| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. அத்தி²ராக³ஸுத்தவண்ணனா
4. Atthirāgasuttavaṇṇanā
64. சதுத்தே² ஸோதி லோபோ⁴. ரஞ்ஜனவஸேனாதி ரங்க³ஜாதங் விய தஸ்ஸ சித்தஸ்ஸ அனுரஞ்ஜனவஸேன. நந்த³னவஸேனாதி ஸப்பீதிகதாய ஆரம்மணஸ்ஸ அபி⁴னந்த³னவஸேன. தண்ஹாயனவஸேனாதி விஸயகத்துகாமதாய வஸேன. ஏகோ ஏவ ஹி லோபோ⁴ பவத்திஆகாரவஸேன ததா² வுத்தோ. பதிட்டி²தந்தி லத்³த⁴ஸபா⁴வங். தத்தா²தி வட்டே. ஆஹாரேதி கேசி. விஞ்ஞாணந்தி அபி⁴ஸங்கா²ரவிஞ்ஞாணங். விருள்ஹந்தி ப²லனிப்³ப³த்தியா விருள்ஹிப்பத்தங். தேனாஹ ‘‘கம்மங் ஜவாபெத்வா’’திஆதி³. தத்த² ஜவாபெத்வாதி ப²லங் கா³ஹாபெத்வா. அபி⁴ஸங்கா²ரவிஞ்ஞாணஞ்ஹி அத்தனா ஸஹஜாதானங் ஸஹஜாதாதி³பச்சயேஹி சேவ ஆஹாரபச்சயேன ச பச்சயோ ஹுத்வா தஸ்ஸ அத்தனோ ப²லுப்பாத³னே ஸாமத்தி²யத்தா விருள்ஹிப்பத்தங். தேனாஹ ‘‘கம்மங் ஸந்தானே லத்³த⁴பா⁴வங் விருள்ஹிப்பத்தஞ்சஸ்ஸ ஹோதீ’’தி. வட்டகதா² ஏஸாதி கத்வா ‘‘யத்தா²தி தேபூ⁴மகவட்டே பு⁴ம்ம’’ந்தி வுத்தங். ஸப்³ப³த்தா²தி ஸப்³பே³ஸு. புரிமபதே³ ஏதங் பு⁴ம்மந்தி ‘‘யத்த² தத்தா²’’தி ஆக³தங் ஏதங் பு⁴ம்மவசனங் புரிமஸ்மிங் புரிமஸ்மிங் பதே³ விஸயபூ⁴தே. தஞ்ஹி ஆரப்³ப⁴ ஏதங் ‘‘யத்த² தத்தா²’’தி பு⁴ம்மவசனங் வுத்தங். இமஸ்மிங் விபாகவட்டேதி பச்சுப்பன்னே விபாகவட்டே. ஆயதிங் வட்டஹேதுகே ஸங்கா²ரே ஸந்தா⁴ய வுத்தங் ‘‘யத்த² அத்தி² ஆயதிங் புனப்³ப⁴வாபி⁴னிப்³ப³த்தீ’’தி வசனதோ . புனப்³ப⁴வாபி⁴னிப்³ப³த்தீதி ச படிஸந்தி⁴ அதி⁴ப்பேதாதி வுத்தங் ‘‘யத்த² அத்தி² ஆயதிங் புனப்³ப⁴வாபி⁴னிப்³ப³த்தி, அத்தி² தத்த² ஆயதிங் ஜாதிஜராமரண’’ந்தி. ஜாதீதி செத்த² மாதுகுச்சி²தோ நிக்க²மனங் அதி⁴ப்பேதங். யஸ்மிங் டா²னேதி யஸ்மிங் காரணே ஸதி.
64. Catutthe soti lobho. Rañjanavasenāti raṅgajātaṃ viya tassa cittassa anurañjanavasena. Nandanavasenāti sappītikatāya ārammaṇassa abhinandanavasena. Taṇhāyanavasenāti visayakattukāmatāya vasena. Eko eva hi lobho pavattiākāravasena tathā vutto. Patiṭṭhitanti laddhasabhāvaṃ. Tatthāti vaṭṭe. Āhāreti keci. Viññāṇanti abhisaṅkhāraviññāṇaṃ. Viruḷhanti phalanibbattiyā viruḷhippattaṃ. Tenāha ‘‘kammaṃ javāpetvā’’tiādi. Tattha javāpetvāti phalaṃ gāhāpetvā. Abhisaṅkhāraviññāṇañhi attanā sahajātānaṃ sahajātādipaccayehi ceva āhārapaccayena ca paccayo hutvā tassa attano phaluppādane sāmatthiyattā viruḷhippattaṃ. Tenāha ‘‘kammaṃ santāne laddhabhāvaṃ viruḷhippattañcassa hotī’’ti. Vaṭṭakathā esāti katvā ‘‘yatthāti tebhūmakavaṭṭe bhumma’’nti vuttaṃ. Sabbatthāti sabbesu. Purimapade etaṃ bhummanti ‘‘yattha tatthā’’ti āgataṃ etaṃ bhummavacanaṃ purimasmiṃ purimasmiṃ pade visayabhūte. Tañhi ārabbha etaṃ ‘‘yattha tatthā’’ti bhummavacanaṃ vuttaṃ. Imasmiṃ vipākavaṭṭeti paccuppanne vipākavaṭṭe. Āyatiṃ vaṭṭahetuke saṅkhāre sandhāya vuttaṃ ‘‘yattha atthi āyatiṃ punabbhavābhinibbattī’’ti vacanato . Punabbhavābhinibbattīti ca paṭisandhi adhippetāti vuttaṃ ‘‘yattha atthi āyatiṃ punabbhavābhinibbatti, atthi tattha āyatiṃ jātijarāmaraṇa’’nti. Jātīti cettha mātukucchito nikkhamanaṃ adhippetaṃ. Yasmiṃ ṭhāneti yasmiṃ kāraṇe sati.
