| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. அஸுபா⁴னுபஸ்ஸீஸுத்தவண்ணனா
6. Asubhānupassīsuttavaṇṇanā
85. ச²ட்டே² அஸுபா⁴னுபஸ்ஸீதி அஸுப⁴ங் அனுபஸ்ஸந்தா த்³வத்திங்ஸாகாரவஸேன சேவ உத்³து⁴மாதகாதீ³ஸு க³ஹிதனிமித்தஸ்ஸ உபஸங்ஹரணவஸேன ச காயஸ்மிங் அஸுப⁴ங் அஸுபா⁴காரங் அனுபஸ்ஸகா ஹுத்வா விஹரத². ஆனாபானஸ்ஸதீதி ஆனாபானே ஸதி, தங் ஆரப்³ப⁴ பவத்தா ஸதி, அஸ்ஸாஸபஸ்ஸாஸபரிக்³கா³ஹிகா ஸதீதி அத்தோ². வுத்தஞ்ஹேதங் ‘‘ஆனந்தி அஸ்ஸாஸோ, நோ பஸ்ஸாஸோ. பானந்தி பஸ்ஸாஸோ, நோ அஸ்ஸாஸோ’’திஆதி³ (படி॰ ம॰ 1.160).
85. Chaṭṭhe asubhānupassīti asubhaṃ anupassantā dvattiṃsākāravasena ceva uddhumātakādīsu gahitanimittassa upasaṃharaṇavasena ca kāyasmiṃ asubhaṃ asubhākāraṃ anupassakā hutvā viharatha. Ānāpānassatīti ānāpāne sati, taṃ ārabbha pavattā sati, assāsapassāsapariggāhikā satīti attho. Vuttañhetaṃ ‘‘ānanti assāso, no passāso. Pānanti passāso, no assāso’’tiādi (paṭi. ma. 1.160).
வோதி தும்ஹாகங். அஜ்ஜ²த்தந்தி இத⁴ கோ³சரஜ்ஜ²த்தங் அதி⁴ப்பேதங். பரிமுக²ந்தி அபி⁴முக²ங். ஸூபட்டி²தாதி ஸுட்டு² உபட்டி²தா. இத³ங் வுத்தங் ஹோதி – ஆனாபானஸ்ஸதி ச தும்ஹாகங் கம்மட்டா²னாபி⁴முக²ங் ஸுட்டு² உபட்டி²தா ஹோதூதி. அத² வா பரிமுக²ந்தி பரிக்³க³ஹிதனிய்யானங். வுத்தஞ்ஹேதங் படிஸம்பி⁴தா³யங் – ‘‘பரீதி பரிக்³க³ஹட்டோ², முக²ந்தி நிய்யானட்டோ² , ஸதீதி உபட்டா²னட்டோ², தேன வுச்சதி பரிமுக²ங் ஸதி’’ந்தி (படி॰ ம॰ 1.164). இமினா சதுஸதிபட்டா²னஸோளஸப்பபே⁴தா³ ஆனாபானஸ்ஸதிகம்மட்டா²னபா⁴வனா த³ஸ்ஸிதாதி த³ட்ட²ப்³பா³.
Voti tumhākaṃ. Ajjhattanti idha gocarajjhattaṃ adhippetaṃ. Parimukhanti abhimukhaṃ. Sūpaṭṭhitāti suṭṭhu upaṭṭhitā. Idaṃ vuttaṃ hoti – ānāpānassati ca tumhākaṃ kammaṭṭhānābhimukhaṃ suṭṭhu upaṭṭhitā hotūti. Atha vā parimukhanti pariggahitaniyyānaṃ. Vuttañhetaṃ paṭisambhidāyaṃ – ‘‘parīti pariggahaṭṭho, mukhanti niyyānaṭṭho , satīti upaṭṭhānaṭṭho, tena vuccati parimukhaṃ sati’’nti (paṭi. ma. 1.164). Iminā catusatipaṭṭhānasoḷasappabhedā ānāpānassatikammaṭṭhānabhāvanā dassitāti daṭṭhabbā.
