| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
7. ஆதாபீஸுத்தவண்ணனா
7. Ātāpīsuttavaṇṇanā
34. ஸத்தமே அனாதாபீதி கிலேஸானங் ஆதாபனட்டே²ன ஆதாபோ, வீரியங், ஸோ ஏதஸ்ஸ அத்தீ²தி ஆதாபீ, ந ஆதாபீ அனாதாபீ, ஸம்மப்பதா⁴னவிரஹிதோ குஸீதோதி வுத்தங் ஹோதி. ஒத்தாபோ வுச்சதி பாபுத்ராஸோ, ஸோ ஏதஸ்ஸ அத்தீ²தி ஒத்தாபீ, ந ஒத்தாபீ அனொத்தாபீ, ஒத்தாபரஹிதோ. அத² வா ஆதாபப்படிபக்கோ² அனாதாபோ, கோஸஜ்ஜங் ஸோ அஸ்ஸ அத்தீ²தி அனாதாபீ. யங் ‘‘ந ஒத்தபதி ஒத்தப்பிதப்³பே³ன, ந ஒத்தபதி பாபகானங் அகுஸலானங் த⁴ம்மானங் ஸமாபத்தியா’’தி ஏவங் வுத்தங், தங் அனொத்தப்பங் அனொத்தாபோ. ஸோ அஸ்ஸ அத்தீ²தி அனொத்தாபீதி ஏவமெத்த² அத்தோ² வேதி³தப்³போ³.
34. Sattame anātāpīti kilesānaṃ ātāpanaṭṭhena ātāpo, vīriyaṃ, so etassa atthīti ātāpī, na ātāpī anātāpī, sammappadhānavirahito kusītoti vuttaṃ hoti. Ottāpo vuccati pāputrāso, so etassa atthīti ottāpī, na ottāpī anottāpī, ottāparahito. Atha vā ātāpappaṭipakkho anātāpo, kosajjaṃ so assa atthīti anātāpī. Yaṃ ‘‘na ottapati ottappitabbena, na ottapati pāpakānaṃ akusalānaṃ dhammānaṃ samāpattiyā’’ti evaṃ vuttaṃ, taṃ anottappaṃ anottāpo. So assa atthīti anottāpīti evamettha attho veditabbo.
அப⁴ப்³போ³தி அனரஹோ. ஸம்போ³தா⁴யாதி அரியமக்³க³த்தா²ய. நிப்³பா³னாயாதி கிலேஸானங் அச்சந்தவூபஸமாய அமதமஹானிப்³பா³னாய. அனுத்தரஸ்ஸ யோக³க்கே²மஸ்ஸாதி அரஹத்தப²லஸ்ஸ. தஞ்ஹி உத்தரிதரஸ்ஸ அபா⁴வதோ அனுத்தரங், சதூஹி யோகே³ஹி அனுபத்³து³தத்தா கே²மங் நிப்³ப⁴யந்தி யோக³க்கே²மந்தி ச வுச்சதி. அதி⁴க³மாயாதி பத்தியா. ஆதாபீதி வீரியவா. ஸோ ஹி ‘‘ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸூ’’தி (தீ³॰ நி॰ 3.345) ஏவங் வுத்தேன வீரியாரம்பே⁴ன ஸமன்னாக³தோ கிலேஸானங் அச்சந்தமேவ ஆதாபனஸீலோதி ஆதாபீ. ஒத்தாபீதி ‘‘யங் ஒத்தபதி ஒத்தப்பிதப்³பே³ன, ஒத்தபதி பாபகானங் அகுஸலானங் த⁴ம்மானங் ஸமாபத்தியா’’தி (த⁴॰ ஸ॰ 31) ஏவங் வுத்தேன ஒத்தப்பேன ஸமன்னாக³தத்தா ஒத்தபனஸீலோதி ஒத்தப்பீ. அயஞ்ஹி ஒத்தாபீதி வுத்தோ. தத³வினாபா⁴வதோ ஹிரியா ச ஸமன்னாக³தோ ஏவ ஹோதீதி ஹிரொத்தப்பஸம்பன்னோ அணுமத்தேபி வஜ்ஜே ப⁴யத³ஸ்ஸாவீ ஸீலேஸு பரிபூரகாரீ ஹோதி. இச்சஸ்ஸ ஸீலஸம்பதா³ த³ஸ்ஸிதா. ஆதாபீதி