| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. மஹாவக்³கோ³
7. Mahāvaggo
1. அஸ்ஸுதவாஸுத்தவண்ணனா
1. Assutavāsuttavaṇṇanā
61. ‘‘அஸ்ஸுதவா’’தி ஸோதத்³வாரானுஸாரேன உபதா⁴ரிதங், உபதா⁴ரணங் வா ஸுதங் அஸ்ஸ அத்தீ²தி ஸுதவா, தப்படிக்கே²பேன ந ஸுதவாதி அஸ்ஸுதவா. வா-ஸத்³தோ³ சாயங் பஸங்ஸாயங், அதிஸயஸ்ஸ வா போ³த⁴னகோ, தஸ்மா யஸ்ஸ பஸங்ஸிதங், அதிஸயேன வா ஸுதங் அத்தி², ஸோ ‘‘ஸுதவா’’தி ஸங்கிலேஸவித்³த⁴ங்ஸனஸமத்தோ² பரியத்தித⁴ம்மபரிசயோ ‘‘தங் ஸுத்வா தத²த்தாய படிபத்தி ச ஸுதவா’’தி இமினா பதே³ன பகாஸிதோ. அத² வா ஸோதப்³ப³யுத்தங் ஸுத்வா கத்தப்³ப³னிப்ப²த்திங் ஸுணீதி ஸுதவா. தப்படிக்கே²பேன ந ஸுதவாதி அஸ்ஸுதவா. தேனாஹு போராணா ‘‘ஆக³மாதி⁴க³மாபா⁴வா, ஞெய்யோ அஸ்ஸுதவா இதீ’’தி. ததா² சாஹ ‘‘க²ந்த⁴தா⁴து…பே॰… வினிச்ச²யரஹிதோ’’தி. தத்த² வாசுக்³க³தகரணங் உக்³க³ஹோ, தத்த² பரிபுச்ச²னங் பரிபுச்சா², குஸலேஹி ஸஹ சோத³னாபரிஹரணவஸேன வினிச்ச²யஸ்ஸ காரணங் வினிச்ச²யோ. புதூ²னந்தி ப³ஹூனங். கிலேஸாதீ³னங் கிலேஸாபி⁴ஸங்கா²ரானங் வித்தா²ரேதப்³ப³ங் படிஸம்பி⁴தா³மக்³க³னித்³தே³ஸேஸு (மஹானி॰ 51, 94) ஆக³தனயேன. அந்த⁴புது²ஜ்ஜனோ க³ஹிதோ ‘‘நாலங் நிப்³பி³ந்தி³து’’ந்திஆதி³வசனதோ. ஆஸன்னபச்சக்க²வாசீ இத³ங்-ஸத்³தோ³தி ஆஹ ‘‘இமஸ்மிந்தி பச்சுப்பன்னபச்சக்க²காயங் த³ஸ்ஸேதீ’’தி. சதூஸு மஹாபூ⁴தேஸு நியுத்தோதி சாதுமஹாபூ⁴திகோ. யதா² பன மஹாமத்திகாய நிப்³ப³த்தங் மத்திகாமயங், ஏவமயங் சதூஹி மஹாபூ⁴தேஹி நிப்³ப³த்தோ ‘‘சதுமஹாபூ⁴தமயோ’’தி வுத்தங். நிப்³பி³ந்தெ³ய்யாதி நிப்³பி³ந்த³னம்பி ஆபஜ்ஜெய்ய. நிப்³பி³ந்த³னா நாம உக்கண்ட²னா அனபி⁴ரதிபா⁴வதோதி வுத்தங் ‘‘உக்கண்டெ²ய்யா’’தி. விரஜ்ஜெய்யாதி வீதராகோ³ ப⁴வெய்ய. தேனாஹ ‘‘ந ரஜ்ஜெய்யா’’தி. விமுச்செய்யாதி இத⁴ பன அச்சந்தாய விமுச்சனங் அதி⁴ப்பேதந்தி ஆஹ ‘‘முச்சிதுகாமோ ப⁴வெய்யா’’தி. சதூஹி ச ரூபஜனகபச்சயேஹி ஆக³தோ சயோதி, ஆசயோ, வுத்³தி⁴. சயதோ அபக்கமோதி அபசயோ, பரிஹானி. ஆதா³னந்தி க³ஹணங், படிஸந்தி⁴யா நிப்³ப³த்தி. பே⁴தோ³தி க²ந்தா⁴னங் பே⁴தோ³. ஸோ ஹி களேவரஸ்ஸ நிக்கே²போதி வுத்தோதி ஆஹ ‘‘நிக்கே²பனந்தி பே⁴தோ³’’தி.
