| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. அத்தகாரீஸுத்தங்
8. Attakārīsuttaṃ
38. அத² கோ² அஞ்ஞதரோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ ப்³ராஹ்மணோ ப⁴க³வந்தங் ஏதத³வோச – ‘‘அஹஞ்ஹி, போ⁴ கோ³தம, ஏவங்வாதீ³ ஏவங்தி³ட்டி² – ‘நத்தி² அத்தகாரோ, நத்தி² பரகாரோ’’’தி. ‘‘மாஹங், ப்³ராஹ்மண, ஏவங்வாதி³ங் ஏவங்தி³ட்டி²ங் அத்³த³ஸங் வா அஸ்ஸோஸிங் வா. கத²ஞ்ஹி நாம ஸயங் அபி⁴க்கமந்தோ, ஸயங் படிக்கமந்தோ ஏவங் வக்க²தி – ‘நத்தி² அத்தகாரோ, நத்தி² பரகாரோ’’’தி!
38. Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho so brāhmaṇo bhagavantaṃ etadavoca – ‘‘ahañhi, bho gotama, evaṃvādī evaṃdiṭṭhi – ‘natthi attakāro, natthi parakāro’’’ti. ‘‘Māhaṃ, brāhmaṇa, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto, sayaṃ paṭikkamanto evaṃ vakkhati – ‘natthi attakāro, natthi parakāro’’’ti!
‘‘தங் கிங் மஞ்ஞஸி, ப்³ராஹ்மண, அத்தி² ஆரப்³ப⁴தா⁴தூ’’தி? ‘‘ஏவங், போ⁴’’. ‘‘ஆரப்³ப⁴தா⁴துயா ஸதி ஆரப்³ப⁴வந்தோ ஸத்தா பஞ்ஞாயந்தீ’’தி? ‘‘ஏவங், போ⁴’’. ‘‘யங் கோ², ப்³ராஹ்மண, ஆரப்³ப⁴தா⁴துயா ஸதி ஆரப்³ப⁴வந்தோ ஸத்தா பஞ்ஞாயந்தி, அயங் ஸத்தானங் அத்தகாரோ அயங் பரகாரோ’’.
‘‘Taṃ kiṃ maññasi, brāhmaṇa, atthi ārabbhadhātū’’ti? ‘‘Evaṃ, bho’’. ‘‘Ārabbhadhātuyā sati ārabbhavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, ārabbhadhātuyā sati ārabbhavanto sattā paññāyanti, ayaṃ sattānaṃ attakāro ayaṃ parakāro’’.
‘‘தங் கிங் மஞ்ஞஸி, ப்³ராஹ்மண, அத்தி² நிக்கமதா⁴து…பே॰… அத்தி² பரக்கமதா⁴து… அத்தி² தா²மதா⁴து… அத்தி² டி²திதா⁴து… அத்தி² உபக்கமதா⁴தூ’’தி? ‘‘ஏவங், போ⁴’’. ‘‘உபக்கமதா⁴துயா ஸதி உபக்கமவந்தோ ஸத்தா பஞ்ஞாயந்தீ’’தி? ‘‘ஏவங், போ⁴’’. ‘‘யங் கோ², ப்³ராஹ்மண, உபக்கமதா⁴துயா ஸதி உபக்கமவந்தோ ஸத்தா பஞ்ஞாயந்தி, அயங் ஸத்தானங் அத்தகாரோ அயங் பரகாரோ’’.
‘‘Taṃ kiṃ maññasi, brāhmaṇa, atthi nikkamadhātu…pe… atthi parakkamadhātu… atthi thāmadhātu… atthi ṭhitidhātu… atthi upakkamadhātū’’ti? ‘‘Evaṃ, bho’’. ‘‘Upakkamadhātuyā sati upakkamavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, upakkamadhātuyā sati upakkamavanto sattā paññāyanti, ayaṃ sattānaṃ attakāro ayaṃ parakāro’’.
‘‘மாஹங், ப்³ராஹ்மண 1, ஏவங்வாதி³ங் ஏவங்தி³ட்டி²ங் அத்³த³ஸங் வா அஸ்ஸோஸிங் வா. கத²ஞ்ஹி நாம ஸயங் அபி⁴க்கமந்தோ ஸயங் படிக்கமந்தோ ஏவங் வக்க²தி – ‘நத்தி² அத்தகாரோ நத்தி² பரகாரோ’’’தி.
‘‘Māhaṃ, brāhmaṇa 2, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto sayaṃ paṭikkamanto evaṃ vakkhati – ‘natthi attakāro natthi parakāro’’’ti.
‘‘அபி⁴க்கந்தங், போ⁴ கோ³தம…பே॰… அஜ்ஜதக்³கே³ பாணுபேதங் ஸரணங் க³த’’ந்தி! அட்ட²மங்.
‘‘Abhikkantaṃ, bho gotama…pe… ajjatagge pāṇupetaṃ saraṇaṃ gata’’nti! Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. அத்தகாரீஸுத்தவண்ணனா • 8. Attakārīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-11. அத்தகாரீஸுத்தாதி³வண்ணனா • 8-11. Attakārīsuttādivaṇṇanā
