| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. அஸ்ஸலாயனஸுத்தவண்ணனா
3. Assalāyanasuttavaṇṇanā
401. ஏவங் மே ஸுதந்தி அஸ்ஸலாயனஸுத்தங். தத்த² நானாவேரஜ்ஜகானந்தி அங்க³மக³தா⁴தீ³ஹி நானப்பகாரேஹி வேரஜ்ஜேஹி ஆக³தானங், தேஸு வா ரட்டே²ஸு ஜாதஸங்வட்³டா⁴னந்திபி அத்தோ². கேனசிதே³வாதி யஞ்ஞுபாஸனாதி³னா அனியமிதகிச்சேன. சாதுவண்ணிந்தி சதுவண்ணஸாதா⁴ரணங். மயங் பன ந்ஹானஸுத்³தி⁴யா பா⁴வனாஸுத்³தி⁴யாபி ப்³ராஹ்மணாவ ஸுஜ்ஜ²ந்தீதி வதா³ம, அயுத்தம்பி ஸமணோ கோ³தமோ கரோதீதி மஞ்ஞமானா ஏவங் சிந்தயிங்ஸு. வுத்தஸிரோதி வாபிதஸிரோ.
401.Evaṃme sutanti assalāyanasuttaṃ. Tattha nānāverajjakānanti aṅgamagadhādīhi nānappakārehi verajjehi āgatānaṃ, tesu vā raṭṭhesu jātasaṃvaḍḍhānantipi attho. Kenacidevāti yaññupāsanādinā aniyamitakiccena. Cātuvaṇṇinti catuvaṇṇasādhāraṇaṃ. Mayaṃ pana nhānasuddhiyā bhāvanāsuddhiyāpi brāhmaṇāva sujjhantīti vadāma, ayuttampi samaṇo gotamo karotīti maññamānā evaṃ cintayiṃsu. Vuttasiroti vāpitasiro.
த⁴ம்மவாதீ³தி ஸபா⁴வவாதீ³. து³ப்படிமந்தியாதி அம்ஹாதி³ஸேஹி அத⁴ம்மவாதீ³ஹி து³க்கே²ன படிமந்திதப்³பா³ ஹொந்தி. த⁴ம்மவாதி³னோ நாம பராஜயோ ந ஸக்கா காதுந்தி த³ஸ்ஸேதி. பரிப்³பா³ஜகந்தி பப்³ப³ஜ்ஜாவிதா⁴னங், தயோ வேதே³ உக்³க³ஹெத்வா ஸப்³ப³பச்சா² பப்³ப³ஜந்தா யேஹி மந்தேஹி பப்³ப³ஜந்தி, பப்³ப³ஜிதா ச யே மந்தே பரிஹரந்தி, யங் வா ஆசாரங் ஆசரந்தி, தங் ஸப்³ப³ங் போ⁴தா சரிதங் ஸிக்கி²தங். தஸ்மா துய்ஹங் பராஜயோ நத்தி², ஜயோவ ப⁴விஸ்ஸதீதி மஞ்ஞந்தா ஏவமாஹங்ஸு.
Dhammavādīti sabhāvavādī. Duppaṭimantiyāti amhādisehi adhammavādīhi dukkhena paṭimantitabbā honti. Dhammavādino nāma parājayo na sakkā kātunti dasseti. Paribbājakanti pabbajjāvidhānaṃ, tayo vede uggahetvā sabbapacchā pabbajantā yehi mantehi pabbajanti, pabbajitā ca ye mante pariharanti, yaṃ vā ācāraṃ ācaranti, taṃ sabbaṃ bhotā caritaṃ sikkhitaṃ. Tasmā tuyhaṃ parājayo natthi, jayova bhavissatīti maññantā evamāhaṃsu.
