| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. அஸ்ஸத்³த⁴ஸுத்தங்
2. Assaddhasuttaṃ
202. ‘‘அஸப்புரிஸஞ்ச வோ, பி⁴க்க²வே, தே³ஸெஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தங் ஸுணாத²…பே॰….
202. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ அஸ்ஸத்³தோ⁴ ஹோதி, அஹிரிகோ ஹோதி, அனொத்தப்பீ ஹோதி, அப்பஸ்ஸுதோ ஹோதி, குஸீதோ ஹோதி, முட்ட²ஸ்ஸதி ஹோதி, து³ப்பஞ்ஞோ ஹோதி. அயங் வுச்சதி, பி⁴க்க²வே, அஸப்புரிஸோ.
‘‘Katamo ca, bhikkhave, asappuriso? Idha, bhikkhave, ekacco assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti. Ayaṃ vuccati, bhikkhave, asappuriso.
‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச அஸ்ஸத்³தோ⁴ ஹோதி, பரஞ்ச அஸ்ஸத்³தி⁴யே 1 ஸமாத³பேதி; அத்தனா ச அஹிரிகோ ஹோதி, பரஞ்ச அஹிரிகதாய ஸமாத³பேதி; அத்தனா ச அனொத்தப்பீ ஹோதி, பரஞ்ச அனொத்தப்பே ஸமாத³பேதி; அத்தனா ச அப்பஸ்ஸுதோ ஹோதி, பரஞ்ச அப்பஸ்ஸுதே ஸமாத³பேதி; அத்தனா ச குஸீதோ ஹோதி, பரஞ்ச கோஸஜ்ஜே ஸமாத³பேதி; அத்தனா ச முட்ட²ஸ்ஸதி ஹோதி, பரஞ்ச முட்ட²ஸ்ஸச்சே 2 ஸமாத³பேதி; அத்தனா ச து³ப்பஞ்ஞோ ஹோதி, பரஞ்ச து³ப்பஞ்ஞதாய ஸமாத³பேதி. அயங் வுச்சதி, பி⁴க்க²வே, அஸப்புரிஸேன அஸப்புரிஸதரோ.
‘‘Katamo ca, bhikkhave, asappurisena asappurisataro? Idha, bhikkhave, ekacco attanā ca assaddho hoti, parañca assaddhiye 3 samādapeti; attanā ca ahiriko hoti, parañca ahirikatāya samādapeti; attanā ca anottappī hoti, parañca anottappe samādapeti; attanā ca appassuto hoti, parañca appassute samādapeti; attanā ca kusīto hoti, parañca kosajje samādapeti; attanā ca muṭṭhassati hoti, parañca muṭṭhassacce 4 samādapeti; attanā ca duppañño hoti, parañca duppaññatāya samādapeti. Ayaṃ vuccati, bhikkhave, asappurisena asappurisataro.
‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ ஸத்³தோ⁴ ஹோதி, ஹிரிமா ஹோதி, ஒத்தப்பீ ஹோதி, ப³ஹுஸ்ஸுதோ ஹோதி, ஆரத்³த⁴வீரியோ ஹோதி, ஸதிமா ஹோதி, பஞ்ஞவா ஹோதி. அயங் வுச்சதி, பி⁴க்க²வே, ஸப்புரிஸோ.
‘‘Katamo ca, bhikkhave, sappuriso? Idha, bhikkhave, ekacco saddho hoti, hirimā hoti, ottappī hoti, bahussuto hoti, āraddhavīriyo hoti, satimā hoti, paññavā hoti. Ayaṃ vuccati, bhikkhave, sappuriso.
‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச ஸத்³தா⁴ஸம்பன்னோ ஹோதி, பரஞ்ச ஸத்³தா⁴ஸம்பதா³ய ஸமாத³பேதி ; அத்தனா ச ஹிரிமா ஹோதி, பரஞ்ச ஹிரிமதாய 5 ஸமாத³பேதி; அத்தனா ச ஒத்தப்பீ ஹோதி, பரஞ்ச ஒத்தப்பே ஸமாத³பேதி; அத்தனா ச ப³ஹுஸ்ஸுதோ ஹோதி, பரஞ்ச பா³ஹுஸச்சே ஸமாத³பேதி; அத்தனா ச ஆரத்³த⁴வீரியோ ஹோதி, பரஞ்ச வீரியாரம்பே⁴ ஸமாத³பேதி; அத்தனா ச உபட்டி²தஸ்ஸதி ஹோதி, பரஞ்ச ஸதிஉபட்டா²னே 6 ஸமாத³பேதி; அத்தனா ச பஞ்ஞாஸம்பன்னோ ஹோதி, பரஞ்ச பஞ்ஞாஸம்பதா³ய ஸமாத³பேதி. அயங் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. து³தியங்.
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca saddhāsampanno hoti, parañca saddhāsampadāya samādapeti ; attanā ca hirimā hoti, parañca hirimatāya 7 samādapeti; attanā ca ottappī hoti, parañca ottappe samādapeti; attanā ca bahussuto hoti, parañca bāhusacce samādapeti; attanā ca āraddhavīriyo hoti, parañca vīriyārambhe samādapeti; attanā ca upaṭṭhitassati hoti, parañca satiupaṭṭhāne 8 samādapeti; attanā ca paññāsampanno hoti, parañca paññāsampadāya samādapeti. Ayaṃ vuccati, bhikkhave, sappurisena sappurisataro’’ti. Dutiyaṃ.
Footnotes:
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸிக்கா²பத³ஸுத்தாதி³வண்ணனா • 1-10. Sikkhāpadasuttādivaṇṇanā
