| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. லக்க²ணஸங்யுத்தங்
8. Lakkhaṇasaṃyuttaṃ
1. பட²மவக்³கோ³
1. Paṭhamavaggo
1. அட்டி²ஸுத்தவண்ணனா
1. Aṭṭhisuttavaṇṇanā
202. ஆயஸ்மா ச லக்க²ணோதிஆதீ³ஸு ‘‘கோ நாமாயஸ்மா லக்க²ணோ, கஸ்மா ச ‘லக்க²ணோ’தி நாமங் அஹோஸி, கோ சாயஸ்மா மொக்³க³ல்லானோ, கஸ்மா ச ஸிதங் பாத்வாகாஸீ’’தி தங் ஸப்³ப³ங் பகாஸேதுங் ‘‘ய்வாய’’ந்திஆதி³ ஆரத்³த⁴ங். லக்க²ணஸம்பன்னேனாதி புரிஸலக்க²ணஸம்பன்னேன.
202.Āyasmāca lakkhaṇotiādīsu ‘‘ko nāmāyasmā lakkhaṇo, kasmā ca ‘lakkhaṇo’ti nāmaṃ ahosi, ko cāyasmā moggallāno, kasmā ca sitaṃ pātvākāsī’’ti taṃ sabbaṃ pakāsetuṃ ‘‘yvāya’’ntiādi āraddhaṃ. Lakkhaṇasampannenāti purisalakkhaṇasampannena.
ஈஸங் ஹஸிதங் ‘‘ஸித’’ந்தி வுச்சதீதி ஆஹ ‘‘மந்த³ஹஸித’’ந்தி. அட்டி²ஸங்க²லிகந்தி நயித³ங் அவிஞ்ஞாணகங் அட்டி²ஸங்க²லிகமத்தங், அத² கோ² ஏகோ பேதோதி ஆஹ ‘‘பேதலோகே நிப்³ப³த்த’’ந்தி. ஏதே அத்தபா⁴வாதி பேதத்தபா⁴வா. ந ஆபாத²ங் ஆக³ச்ச²ந்தீதி தே³வத்தபா⁴வா விய ந ஆபாத²ங் ஆக³ச்ச²ந்தி பகதியா. தேஸங் பன ருசியா ஆபாத²ங் ஆக³ச்செ²ய்யுங் மனுஸ்ஸானங். து³க்கா²பி⁴பூ⁴தானங் அனாத²பா⁴வத³ஸ்ஸனபத³ட்டா²னா கருணாதி ஆஹ ‘‘காருஞ்ஞே கத்தப்³பே³’’தி. அத்தனோ ச ஸம்பத்திங் பு³த்³த⁴ஞாணஸ்ஸ ச ஸம்பத்திந்தி பச்சேகங் ஸம்பத்திஸத்³தோ³ யோஜேதப்³போ³. தது³ப⁴யங் விபா⁴வேதுங் ‘‘தங் ஹீ’’திஆதி³ வுத்தங். தத்த² அத்தனோ ஸம்பத்திங் அனுஸ்ஸரித்வா ஸிதங் பாத்வாகாஸீதி பத³ங் ஆனெத்வா ஸம்ப³ந்தி⁴தப்³ப³ங். த⁴ம்மதா⁴தூதி ஸப்³ப³ஞ்ஞுதஞ்ஞாணங் ஸந்தா⁴ய வத³தி. த⁴ம்மதா⁴தூதி வா த⁴ம்மானங் ஸபா⁴வோ.