402. தி³ஸ்ஸந்தி கோ² பனாதிஆதி³ தேஸங் லத்³தி⁴பி⁴ந்த³னத்த²ங் வுத்தங். தத்த² ப்³ராஹ்மணியோதி ப்³ராஹ்மணானங் புத்தபடிலாப⁴த்தா²ய ஆவாஹவிவாஹவஸேன குலா ஆனீதா ப்³ராஹ்மணியோ தி³ஸ்ஸந்தி . தா கோ² பனேதா அபரேன ஸமயேன உதுனியோபி ஹொந்தி, ஸஞ்ஜாதபுப்பா²தி அத்தோ². க³ப்³பி⁴னியோதி ஸஞ்ஜாதக³ப்³பா⁴. விஜாயமானாதி புத்ததீ⁴தரோ ஜனயமானா. பாயமானாதி தா³ரகே த²ஞ்ஞங் பாயந்தியோ. யோனிஜாவ ஸமானாதி ப்³ராஹ்மணீனங் பஸ்ஸாவமக்³கே³ன ஜாதா ஸமானா. ஏவமாஹங்ஸூதி ஏவங் வத³ந்தி. கத²ங்? ப்³ராஹ்மணோவ ஸெட்டோ² வண்ணோ…பே॰… ப்³ரஹ்மதா³யாதா³தி. யதி³ பன நேஸங் ஸச்சவசனங் ஸியா, ப்³ராஹ்மணீனங் குச்சி² மஹாப்³ரஹ்முனோ உரோ ப⁴வெய்ய, ப்³ராஹ்மணீனங் பஸ்ஸாவமக்³கோ³ மஹாப்³ரஹ்முனோ முக²ங் ப⁴வெய்ய, எத்தாவதா ‘‘மயங் மஹாப்³ரஹ்முனோ உரே வஸித்வா முக²தோ நிக்க²ந்தா’’தி வத்துங் மா லப⁴ந்தூதி அயங் முக²தோ ஜாதச்சே²த³கவாதோ³ வுத்தோ.
402.Dissanti kho panātiādi tesaṃ laddhibhindanatthaṃ vuttaṃ. Tattha brāhmaṇiyoti brāhmaṇānaṃ puttapaṭilābhatthāya āvāhavivāhavasena kulā ānītā brāhmaṇiyo dissanti . Tā kho panetā aparena samayena utuniyopi honti, sañjātapupphāti attho. Gabbhiniyoti sañjātagabbhā. Vijāyamānāti puttadhītaro janayamānā. Pāyamānāti dārake thaññaṃ pāyantiyo. Yonijāva samānāti brāhmaṇīnaṃ passāvamaggena jātā samānā. Evamāhaṃsūti evaṃ vadanti. Kathaṃ? Brāhmaṇova seṭṭho vaṇṇo…pe… brahmadāyādāti. Yadi pana nesaṃ saccavacanaṃ siyā, brāhmaṇīnaṃ kucchi mahābrahmuno uro bhaveyya, brāhmaṇīnaṃ passāvamaggo mahābrahmuno mukhaṃ bhaveyya, ettāvatā ‘‘mayaṃ mahābrahmuno ure vasitvā mukhato nikkhantā’’ti vattuṃ mā labhantūti ayaṃ mukhato jātacchedakavādo vutto.
403. அய்யோ ஹுத்வா தா³ஸோ ஹோதி, தா³ஸோ ஹுத்வா அய்யோ ஹோதீதி ப்³ராஹ்மணோ ஸப⁴ரியோ வணிஜ்ஜங் பயோஜெந்தோ யோனகரட்ட²ங் வா கம்போ³ஜரட்ட²ங் வா க³ந்த்வா காலங் கரோதி, தஸ்ஸ கே³ஹே வயப்பத்தே புத்தே அஸதி ப்³ராஹ்மணீ தா³ஸேன வா கம்மகரேன வா ஸத்³தி⁴ங் ஸங்வாஸங் கப்பேதி. ஏகஸ்மிங் தா³ரகே ஜாதே ஸோ புரிஸோ தா³ஸோவ ஹோதி, தஸ்ஸ ஜாததா³ரகோ பன தா³யஜ்ஜஸாமிகோ ஹோதி. மாதிதோ ஸுத்³தோ⁴ பிதிதோ அஸுத்³தோ⁴ ஸோ வணிஜ்ஜங் பயோஜெந்தோ மஜ்ஜி²மபதே³ஸங் க³ந்த்வா ப்³ராஹ்மணதா³ரிகங் க³ஹெத்வா தஸ்ஸா குச்சி²ஸ்மிங் புத்தங் படிலப⁴தி, ஸோபி மாதிதோவ ஸுத்³தோ⁴ ஹோதி பிதிதோ அஸுத்³தோ⁴. ஏவங் ப்³ராஹ்மணஸமயஸ்மிஞ்ஞேவ ஜாதிஸம்பே⁴தோ³ ஹோதீதி த³ஸ்ஸனத்த²மேதங் வுத்தங். கிங் ப³லங், கோ அஸ்ஸாஸோதி யத்த² தும்ஹே தா³ஸா ஹொந்தா ஸப்³பே³வ தா³ஸா ஹோத², அய்யா ஹொந்தா ஸப்³பே³வ அய்யா ஹோத², எத்த² வோ கோ தா²மோ, கோ அவஸ்ஸயோ, யங் ப்³ராஹ்மணோவ ஸெட்டோ² வண்ணோதி வத³தா²தி தீ³பேதி.