61.‘‘Assutavā’’ti sotadvārānusārena upadhāritaṃ, upadhāraṇaṃ vā sutaṃ assa atthīti sutavā, tappaṭikkhepena na sutavāti assutavā. Vā-saddo cāyaṃ pasaṃsāyaṃ, atisayassa vā bodhanako, tasmā yassa pasaṃsitaṃ, atisayena vā sutaṃ atthi, so ‘‘sutavā’’ti saṃkilesaviddhaṃsanasamattho pariyattidhammaparicayo ‘‘taṃ sutvā tathattāya paṭipatti ca sutavā’’ti iminā padena pakāsito. Atha vā sotabbayuttaṃ sutvā kattabbanipphattiṃ suṇīti sutavā. Tappaṭikkhepena na sutavāti assutavā. Tenāhu porāṇā ‘‘āgamādhigamābhāvā, ñeyyo assutavā itī’’ti. Tathā cāha ‘‘khandhadhātu…pe… vinicchayarahito’’ti. Tattha vācuggatakaraṇaṃ uggaho, tattha paripucchanaṃ paripucchā, kusalehi saha codanāpariharaṇavasena vinicchayassa kāraṇaṃ vinicchayo. Puthūnanti bahūnaṃ. Kilesādīnaṃ kilesābhisaṅkhārānaṃ vitthāretabbaṃ paṭisambhidāmagganiddesesu (mahāni. 51, 94) āgatanayena. Andhaputhujjano gahito ‘‘nālaṃ nibbinditu’’ntiādivacanato. Āsannapaccakkhavācī idaṃ-saddoti āha ‘‘imasminti paccuppannapaccakkhakāyaṃ dassetī’’ti. Catūsu mahābhūtesu niyuttoti cātumahābhūtiko. Yathā pana mahāmattikāya nibbattaṃ mattikāmayaṃ, evamayaṃ catūhi mahābhūtehi nibbatto ‘‘catumahābhūtamayo’’ti vuttaṃ. Nibbindeyyāti nibbindanampi āpajjeyya. Nibbindanā nāma ukkaṇṭhanā anabhiratibhāvatoti vuttaṃ ‘‘ukkaṇṭheyyā’’ti. Virajjeyyāti vītarāgo bhaveyya. Tenāha ‘‘na rajjeyyā’’ti. Vimucceyyāti idha pana accantāya vimuccanaṃ adhippetanti āha ‘‘muccitukāmo bhaveyyā’’ti. Catūhi ca rūpajanakapaccayehi āgato cayoti, ācayo, vuddhi. Cayato apakkamoti apacayo, parihāni. Ādānanti gahaṇaṃ, paṭisandhiyā nibbatti. Bhedoti khandhānaṃ bhedo. So hi kaḷevarassa nikkhepoti vuttoti āha ‘‘nikkhepananti bhedo’’ti.
பஞ்ஞாயந்தீதி பகாரதோ ஞாயந்தி. ரூபங் பரிக்³க³ஹேதுங் பரிக்³க³ண்ஹனவஸேனபி ரூபங் ஆலம்பி³துங். அயுத்தரூபங் கத்வா தண்ஹாதீ³ஹி பரிக்³க³ஹேதுங் அரூபங் பரிக்³க³ண்ஹிதுங் யுத்தரூபங் கரோதி தேஸங் பி⁴க்கூ²னங் ஸப்பாயபா⁴வதோ. தேனாஹ ‘‘கஸ்மா’’திஆதி³. நிக்கட்³ட⁴ந்தோதி ததோ கா³ஹதோ நீஹரந்தோ.