ஏவங் ஸங்கே²பேனேவ ராக³சரிதவிதக்கசரிதானங் ஸப்பாயங் படிகூலமனஸிகாரகாயானுபஸ்ஸனாவஸேன ஸமத²கம்மட்டா²னங் விபஸ்ஸனாகம்மட்டா²னஞ்ச உபதி³ஸித்வா இதா³னி ஸுத்³த⁴விபஸ்ஸனாகம்மட்டா²னமேவ த³ஸ்ஸெந்தோ ‘‘ஸப்³ப³ஸங்கா²ரேஸு அனிச்சானுபஸ்ஸினோ விஹரதா²’’தி ஆஹ. தத்த² அனிச்சங், அனிச்சலக்க²ணங், அனிச்சானுபஸ்ஸனா, அனிச்சானுபஸ்ஸீதி இத³ங் சதுக்கங் வேதி³தப்³ப³ங். ஹுத்வா, அபா⁴வதோ, உத³யப்³ப³யயோக³தோ, தாவகாலிகதோ, நிச்சபடிக்கே²பதோ ச க²ந்த⁴பஞ்சகங் அனிச்சங் நாம. தஸ்ஸ யோ ஹுத்வா அபா⁴வாகாரோ, தங் அனிச்சலக்க²ணங் நாம. தங் ஆரப்³ப⁴ பவத்தா விபஸ்ஸனா அனிச்சானுபஸ்ஸனா. தங் அனிச்சந்தி விபஸ்ஸகோ அனிச்சானுபஸ்ஸீ. எத்த² ச ஏகாத³ஸவிதா⁴ அஸுப⁴கதா² பட²மஜ்ஜா²னங் பாபெத்வா, ஸோளஸவத்து²கா ச ஆனாபானகதா² சதுத்த²ஜ்ஜா²னங் பாபெத்வா, விபஸ்ஸனாகதா² ச வித்தா²ரதோ வத்தப்³பா³, ஸா பன ஸப்³பா³காரதோ விஸுத்³தி⁴மக்³கே³ (விஸுத்³தி⁴॰ 2.737-740) கதி²தாதி தத்த² வுத்தனயேனேவ வேதி³தப்³பா³.
Evaṃ saṅkhepeneva rāgacaritavitakkacaritānaṃ sappāyaṃ paṭikūlamanasikārakāyānupassanāvasena samathakammaṭṭhānaṃ vipassanākammaṭṭhānañca upadisitvā idāni suddhavipassanākammaṭṭhānameva dassento ‘‘sabbasaṅkhāresu aniccānupassino viharathā’’ti āha. Tattha aniccaṃ, aniccalakkhaṇaṃ, aniccānupassanā, aniccānupassīti idaṃ catukkaṃ veditabbaṃ. Hutvā, abhāvato, udayabbayayogato, tāvakālikato, niccapaṭikkhepato ca khandhapañcakaṃ aniccaṃ nāma. Tassa yo hutvā abhāvākāro, taṃ aniccalakkhaṇaṃ nāma. Taṃ ārabbha pavattā vipassanā aniccānupassanā. Taṃ aniccanti vipassako aniccānupassī. Ettha ca ekādasavidhā asubhakathā paṭhamajjhānaṃ pāpetvā, soḷasavatthukā ca ānāpānakathā catutthajjhānaṃ pāpetvā, vipassanākathā ca vitthārato vattabbā, sā pana sabbākārato visuddhimagge (visuddhi. 2.737-740) kathitāti tattha vuttanayeneva veditabbā.
இதா³னி அஸுபா⁴னுபஸ்ஸனாதீ³ஹி நிப்பா²தே³தப்³ப³ங் ப²லவிஸேஸங் த³ஸ்ஸேதுங் ‘‘அஸுபா⁴னுபஸ்ஸீன’’ந்திஆதி³மாஹ. தத்த² ஸுபா⁴ய தா⁴துயாதி ஸுப⁴பா⁴வே, ஸுப⁴னிமித்தேதி அத்தோ². ராகா³னுஸயோதி ஸுபா⁴ரம்மணே உப்பஜ்ஜனாரஹோ காமராகா³னுஸயோ. ஸோ கேஸாதீ³ஸு உத்³து⁴மாதகாதீ³ஸு வா அஸுபா⁴னுபஸ்ஸீனங் அஸுப⁴னிமித்தங் க³ஹெத்வா தத்த² பட²மஜ்ஜா²னங் நிப்³ப³த்தெத்வா தங் பாத³கங் கத்வா விபஸ்ஸனங் பட்ட²பெத்வா அதி⁴க³தேன அனாகா³மிமக்³கே³ன பஹீயதி, ஸப்³ப³ஸோ ஸமுச்சி²ந்தீ³யதீதி அத்தோ². வுத்தஞ்ஹேதங் ‘‘அஸுபா⁴ பா⁴வேதப்³பா³ காமராக³ஸ்ஸ பஹானாயா’’தி (அ॰ நி॰ 9.3; உதா³॰ 31). பா³ஹிராதி