403.Ayyo hutvā dāso hoti, dāso hutvā ayyo hotīti brāhmaṇo sabhariyo vaṇijjaṃ payojento yonakaraṭṭhaṃ vā kambojaraṭṭhaṃ vā gantvā kālaṃ karoti, tassa gehe vayappatte putte asati brāhmaṇī dāsena vā kammakarena vā saddhiṃ saṃvāsaṃ kappeti. Ekasmiṃ dārake jāte so puriso dāsova hoti, tassa jātadārako pana dāyajjasāmiko hoti. Mātito suddho pitito asuddho so vaṇijjaṃ payojento majjhimapadesaṃ gantvā brāhmaṇadārikaṃ gahetvā tassā kucchismiṃ puttaṃ paṭilabhati, sopi mātitova suddho hoti pitito asuddho. Evaṃ brāhmaṇasamayasmiññeva jātisambhedo hotīti dassanatthametaṃ vuttaṃ. Kiṃbalaṃ, ko assāsoti yattha tumhe dāsā hontā sabbeva dāsā hotha, ayyā hontā sabbeva ayyā hotha, ettha vo ko thāmo, ko avassayo, yaṃ brāhmaṇova seṭṭho vaṇṇoti vadathāti dīpeti.
404. க²த்தியோவ நு கோ²திஆத³யோ ஸுத்தச்சே²த³கவாதா³ நாம ஹொந்தி.
404.Khattiyova nu khotiādayo suttacchedakavādā nāma honti.
408. இதா³னி சாதுவண்ணிஸுத்³தி⁴ங் த³ஸ்ஸெந்தோ இத⁴ ராஜாதிஆதி³மாஹ. ஸாபானதோ³ணியாதி ஸுனகா²னங் பிவனதோ³ணியா. அக்³கி³கரணீயந்தி ஸீதவினோத³னஅந்த⁴காரவித⁴மனப⁴த்தபசனாதி³ அக்³கி³கிச்சங். எத்த² அஸ்ஸலாயனாதி எத்த² ஸப்³ப³ஸ்மிங் அக்³கி³கிச்சங் கரொந்தே.
408. Idāni cātuvaṇṇisuddhiṃ dassento idha rājātiādimāha. Sāpānadoṇiyāti sunakhānaṃ pivanadoṇiyā. Aggikaraṇīyanti sītavinodanaandhakāravidhamanabhattapacanādi aggikiccaṃ. Ettha assalāyanāti ettha sabbasmiṃ aggikiccaṃ karonte.
409. இதா³னி யதே³தங் ப்³ராஹ்மணா சாதுவண்ணிஸுத்³தீ⁴தி வத³ந்தி, எத்த² சாதுவண்ணாதி நியமோ நத்தி². பஞ்சமோ ஹி பாத³ஸிகவண்ணோபி அத்தீ²தி ஸங்கி²த்தேன தேஸங் வாதே³ தோ³ஸத³ஸ்ஸனத்த²ங் இத⁴ க²த்தியகுமாரோதிஆதி³மாஹ. தத்ர அமுத்ர ச பனேஸானந்தி அமுஸ்மிஞ்ச பன புரிமனயே ஏதேஸங் மாணவகானங் கிஞ்சி நானாகரணங் ந பஸ்ஸாமீதி வத³தி. நானாகரணங் பன தேஸம்பி அத்தி²யேவ. க²த்தியகுமாரஸ்ஸ ஹி ப்³ராஹ்மணகஞ்ஞாய உப்பன்னோ க²த்தியபாத³ஸிகோ நாம, இதரோ ப்³ராஹ்மணபாத³ஸிகோ நாம, ஏதே ஹீனஜாதிமாணவகா.