இமினா நயேனஸ்ஸ கிலேஸபரிதாபிதாதீ³பனேன ஸமத²விபஸ்ஸனாபா⁴வனானுயுத்ததா த³ஸ்ஸிதா. யதா²வுத்தஞ்ச வீரியங் ஸத்³தா⁴ஸதிஸமாதி⁴பஞ்ஞாஹி வினா ந ஹோதீதி விமுத்திபரிபாசகானி ஸத்³தா⁴பஞ்சமானி இந்த்³ரியானி அத்த²தோ வுத்தானேவ ஹொந்தி. தேஸு ச ஸித்³தே⁴ஸு அனிச்சே அனிச்சஸஞ்ஞா, அனிச்சே து³க்க²ஸஞ்ஞா, து³க்கே² அனத்தஸஞ்ஞா, பஹானஸஞ்ஞா, விராக³ஸஞ்ஞா, நிரோத⁴ஸஞ்ஞாதி ச² நிப்³பே³த⁴பா⁴கி³யா ஸஞ்ஞா ஸித்³தா⁴ ஏவாதி. ஏவங் இமேஹி த்³வீஹி த⁴ம்மேஹி ஸமன்னாக³தஸ்ஸ லோகியானங் ஸீலஸமாதி⁴பஞ்ஞானங் ஸிஜ்ஜ²னதோ மக்³க³ப²லனிப்³பா³னாதி⁴க³மஸ்ஸ ப⁴ப்³ப³தங் த³ஸ்ஸெந்தோ ‘‘ஆதாபீ ச கோ²…பே॰… அதி⁴க³மாயா’’தி ஆஹ.
Abhabboti anaraho. Sambodhāyāti ariyamaggatthāya. Nibbānāyāti kilesānaṃ accantavūpasamāya amatamahānibbānāya. Anuttarassa yogakkhemassāti arahattaphalassa. Tañhi uttaritarassa abhāvato anuttaraṃ, catūhi yogehi anupaddutattā khemaṃ nibbhayanti yogakkhemanti ca vuccati. Adhigamāyāti pattiyā. Ātāpīti vīriyavā. So hi ‘‘āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesū’’ti (dī. ni. 3.345) evaṃ vuttena vīriyārambhena samannāgato kilesānaṃ accantameva ātāpanasīloti ātāpī. Ottāpīti ‘‘yaṃ ottapati ottappitabbena, ottapati pāpakānaṃ akusalānaṃ dhammānaṃ samāpattiyā’’ti (dha. sa. 31) evaṃ vuttena ottappena samannāgatattā ottapanasīloti ottappī. Ayañhi ottāpīti vutto. Tadavinābhāvato hiriyā ca samannāgato eva hotīti hirottappasampanno aṇumattepi vajje bhayadassāvī sīlesu paripūrakārī hoti. Iccassa sīlasampadā dassitā. Ātāpīti iminā nayenassa kilesaparitāpitādīpanena samathavipassanābhāvanānuyuttatā dassitā. Yathāvuttañca vīriyaṃ saddhāsatisamādhipaññāhi vinā na hotīti vimuttiparipācakāni saddhāpañcamāni indriyāni atthato vuttāneva honti. Tesu ca siddhesu anicce aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññāti cha nibbedhabhāgiyā saññā siddhā evāti. Evaṃ imehi dvīhi dhammehi samannāgatassa lokiyānaṃ sīlasamādhipaññānaṃ sijjhanato maggaphalanibbānādhigamassa bhabbataṃ dassento ‘‘ātāpī ca kho…pe… adhigamāyā’’ti āha.