ப³ஹித்³தா⁴வத்து²கத்தா அனத்தா²வஹத்தா ச பா³ஹிரா ப³ஹிபூ⁴தா. விதக்காஸயாதி காமஸங்கப்பாதி³மிச்சா²விதக்கா. தே ஹி அப்பஹீனா ஆஸயானுக³தா ஸதி பச்சயஸமவாயே உப்பஜ்ஜனதோ விதக்காஸயாதி வுத்தா. காமவிதக்கோ செத்த² காமராக³க்³க³ஹணேன க³ஹிதோ ஏவாதி தத³வஸேஸா விதக்கா ஏவ வுத்தாதி வேதி³தப்³பா³. விகா⁴தபக்கி²காதி து³க்க²பா⁴கி³யா, இச்சா²விகா⁴தனிப்³ப³த்தனகா வா. தே ந ஹொந்தீதி தே பஹீயந்தி. ப்³யாபாத³விதக்கோ, விஹிங்ஸாவிதக்கோ, ஞாதிவிதக்கோ, ஜனபத³விதக்கோ, அமராவிதக்கோ, அனவஞ்ஞத்திபடிஸங்யுத்தோ விதக்கோ, லாப⁴ஸக்காரஸிலோகபடிஸங்யுத்தோ விதக்கோ, பரானுத்³த³யதாபடிஸங்யுத்தோ விதக்கோதி அட்ட², காமவிதக்கேன ஸத்³தி⁴ங் நவவிதா⁴ மஹாவிதக்கா ஆனாபானஸ்ஸதிஸமாதி⁴னா தன்னிஸ்ஸிதாய ச விபஸ்ஸனாய புப்³ப³பா⁴கே³ விக்க²ம்பி⁴தா. தங் பாத³கங் கத்வா அதி⁴க³தேன அரியமக்³கே³ன யதா²ரஹங் அனவஸேஸதோ பஹீயந்தி. வுத்தம்பி சேதங் ‘‘ஆனாபானஸ்ஸதி பா⁴வேதப்³பா³ விதக்குபச்சே²தா³யா’’தி (அ॰ நி॰ 9.3; உதா³॰ 31).
Idāni asubhānupassanādīhi nipphādetabbaṃ phalavisesaṃ dassetuṃ ‘‘asubhānupassīna’’ntiādimāha. Tattha subhāya dhātuyāti subhabhāve, subhanimitteti attho. Rāgānusayoti subhārammaṇe uppajjanāraho kāmarāgānusayo. So kesādīsu uddhumātakādīsu vā asubhānupassīnaṃ asubhanimittaṃ gahetvā tattha paṭhamajjhānaṃ nibbattetvā taṃ pādakaṃ katvā vipassanaṃ paṭṭhapetvā adhigatena anāgāmimaggena pahīyati, sabbaso samucchindīyatīti attho. Vuttañhetaṃ ‘‘asubhā bhāvetabbā kāmarāgassa pahānāyā’’ti (a. ni. 9.3; udā. 31). Bāhirāti bahiddhāvatthukattā anatthāvahattā ca bāhirā bahibhūtā. Vitakkāsayāti kāmasaṅkappādimicchāvitakkā. Te hi appahīnā āsayānugatā sati paccayasamavāye uppajjanato vitakkāsayāti vuttā. Kāmavitakko cettha kāmarāgaggahaṇena gahito evāti tadavasesā vitakkā eva vuttāti veditabbā. Vighātapakkhikāti dukkhabhāgiyā, icchāvighātanibbattanakā vā. Te na hontīti te pahīyanti. Byāpādavitakko, vihiṃsāvitakko, ñātivitakko, janapadavitakko, amarāvitakko, anavaññattipaṭisaṃyutto vitakko, lābhasakkārasilokapaṭisaṃyutto vitakko, parānuddayatāpaṭisaṃyutto vitakkoti aṭṭha, kāmavitakkena saddhiṃ navavidhā mahāvitakkā ānāpānassatisamādhinā tannissitāya ca vipassanāya pubbabhāge vikkhambhitā. Taṃ pādakaṃ katvā adhigatena ariyamaggena yathārahaṃ anavasesato pahīyanti. Vuttampi cetaṃ ‘‘ānāpānassati bhāvetabbā vitakkupacchedāyā’’ti (a. ni. 9.3; udā. 31).
