1. ஆஸீவிஸோபமஸுத்தவண்ணனா

1. Āsīvisopamasuttavaṇṇanā

238. யே பி⁴க்கூ² ததா³ ப⁴க³வந்தங் பரிவாரெத்வா நிஸின்னா, தேஸு கேசி ஏகவிஹாரினோ, கேசி அத்தது³தியா, கேசி அத்தததியா, கேசி அத்தசதுத்தா², கேசி அத்தபஞ்சமா ஹுத்வா அரஞ்ஞாயதனேஸு விஹரந்தீதி வுத்தங் – ‘‘ஏகசாரிக…பே॰… பஞ்சசாரிகே’’தி. ஸமானஜ்ஜா²ஸயதா ஸபா⁴க³வுத்தினோ. கம்மட்டா²னானுயுஞ்ஜனஸ்ஸ காரகே. ததோ ஏவ தத்த² யுத்தபயுத்தே. புக்³க³லஜ்ஜா²ஸயேன காரணபூ⁴தேன. பச்சயபூ⁴தந்தி அபஸ்ஸயபூ⁴தங். ‘‘ஸெய்யதா²பி, பி⁴க்க²வே’’தி ஆரபி⁴த்வா யாவ ‘‘திண்ணோ பாரங்க³தோ த²லே திட்ட²தி ப்³ராஹ்மணோ’’தி அயங் மாதிகானிக்கே²போ. தேஸங் மாதிகாய வித்தா²ரபா⁴ஜனங். வாஸனா ப⁴விஸ்ஸதீதி வாஸனாவஹங் ப⁴விஸ்ஸதி. ஸினேருங் உக்கி²பந்தோ வியாதிஆதி³ இமிஸ்ஸா தே³ஸனாய அனஞ்ஞஸாதா⁴ரணதாய ஸுது³க்கரபா⁴வத³ஸ்ஸனங்.

238. Ye bhikkhū tadā bhagavantaṃ parivāretvā nisinnā, tesu keci ekavihārino, keci attadutiyā, keci attatatiyā, keci attacatutthā, keci attapañcamā hutvā araññāyatanesu viharantīti vuttaṃ – ‘‘ekacārika…pe… pañcacārike’’ti. Samānajjhāsayatā sabhāgavuttino. Kammaṭṭhānānuyuñjanassa kārake. Tato eva tattha yuttapayutte. Puggalajjhāsayena kāraṇabhūtena. Paccayabhūtanti apassayabhūtaṃ. ‘‘Seyyathāpi, bhikkhave’’ti ārabhitvā yāva ‘‘tiṇṇo pāraṅgato thale tiṭṭhati brāhmaṇo’’ti ayaṃ mātikānikkhepo. Tesaṃ mātikāya vitthārabhājanaṃ. Vāsanā bhavissatīti vāsanāvahaṃ bhavissati. Sineruṃ ukkhipanto viyātiādi imissā desanāya anaññasādhāraṇatāya sudukkarabhāvadassanaṃ.

மஞ்சட்டே²ஸு மஞ்சஸமஞ்ஞா விய முக²ட்ட²ங் விஸங் ‘‘முக²’’ந்தி அதி⁴ப்பேதங். ஸுக்க²கட்ட²ஸதி³ஸபா⁴வாபாத³னதோ ‘‘கட்ட²’’ந்தி வுச்சதீதி கட்ட²ங் முக²ங் ஏதஸ்ஸாதி கட்ட²முகோ², த³ங்ஸனாதி³னா கட்ட²ஸதி³ஸபா⁴வகரோ ஸப்போ. அத² வா கட்ட²ஸதி³ஸபா⁴வாபாத³னதோ கட்ட²ங் விஸங் வா முகே² ஏதஸ்ஸாதி கட்ட²முகோ². இமினா நயேன ஸேஸபதே³ஸுபி அத்தோ² வேதி³தப்³போ³. இமே சத்தாரோதி இமே விஸகிச்சபே⁴தே³ன சத்தாரோ. இதா³னி தங் நேஸங் விஸகிச்சபே⁴த³ங் த³ஸ்ஸேதுங் ‘‘தேஸூ’’திஆதி³ வுத்தங். அயஸூலஸமப்பிதங் வியாதி அப்³ப⁴ந்தரே அயஸூலங் அனுப்பவேஸிதங் விய. பக்கபூதிபனஸங் வியாதி பச்சித்வா காலாதிக்கமே குதி²தபனஸப²லங் விய. சங்க³வாரேதி ரஜகானங் கா²ரபரிஸ்ஸாவனே ஸுராபரிஸ்ஸாவனே வா. அனவஸேஸங் சி²ஜ்ஜனேன அஸனிபாதட்டா²னங் விய. மஹானிகா²த³னேனாதி மஹந்தேன நிகா²த³னேன.

