| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. அத்தி²னுகோ²பரியாயஸுத்தவண்ணனா
8. Atthinukhopariyāyasuttavaṇṇanā
153. பரியாயதி பரிக³ச்ச²தி ப²லங் ஏதஸ்ஸாதி பரியாயோ ஹேதூதி ஆஹ – ‘‘யங் பரியாயந்தி யங் காரண’’ந்தி. பச்சக்க²தி³ட்டே² அவிபரீதே அத்தே² பவத்தஸத்³தா⁴ பச்சக்க²ஸத்³தா⁴ யதா² ‘‘ஸம்மாஸம்பு³த்³தோ⁴ ப⁴க³வா, ஸ்வாகா²தோ த⁴ம்மோ’’தி (ம॰ நி॰ 1.288) ச. ஏவங் கிராதி இதி கிராய உப்பன்னோ ஸத்³த³ஹனாகாரோ ஸத்³தா⁴பதிரூபகோ. ஏதந்தி ‘‘அஞ்ஞத்ரேவ ஸத்³தா⁴யா’’தி ஏதங் வசனங் . ருசாபெத்வாதி கிஞ்சி அத்த²ங் அத்தனோ மதியா ரோசெத்வா. க²மாபெத்வாதி தஸ்ஸேவ வேவசனங், சித்தங் ததா² க²மாபெத்வா. தேனாஹ – ‘‘அத்தே²தந்தி க³ஹணாகாரோ’’தி. பரம்பராக³தஸ்ஸ அத்த²ஸ்ஸ ஏவங் கிரஸ்ஸாதி அனுஸ்ஸவனங். காரணங் சிந்தெந்தஸ்ஸாதி யுத்திங் சிந்தெந்தஸ்ஸ. காரணங் உபட்டா²தீதி ‘‘ஸாதூ⁴’’தி அத்தனோ சித்தஸ்ஸ உபதிட்ட²தி. அத்தே²தந்தி ‘‘ஏதங் காரணங் ஏவமயமத்தோ² யுஜ்ஜதீ’’தி சித்தேன க³ஹணங். ஆகாரபரிவிதக்கோதி யுத்திபரிகப்பனா. லத்³தீ⁴தி நிச்ச²யேன க³ஹணங், ஸா ச கோ² தி³ட்டி² அயாதா²வக்³க³ஹணேன அஞ்ஞாணமேவாதி த³ட்ட²ப்³ப³ங். தந்தி லத்³தி⁴ங். அத்தே²ஸாதி ஏஸா லத்³தி⁴ மம உப்பன்னா அத்தி² யுத்தரூபா ஹுத்வா உபலப்³ப⁴தி. ஏவங் க³ஹணாகாரோ தி³ட்டி²னிஜ்ஜா²னக்க²ந்தி நாம, பட²முப்பன்னலத்³தி⁴ஸங்கா²தாய தி³ட்டி²யா நிஜ்ஜா²னங் க²மனாகாரோ தி³ட்டி²னிஜ்ஜா²னக்க²ந்தி நாம. பஞ்ச டா²னானீதி யதா²வுத்தானி ஸத்³தா⁴தீ³னி பஞ்ச காரணானி. முஞ்சித்வா அக்³க³ஹெத்வா. ஹெட்டி²மமக்³க³வஜ்ஜா²னங் ராகா³தீ³னங் அபா⁴வங் ஸந்தா⁴ய ‘‘நத்தி² மே அஜ்ஜ²த்தங் ராக³தோ³ஸமோஹோ’’தி அயங் ஸெக்கா²னங் பச்சவெக்க²ணா, ஸப்³ப³ஸோ அபா⁴வங் ஸந்தா⁴ய அஸெக்கா²னந்தி ஆஹ – ‘‘ஸெக்கா²ஸெக்கா²னங் பச்சவெக்க²ணா கதி²தா’’தி. ‘‘ஸந்தங் வா அஜ்ஜ²த்த’’ந்திஆதி³னா ஸெக்கா²னங், ‘‘அஸந்தங் வா அஜ்ஜ²த்த’’ந்திஆதி³னா அஸெக்கா²னங் பச்சவெக்க²ணா கதி²தாதி த³ட்ட²ப்³ப³ங்.
153. Pariyāyati parigacchati phalaṃ etassāti pariyāyo hetūti āha – ‘‘yaṃ pariyāyanti yaṃ kāraṇa’’nti. Paccakkhadiṭṭhe aviparīte atthe pavattasaddhā paccakkhasaddhā yathā ‘‘sammāsambuddho bhagavā, svākhāto dhammo’’ti (ma. ni. 1.288) ca. Evaṃ kirāti iti kirāya uppanno saddahanākāro saddhāpatirūpako. Etanti ‘‘aññatreva saddhāyā’’ti etaṃ vacanaṃ . Rucāpetvāti kiñci atthaṃ attano matiyā rocetvā. Khamāpetvāti tasseva vevacanaṃ, cittaṃ tathā khamāpetvā. Tenāha – ‘‘atthetanti gahaṇākāro’’ti. Paramparāgatassa atthassa evaṃ kirassāti anussavanaṃ. Kāraṇaṃ cintentassāti yuttiṃ cintentassa. Kāraṇaṃ upaṭṭhātīti ‘‘sādhū’’ti attano cittassa upatiṭṭhati. Atthetanti ‘‘etaṃ kāraṇaṃ evamayamattho yujjatī’’ti cittena gahaṇaṃ. Ākāraparivitakkoti yuttiparikappanā. Laddhīti nicchayena gahaṇaṃ, sā ca kho diṭṭhi ayāthāvaggahaṇena aññāṇamevāti daṭṭhabbaṃ. Tanti laddhiṃ. Atthesāti esā laddhi mama uppannā atthi yuttarūpā hutvā upalabbhati. Evaṃ gahaṇākāro diṭṭhinijjhānakkhanti nāma, paṭhamuppannaladdhisaṅkhātāya diṭṭhiyā nijjhānaṃ khamanākāro diṭṭhinijjhānakkhanti nāma. Pañca ṭhānānīti yathāvuttāni saddhādīni pañca kāraṇāni. Muñcitvā aggahetvā. Heṭṭhimamaggavajjhānaṃ rāgādīnaṃ abhāvaṃ sandhāya ‘‘natthi me ajjhattaṃ rāgadosamoho’’ti ayaṃ sekkhānaṃ paccavekkhaṇā, sabbaso abhāvaṃ sandhāya asekkhānanti āha – ‘‘sekkhāsekkhānaṃ paccavekkhaṇā kathitā’’ti. ‘‘Santaṃ vā ajjhatta’’ntiādinā sekkhānaṃ, ‘‘asantaṃ vā ajjhatta’’ntiādinā asekkhānaṃ paccavekkhaṇā kathitāti daṭṭhabbaṃ.
அத்தி²னுகோ²பரியாயஸுத்தவண்ணனா நிட்டி²தா.
Atthinukhopariyāyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. அத்தி²னுகோ²பரியாயஸுத்தங் • 8. Atthinukhopariyāyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. அத்தி²னுகோ²பரியாயஸுத்தவண்ணனா • 8. Atthinukhopariyāyasuttavaṇṇanā