Paññāyantīti pakārato ñāyanti. Rūpaṃ pariggahetuṃ pariggaṇhanavasenapi rūpaṃ ālambituṃ. Ayuttarūpaṃ katvā taṇhādīhi pariggahetuṃ arūpaṃ pariggaṇhituṃ yuttarūpaṃ karoti tesaṃ bhikkhūnaṃ sappāyabhāvato. Tenāha ‘‘kasmā’’tiādi. Nikkaḍḍhantoti tato gāhato nīharanto.
மனாயதனஸ்ஸேவ நாமங், ந ஸமாதி⁴பஞ்ஞத்தீனங் ‘‘சித்தங் பஞ்ஞஞ்ச பா⁴வயங் (ஸங்॰ நி॰ 1.23, 192; பேடகோ॰ 22; மி॰ ப॰ 1.9.9), சித்தோ க³ஹபதீ’’திஆதீ³ஸு (த⁴॰ ப॰ அட்ட²॰ 74) விய. சித்தீகாதப்³ப³பூ⁴தங் வத்து² ஏதஸ்ஸாதி சித்தவத்து², தஸ்ஸ பா⁴வோ சித்தவத்து²தா, தேன காரணேன சித்தபா⁴வமாஹ. சித்தகோ³சரதாயாதி சித்தவிசித்தவிஸயதாய. ஸம்பயுத்தத⁴ம்மசித்ததாயாதி ராகா³தி³ஸத்³தா⁴தி³ஸம்பயுத்தத⁴ம்மவஸேன சித்தஸபா⁴வத்தா. தேன சித்ததாய சித்தத்தமாஹ. விஜானநட்டே²னாதி பு³ஜ்ஜ²னட்டே²ன. அஜ்ஜோ²ஸிதந்தி அஜ்ஜோ²ஸாபூ⁴தாய தண்ஹாய க³ஹிதங். தேனாஹ ‘‘தண்ஹாயா’’திஆதி³. பராமஸித்வாதி த⁴ம்மஸபா⁴வங் அனிச்சதாதி³ங் அதிக்கமித்வா பரதோ நிச்சாதி³தோ ஆமஸித்வா. அட்ட²ஸதந்தி அட்டா²தி⁴கங் ஸதங். நவ மானாதி ஸெய்யஸ்ஸ ‘‘ஸெய்யோஹமஸ்மீ’’திஆதி³னா ஆக³தா நவவித⁴மானா. ப்³ரஹ்மஜாலே ஆக³தா ஸஸ்ஸதவாதா³த³யோ த்³வாஸட்டி²தி³ட்டி²யோ. ஏவந்தி வுத்தாகாரேன. யஸ்மா தண்ஹாமானதி³ட்டி²க்³கா³ஹவஸேன புது²ஜ்ஜனேன த³ள்ஹக்³கா³ஹங் க³ஹிதங், தஸ்மா ஸோ தத்த² நிப்³பி³ந்தி³துங் நிப்³பி³தா³ஞாணங் உப்பாதே³துங் ந ஸமத்தோ².