Mañcaṭṭhesu mañcasamaññā viya mukhaṭṭhaṃ visaṃ ‘‘mukha’’nti adhippetaṃ. Sukkhakaṭṭhasadisabhāvāpādanato ‘‘kaṭṭha’’nti vuccatīti kaṭṭhaṃ mukhaṃ etassāti kaṭṭhamukho, daṃsanādinā kaṭṭhasadisabhāvakaro sappo. Atha vā kaṭṭhasadisabhāvāpādanato kaṭṭhaṃ visaṃ vā mukhe etassāti kaṭṭhamukho. Iminā nayena sesapadesupi attho veditabbo. Ime cattāroti ime visakiccabhedena cattāro. Idāni taṃ nesaṃ visakiccabhedaṃ dassetuṃ ‘‘tesū’’tiādi vuttaṃ. Ayasūlasamappitaṃ viyāti abbhantare ayasūlaṃ anuppavesitaṃ viya. Pakkapūtipanasaṃ viyāti paccitvā kālātikkame kuthitapanasaphalaṃ viya. Caṅgavāreti rajakānaṃ khāraparissāvane surāparissāvane vā. Anavasesaṃ chijjanena asanipātaṭṭhānaṃ viya. Mahānikhādanenāti mahantena nikhādanena.

விஸவேக³விகாரேனாதி விஸவேக³க³தேன விகாரேன. வாதேனாதி தஸ்ஸ ஸப்பஸ்ஸ ஸரீரங் பு²ஸித்வா உக்³க³தவாதேன. நாஸவாதே பன வத்தப்³ப³மேவ நத்தி². புக்³க³லபண்ணத்திவஸேனாதி தேஸங்யேவ ஸோளஸன்னங் ஸப்பானங் ஆக³தவிஸோதிஆதி³புக்³க³லனாமஸ்ஸ வஸேன சதுஸட்டி² ஹொந்தி பச்சேகங் சதுப்³பி³த⁴பா⁴வதோ. ஆக³தவிஸோதி ஆக³ச்ச²விஸோ, ஸீக⁴தரங் அபி⁴ருஹனவிஸோதி அத்தோ². கோ⁴ரவிஸோதி கக்க²ளவிஸோ, து³த்திகிச்ச²விஸோ. அயங் ஸீதஉத³கங் விய ஹோதி கா³ள்ஹது³ப்³பி³னிம்மோசயபா⁴வேன. உத³கஸப்போ ஹி கோ⁴ரவிஸோ ஹோதி யேவாதி வுத்தங் – ‘‘உத³கஸப்பாதீ³னங் விஸங் வியா’’தி. பஞ்ஞாயதீதி க³ண்ட³பிளகாதி³வஸேன பஞ்ஞாயதி. அனேளகஸப்போ நாம மஹாஆஸீவிஸோ. நீலஸப்போ நாம ஸாக²வண்ணோ ருக்க²க்³கா³தீ³ஸு விசரணகஸப்போ. இமினா உபாயேனாதி யோயங் கட்ட²முகே²ஸு த³ட்ட²விஸானங்யேவ ‘‘ஆக³தவிஸோ நோ கோ⁴ரவிஸோ’’திஆதி³னா சதுப்³பி³த⁴பா⁴வோ வுத்தோ, இமினா உபாயேன. கட்ட²முகே² த³ட்ட²விஸாத³யோதி கட்ட²முகே²ஸு த³ட்ட²விஸோ, பு²ட்ட²விஸோ, வாதவிபோ⁴தி தயோ, பூதிமுகா²தீ³ஸு ச த³ட்ட²விஸாத³யோ சத்தாரோ சத்தாரோ வேதி³தப்³போ³.

Visavegavikārenāti visavegagatena vikārena. Vātenāti tassa sappassa sarīraṃ phusitvā uggatavātena. Nāsavāte pana vattabbameva natthi. Puggalapaṇṇattivasenāti tesaṃyeva soḷasannaṃ sappānaṃ āgatavisotiādipuggalanāmassa vasena catusaṭṭhi honti paccekaṃ catubbidhabhāvato. Āgatavisoti āgacchaviso, sīghataraṃ abhiruhanavisoti attho. Ghoravisoti kakkhaḷaviso, duttikicchaviso. Ayaṃ sītaudakaṃ viya hoti gāḷhadubbinimmocayabhāvena. Udakasappo hi ghoraviso hoti yevāti vuttaṃ – ‘‘udakasappādīnaṃ visaṃ viyā’’ti. Paññāyatīti gaṇḍapiḷakādivasena paññāyati. Aneḷakasappo nāma mahāāsīviso. Nīlasappo nāma sākhavaṇṇo rukkhaggādīsu vicaraṇakasappo. Iminā upāyenāti yoyaṃ kaṭṭhamukhesu daṭṭhavisānaṃyeva ‘‘āgataviso no ghoraviso’’tiādinā catubbidhabhāvo vutto, iminā upāyena. Kaṭṭhamukhe daṭṭhavisādayoti kaṭṭhamukhesu daṭṭhaviso, phuṭṭhaviso, vātavibhoti tayo, pūtimukhādīsu ca daṭṭhavisādayo cattāro cattāro veditabbo.

ஏகேகந்தி சதுஸட்டி²யோ ஏகேகங். சதுதா⁴தி அண்ட³ஜாதி³விபா⁴கே³ன சதுதா⁴ விப⁴ஜித்வா. ச²பண்ணாஸானீதி ச²பண்ணாஸாதி⁴கானி. க³தமக்³க³ஸ்ஸாதி யதா²வுத்தஸங்க்²யாக³தமக்³க³ஸ்ஸ படிலோமதோ ஸங்கி²ப்பமானா அனுக்கமேன சத்தாரோவ ஹொந்தி. குலவஸேனாதி கட்ட²முகா²தி³ஜாதிவஸேன.