409. Idāni yadetaṃ brāhmaṇā cātuvaṇṇisuddhīti vadanti, ettha cātuvaṇṇāti niyamo natthi. Pañcamo hi pādasikavaṇṇopi atthīti saṃkhittena tesaṃ vāde dosadassanatthaṃ idha khattiyakumārotiādimāha. Tatra amutra ca panesānanti amusmiñca pana purimanaye etesaṃ māṇavakānaṃ kiñci nānākaraṇaṃ na passāmīti vadati. Nānākaraṇaṃ pana tesampi atthiyeva. Khattiyakumārassa hi brāhmaṇakaññāya uppanno khattiyapādasiko nāma, itaro brāhmaṇapādasiko nāma, ete hīnajātimāṇavakā.
ஏவங் பஞ்சமஸ்ஸ வண்ணஸ்ஸ அத்தி²தாய சாதுவண்ணிஸுத்³தீ⁴தி ஏதேஸங் வாதே³ தோ³ஸங் த³ஸ்ஸெத்வா இதா³னி புன சாதுவண்ணிஸுத்³தி⁴யங் ஓவத³ந்தோ தங் கிங் மஞ்ஞஸீதிஆதி³மாஹ. தத்த² ஸத்³தே⁴தி மதகப⁴த்தே. தா²லிபாகேதி பண்ணாகாரப⁴த்தே. யஞ்ஞேதி யஞ்ஞப⁴த்தே. பாஹுனேதி ஆக³ந்துகானங் கதப⁴த்தே. கிங் ஹீதி கிங் மஹப்ப²லங் ப⁴விஸ்ஸதி, நோ ப⁴விஸ்ஸதீதி தீ³பேதி.
Evaṃ pañcamassa vaṇṇassa atthitāya cātuvaṇṇisuddhīti etesaṃ vāde dosaṃ dassetvā idāni puna cātuvaṇṇisuddhiyaṃ ovadanto taṃ kiṃ maññasītiādimāha. Tattha saddheti matakabhatte. Thālipāketi paṇṇākārabhatte. Yaññeti yaññabhatte. Pāhuneti āgantukānaṃ katabhatte. Kiṃ hīti kiṃ mahapphalaṃ bhavissati, no bhavissatīti dīpeti.
410. பூ⁴தபுப்³ப³ந்தி அஸ்ஸலாயன புப்³பே³ மயி ஜாதியா ஹீனதரே தும்ஹே ஸெட்ட²தரா ஸமானாபி மயா ஜாதிவாதே³ பஞ்ஹங் புட்டா² ஸம்பாதே³துங் ந ஸக்கி²த்த², இதா³னி தும்ஹே ஹீனதரா ஹுத்வா மயா ஸெட்ட²தரேன பு³த்³தா⁴னங் ஸகே ஜாதிவாத³பஞ்ஹங் புட்டா² கிங் ஸம்பாதெ³ஸ்ஸத²? ந எத்த² சிந்தா காதப்³பா³தி மாணவங் உபத்த²ம்பெ⁴ந்தோ இமங் தே³ஸனங் ஆரபி⁴. தத்த² அஸிதோதி காளகோ. தே³வலோதி தஸ்ஸ நாமங், அயமேவ ப⁴க³வா தேன ஸமயேன. படலியோதி க³ணங்க³ணுபாஹனா. பத்த²ண்டி³லேதி பண்ணஸாலபரிவேணே. கோ நு கோ²தி கஹங் நு கோ². கா³மண்ட³லரூபோ வியாதி கா³மதா³ரகரூபோ விய. ஸோ க்²வாஹங், போ⁴, ஹோமீதி ஸோ அஹங், போ⁴, அஸிததே³வலோ ஹோமீதி வத³தி. ததா³ கிர மஹாஸத்தோ கொண்ட³த³மகோ ஹுத்வா விசரதி. அபி⁴வாதே³துங் உபக்கமிங்ஸூதி வந்தி³துங் உபக்கமங் அகங்ஸு. ததோ பட்டா²ய ச வஸ்ஸஸதிகதாபஸோபி தத³ஹுஜாதங் ப்³ராஹ்மணகுமாரங் அவந்த³ந்தோ கொண்டி³தோ ஹோதி.