காரணஞ்செத்த² ஸங்கா²ரா வேதி³தப்³பா³. தே ஹி ஆயதிங் புனப்³ப⁴வாபி⁴னிப்³ப³த்தியா ஹேதூ, தண்ஹாஅவிஜ்ஜாயோ, காலக³திஆத³யோ ச கம்மஸ்ஸ ஸம்பா⁴ரா. கேசி பன கிலேஸவட்டகம்மக³திகாலா சாதி அதி⁴ப்பாயேன ‘‘காலக³திஆத³யோ ச கம்மஸ்ஸ ஸம்பா⁴ரா’’தி வத³ந்தி. தங்தங்ப⁴வபத்த²னாய ததா² ததா² க³தோ திவிதோ⁴ ப⁴வோவ தேபூ⁴மகவட்டங். தேனாஹ ‘‘யத்தா²தி தேபூ⁴மகவட்டே’’தி. ததா² சாஹ ‘‘ஸஸம்பா⁴ரககம்மங் ப⁴வேஸு ரூபங் ஸமுட்டா²பேதீ’’தி. ரூபந்தி அத்தபா⁴வங்.
Kāraṇañcettha saṅkhārā veditabbā. Te hi āyatiṃ punabbhavābhinibbattiyā hetū, taṇhāavijjāyo, kālagatiādayo ca kammassa sambhārā. Keci pana kilesavaṭṭakammagatikālā cāti adhippāyena ‘‘kālagatiādayo ca kammassa sambhārā’’ti vadanti. Taṃtaṃbhavapatthanāya tathā tathā gato tividho bhavova tebhūmakavaṭṭaṃ. Tenāha ‘‘yatthāti tebhūmakavaṭṭe’’ti. Tathā cāha ‘‘sasambhārakakammaṃ bhavesu rūpaṃ samuṭṭhāpetī’’ti. Rūpanti attabhāvaṃ.
ஸங்கி²பித்வாதி தீஸு அகத்வா விஞ்ஞாணேன ஏகஸங்கே²பங் கத்வாதி அத்தோ². ஏகோ ஸந்தீ⁴தி ஏகோ ஹேதுப²லஸந்தி⁴. விபாகவிதி⁴ந்தி ஸளாயதனாதி³கங் வேத³னாவஸானங் விபாகவிதி⁴ங். ‘‘நாமரூபேன ஸத்³தி⁴’’ந்தி பத³ங் ஆனெத்வா ஸம்ப³ந்தோ⁴. நாமரூபேனாதி வா ஸஹயோகே³ கரணவசனங். இத⁴ ஏகோ ஸந்தீ⁴தி ஏகோ ஹேதுப²லஸந்தி⁴. ஆயதிப⁴வஸ்ஸாதி ஆயதிங் உபபத்திப⁴வஸ்ஸ. தேன செத்த² ஏகோ ஸந்தி⁴ ஹேதுப²லஸந்தி⁴ வேதி³தப்³போ³.
Saṅkhipitvāti tīsu akatvā viññāṇena ekasaṅkhepaṃ katvāti attho. Eko sandhīti eko hetuphalasandhi. Vipākavidhinti saḷāyatanādikaṃ vedanāvasānaṃ vipākavidhiṃ. ‘‘Nāmarūpena saddhi’’nti padaṃ ānetvā sambandho. Nāmarūpenāti vā sahayoge karaṇavacanaṃ. Idha eko sandhīti eko hetuphalasandhi. Āyatibhavassāti āyatiṃ upapattibhavassa. Tena cettha eko sandhi hetuphalasandhi veditabbo.
கீ²ணாஸவஸ்ஸ அக்³க³மக்³கா³தி⁴க³மனதோவ பவத்தகம்மஸ்ஸ மக்³கே³ன ஸஹாயவேகல்லஸ்ஸ கதத்தா அவிஜ்ஜமானங். ஸூரியரஸ்மிஸமந்தி ததோ ஏவ வுத்தனயேனேவ அப்பதிட்டி²தஸூரியரஸ்மிஸமங். ஸாதி ரஸ்மி. காயாத³யோதி காயத்³வாராத³யோ. கதகம்மந்தி பச்சயேஹி கதபா⁴வங் உபாதா³ய வுத்தங், ந கம்மலக்க²ணபத்ததோ. தேனாஹ ‘‘குஸலாகுஸலங் நாம ந ஹோதீ’’தி. கிரியமத்தேதி அவிபாகத⁴ம்மத்தா காயிகாதி³பயோக³மத்தே ட²த்வா. அவிபாகங் ஹோதி தேஸங் அவிபாகத⁴ம்மத்தா.
Khīṇāsavassa aggamaggādhigamanatova pavattakammassa maggena sahāyavekallassa katattā avijjamānaṃ. Sūriyarasmisamanti tato eva vuttanayeneva appatiṭṭhitasūriyarasmisamaṃ. Sāti rasmi. Kāyādayoti kāyadvārādayo. Katakammanti paccayehi katabhāvaṃ upādāya vuttaṃ, na kammalakkhaṇapattato. Tenāha ‘‘kusalākusalaṃ nāma na hotī’’ti. Kiriyamatteti avipākadhammattā kāyikādipayogamatte ṭhatvā. Avipākaṃ hoti tesaṃ avipākadhammattā.
அத்தி²ராக³ஸுத்தவண்ணனா நிட்டி²தா.
Atthirāgasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அத்தி²ராக³ஸுத்தங் • 4. Atthirāgasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. அத்தி²ராக³ஸுத்தவண்ணனா • 4. Atthirāgasuttavaṇṇanā