Ekekanti catusaṭṭhiyo ekekaṃ. Catudhāti aṇḍajādivibhāgena catudhā vibhajitvā. Chapaṇṇāsānīti chapaṇṇāsādhikāni. Gatamaggassāti yathāvuttasaṅkhyāgatamaggassa paṭilomato saṃkhippamānā anukkamena cattārova honti. Kulavasenāti kaṭṭhamukhādijātivasena.

ஸகலகாயே ஆஸிஞ்சித்வா விய ட²பிதவிஸாதி ஹி தேஸங் பு²ட்ட²விஸதா, வாதவிஸதா வுச்சதி. ஏவந்தி ‘‘ஆஸித்தவிஸா’’திஆதி³னா. எத்தா²தி ஆஸீவிஸஸத்³தே³ வசனத்தோ² நிருத்தினயேன வேதி³தப்³போ³. உக்³க³ததேஜாதி உத³க்³க³தேஜா, அத்தனோ விஸதேஜேன நேஸங் குரூரத³ப்³ப³தா வா. து³ன்னிம்மத்³த³னவிஸாதி மந்தாக³தே³ஹி அனிம்மத்³த³னீயவிஸா. சத்தாரோ ஆஸீவிஸாதி எத்த² இதி-ஸத்³தோ³ ஆதி³அத்தோ². தேனெத்த² அவஸேஸபாளிங் ஸங்க³ண்ஹாதி.

Sakalakāye āsiñcitvā viya ṭhapitavisāti hi tesaṃ phuṭṭhavisatā, vātavisatā vuccati. Evanti ‘‘āsittavisā’’tiādinā. Etthāti āsīvisasadde vacanattho niruttinayena veditabbo. Uggatatejāti udaggatejā, attano visatejena nesaṃ kurūradabbatā vā. Dunnimmaddanavisāti mantāgadehi animmaddanīyavisā. Cattāro āsīvisāti ettha iti-saddo ādiattho. Tenettha avasesapāḷiṃ saṅgaṇhāti.

ஆஸீவிஸேஸூதி இமே ஆஸீவிஸா த³ட்ட²விஸா ஏவாதி வேதி³தப்³பா³. ஸரீரட்ட²கேஸுயேவாதி தேன புரிஸேன தேஸங் கஸ்ஸசி அனிட்ட²ஸ்ஸ அகதத்தா ஆயுஸேஸஸ்ஸ ச விஜ்ஜமானத்தா நங் ந த³ங்ஸிங்ஸூதி த³ட்ட²ப்³ப³ங். புச்சி² யதா²பூ⁴தங் பவேதே³துகாமோ. து³ருபட்டா²ஹாதி து³ருபட்டா²னா. ஸொத்தி²மக்³கோ³தி ஸொத்தி²பா⁴வஸ்ஸ உபாயோ.

Āsīvisesūti ime āsīvisā daṭṭhavisā evāti veditabbā. Sarīraṭṭhakesuyevāti tena purisena tesaṃ kassaci aniṭṭhassa akatattā āyusesassa ca vijjamānattā naṃ na daṃsiṃsūti daṭṭhabbaṃ. Pucchi yathābhūtaṃ pavedetukāmo. Durupaṭṭhāhāti durupaṭṭhānā. Sotthimaggoti sotthibhāvassa upāyo.

அந்தரசரோதி அந்தரங் சரோ ஸுக²ஸத்து விஸ்ஸாஸகா⁴தீ. தேனாஹ ‘‘வத⁴கோ’’தி. இதா³னி தாஸங் பேஸனே காரணங் த³ஸ்ஸேதுங் ‘‘பட²ம’’ந்திஆதி³ வுத்தங். அபி⁴முக²க³தங் விய அபி⁴முக²க³தங். ஈதி³ஸீபி ஹி வசோயுத்தி லோகே நிரூபீயதி ஸந்தியங் புரிஸங் ட²பேதீதி விய. தஸ்மா அபி⁴முக²க³தந்தி அபி⁴முக²ங் தேன ஸம்பத்தந்தி அத்தோ². வங்கஸண்டா²னங் ப²லகங் ருக்க²மூலே ஆக³தாக³தானங் நிஸீத³னத்தா²ய அத்த²தங்.

Antaracaroti antaraṃ caro sukhasattu vissāsaghātī. Tenāha ‘‘vadhako’’ti. Idāni tāsaṃ pesane kāraṇaṃ dassetuṃ ‘‘paṭhama’’ntiādi vuttaṃ. Abhimukhagataṃ viya abhimukhagataṃ. Īdisīpi hi vacoyutti loke nirūpīyati santiyaṃ purisaṃ ṭhapetīti viya. Tasmā abhimukhagatanti abhimukhaṃ tena sampattanti attho. Vaṅkasaṇṭhānaṃ phalakaṃ rukkhamūle āgatāgatānaṃ nisīdanatthāya atthataṃ.