Īsaṃ hasitaṃ ‘‘sita’’nti vuccatīti āha ‘‘mandahasita’’nti. Aṭṭhisaṅkhalikanti nayidaṃ aviññāṇakaṃ aṭṭhisaṅkhalikamattaṃ, atha kho eko petoti āha ‘‘petaloke nibbatta’’nti. Ete attabhāvāti petattabhāvā. Na āpāthaṃ āgacchantīti devattabhāvā viya na āpāthaṃ āgacchanti pakatiyā. Tesaṃ pana ruciyā āpāthaṃ āgaccheyyuṃ manussānaṃ. Dukkhābhibhūtānaṃ anāthabhāvadassanapadaṭṭhānā karuṇāti āha ‘‘kāruññe kattabbe’’ti. Attano ca sampattiṃ buddhañāṇassa ca sampattinti paccekaṃ sampattisaddo yojetabbo. Tadubhayaṃ vibhāvetuṃ ‘‘taṃ hī’’tiādi vuttaṃ. Tattha attano sampattiṃ anussaritvā sitaṃ pātvākāsīti padaṃ ānetvā sambandhitabbaṃ. Dhammadhātūti sabbaññutaññāṇaṃ sandhāya vadati. Dhammadhātūti vā dhammānaṃ sabhāvo.
இதரோதி லக்க²ணத்தே²ரோ. உபபத்தீதி ஜாதி. உபபத்திஸீஸேன ஹி ததா²ரூபங் அத்தபா⁴வங் வத³தி. லோஹதுண்ட³கேஹீதி லோஹமயேஹேவ துண்ட³கேஹி. சரந்தீதி ஆகாஸேன க³ச்ச²ந்தி. அச்ச²ரியங் வதாதி க³ரஹச்ச²ரியங் நாமேதங். சக்கு²பூ⁴தாதி ஸம்பத்ததி³ப்³ப³சக்கு²கா, லோகஸ்ஸ சக்கு²பூ⁴தாதி ஏவங் வா எத்த² அத்தோ² த³ட்ட²ப்³போ³.
Itaroti lakkhaṇatthero. Upapattīti jāti. Upapattisīsena hi tathārūpaṃ attabhāvaṃ vadati. Lohatuṇḍakehīti lohamayeheva tuṇḍakehi. Carantīti ākāsena gacchanti. Acchariyaṃ vatāti garahacchariyaṃ nāmetaṃ. Cakkhubhūtāti sampattadibbacakkhukā, lokassa cakkhubhūtāti evaṃ vā ettha attho daṭṭhabbo.
யத்ராதி ஹேதுஅத்தே² நிபாதோதி ஆஹ ‘‘யத்ராதி காரணவசன’’ந்தி. அஞ்ஞத்ர ஹி ‘‘யத்ர ஹி நாமா’’தி அத்தோ² வுச்சதி. அப்பமாணே ஸத்தனிகாயே தே ச கோ² விபா⁴கே³ன காமப⁴வாதி³பே⁴தே³ ப⁴வே, நிரயாதி³பே⁴தா³ க³தியோ, நானத்தகாயனானத்தஸஞ்ஞிஆதி³விஞ்ஞாணட்டி²தியோ, ததா²ரூபே ஸத்தாவாஸே ச ஸப்³ப³ஞ்ஞுதஞ்ஞாணஞ்ச மே உபனேதுங் பச்சக்க²ங் கரொந்தேன.
Yatrāti hetuatthe nipātoti āha ‘‘yatrāti kāraṇavacana’’nti. Aññatra hi ‘‘yatra hi nāmā’’ti attho vuccati. Appamāṇe sattanikāye te ca kho vibhāgena kāmabhavādibhede bhave, nirayādibhedā gatiyo, nānattakāyanānattasaññiādiviññāṇaṭṭhitiyo, tathārūpe sattāvāse ca sabbaññutaññāṇañca me upanetuṃ paccakkhaṃ karontena.