கா³தா²ஸு குஸீதோதி மிச்சா²விதக்கப³ஹுலதாய காமப்³யாபாத³விஹிங்ஸாவிதக்கஸங்கா²தேஹி குச்சி²தேஹி பாபத⁴ம்மேஹி ஸிதோ ஸம்ப³ந்தோ⁴ யுத்தோதி குஸீதோ. குச்சி²தங் வா ஸீத³தி ஸம்மாபடிபத்திதோ அவஸீத³தீதி குஸீதோ, த³-காரஸ்ஸ த-காரங் கத்வா. ஹீனவீரியோதி நிப்³பீ³ரியோ, சதூஸுபி இரியாபதே²ஸு வீரியகரணரஹிதோ. அனுஸ்ஸாஹஸங்ஹனநஸபா⁴வஸ்ஸ சித்தாலஸியஸ்ஸ தி²னஸ்ஸ, அஸத்திவிகா⁴தஸபா⁴வஸ்ஸ காயாலஸியஸ்ஸ மித்³த⁴ஸ்ஸ ச அபி⁴ண்ஹப்பவத்தியா தி²னமித்³த⁴ப³ஹுலோ. பாபஜிகு³ச்ச²னலக்க²ணாய ஹிரியா அபா⁴வேன தப்படிபக்கே²ன அஹிரிகேன ஸமன்னாக³தத்தா ச அஹிரிகோ. ஹிரொத்தப்பவீரியானங் அபா⁴வேனேவ ஸம்மாபடிபத்தியங் நத்தி² ஏதஸ்ஸ ஆத³ரோதி அனாத³ரோ. உப⁴யதா²பி ததா² த⁴ம்மபுக்³க³லேன து³வித⁴கிரியாகரணேன அனாத³ரோ. பு²ட்டு²ந்தி பு²ஸிதுங். ஸம்போ³தி⁴முத்தமந்தி ஸம்போ³தி⁴ஸங்கா²தங் உத்தமங் அரஹத்தங் அதி⁴க³ந்துங் அப⁴ப்³போ³தி அத்தோ².
Gāthāsu kusītoti micchāvitakkabahulatāya kāmabyāpādavihiṃsāvitakkasaṅkhātehi kucchitehi pāpadhammehi sito sambandho yuttoti kusīto. Kucchitaṃ vā sīdati sammāpaṭipattito avasīdatīti kusīto, da-kārassa ta-kāraṃ katvā. Hīnavīriyoti nibbīriyo, catūsupi iriyāpathesu vīriyakaraṇarahito. Anussāhasaṃhananasabhāvassa cittālasiyassa thinassa, asattivighātasabhāvassa kāyālasiyassa middhassa ca abhiṇhappavattiyā thinamiddhabahulo. Pāpajigucchanalakkhaṇāya hiriyā abhāvena tappaṭipakkhena ahirikena samannāgatattā ca ahiriko. Hirottappavīriyānaṃ abhāveneva sammāpaṭipattiyaṃ natthi etassa ādaroti anādaro. Ubhayathāpi tathā dhammapuggalena duvidhakiriyākaraṇena anādaro. Phuṭṭhunti phusituṃ. Sambodhimuttamanti sambodhisaṅkhātaṃ uttamaṃ arahattaṃ adhigantuṃ abhabboti attho.