அரித்தஹத்தோ² புரிஸோ ஸந்தாரேதி ஏதாயாதி ஸந்தாரணீ. ஓரிமதீரதோ உத்தரணாய ஸேது உத்தரஸேது. ஏகேன த்³வீஹி வா க³ந்தப்³போ³ ருக்க²மயோ ஸேது ருக்க²ஸேது. ஜங்க⁴ஸத்தே²ன க³மனயொக்³கோ³ ஸேது ஜங்க⁴ஸேது. ஸகடேன க³ந்துங் ஸக்குணெய்யோ ஸகடஸேது. ந கோ² ஏஸ ப்³ராஹ்மணோ பரமத்த²தோ. தத³த்தோ² பன ஏகதே³ஸேன ஸம்ப⁴வதீதி ததா² வுத்தந்தி த³ஸ்ஸெந்தோ ‘‘எத்தகானங் பச்சத்தி²கானங் பா³ஹிதத்தா’’தி ஆஹ. தே³ஸனந்தி உத்³தே³ஸதே³ஸனங். வினிவத்தெந்தோதி படிஸங்ஹரந்தோ. ந லத்³தோ⁴ வதாஸீதி ந லத்³தோ⁴ வத ஆஸி.

Arittahattho puriso santāreti etāyāti santāraṇī. Orimatīrato uttaraṇāya setu uttarasetu. Ekena dvīhi vā gantabbo rukkhamayo setu rukkhasetu. Jaṅghasatthena gamanayoggo setu jaṅghasetu. Sakaṭena gantuṃ sakkuṇeyyo sakaṭasetu. Na kho esa brāhmaṇo paramatthato. Tadattho pana ekadesena sambhavatīti tathā vuttanti dassento ‘‘ettakānaṃ paccatthikānaṃ bāhitattā’’ti āha. Desananti uddesadesanaṃ. Vinivattentoti paṭisaṃharanto. Na laddho vatāsīti na laddho vata āsi.

ராஜா விய கம்மங் ஸத்தேஸு இஸ்ஸரியஸ்ஸ வத்தாபனதோ. ராஜா…பே॰… புது²ஜ்ஜனோ வட்டது³க்க²ஸங்கா²தாபராத⁴தாய. ஞாணபலாயனேனாதி மஹாபூ⁴தேஹி நிப்³பி³ந்தி³த்வா விரஜ்ஜித்வா விமுச்சிதுகாமதாவஸேன உப்பன்னஞாணபலாயனே மக்³கா³தி⁴க³மஸித்³தே⁴னேவ ஞாணபலாயனேன. ஏவஞ்ஹெத்த² உபமாஸங்ஸந்த³னங் மத்த²கங் பாபிதமேவ ஹோதி.

Rājā viya kammaṃ sattesu issariyassa vattāpanato. Rājā…pe… puthujjano vaṭṭadukkhasaṅkhātāparādhatāya. Ñāṇapalāyanenāti mahābhūtehi nibbinditvā virajjitvā vimuccitukāmatāvasena uppannañāṇapalāyane maggādhigamasiddheneva ñāṇapalāyanena. Evañhettha upamāsaṃsandanaṃ matthakaṃ pāpitameva hoti.

யதே²வ ஹீதிஆதி³னா ஏகதே³ஸனாஸமுதா³யஸ்ஸ நித³ஸ்ஸனங் ஆரத்³த⁴ங். யதா²வுத்தவசனங் அட்ட²கதா²சரியானங் வசனேன ஸமத்தே²தி ‘‘பத்த²த்³தோ⁴ ப⁴வதீ’’திஆதி³னா. தத்த² கட்ட²முகே²ன வாதி வா-ஸத்³தோ³ உபமத்தோ². யதா² கட்ட²முகே²ன ஸப்பேன த³ட்டோ² பத்த²த்³தோ⁴ ஹோதி, ஏவங் பத²வீதா⁴துப்பகோபேன ஸோ காயோ கட்ட²முகே²வ ஹோதி, கட்ட²முக²க³தோ விய பத்த²த்³தோ⁴ ஹோதீதி அத்தோ². அத² வா வா-ஸத்³தோ³ அவதா⁴ரணத்தோ². ஸோ ‘‘பத²வீதா⁴துபகோபேன வா’’தி ஏவங் ஆனெத்வா ஸம்ப³ந்தி⁴தப்³போ³. அயஞ்ஹெத்த² அத்தோ² – கட்ட²முகே²ன த³ட்டோ²பி காயோ பத²வீதா⁴துப்பகோபேனேவ பத்த²த்³தோ⁴ ஹோதி, தஸ்மா பத²வீதா⁴துயா அவியுத்தோ ஸோ காயோ ஸப்³ப³தா³ கட்ட²முக²க³தோ விய ஹோதீதி. வா-ஸத்³தோ³ வா அனியமத்தோ². தத்ராயமத்தோ² – கட்ட²முகே²ன த³ட்டோ² காயோ பத்த²த்³தோ⁴ ஹோதி வா, ந வா மந்தாக³த³வஸேன. பத²வீதா⁴துப்பகோபேன பன மந்தாக³த³ரஹிதோ ஸோ காயோ கட்ட²முக²க³தோ விய ஹோதி ஏகந்தபத்த²த்³தோ⁴தி. தத்த² காயோதி பகதிகாயோ. பூதிகோதி குதி²தோ. ஸந்தத்தோதி ஸப்³ப³ஸோ தத்தோ மஹாதா³ஹப்பத்தோ. ஸஞ்சி²ன்னோதி ஸப்³ப³ஸோ சி²ன்னோ சுண்ணவிசுண்ணபூ⁴தோ. யதா³ காயோ பத்த²த்³தா⁴தி³பா⁴வப்பத்தோ ஹோதி, ததா³ புரிஸோ கட்ட²முகா²தி³ஸப்பஸ்ஸ முகே² வத்தமானோ விய ஹோதீதி அத்தோ².