யா அவிஜ்ஜா, ஸா பஹீயதீதி யா ஸச்சஸபா⁴வபடிச்சா²தி³னீ ஸப்³பா³னத்த²காரீ ஸகலஸ்ஸ வட்டது³க்க²ஸ்ஸ மூலபூ⁴தா அவிஜ்ஜா, ஸா அனிச்சானுபஸ்ஸீனங் விஹரதங் ஸமுச்சி²ஜ்ஜதி. இத³ங் கிர ப⁴க³வதா அனிச்சாகாரதோ வுட்டி²தஸ்ஸ ஸுக்க²விபஸ்ஸககீ²ணாஸவஸ்ஸ வஸேன வுத்தங். தஸ்ஸாயங் ஸங்கே²பத்தோ² – தேபூ⁴மகேஸு ஸப்³ப³ஸங்கா²ரேஸு அனிச்சாதி³தோ ஸம்மஸனங் பட்ட²பெத்வா விபஸ்ஸந்தானங் யதா³ அனிச்சந்தி பவத்தமானா வுட்டா²னகா³மினீவிபஸ்ஸனா மக்³கே³ன க⁴டீயதி, அனுக்கமேன அரஹத்தமக்³கோ³ உப்பஜ்ஜதி, தேஸங் அனிச்சானுபஸ்ஸீனங் விஹரதங் அவிஜ்ஜா அனவஸேஸதோ பஹீயதி, அரஹத்தமக்³க³விஜ்ஜா உப்பஜ்ஜதீதி. அனிச்சானுபஸ்ஸீனங் விஹரதந்தி இத³ங் அனிச்சலக்க²ணஸ்ஸ தேஸங் பாகடபா⁴வதோ இதரஸ்ஸ லக்க²ணத்³வயஸ்ஸ க³ஹணே உபாயபா⁴வதோ வா வுத்தங், ந பன ஏகஸ்ஸேவ லக்க²ணஸ்ஸ அனுபஸ்ஸிதப்³ப³தோ. வுத்தஞ்ஹேதங் ‘‘யத³னிச்சங் தங் து³க்க²ங், யங் து³க்க²ங் தத³னத்தா’’தி (ஸங்॰ நி॰ 3.15). அபரம்பி வுத்தங் ‘‘அனிச்சஸஞ்ஞினோ ஹி, மேகி⁴ய, அனத்தஸஞ்ஞா ஸண்டா²தி, அனத்தஸஞ்ஞீ அஸ்மிமானஸமுக்³கா⁴தங் பாபுணாதீ’’தி.
Yā avijjā, sā pahīyatīti yā saccasabhāvapaṭicchādinī sabbānatthakārī sakalassa vaṭṭadukkhassa mūlabhūtā avijjā, sā aniccānupassīnaṃ viharataṃ samucchijjati. Idaṃ kira bhagavatā aniccākārato vuṭṭhitassa sukkhavipassakakhīṇāsavassa vasena vuttaṃ. Tassāyaṃ saṅkhepattho – tebhūmakesu sabbasaṅkhāresu aniccādito sammasanaṃ paṭṭhapetvā vipassantānaṃ yadā aniccanti pavattamānā vuṭṭhānagāminīvipassanā maggena ghaṭīyati, anukkamena arahattamaggo uppajjati, tesaṃ aniccānupassīnaṃ viharataṃ avijjā anavasesato pahīyati, arahattamaggavijjā uppajjatīti. Aniccānupassīnaṃ viharatanti idaṃ aniccalakkhaṇassa tesaṃ pākaṭabhāvato itarassa lakkhaṇadvayassa gahaṇe upāyabhāvato vā vuttaṃ, na pana ekasseva lakkhaṇassa anupassitabbato. Vuttañhetaṃ ‘‘yadaniccaṃ taṃ dukkhaṃ, yaṃ dukkhaṃ tadanattā’’ti (saṃ. ni. 3.15). Aparampi vuttaṃ ‘‘aniccasaññino hi, meghiya, anattasaññā saṇṭhāti, anattasaññī asmimānasamugghātaṃ pāpuṇātī’’ti.
கா³தா²ஸு ஆனாபானே படிஸ்ஸதோதி ஆனாபானநிமித்தஸ்மிங் படி படி ஸதோ, உபட்டி²தஸ்ஸதீதி அத்தோ². பஸ்ஸந்தி ஆஸவக்க²யஞாணசக்கு²னா ஸங்கா²ரூபஸமங் நிப்³பா³னங் பஸ்ஸந்தோ. ஆதாபீ ஸப்³ப³தா³தி அந்தராவோஸானங் அனாபஜ்ஜித்வா அஸுபா⁴னுபஸ்ஸனாதீ³ஸு ஸததங் ஆதாபீ யுத்தப்பயுத்தோ, ததோ ஏவ யதோ வாயமமானோ, நியதோ வா ஸம்மத்தனியாமேன தத்த² ஸப்³ப³ஸங்கா²ரஸமதே² நிப்³பா³னே அரஹத்தப²லவிமுத்தியா விமுச்சதி. ஸேஸங் வுத்தனயமேவ.
Gāthāsu ānāpāne paṭissatoti ānāpānanimittasmiṃ paṭi paṭi sato, upaṭṭhitassatīti attho. Passanti āsavakkhayañāṇacakkhunā saṅkhārūpasamaṃ nibbānaṃ passanto. Ātāpī sabbadāti antarāvosānaṃ anāpajjitvā asubhānupassanādīsu satataṃ ātāpī yuttappayutto, tato eva yato vāyamamāno, niyato vā sammattaniyāmena tattha sabbasaṅkhārasamathe nibbāne arahattaphalavimuttiyā vimuccati. Sesaṃ vuttanayameva.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. அஸுபா⁴னுபஸ்ஸீஸுத்தங் • 6. Asubhānupassīsuttaṃ