ஸதிமாதி சிரகதசிரபா⁴ஸிதானங் அனுஸ்ஸரணே ஸமத்த²ஸ்ஸ ஸதினேபக்கஸ்ஸ பா⁴வேன சதுஸதிபட்டா²னயோகே³ன ஸதிமா. நிபகோதி ஸத்தட்டா²னியஸம்பஜஞ்ஞஸங்கா²தேன சேவ கம்மட்டா²னபரிஹரணபஞ்ஞாஸங்கா²தேன ச நேபக்கேன ஸமன்னாக³தத்தா நிபகோ. ஜா²யீதி ஆரம்மணூபனிஜ்ஜா²னேன லக்க²ணூபனிஜ்ஜா²னேன சாதி த்³வீஹிபி ஜா²னேஹி ஜா²யீ. அப்பமத்தோதி ‘‘தி³வஸங் சங்கமேன நிஸஜ்ஜாய ஆவரணியேஹி த⁴ம்மேஹி சித்தங் பரிஸோதே⁴தீ’’திஆதி³னா நயேன கம்மட்டா²னபா⁴வனாய அப்பமத்தோ. ஸங்யோஜனங் ஜாதிஜராய செ²த்வாதி ஜாதியா சேவ ஜராய ச ஸத்தே ஸங்யோஜேதீதி ஸங்யோஜனந்தி லத்³த⁴னாமங் காமராகா³தி³கங் த³ஸவித⁴ம்பி கிலேஸஜாதங் அனுஸயஸமுக்³கா⁴தவஸேன மூலதோ சி²ந்தி³த்வா. அத² வா ஸங்யோஜனங் ஜாதிஜராய செ²த்வாதி ஜாதிஜராய ஸங்யோஜனங் சி²ந்தி³த்வா. யஸ்ஸ ஹி ஸங்யோஜனானி அச்சி²ன்னானி, தஸ்ஸ ஜாதிஜராய அச்சே²தோ³ அஸமுக்³கா⁴தோவ. யஸ்ஸ பன தானி சி²ன்னானி, தஸ்ஸ ஜாதிஜராபி சி²ன்னாவ காரணஸ்ஸ ஸமுக்³கா⁴திதத்தா. தஸ்மா ஸங்யோஜனங் சி²ந்த³ந்தோ ஏவ ஜாதிஜராபி சி²ந்த³தி. தேன வுத்தங் ‘‘ஸங்யோஜனங் ஜாதிஜராய செ²த்வா’’தி. இதே⁴வ ஸம்போ³தி⁴மனுத்தரங் பு²ஸேதி இமஸ்மிங்யேவ அத்தபா⁴வே அக்³க³மக்³க³ங் அரஹத்தங் வா பு²ஸே பாபுணெய்ய.
Satimāti cirakatacirabhāsitānaṃ anussaraṇe samatthassa satinepakkassa bhāvena catusatipaṭṭhānayogena satimā. Nipakoti sattaṭṭhāniyasampajaññasaṅkhātena ceva kammaṭṭhānapariharaṇapaññāsaṅkhātena ca nepakkena samannāgatattā nipako. Jhāyīti ārammaṇūpanijjhānena lakkhaṇūpanijjhānena cāti dvīhipi jhānehi jhāyī. Appamattoti ‘‘divasaṃ caṅkamena nisajjāya āvaraṇiyehi dhammehi cittaṃ parisodhetī’’tiādinā nayena kammaṭṭhānabhāvanāya appamatto. Saṃyojanaṃ jātijarāya chetvāti jātiyā ceva jarāya ca satte saṃyojetīti saṃyojananti laddhanāmaṃ kāmarāgādikaṃ dasavidhampi kilesajātaṃ anusayasamugghātavasena mūlato chinditvā. Atha vā saṃyojanaṃ jātijarāya chetvāti jātijarāya saṃyojanaṃ chinditvā. Yassa hi saṃyojanāni acchinnāni, tassa jātijarāya acchedo asamugghātova. Yassa pana tāni chinnāni, tassa jātijarāpi chinnāva kāraṇassa samugghātitattā. Tasmā saṃyojanaṃ chindanto eva jātijarāpi chindati. Tena vuttaṃ ‘‘saṃyojanaṃ jātijarāya chetvā’’ti. Idheva sambodhimanuttaraṃ phuseti imasmiṃyeva attabhāve aggamaggaṃ arahattaṃ vā phuse pāpuṇeyya.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 7. ஆதாபீஸுத்தங் • 7. Ātāpīsuttaṃ
