસ્સ નિદસ્સનન્તિ વા અનિદસ્સનં. એતસ્મિં અધિગતે નત્થિ સંસારે. પપઞ્ચન્તિ વા નિપ્પપઞ્ચં.
377-409. Tattha ca natthi ettha taṇhāsaṅkhātaṃ nataṃ, natthi etasmiṃ vā adhigate puggalabhāvoti anataṃ. Anāsavanti etthāpi eseva nayo. Saccadhammatāya saccaṃ. Vaṭṭadukkhato pārametīti pāraṃ. Saṇhaṭṭhenāti sukhumaṭṭhena nipuṇaṃ. Tato eva duddasatāya. Ajajjaraṃ niccasabhāvattā. Natthi etassa nidassananti vā anidassanaṃ. Etasmiṃ adhigate natthi saṃsāre. Papañcanti vā nippapañcaṃ.
એતસ્મિં અધિગતે પુગ્ગલસ્સ મરણં નત્થીતિ વા અમતં. અતપ્પકટ્ઠેન વા પણીતં. સુખહેતુતાય વા સિવં. તણ્હા ખીયન્તિ એત્થાતિ તણ્હક્ખયં.
Etasmiṃ adhigate puggalassa maraṇaṃ natthīti vā amataṃ. Atappakaṭṭhena vā paṇītaṃ. Sukhahetutāya vā sivaṃ. Taṇhā khīyanti etthāti taṇhakkhayaṃ.
અઞ્ઞસ્સ તાદિસસ્સ અભાવતો વિમ્હાપનીયતાય અભૂતમેવાતિ. કુતોચિ પચ્ચયતો અનિબ્બત્તમેવ હુત્વા ભૂતં વિજ્જમાનં. તેનાહ ‘‘અજાતં હુત્વા અત્થી’’તિ. નત્થિ એત્થ દુક્ખન્તિ નિદ્દુક્ખં, તસ્સ ભાવો નિદ્દુક્ખત્તં. તસ્મા અનીતિકં ઈતિરહિતં. વાનં વુચ્ચતિ તણ્હા, તદભાવેન નિબ્બાનં. બ્યાબજ્ઝં વુચ્ચતિ દુક્ખં, તદભાવેન અબ્યાબજ્ઝં. પરમત્થતો સચ્ચતો સુદ્ધિભાવેન. કામા એવ પુથુજ્જનેહિ અલ્લીયિતબ્બતો આલયા. એસ નયો સેસેસુપિ. પતિટ્ઠટ્ઠેનાતિ પતિટ્ઠાભાવેન વટ્ટદુક્ખતો મુચ્ચિતુકામાનં દીપસદિસં ઓઘેહિ અનજ્ઝોત્થરણીયત્તા. અલ્લીયિતબ્બયુત્તટ્ઠેનાતિ અલ્લીયિતું અરહભાવતો. તાયનટ્ઠેનાતિ સપરતાયનટ્ઠેન. ભયસરણટ્ઠેનાતિ ભયસ્સ હિંસનટ્ઠેન. સેટ્ઠં ઉત્તમં. ગતીતિ ગન્ધબ્બટ્ઠાનં.
Aññassa tādisassa abhāvato vimhāpanīyatāya abhūtamevāti. Kutoci paccayato anibbattameva hutvā bhūtaṃ vijjamānaṃ. Tenāha ‘‘ajātaṃ hutvā atthī’’ti. Natthi ettha dukkhanti niddukkhaṃ, tassa bhāvo niddukkhattaṃ. Tasmā anītikaṃ ītirahitaṃ. Vānaṃ vuccati taṇhā, tadabhāvena nibbānaṃ. Byābajjhaṃ vuccati dukkhaṃ, tadabhāvena abyābajjhaṃ. Paramatthato saccato suddhibhāvena. Kāmā eva puthujjanehi allīyitabbato ālayā. Esa nayo sesesupi. Patiṭṭhaṭṭhenāti patiṭṭhābhāvena vaṭṭadukkhato muccitukāmānaṃ dīpasadisaṃ oghehi anajjhottharaṇīyattā. Allīyitabbayuttaṭṭhenāti allīyituṃ arahabhāvato. Tāyanaṭṭhenāti saparatāyanaṭṭhena. Bhayasaraṇaṭṭhenāti bhayassa hiṃsanaṭṭhena. Seṭṭhaṃ uttamaṃ. Gatīti gandhabbaṭṭhānaṃ.
અસઙ્ખતસુત્તાદિવણ્ણના નિટ્ઠિતા.
Asaṅkhatasuttādivaṇṇanā niṭṭhitā.
અસઙ્ખતસંયુત્તવણ્ણના નિટ્ઠિતા.
Asaṅkhatasaṃyuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya
૧. અસઙ્ખતસુત્તં • 1. Asaṅkhatasuttaṃ
૨. અનતસુત્તં • 2. Anatasuttaṃ
૩-૩૨. અનાસવાદિસુત્તં • 3-32. Anāsavādisuttaṃ
૩૩. પરાયનસુત્તં • 33. Parāyanasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧-૩૩. અસઙ્ખતસુત્તાદિવણ્ણના • 1-33. Asaṅkhatasuttādivaṇṇanā