Yatheva hītiādinā ekadesanāsamudāyassa nidassanaṃ āraddhaṃ. Yathāvuttavacanaṃ aṭṭhakathācariyānaṃ vacanena samattheti ‘‘patthaddho bhavatī’’tiādinā. Tattha kaṭṭhamukhena vāti vā-saddo upamattho. Yathā kaṭṭhamukhena sappena daṭṭho patthaddho hoti, evaṃ pathavīdhātuppakopena so kāyo kaṭṭhamukheva hoti, kaṭṭhamukhagato viya patthaddho hotīti attho. Atha vā vā-saddo avadhāraṇattho. So ‘‘pathavīdhātupakopena vā’’ti evaṃ ānetvā sambandhitabbo. Ayañhettha attho – kaṭṭhamukhena daṭṭhopi kāyo pathavīdhātuppakopeneva patthaddho hoti, tasmā pathavīdhātuyā aviyutto so kāyo sabbadā kaṭṭhamukhagato viya hotīti. Vā-saddo vā aniyamattho. Tatrāyamattho – kaṭṭhamukhena daṭṭho kāyo patthaddho hoti vā, na vā mantāgadavasena. Pathavīdhātuppakopena pana mantāgadarahito so kāyo kaṭṭhamukhagato viya hoti ekantapatthaddhoti. Tattha kāyoti pakatikāyo. Pūtikoti kuthito. Santattoti sabbaso tatto mahādāhappatto. Sañchinnoti sabbaso chinno cuṇṇavicuṇṇabhūto. Yadā kāyo patthaddhādibhāvappatto hoti, tadā puriso kaṭṭhamukhādisappassa mukhe vattamāno viya hotīti attho.

விஸேஸதோதி கட்ட²முகா²தி³விஸேஸதோ ச பத²வீஆதி³விஸேஸதோ ச. அனத்த²க்³க³ஹணதோதிஆதி³ அசேதனேஸுபி பூ⁴தேஸு ஸசேதனேஸு விய அனத்தா²தீ³னங் பச்சக்க²தாய நிப்³பே³த³ஜனநத்த²ங் ஆரத்³த⁴ங். தத்த² ஆஸயதோதி பவத்திட்டா²னதோ. ஏதேஸந்தி மஹாபூ⁴தானங். ஸதி³ஸதாதி வம்மிகாஸயஸுஸிரக³ஹனஸங்காரட்டா²னாஸயதாய ச ஸதி³ஸதா.

Visesatoti kaṭṭhamukhādivisesato ca pathavīādivisesato ca. Anatthaggahaṇatotiādi acetanesupi bhūtesu sacetanesu viya anatthādīnaṃ paccakkhatāya nibbedajananatthaṃ āraddhaṃ. Tattha āsayatoti pavattiṭṭhānato. Etesanti mahābhūtānaṃ. Sadisatāti vammikāsayasusiragahanasaṅkāraṭṭhānāsayatāya ca sadisatā.

பச்சத்தலக்க²ணவஸேனாதி விஸுங் விஸுங் லக்க²ணவஸேன. பத²வீஆதீ³னங் கக்க²ளபா⁴வாதி³, தங்ஸமங்கி³னோ புக்³க³லஸ்ஸ கக்க²ளபா⁴வாபாத³னாதி³னா விகாருப்பாத³னதோ விஸவேக³விகாரதோ ஸதி³ஸதா வேதி³தப்³பா³.

Paccattalakkhaṇavasenāti visuṃ visuṃ lakkhaṇavasena. Pathavīādīnaṃ kakkhaḷabhāvādi, taṃsamaṅgino puggalassa kakkhaḷabhāvāpādanādinā vikāruppādanato visavegavikārato sadisatā veditabbā.

அனத்தா²தி ப்³யஸனா. ப்³யாதி⁴ந்தி குட்டா²தி³ப்³யாதி⁴ங். ப⁴வே ஜாதாபி⁴னந்தி³னோதி ப⁴வேஸு ஜாதியா அபி⁴னந்த³னஸீலா. பஞ்சவோகாரே ஹி ஜாதியா அபி⁴னந்த³னா நாம மஹாபூ⁴தாபி⁴னந்த³னா ஏவ.

Anatthāti byasanā. Byādhinti kuṭṭhādibyādhiṃ. Bhave jātābhinandinoti bhavesu jātiyā abhinandanasīlā. Pañcavokāre hi jātiyā abhinandanā nāma mahābhūtābhinandanā eva.