Manāyatanassevanāmaṃ, na samādhipaññattīnaṃ ‘‘cittaṃ paññañca bhāvayaṃ (saṃ. ni. 1.23, 192; peṭako. 22; mi. pa. 1.9.9), citto gahapatī’’tiādīsu (dha. pa. aṭṭha. 74) viya. Cittīkātabbabhūtaṃ vatthu etassāti cittavatthu, tassa bhāvo cittavatthutā, tena kāraṇena cittabhāvamāha. Cittagocaratāyāti cittavicittavisayatāya. Sampayuttadhammacittatāyāti rāgādisaddhādisampayuttadhammavasena cittasabhāvattā. Tena cittatāya cittattamāha. Vijānanaṭṭhenāti bujjhanaṭṭhena. Ajjhositanti ajjhosābhūtāya taṇhāya gahitaṃ. Tenāha ‘‘taṇhāyā’’tiādi. Parāmasitvāti dhammasabhāvaṃ aniccatādiṃ atikkamitvā parato niccādito āmasitvā. Aṭṭhasatanti aṭṭhādhikaṃ sataṃ. Nava mānāti seyyassa ‘‘seyyohamasmī’’tiādinā āgatā navavidhamānā. Brahmajāle āgatā sassatavādādayo dvāsaṭṭhidiṭṭhiyo. Evanti vuttākārena. Yasmā taṇhāmānadiṭṭhiggāhavasena puthujjanena daḷhaggāhaṃ gahitaṃ, tasmā so tattha nibbindituṃ nibbidāñāṇaṃ uppādetuṃ na samattho.
பி⁴க்க²வேதி எத்த² இதி-ஸத்³தோ³ ஆதி³அத்தோ², தேன ‘‘வர’’ந்தி ஏவமாதி³கங் ஸங்க³ண்ஹாதி. இத³ங் அனுஸந்தி⁴வசனங் ‘‘கஸ்மா ஆஹா’’தி கதே²துகாமதாய காரணங் புச்ச²தி. தேனாஹ ‘‘பட²மங் ஹீ’’திஆதி³. அஸ்ஸுதவதா புது²ஜ்ஜனேன. தேனாதி ப⁴க³வதா. அயுத்தரூபங் கதங் ‘‘நிப்³பி³ந்தெ³ய்யா’’திஆதி³னா ஆதீ³னவஸ்ஸ விபா⁴விதத்தா. அரூபே பன ததா² ஆதீ³னவஸ்ஸ அவிபா⁴விதத்தா வுத்தங் ‘‘அரூபங் பரிக்³க³ஹேதுங் யுத்தரூப’’ந்தி, யுத்தரூபங் விய கதந்தி அதி⁴ப்பாயோ. கா³ஹோதி தண்ஹாமானதி³ட்டி²க்³கா³ஹோ. ‘‘நிக்க²மித்வா அரூபங் க³தோ’’தி இத³ங் ப⁴க³வதா ஆதீ³னவங் த³ஸ்ஸெத்வா ரூபே கா³ஹோ படிக்கி²த்தோ, ந அரூபே, தஸ்மா ‘‘காதப்³போ³ நு கோ² ஸோ தத்தா²’’தி மிச்சா²க³ண்ஹந்தானங் ஸோ ததோ ரூபதோ நிக்க²மித்வா அரூபங் க³தோ விய ஹோதீதி கத்வா வுத்தங். திட்ட²மானந்தி திட்ட²ந்தங். ‘‘ஆபஜ்ஜித்வா விய ஹோதீ’’தி ஸபா⁴வேன பவத்தமானங் ‘‘பட²மவயே’’திஆதி³னா ரூபஸ்ஸ பே⁴த³ங் வயாதீ³ஹி விப⁴ஜித்வா த³ஸ்ஸேதி.