கோ³கா⁴தகோதி கு³ன்னங் அபி⁴ண்ஹங் ஹனநகோ. தேனாஹ ‘‘வதி⁴த்வா வதி⁴த்வா’’தி. தஸ்ஸாதி கு³ன்னங் வத⁴ககம்மஸ்ஸ. அபராபரியகம்மஸ்ஸாதி அபராபரியவேத³னீயகம்மஸ்ஸ. ப³லவதா கோ³கா⁴தககம்மேன விபாகே தீ³யமானே அலத்³தோ⁴காஸங் அபராபரியவேத³னீயங் தஸ்மிங் விபக்கவிபாகே இதா³னி லத்³தோ⁴காஸங் ‘‘அவஸேஸகம்ம’’ந்தி வுத்தங். படிஸந்தீ⁴தி பாபகம்மஜனிதா படிஸந்தி⁴. கம்மஸபா⁴க³தாயாதி கம்மஸதி³ஸபா⁴வேன. ஆரம்மணஸபா⁴க³தாயாதி ஆரம்மணஸ்ஸ ஸபா⁴க³பா⁴வேன ஸதி³ஸபா⁴வேன. யாதி³ஸே ஹி ஆரம்மணே புப்³பே³ தங் கம்மங் தஸ்ஸ ச விபாகோ பவத்தோ, தாதி³ஸேயேவ ஆரம்மணே இத³ங் கம்மங் இமஸ்ஸ விபாகோ ச பவத்தோதி கத்வா வுத்தங் ‘‘தஸ்ஸேவ கம்மஸ்ஸ விபாகாவஸேஸேனா’’தி. ப⁴வதி ஹி தங்ஸதி³ஸேபி தப்³போ³ஹாரோ யதா² ‘‘ஸோ ஏவ தித்திரோ, தானியேவ ஓஸதா⁴னீ’’தி. நிமித்தங் அஹோஸீதி புப்³பே³ கதூபசிதஸ்ஸ பேதூபபத்தினிப்³ப³த்தனவஸேன கதோகாஸஸ்ஸ தஸ்ஸ கம்மஸ்ஸ நிமித்தபூ⁴தங் இதா³னி ததா² உபட்ட²ஹந்தங் தஸ்ஸ விபாகஸ்ஸ நிமித்தங் ஆரம்மணங் அஹோஸி. ஸோதி கோ³கா⁴தகோ. அட்டி²ஸங்க²லிகபேதோ ஜாதோ கம்மஸரிக்க²கவிபாகதாவஸேன.
Goghātakoti gunnaṃ abhiṇhaṃ hananako. Tenāha ‘‘vadhitvā vadhitvā’’ti. Tassāti gunnaṃ vadhakakammassa. Aparāpariyakammassāti aparāpariyavedanīyakammassa. Balavatā goghātakakammena vipāke dīyamāne aladdhokāsaṃ aparāpariyavedanīyaṃ tasmiṃ vipakkavipāke idāni laddhokāsaṃ ‘‘avasesakamma’’nti vuttaṃ. Paṭisandhīti pāpakammajanitā paṭisandhi. Kammasabhāgatāyāti kammasadisabhāvena. Ārammaṇasabhāgatāyāti ārammaṇassa sabhāgabhāvena sadisabhāvena. Yādise hi ārammaṇe pubbe taṃ kammaṃ tassa ca vipāko pavatto, tādiseyeva ārammaṇe idaṃ kammaṃ imassa vipāko ca pavattoti katvā vuttaṃ ‘‘tasseva kammassa vipākāvasesenā’’ti. Bhavati hi taṃsadisepi tabbohāro yathā ‘‘so eva tittiro, tāniyeva osadhānī’’ti. Nimittaṃ ahosīti pubbe katūpacitassa petūpapattinibbattanavasena katokāsassa tassa kammassa nimittabhūtaṃ idāni tathā upaṭṭhahantaṃ tassa vipākassa nimittaṃ ārammaṇaṃ ahosi. Soti goghātako. Aṭṭhisaṅkhalikapeto jāto kammasarikkhakavipākatāvasena.
அட்டி²ஸுத்தவண்ணனா நிட்டி²தா.
Aṭṭhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அட்டி²ஸுத்தங் • 1. Aṭṭhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. அட்டி²ஸுத்தவண்ணனா • 1. Aṭṭhisuttavaṇṇanā