து³ருபட்டா²னதரானீதி து³ப்படிகாரதரானி. து³ராஸதா³தி து³ருபஸங்கமனா. ‘‘உபட்டா²மீ’’தி உபஸங்கமிதுங் ந ஸக்கொந்தி. பரிஜானாம கம்மனாமானி, உபகாரா நாம நத்தி². அனந்ததோ³ஸூபத்³த³வதோதி அபரிமாணதோ³ஸூபத்³த³வஹேதுதோ. ஏகபக்க²லந்தி ஏகது³க்க²ங்.

Durupaṭṭhānatarānīti duppaṭikāratarāni. Durāsadāti durupasaṅkamanā. ‘‘Upaṭṭhāmī’’ti upasaṅkamituṃ na sakkonti. Parijānāma kammanāmāni, upakārā nāma natthi. Anantadosūpaddavatoti aparimāṇadosūpaddavahetuto. Ekapakkhalanti ekadukkhaṃ.

ரூபக்க²ந்தோ⁴ பி⁴ஜ்ஜமானோ சத்தாரோ அரூபக்க²ந்தே⁴ க³ஹெத்வாவ பி⁴ஜ்ஜதி அரூபக்க²ந்தா⁴னங் ஏகனிரோத⁴த்தா. வத்து²ரூபம்பி க³ஹெத்வாவ பி⁴ஜ்ஜந்தி பஞ்சவோகாரே அரூபக்க²ந்தே⁴ஸு பி⁴ன்னேஸு ரூபக்க²ந்த⁴ஸ்ஸ அவட்டா²னாபா⁴வதோ. எத்தாவதாதி லோபு⁴ப்பாத³னமத்தேன. பஞ்ஞா நாம அத்தபா⁴வே உத்தமங்க³ங் பஞ்ஞுத்தரத்தா குஸலத⁴ம்மானங், ஸதி ச கிலேஸுப்பத்தியங் பஞ்ஞாய அனுப்பஜ்ஜனதோ வுத்தங் – ‘‘எத்தாவதா பஞ்ஞாஸீஸங் பதிதங் நாம ஹோதீ’’தி. யோனியோ உபனேதி தது³பக³ஸ்ஸ கம்மபச்சயஸ்ஸ பா⁴வே. ‘‘ஜாதிப⁴யங், ஜராப⁴யங், மரணப⁴யங், சோரப⁴ய’’ந்திஆதி³னா ஆக³தானி பஞ்சவீஸதி மஹாப⁴யானி, ‘‘ஹத்த²ம்பி சி²ந்த³தீ’’திஆதி³னா ஆக³தானி த்³வத்திங்ஸ கம்மகாரணானி ஆக³தானேவ ஹொந்தி காரணஸ்ஸ ஸமவட்டி²தத்தா. நந்தீ³ராகோ³ ஸங்கா²ரக்க²ந்தோ⁴தி ஸங்கா²ரக்க²ந்த⁴பரியாபன்னத்தா வுத்தங்.

Rūpakkhandhobhijjamāno cattāro arūpakkhandhe gahetvāva bhijjati arūpakkhandhānaṃ ekanirodhattā. Vatthurūpampi gahetvāva bhijjanti pañcavokāre arūpakkhandhesu bhinnesu rūpakkhandhassa avaṭṭhānābhāvato. Ettāvatāti lobhuppādanamattena. Paññā nāma attabhāve uttamaṅgaṃ paññuttarattā kusaladhammānaṃ, sati ca kilesuppattiyaṃ paññāya anuppajjanato vuttaṃ – ‘‘ettāvatā paññāsīsaṃ patitaṃ nāma hotī’’ti. Yoniyo upaneti tadupagassa kammapaccayassa bhāve. ‘‘Jātibhayaṃ, jarābhayaṃ, maraṇabhayaṃ, corabhaya’’ntiādinā āgatāni pañcavīsati mahābhayāni, ‘‘hatthampi chindatī’’tiādinā āgatāni dvattiṃsa kammakāraṇāni āgatāneva honti kāraṇassa samavaṭṭhitattā. Nandīrāgo saṅkhārakkhandhoti saṅkhārakkhandhapariyāpannattā vuttaṃ.

பாளியங்யேவ ஆக³தா ‘‘சக்கு²தோ சேபி நங், பி⁴க்க²வே’’திஆதி³னா. கிஞ்சி அலபி⁴த்வாதி தஸ்மிங் ஸுஞ்ஞகா³மே சோரானங் க³ய்ஹூபக³ஸ்ஸ அலாப⁴வசனேனேவ தஸ்ஸ புரிஸஸ்ஸ அத்தனோ படிஸரணஸ்ஸ அலாபோ⁴ வுத்தோ ஏவ ஹோதீதி ந உத்³த⁴டோ, புரிஸட்டா²னியோ பி⁴க்கு², சோரா பன பா³ஹிராயதனட்டா²னியா. அபி⁴னிவிஸித்வாதி விபஸ்ஸனாபி⁴னிவேஸங் கத்வா. அஜ்ஜ²த்திகாயதனவஸேன தே³ஸனாய ஆக³தத்தா வுத்தங் ‘‘உபாதா³ரூபகம்மட்டா²னவஸேனா’’தி.