Bhikkhaveti ettha iti-saddo ādiattho, tena ‘‘vara’’nti evamādikaṃ saṅgaṇhāti. Idaṃ anusandhivacanaṃ ‘‘kasmā āhā’’ti kathetukāmatāya kāraṇaṃ pucchati. Tenāha ‘‘paṭhamaṃ hī’’tiādi. Assutavatā puthujjanena. Tenāti bhagavatā. Ayuttarūpaṃ kataṃ ‘‘nibbindeyyā’’tiādinā ādīnavassa vibhāvitattā. Arūpe pana tathā ādīnavassa avibhāvitattā vuttaṃ ‘‘arūpaṃ pariggahetuṃ yuttarūpa’’nti, yuttarūpaṃ viya katanti adhippāyo. Gāhoti taṇhāmānadiṭṭhiggāho. ‘‘Nikkhamitvā arūpaṃ gato’’ti idaṃ bhagavatā ādīnavaṃ dassetvā rūpe gāho paṭikkhitto, na arūpe, tasmā ‘‘kātabbo nu kho so tatthā’’ti micchāgaṇhantānaṃ so tato rūpato nikkhamitvā arūpaṃ gato viya hotīti katvā vuttaṃ. Tiṭṭhamānanti tiṭṭhantaṃ. ‘‘Āpajjitvā viya hotī’’ti sabhāvena pavattamānaṃ ‘‘paṭhamavaye’’tiādinā rūpassa bhedaṃ vayādīhi vibhajitvā dasseti.
பாத³ஸ்ஸ உத்³த⁴ரணேதி யதா² ட²பிதஸ்ஸ பாத³ஸ்ஸ உக்கி²பனே. அதிஹரணந்தி யதா²உத்³த⁴தங் யதா²ட்டி²தட்டா²னங் அதிக்கமித்வா ஹரணங். வீதிஹரணந்தி உத்³த⁴தோ பாதோ³ யதா²ட்டி²தங் பாத³ங் யதா² ந க⁴ட்டேதி, ஏவங் தோ²கங் பஸ்ஸதோ பரிணாமெத்வா ஹரணங். வொஸ்ஸஜ்ஜனந்தி ததா² பரபாத³ங் வீதிஸாரெத்வா பூ⁴மியங் நிக்கி²பனத்த²ங் அவொஸ்ஸஜ்ஜனங். ஸன்னிக்கே²பனந்தி வொஸ்ஸஜ்ஜெத்வா பூ⁴மியங் ஸமங் நிக்கி²பனங் ட²பனங். ஸன்னிருஜ்ஜ²னந்தி நிக்கி²த்தஸ்ஸ ஸப்³ப³ஸோ நிருஜ்ஜ²னங் உப்பீளனங். தத்த² தத்தே²வாதி தஸ்மிங் தஸ்மிங் பட²மவயாதி³கே ஏவ. அவதா⁴ரணேன தேஸங் கொட்டா²ஸந்தரஸங்கமனாபா⁴வமாஹ. ஓதீ⁴தி பா⁴வோ, பப்³ப³ந்தி ஸந்தி⁴. பட²மவயாத³யோ ஏவ ஹெத்த² ஓதி⁴ பப்³ப³ந்தி ச அதி⁴ப்பேதா. படபடாயந்தாதி ‘‘படபடா’’இதி கரொந்தா விய, தேன நேஸங் பவத்திக்க²ணஸ்ஸ இத்தரதங் த³ஸ்ஸேதி. ஏதந்தி ஏதங் ரூபத⁴ம்மானங் யதா²வுத்தங் தத்த² தத்தே²வ பி⁴ஜ்ஜனங் ஏவங் வுத்தப்பகாரமேவ. வட்டிப்பதே³ஸந்தி வட்டியா புலகங் ப³ரஹங். தஞ்ஹி வட்டியா புலகங் அனதிக்கமித்வாவ ஸா தீ³பஜாலா பி⁴ஜ்ஜதி. பவேணிஸம்ப³ந்த⁴வஸேனாதி ஸந்ததிவஸேன.
