| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2-10. அட்ட²ஸதஸுத்தாதி³வண்ணனா
2-10. Aṭṭhasatasuttādivaṇṇanā
270-278. வேத³னானங் அட்டா²தி⁴கங் ஸதங், தஸ்ஸ அட்ட²ஸதஸ்ஸ தப்³பா⁴வஸ்ஸ பரியாயோ காரணங் எத்த² அத்தீ²தி அட்ட²ஸதபரியாயோ, ஸுத்தங். தேனாஹ ‘‘அட்ட²ஸதஸ்ஸ காரணபூ⁴த’’ந்தி. த⁴ம்மகாரணந்தி பரியத்தித⁴ம்மபூ⁴தங் காரணங். காயிகாதி பஞ்சத்³வாரகாயிகா. தேனாஹ ‘‘காமாவசரேயேவ லப்³ப⁴ந்தீ’’தி, காமபூ⁴மிகாதி அத்தோ². அரூபாவசரே நத்தி², திபூ⁴மிகாதி அத்தோ². தேனாஹ – ‘‘அரூபே திகசதுக்கஜ்ஜா²னங் உப்பஜ்ஜதி, தஞ்ச கோ² லோகுத்தரங், ந லோகிய’’ந்தி. இதரா உபெக்கா²வேத³னா. உபவிசரந்தி உபேச்ச பஜ்ஜந்தீதி அத்தோ². தங்ஸம்பயுத்தானந்தி விசாரஸம்பயுத்தானங்.
270-278. Vedanānaṃ aṭṭhādhikaṃ sataṃ, tassa aṭṭhasatassa tabbhāvassa pariyāyo kāraṇaṃ ettha atthīti aṭṭhasatapariyāyo, suttaṃ. Tenāha ‘‘aṭṭhasatassa kāraṇabhūta’’nti. Dhammakāraṇanti pariyattidhammabhūtaṃ kāraṇaṃ. Kāyikāti pañcadvārakāyikā. Tenāha ‘‘kāmāvacareyeva labbhantī’’ti, kāmabhūmikāti attho. Arūpāvacare natthi, tibhūmikāti attho. Tenāha – ‘‘arūpe tikacatukkajjhānaṃ uppajjati, tañca kho lokuttaraṃ, na lokiya’’nti. Itarā upekkhāvedanā. Upavicaranti upecca pajjantīti attho. Taṃsampayuttānanti vicārasampayuttānaṃ.
படிலாப⁴தோதி படிலத்³த⁴பா⁴வதோ. ஸமனுபஸ்ஸதோதி பச்சவெக்க²தோ பஸ்ஸதோ. அதீதங் க²ணத்தயாதிக்கமேன அதிக்கந்தங், நிருத்³த⁴ப்பத்தியா நிருத்³த⁴ங், பகதிவிஜஹனேன விபரிணதங். ஸமனுஸ்ஸரதோதி சிந்தயதோ. கே³ஹஸ்ஸிதந்தி காமகு³ணனிஸ்ஸிதங். காமகு³ணா ஹி இத⁴ கே³ஹனிஸ்ஸிதத⁴ம்மேன கே³ஹபரியாயேன வுத்தா.
Paṭilābhatoti paṭiladdhabhāvato. Samanupassatoti paccavekkhato passato. Atītaṃ khaṇattayātikkamena atikkantaṃ, niruddhappattiyā niruddhaṃ, pakativijahanena vipariṇataṃ. Samanussaratoti cintayato. Gehassitanti kāmaguṇanissitaṃ. Kāmaguṇā hi idha gehanissitadhammena gehapariyāyena vuttā.
விபரிணாமவிராக³னிரோத⁴ந்தி விபரிணாமனங் விரஜ்ஜனலக்க²ணங் நிருஜ்ஜ²னஞ்ச விதி³த்வா. புப்³பே³தி அதீதே. ஏதரஹீதி இதா³னி வத்தமானா. ஸம்மப்பஞ்ஞாய பஸ்ஸதோதி விபஸ்ஸனாபஞ்ஞாய சேவ மக்³க³பஞ்ஞாய ச யாதா²வதோ பஸ்ஸதோ. உஸ்ஸுக்காபேதுந்தி விபஸ்ஸனங் பட்ட²பெத்வா மக்³க³படிவேத⁴ங் பாபேதுங். நிப்³பா³னங் உத்³தி³ஸ்ஸ பவத்திதத்தா நெக்க²ம்மஸ்ஸிதஸோமனஸ்ஸானி நாம. லோகாமிஸபடிஸங்யுத்தானந்தி காமகு³ணனிஸ்ஸிதானங். ததா³யதனந்தி தங் ஆயதனங் தங் காரணங் அரஹத்தங். அனுத்தரேஸு விமொக்கே²ஸூதி அரியப²லத⁴ம்மேஸு. பிஹந்தி அதி⁴க³மிச்ச²ங்.
Vipariṇāmavirāganirodhanti vipariṇāmanaṃ virajjanalakkhaṇaṃ nirujjhanañca viditvā. Pubbeti atīte. Etarahīti idāni vattamānā. Sammappaññāya passatoti vipassanāpaññāya ceva maggapaññāya ca yāthāvato passato. Ussukkāpetunti vipassanaṃ paṭṭhapetvā maggapaṭivedhaṃ pāpetuṃ. Nibbānaṃ uddissa pavattitattā nekkhammassitasomanassāni nāma. Lokāmisapaṭisaṃyuttānanti kāmaguṇanissitānaṃ. Tadāyatananti taṃ āyatanaṃ taṃ kāraṇaṃ arahattaṃ. Anuttaresu vimokkhesūti ariyaphaladhammesu. Pihanti adhigamicchaṃ.
உபெக்கா²தி ஸோமனஸ்ஸரஹிதஅஞ்ஞாணுபெக்கா². பா³ல்யயோக³தோ பா³லஸ்ஸ, ததோ ஏவ மூள்ஹஸ்ஸ புது²ஜ்ஜனஸ்ஸ. கிலேஸோதீ⁴னங் மக்³கோ³தீ⁴ஹி அஜிதத்தா அனோதி⁴ஜினஸ்ஸ. ஸத்தமப⁴வாதி³தோ உத்³த⁴ங் பவத்தனவிபாகஸ்ஸ அஜிதத்தா அவிபாகஜினஸ்ஸ. அனேகாதீ³னவே வட்டே ஆதீ³னவஸ்ஸ அஜானநேன அனாதீ³னவத³ஸ்ஸாவினோ. படிபத்திபடிவேத⁴பா³ஹுஸச்சாபா⁴வேன அஸ்ஸுதவதோ புது²ஜ்ஜனஸ்ஸ. ரூபங் ஸா நாதிவத்ததி ந அதிக்கமதி ஞாணஸம்பயுத்தாபா⁴வதோ. ஸப்³ப³ஸங்கா³ஹகோதி ஸப்³ப³த⁴ம்மே ஸங்க³ண்ஹனகோ. ததியாதீ³னி யாவ த³ஸமா ஹெட்டா² வுத்தனயத்தா உத்தானத்தா²னேவ.
Upekkhāti somanassarahitaaññāṇupekkhā. Bālyayogato bālassa, tato eva mūḷhassa puthujjanassa. Kilesodhīnaṃ maggodhīhi ajitattā anodhijinassa. Sattamabhavādito uddhaṃ pavattanavipākassa ajitattā avipākajinassa. Anekādīnave vaṭṭe ādīnavassa ajānanena anādīnavadassāvino. Paṭipattipaṭivedhabāhusaccābhāvena assutavato puthujjanassa. Rūpaṃ sā nātivattati na atikkamati ñāṇasampayuttābhāvato. Sabbasaṅgāhakoti sabbadhamme saṅgaṇhanako. Tatiyādīni yāva dasamā heṭṭhā vuttanayattā uttānatthāneva.
அட்ட²ஸதஸுத்தாதி³வண்ணனா நிட்டி²தா.
Aṭṭhasatasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
2. அட்ட²ஸதஸுத்தங் • 2. Aṭṭhasatasuttaṃ
3. அஞ்ஞதரபி⁴க்கு²ஸுத்தங் • 3. Aññatarabhikkhusuttaṃ
4. புப்³ப³ஸுத்தங் • 4. Pubbasuttaṃ
5. ஞாணஸுத்தங் • 5. Ñāṇasuttaṃ
6. ஸம்ப³ஹுலபி⁴க்கு²ஸுத்தங் • 6. Sambahulabhikkhusuttaṃ
7. பட²மஸமணப்³ராஹ்மணஸுத்தங் • 7. Paṭhamasamaṇabrāhmaṇasuttaṃ
8. து³தியஸமணப்³ராஹ்மணஸுத்தங் • 8. Dutiyasamaṇabrāhmaṇasuttaṃ
9. ததியஸமணப்³ராஹ்மணஸுத்தங் • 9. Tatiyasamaṇabrāhmaṇasuttaṃ
10. ஸுத்³தி⁴கஸுத்தங் • 10. Suddhikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-10. அட்ட²ஸதஸுத்தாதி³வண்ணனா • 2-10. Aṭṭhasatasuttādivaṇṇanā