Pāḷiyaṃyeva āgatā ‘‘cakkhuto cepi naṃ, bhikkhave’’tiādinā. Kiñci alabhitvāti tasmiṃ suññagāme corānaṃ gayhūpagassa alābhavacaneneva tassa purisassa attano paṭisaraṇassa alābho vutto eva hotīti na uddhaṭo, purisaṭṭhāniyo bhikkhu, corā pana bāhirāyatanaṭṭhāniyā. Abhinivisitvāti vipassanābhinivesaṃ katvā. Ajjhattikāyatanavasena desanāya āgatattā vuttaṃ ‘‘upādārūpakammaṭṭhānavasenā’’ti.

பா³ஹிரானந்தி பா³ஹிராயதனானங். பஞ்ச கிச்சானீதி சோரேஹி ததா³ காதப்³பா³னி பஞ்ச கிச்சானி. ஹத்த²ஸாரந்தி அத்தனோ ஸந்தகே ஹத்தே²ஹி க³ஹேதப்³ப³ஸாரப⁴ண்ட³ங். பாதனாதி³வஸேன ஹத்த²பராமாஸங் கரொந்தி. பஹாரடா²னேதி பஹடட்டா²னே. டா²னஸோ தஸ்மிங் ஏவ க²ணேதி வத³ந்தி. அத்தனோ ஸுகா²வஹங் குஸலத⁴ம்மங் பஹாய து³க்கா²வஹேன அகுஸலேன ஸமங்கி³தா ஸுகா²வஹங் ப⁴ண்ட³ங் பஹாய ப³ஹி நிக்க²மனங் வியாதி வுத்தங் ஸுக²னிஸ்ஸயத்தா தஸ்ஸ. ஹத்த²பரா…பே॰… ஆபஜ்ஜனகாலோ கு³ணஸரீரஸ்ஸ ததா³ பமாதே³ன பா³தி⁴தத்தா. பஹார…பே॰… காலோ ததோ த³ள்ஹதரங் கு³ணஸரீரஸ்ஸ பா³தி⁴தத்தா. பஹாரங்…பே॰… அஸ்ஸமணகாலோ கு³ணஸரீரஸ்ஸ மரணப்பத்திஸதி³ஸத்தா. அவஸேஸஜனஸ்ஸ தா³ஸபரிபோ⁴கே³ன பரிபு⁴ஞ்ஜிதப்³ப³தா அஞ்ஞத²த்தப்பத்திகி³ஹிபா⁴வாபத்தியா நித³ஸ்ஸனபா⁴வேன வுத்தா. யங் ‘‘ச²ஸு த்³வாரேஸு ஆரம்மணே ஆபாத²க³தே’’தி வுத்தங், தமேவ ஆரம்மணங் நிஸ்ஸாய ஸம்பராயிகோ து³க்க²க்க²ந்தோ⁴ வேதி³தப்³போ³தி யோஜனா.

Bāhirānanti bāhirāyatanānaṃ. Pañca kiccānīti corehi tadā kātabbāni pañca kiccāni. Hatthasāranti attano santake hatthehi gahetabbasārabhaṇḍaṃ. Pātanādivasena hatthaparāmāsaṃ karonti. Pahāraṭhāneti pahaṭaṭṭhāne. Ṭhānaso tasmiṃ eva khaṇeti vadanti. Attano sukhāvahaṃ kusaladhammaṃ pahāya dukkhāvahena akusalena samaṅgitā sukhāvahaṃ bhaṇḍaṃ pahāya bahi nikkhamanaṃ viyāti vuttaṃ sukhanissayattā tassa. Hatthaparā…pe… āpajjanakālo guṇasarīrassa tadā pamādena bādhitattā. Pahāra…pe… kālo tato daḷhataraṃ guṇasarīrassa bādhitattā. Pahāraṃ…pe… assamaṇakālo guṇasarīrassa maraṇappattisadisattā. Avasesajanassa dāsaparibhogena paribhuñjitabbatā aññathattappattigihibhāvāpattiyā nidassanabhāvena vuttā. Yaṃ ‘‘chasu dvāresu ārammaṇe āpāthagate’’ti vuttaṃ, tameva ārammaṇaṃ nissāya samparāyiko dukkhakkhandho veditabboti yojanā.

ரூபாதீ³னீதி ரூபஸத்³த³க³ந்த⁴ரஸானி. தேஸந்தி யதா²வுத்தபூ⁴துபாதா³ரூபானங். லஹுதாதி³வஸேனாதி தேஸங் லஹுதாதி³வஸேன. து³ருத்தரணட்டோ²தி உத்தரிதுங் அஸக்குணெய்யபா⁴வோ ஓக⁴ட்டோ². வுத்தனயேனாதி ‘‘ஸம்பயுத்தா வேத³னா வேத³னாக்க²ந்தோ⁴’’திஆதி³னா வுத்தனயேன. சதுமஹாபூ⁴தாதீ³ஹீதி ஆதி³ஸத்³தே³ன உபாதா³னக்க²ந்தா⁴தீ³னங் க³ஹணங். சித்தகிரியத³ஸ்ஸனத்த²ந்தி சித்தபயோக³த³ஸ்ஸனத்த²ங். வுத்தவாயாமமேவாதி ‘‘ஸம்மாவாயாமோ’’தி யோ அரியமக்³கே³ வுத்தோ. ப⁴த்³தே³கரத்தாதீ³னீதி ‘‘அஜ்ஜேவ கிச்சங் ஆதப்ப’’ந்திஆதி³னா (ம॰ நி॰ 3.272, 275, 276) வுத்தானி ப⁴த்³தே³கரத்தஸுத்தாதீ³னி.