Pādassa uddharaṇeti yathā ṭhapitassa pādassa ukkhipane. Atiharaṇanti yathāuddhataṃ yathāṭṭhitaṭṭhānaṃ atikkamitvā haraṇaṃ. Vītiharaṇanti uddhato pādo yathāṭṭhitaṃ pādaṃ yathā na ghaṭṭeti, evaṃ thokaṃ passato pariṇāmetvā haraṇaṃ. Vossajjananti tathā parapādaṃ vītisāretvā bhūmiyaṃ nikkhipanatthaṃ avossajjanaṃ. Sannikkhepananti vossajjetvā bhūmiyaṃ samaṃ nikkhipanaṃ ṭhapanaṃ. Sannirujjhananti nikkhittassa sabbaso nirujjhanaṃ uppīḷanaṃ. Tattha tatthevāti tasmiṃ tasmiṃ paṭhamavayādike eva. Avadhāraṇena tesaṃ koṭṭhāsantarasaṅkamanābhāvamāha. Odhīti bhāvo, pabbanti sandhi. Paṭhamavayādayo eva hettha odhi pabbanti ca adhippetā. Paṭapaṭāyantāti ‘‘paṭapaṭā’’iti karontā viya, tena nesaṃ pavattikkhaṇassa ittarataṃ dasseti. Etanti etaṃ rūpadhammānaṃ yathāvuttaṃ tattha tattheva bhijjanaṃ evaṃ vuttappakārameva. Vaṭṭippadesanti vaṭṭiyā pulakaṃ barahaṃ. Tañhi vaṭṭiyā pulakaṃ anatikkamitvāva sā dīpajālā bhijjati. Paveṇisambandhavasenāti santativasena.
ரத்திந்தி ரத்தியங். பு⁴ம்மத்தே² ஹேதங் உபயோக³வசனங். ஏவங் பன அத்தோ² ந க³ஹேதப்³போ³ அனுப்பன்னஸ்ஸ நிரோதா⁴பா⁴வதோ. புரிமபவேணிதோதி ரூபே வுத்தபவேணிதோ. அனேகானி சித்தகோடிஸதஸஹஸ்ஸானி உப்பஜ்ஜந்தீதி வுத்தமத்த²ங் தே²ரவாதே³ன தீ³பேதுங் ‘‘வுத்தம்பி சேத’’ந்திஆதி³ வுத்தங். அட்³ட⁴சூளந்தி தோ²கேன ஊனங் உபட்³ட⁴ங், தஸ்ஸ பன உபட்³ட⁴ங் அதி⁴காரதோ வாஹஸதஸ்ஸாதி விஞ்ஞாயதி. ‘‘அட்³ட⁴சுத்³த³ஸ’’ந்தி கேசி, ‘‘அட்³ட⁴சதுத்த²’’ந்தி அபரே. ‘‘ஸாதி⁴கங் தி³யட்³ட⁴ஸதங் வாஹா’’தி த³ள்ஹங் கத்வா வத³ந்தீதி வீமங்ஸிதப்³ப³ங். சதுனாளிகோ தும்போ³. மஹாரஞ்ஞதாய பவத்³த⁴ங் வனங் பவனந்தி ஆஹ ‘‘பவனேதி மஹாவனே’’தி. தந்தி பட²மங் க³ஹிதஸாக²ங். அயமத்தோ²தி அயங் பூ⁴மிங் அனோதரித்வா டி²தஸாகா²ய ஏவ க³ஹணஸங்கா²தோ அத்தோ². ஏதத³த்த²மேவ ஹி ப⁴க³வா ‘‘அரஞ்ஞே’’தி வத்வாபி ‘‘பவனே’’தி ஆஹ.
Rattinti rattiyaṃ. Bhummatthe hetaṃ upayogavacanaṃ. Evaṃ pana attho na gahetabbo anuppannassa nirodhābhāvato. Purimapaveṇitoti rūpe vuttapaveṇito. Anekāni cittakoṭisatasahassāni uppajjantīti vuttamatthaṃ theravādena dīpetuṃ ‘‘vuttampi ceta’’ntiādi vuttaṃ. Aḍḍhacūḷanti thokena ūnaṃ upaḍḍhaṃ, tassa pana upaḍḍhaṃ adhikārato vāhasatassāti viññāyati. ‘‘Aḍḍhacuddasa’’nti keci, ‘‘aḍḍhacatuttha’’nti apare. ‘‘Sādhikaṃ diyaḍḍhasataṃ vāhā’’ti daḷhaṃ katvā vadantīti vīmaṃsitabbaṃ. Catunāḷiko tumbo. Mahāraññatāya pavaddhaṃ vanaṃ pavananti āha ‘‘pavaneti mahāvane’’ti. Tanti paṭhamaṃ gahitasākhaṃ. Ayamatthoti ayaṃ bhūmiṃ anotaritvā ṭhitasākhāya eva gahaṇasaṅkhāto attho. Etadatthameva hi bhagavā ‘‘araññe’’ti vatvāpi ‘‘pavane’’ti āha.