410.Bhūtapubbanti assalāyana pubbe mayi jātiyā hīnatare tumhe seṭṭhatarā samānāpi mayā jātivāde pañhaṃ puṭṭhā sampādetuṃ na sakkhittha, idāni tumhe hīnatarā hutvā mayā seṭṭhatarena buddhānaṃ sake jātivādapañhaṃ puṭṭhā kiṃ sampādessatha? Na ettha cintā kātabbāti māṇavaṃ upatthambhento imaṃ desanaṃ ārabhi. Tattha asitoti kāḷako. Devaloti tassa nāmaṃ, ayameva bhagavā tena samayena. Paṭaliyoti gaṇaṅgaṇupāhanā. Patthaṇḍileti paṇṇasālapariveṇe. Ko nu khoti kahaṃ nu kho. Gāmaṇḍalarūpo viyāti gāmadārakarūpo viya. So khvāhaṃ, bho, homīti so ahaṃ, bho, asitadevalo homīti vadati. Tadā kira mahāsatto koṇḍadamako hutvā vicarati. Abhivādetuṃ upakkamiṃsūti vandituṃ upakkamaṃ akaṃsu. Tato paṭṭhāya ca vassasatikatāpasopi tadahujātaṃ brāhmaṇakumāraṃ avandanto koṇḍito hoti.
411. ஜனிகா மாதாதி யாய தும்ஹே ஜனிதா, ஸா வோ ஜனிகா மாதா. ஜனிகாமாதூதி ஜனிகாய மாது. யோ ஜனகோதி யோ ஜனகோ பிதா. ‘‘யோ ஜனிகோ பிதாதேவ’’ வா பாடோ².
411.Janikā mātāti yāya tumhe janitā, sā vo janikā mātā. Janikāmātūti janikāya mātu. Yo janakoti yo janako pitā. ‘‘Yo janiko pitāteva’’ vā pāṭho.
அஸிதேனாதி பஞ்சாபி⁴ஞ்ஞேன அஸிதேன தே³வலேன இஸினா இமங் க³ந்த⁴ப்³ப³பஞ்ஹங் புட்டா² ந ஸம்பாயிஸ்ஸந்தி. யேஸந்தி யேஸங் ஸத்தன்னங் இஸீனங். ந புண்ணோ த³ப்³பி³கா³ஹோதி தேஸங் ஸத்தன்னங் இஸீனங் த³ப்³பி³ங் க³ஹெத்வா பண்ணங் பசித்வா தா³யகோ புண்ணோ நாம ஏகோ அஹோஸி, ஸோ த³ப்³பி³க³ஹணஸிப்பங் ஜானாதி. த்வங் ஸாசரியகோ தேஸங் புண்ணோபி ந ஹோதி, தேன ஞாதங் த³ப்³பி³க³ஹணஸிப்பமத்தம்பி ந ஜானாஸீதி. ஸேஸங் ஸப்³ப³த்த² உத்தானமேவாதி.
Asitenāti pañcābhiññena asitena devalena isinā imaṃ gandhabbapañhaṃ puṭṭhā na sampāyissanti. Yesanti yesaṃ sattannaṃ isīnaṃ. Na puṇṇo dabbigāhoti tesaṃ sattannaṃ isīnaṃ dabbiṃ gahetvā paṇṇaṃ pacitvā dāyako puṇṇo nāma eko ahosi, so dabbigahaṇasippaṃ jānāti. Tvaṃ sācariyako tesaṃ puṇṇopi na hoti, tena ñātaṃ dabbigahaṇasippamattampi na jānāsīti. Sesaṃ sabbattha uttānamevāti.
அயங் பன அஸ்ஸலாயனோ ஸத்³தோ⁴ அஹோஸி பஸன்னோ, அத்தனோ அந்தோனிவேஸனேயேவ சேதியங் காரேஸி. யாவஜ்ஜதி³வஸா அஸ்ஸலாயனவங்ஸே ஜாதா நிவேஸனங் காரெத்வா அந்தோனிவேஸனே சேதியங் கரொந்தேவாதி.
Ayaṃ pana assalāyano saddho ahosi pasanno, attano antonivesaneyeva cetiyaṃ kāresi. Yāvajjadivasā assalāyanavaṃse jātā nivesanaṃ kāretvā antonivesane cetiyaṃ karontevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
அஸ்ஸலாயனஸுத்தவண்ணனா நிட்டி²தா.
Assalāyanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. அஸ்ஸலாயனஸுத்தங் • 3. Assalāyanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. அஸ்ஸலாயனஸுத்தவண்ணனா • 3. Assalāyanasuttavaṇṇanā