Rūpādīnīti rūpasaddagandharasāni. Tesanti yathāvuttabhūtupādārūpānaṃ. Lahutādivasenāti tesaṃ lahutādivasena. Duruttaraṇaṭṭhoti uttarituṃ asakkuṇeyyabhāvo oghaṭṭho. Vuttanayenāti ‘‘sampayuttā vedanā vedanākkhandho’’tiādinā vuttanayena. Catumahābhūtādīhīti ādisaddena upādānakkhandhādīnaṃ gahaṇaṃ. Cittakiriyadassanatthanti cittapayogadassanatthaṃ. Vuttavāyāmamevāti ‘‘sammāvāyāmo’’ti yo ariyamagge vutto. Bhaddekarattādīnīti ‘‘ajjeva kiccaṃ ātappa’’ntiādinā (ma. ni. 3.272, 275, 276) vuttāni bhaddekarattasuttādīni.

குண்ட²பாதோ³தி சி²ன்னபாதோ³வ ஹுத்வா க³திவிகலோ. மானஸங் ப³ந்த⁴தீதி தஸ்மிங் சித்தே கிச்சங் நிப³ந்த⁴தி. ‘‘அயங் அரியமக்³கோ³ மய்ஹங் ஓகு⁴த்தரனுபாயோ’’தி தத்த² சித்தஸ்ஸ ஸன்னிட்டா²னங் புன தத்த² பவத்தனங் வீரியாரம்போ⁴ சித்தப³ந்த⁴னங்.

Kuṇṭhapādoti chinnapādova hutvā gativikalo. Mānasaṃ bandhatīti tasmiṃ citte kiccaṃ nibandhati. ‘‘Ayaṃ ariyamaggo mayhaṃ oghuttaranupāyo’’ti tattha cittassa sanniṭṭhānaṃ puna tattha pavattanaṃ vīriyārambho cittabandhanaṃ.

தஸ்ஸ நாமரூபஸ்ஸ இமே நந்தீ³ராகா³த³யோ தண்ஹாவிஜ்ஜாத³யோதி கத்வா பச்சயோ த⁴ம்மாயதனேகதே³ஸோ. அரியமக்³க³னிப்³பா³னதண்ஹாவஜ்ஜோ இத⁴ த⁴ம்மாயதனேகதே³ஸோதி ச. ஸோளஸஹாகாரேஹீதி பீளனாதீ³ஹி ஸோளஸஹி ஆகாரேஹி. ஸதிபட்டா²னவிப⁴ங்கே³ ஆக³தனயேன ஸட்டி²னயஸஹஸ்ஸேஹி. தே³ஸனாபரியோஸானே…பே॰… பதிட்ட²ஹிங்ஸூதி விபஞ்சிதஞ்ஞூ ஏவெத்த² க³ஹணவஸேன அதி⁴க³தவிஸேஸா பரிச்சி²ந்தி³தா. தே ஹி ததா³ த⁴ம்மபடிக்³கா³ஹகபா⁴வேன ஸத்து² ஸந்திகே ஸன்னிஸின்னா. உக்³க⁴டிதஞ்ஞூனங் பன நெய்யானஞ்ச விஸேஸாதி⁴க³மோ அட்ட²கதா²யங் ந ருள்ஹோதி இத⁴ ந க³ஹிதோதி.

Tassa nāmarūpassa ime nandīrāgādayo taṇhāvijjādayoti katvā paccayo dhammāyatanekadeso. Ariyamagganibbānataṇhāvajjo idha dhammāyatanekadesoti ca. Soḷasahākārehīti pīḷanādīhi soḷasahi ākārehi. Satipaṭṭhānavibhaṅge āgatanayena saṭṭhinayasahassehi. Desanāpariyosāne…pe… patiṭṭhahiṃsūti vipañcitaññū evettha gahaṇavasena adhigatavisesā paricchinditā. Te hi tadā dhammapaṭiggāhakabhāvena satthu santike sannisinnā. Ugghaṭitaññūnaṃ pana neyyānañca visesādhigamo aṭṭhakathāyaṃ na ruḷhoti idha na gahitoti.

ஆஸீவிஸோபமஸுத்தவண்ணனா நிட்டி²தா.

Āsīvisopamasuttavaṇṇanā niṭṭhitā.

Next: 2. ரதோ²பமஸுத்தவண்ணனா • 2. Rathopamasuttavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஆஸீவிஸோபமஸுத்தங் • 1. Āsīvisopamasuttaṃ

அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஆஸீவிஸோபமஸுத்தவண்ணனா • 1. Āsīvisopamasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact