| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. அட்ட²ங்கி³கஸுத்தங்
5. Aṭṭhaṅgikasuttaṃ
205. ‘‘அஸப்புரிஸஞ்ச வோ, பி⁴க்க²வே, தே³ஸெஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தங் ஸுணாத²…பே॰….
205. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி, மிச்சா²ஸங்கப்போ ஹோதி, மிச்சா²வாசோ ஹோதி, மிச்சா²கம்மந்தோ ஹோதி, மிச்சா²ஆஜீவோ ஹோதி, மிச்சா²வாயாமோ ஹோதி, மிச்சா²ஸதி ஹோதி, மிச்சா²ஸமாதி⁴ ஹோதி. அயங் வுச்சதி, பி⁴க்க²வே, அஸப்புரிஸோ.
‘‘Katamo ca, bhikkhave, asappuriso? Idha, bhikkhave, ekacco micchādiṭṭhiko hoti, micchāsaṅkappo hoti, micchāvāco hoti, micchākammanto hoti, micchāājīvo hoti, micchāvāyāmo hoti, micchāsati hoti, micchāsamādhi hoti. Ayaṃ vuccati, bhikkhave, asappuriso.
‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴ பி⁴க்க²வே, ஏகச்சோ அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி; அத்தனா ச மிச்சா²ஸங்கப்போ ஹோதி, பரஞ்ச மிச்சா²ஸங்கப்பே ஸமாத³பேதி; அத்தனா ச மிச்சா²வாசோ ஹோதி, பரஞ்ச மிச்சா²வாசாய ஸமாத³பேதி; அத்தனா ச மிச்சா²கம்மந்தோ ஹோதி, பரஞ்ச மிச்சா²கம்மந்தே ஸமாத³பேதி; அத்தனா ச மிச்சா²ஆஜீவோ ஹோதி, பரஞ்ச மிச்சா²ஆஜீவே ஸமாத³பேதி; அத்தனா ச மிச்சா²வாயாமோ ஹோதி, பரஞ்ச மிச்சா²வாயாமே ஸமாத³பேதி; அத்தனா ச மிச்சா²ஸதி ஹோதி, பரஞ்ச மிச்சா²ஸதியா ஸமாத³பேதி; அத்தனா ச மிச்சா²ஸமாதி⁴ ஹோதி, பரஞ்ச மிச்சா²ஸமாதி⁴ம்ஹி ஸமாத³பேதி. அயங் வுச்சதி, பி⁴க்க²வே, அஸப்புரிஸேன அஸப்புரிஸதரோ.
‘‘Katamo ca, bhikkhave, asappurisena asappurisataro? Idha bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti; attanā ca micchāsaṅkappo hoti, parañca micchāsaṅkappe samādapeti; attanā ca micchāvāco hoti, parañca micchāvācāya samādapeti; attanā ca micchākammanto hoti, parañca micchākammante samādapeti; attanā ca micchāājīvo hoti, parañca micchāājīve samādapeti; attanā ca micchāvāyāmo hoti, parañca micchāvāyāme samādapeti; attanā ca micchāsati hoti, parañca micchāsatiyā samādapeti; attanā ca micchāsamādhi hoti, parañca micchāsamādhimhi samādapeti. Ayaṃ vuccati, bhikkhave, asappurisena asappurisataro.
‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி, ஸம்மாஸங்கப்போ ஹோதி, ஸம்மாவாசோ ஹோதி, ஸம்மாகம்மந்தோ ஹோதி, ஸம்மாஆஜீவோ ஹோதி, ஸம்மாவாயாமோ ஹோதி, ஸம்மாஸதி ஹோதி, ஸம்மாஸமாதி⁴ ஹோதி. அயங் வுச்சதி, பி⁴க்க²வே, ஸப்புரிஸோ.
‘‘Katamo ca, bhikkhave, sappuriso? Idha, bhikkhave, ekacco sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti. Ayaṃ vuccati, bhikkhave, sappuriso.
‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி; அத்தனா ச ஸம்மாஸங்கப்போ ஹோதி, பரஞ்ச ஸம்மாஸங்கப்பே ஸமாத³பேதி; அத்தனா ச ஸம்மாவாசோ ஹோதி, பரஞ்ச ஸம்மாவாசாய ஸமாத³பேதி; அத்தனா ச ஸம்மாகம்மந்தோ ஹோதி, பரஞ்ச ஸம்மாகம்மந்தே ஸமாத³பேதி; அத்தனா ச ஸம்மாஆஜீவோ ஹோதி, பரஞ்ச ஸம்மாஆஜீவே ஸமாத³பேதி; அத்தனா ச ஸம்மாவாயாமோ ஹோதி, பரஞ்ச ஸம்மாவாயாமே ஸமாத³பேதி; அத்தனா ச ஸம்மாஸதி ஹோதி, பரஞ்ச ஸம்மாஸதியா ஸமாத³பேதி; அத்தனா ச ஸம்மாஸமாதி⁴ ஹோதி, பரஞ்ச ஸம்மாஸமாதி⁴ம்ஹி ஸமாத³பேதி. அயங் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. பஞ்சமங்.
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti; attanā ca sammāsaṅkappo hoti, parañca sammāsaṅkappe samādapeti; attanā ca sammāvāco hoti, parañca sammāvācāya samādapeti; attanā ca sammākammanto hoti, parañca sammākammante samādapeti; attanā ca sammāājīvo hoti, parañca sammāājīve samādapeti; attanā ca sammāvāyāmo hoti, parañca sammāvāyāme samādapeti; attanā ca sammāsati hoti, parañca sammāsatiyā samādapeti; attanā ca sammāsamādhi hoti, parañca sammāsamādhimhi samādapeti. Ayaṃ vuccati, bhikkhave, sappurisena sappurisataro’’ti. Pañcamaṃ.
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸிக்கா²பத³ஸுத்தாதி³வண்ணனா • 1-10. Sikkhāpadasuttādivaṇṇanā