அரஞ்ஞமஹாவனங் வியாதி அரஞ்ஞட்டா²னே ப்³ரஹாரஞ்ஞே விய. ஆரம்மணோலம்ப³னந்தி ஆரம்மணஸ்ஸ அவலம்ப³னங். ந வத்தப்³ப³ங் ஆரம்மணபச்சயேன வினா அனுப்பஜ்ஜனதோ. ஏகஜாதியந்தி ரூபாதி³னீலாதி³ஏகஸபா⁴வங். ‘‘தி³ஸ்ஸதி, பி⁴க்க²வே, இமஸ்ஸ சாதுமஹாபூ⁴திகஸ்ஸ காயஸ்ஸ ஆசயோபி அபசயோபீ’’தி வத³ந்தேன ரூபதோ நீஹரித்வா அரூபே கா³ஹோ பதிட்டா²பிதோ நாம, ‘‘வரங், பி⁴க்க²வே, அஸ்ஸுதவா புது²ஜ்ஜனோ’’திஆதி³ங் வத³ந்தேன அரூபதோ நீஹரித்வா ரூபே கா³ஹோ பதிட்டா²பிதோ நாம.
Araññamahāvanaṃ viyāti araññaṭṭhāne brahāraññe viya. Ārammaṇolambananti ārammaṇassa avalambanaṃ. Na vattabbaṃ ārammaṇapaccayena vinā anuppajjanato. Ekajātiyanti rūpādinīlādiekasabhāvaṃ. ‘‘Dissati, bhikkhave, imassa cātumahābhūtikassa kāyassa ācayopi apacayopī’’ti vadantena rūpato nīharitvā arūpe gāho patiṭṭhāpito nāma, ‘‘varaṃ, bhikkhave, assutavā puthujjano’’tiādiṃ vadantena arūpato nīharitvā rūpe gāho patiṭṭhāpito nāma.
நந்தி கா³ஹங். உப⁴யதோதி ரூபதோ ச அரூபதோ ச. ஹரிஸ்ஸாமீதி நீஹரிஸ்ஸாமி. பரிவத்தெத்வாதி மந்தங் ஜப்பித்வா. கண்ணே து⁴மெத்வாதி கண்ணே த⁴மெத்வா. அஸ்ஸாதி விஸஸ்ஸ. நிம்மதெ²த்வாதி நிம்மத்³தி³த்வா, நீஹரித்வாதி அதி⁴ப்பாயோ.
Nanti gāhaṃ. Ubhayatoti rūpato ca arūpato ca. Harissāmīti nīharissāmi. Parivattetvāti mantaṃ jappitvā. Kaṇṇe dhumetvāti kaṇṇe dhametvā. Assāti visassa. Nimmathetvāti nimmadditvā, nīharitvāti adhippāyo.
மக்³கோ³தி லோகுத்தரமக்³கோ³. ‘‘நிப்³பி³ந்த³’’ந்தி இமினா ப³லவவிபஸ்ஸனா கதி²தா.
Maggoti lokuttaramaggo. ‘‘Nibbinda’’nti iminā balavavipassanā kathitā.
அஸ்ஸுதவாஸுத்தவண்ணனா நிட்டி²தா.
Assutavāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அஸ்ஸுதவாஸுத்தங் • 1. Assutavāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. அஸ்ஸுதவாஸுத்தவண்ணனா • 1. Assutavāsuttavaṇṇanā
