| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. து³தியபண்ணாஸகங்
2. Dutiyapaṇṇāsakaṃ
(6) 1. நீவரணவக்³கோ³
(6) 1. Nīvaraṇavaggo
1. ஆவரணஸுத்தங்
1. Āvaraṇasuttaṃ
51. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
51. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘பஞ்சிமே, பி⁴க்க²வே, ஆவரணா நீவரணா சேதஸோ அஜ்ஜா²ருஹா பஞ்ஞாய து³ப்³ப³லீகரணா. கதமே பஞ்ச? காமச்ச²ந்தோ³, பி⁴க்க²வே, ஆவரணோ நீவரணோ சேதஸோ அஜ்ஜா²ருஹோ பஞ்ஞாய து³ப்³ப³லீகரணோ. ப்³யாபாதோ³, பி⁴க்க²வே, ஆவரணோ நீவரணோ சேதஸோ அஜ்ஜா²ருஹோ பஞ்ஞாய து³ப்³ப³லீகரணோ. தி²னமித்³த⁴ங், பி⁴க்க²வே, ஆவரணங் நீவரணங் சேதஸோ அஜ்ஜா²ருஹங் பஞ்ஞாய து³ப்³ப³லீகரணங். உத்³த⁴ச்சகுக்குச்சங், பி⁴க்க²வே, ஆவரணங் நீவரணங் சேதஸோ அஜ்ஜா²ருஹங் பஞ்ஞாய து³ப்³ப³லீகரணங். விசிகிச்சா², பி⁴க்க²வே, ஆவரணா நீவரணா சேதஸோ அஜ்ஜா²ருஹா பஞ்ஞாய து³ப்³ப³லீகரணா. இமே கோ², பி⁴க்க²வே, பஞ்ச ஆவரணா நீவரணா சேதஸோ அஜ்ஜா²ருஹா பஞ்ஞாய து³ப்³ப³லீகரணா.
‘‘Pañcime, bhikkhave, āvaraṇā nīvaraṇā cetaso ajjhāruhā paññāya dubbalīkaraṇā. Katame pañca? Kāmacchando, bhikkhave, āvaraṇo nīvaraṇo cetaso ajjhāruho paññāya dubbalīkaraṇo. Byāpādo, bhikkhave, āvaraṇo nīvaraṇo cetaso ajjhāruho paññāya dubbalīkaraṇo. Thinamiddhaṃ, bhikkhave, āvaraṇaṃ nīvaraṇaṃ cetaso ajjhāruhaṃ paññāya dubbalīkaraṇaṃ. Uddhaccakukkuccaṃ, bhikkhave, āvaraṇaṃ nīvaraṇaṃ cetaso ajjhāruhaṃ paññāya dubbalīkaraṇaṃ. Vicikicchā, bhikkhave, āvaraṇā nīvaraṇā cetaso ajjhāruhā paññāya dubbalīkaraṇā. Ime kho, bhikkhave, pañca āvaraṇā nīvaraṇā cetaso ajjhāruhā paññāya dubbalīkaraṇā.
‘‘ஸோ வத, பி⁴க்க²வே, பி⁴க்கு² இமே பஞ்ச ஆவரணே நீவரணே சேதஸோ அஜ்ஜா²ருஹே பஞ்ஞாய து³ப்³ப³லீகரணே அப்பஹாய, அப³லாய பஞ்ஞாய து³ப்³ப³லாய அத்தத்த²ங் வா ஞஸ்ஸதி பரத்த²ங் வா ஞஸ்ஸதி உப⁴யத்த²ங் வா ஞஸ்ஸதி உத்தரி 1 வா மனுஸ்ஸத⁴ம்மா அலமரியஞாணத³ஸ்ஸனவிஸேஸங் ஸச்சி²கரிஸ்ஸதீதி நேதங் டா²னங் விஜ்ஜதி. ஸெய்யதா²பி, பி⁴க்க²வே, நதீ³ பப்³ப³தெய்யா தூ³ரங்க³மா 2 ஸீக⁴ஸோதா ஹாரஹாரினீ. தஸ்ஸா புரிஸோ உப⁴தோ நங்க³லமுகா²னி விவரெய்ய. ஏவஞ்ஹி ஸோ, பி⁴க்க²வே, மஜ்ஜே² நதி³யா ஸோதோ விக்கி²த்தோ விஸடோ ப்³யாதி³ண்ணோ நேவ 3 தூ³ரங்க³மோ அஸ்ஸ ந 4 ஸீக⁴ஸோதோ ந 5 ஹாரஹாரீ 6. ஏவமேவங் கோ², பி⁴க்க²வே, ஸோ வத பி⁴க்கு² இமே பஞ்ச ஆவரணே நீவரணே சேதஸோ அஜ்ஜா²ருஹே பஞ்ஞாய து³ப்³ப³லீகரணே அப்பஹாய, அப³லாய பஞ்ஞாய து³ப்³ப³லாய அத்தத்த²ங் வா ஞஸ்ஸதி பரத்த²ங் வா ஞஸ்ஸதி உப⁴யத்த²ங் வா ஞஸ்ஸதி உத்தரி வா மனுஸ்ஸத⁴ம்மா அலமரியஞாணத³ஸ்ஸனவிஸேஸங் ஸச்சி²கரிஸ்ஸதீதி நேதங் டா²னங் விஜ்ஜதி.
‘‘So vata, bhikkhave, bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe appahāya, abalāya paññāya dubbalāya attatthaṃ vā ñassati paratthaṃ vā ñassati ubhayatthaṃ vā ñassati uttari 7 vā manussadhammā alamariyañāṇadassanavisesaṃ sacchikarissatīti netaṃ ṭhānaṃ vijjati. Seyyathāpi, bhikkhave, nadī pabbateyyā dūraṅgamā 8 sīghasotā hārahārinī. Tassā puriso ubhato naṅgalamukhāni vivareyya. Evañhi so, bhikkhave, majjhe nadiyā soto vikkhitto visaṭo byādiṇṇo neva 9 dūraṅgamo assa na 10 sīghasoto na 11 hārahārī 12. Evamevaṃ kho, bhikkhave, so vata bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe appahāya, abalāya paññāya dubbalāya attatthaṃ vā ñassati paratthaṃ vā ñassati ubhayatthaṃ vā ñassati uttari vā manussadhammā alamariyañāṇadassanavisesaṃ sacchikarissatīti netaṃ ṭhānaṃ vijjati.
‘‘ஸோ வத, பி⁴க்க²வே, பி⁴க்கு² இமே பஞ்ச ஆவரணே நீவரணே சேதஸோ அஜ்ஜா²ருஹே பஞ்ஞாய து³ப்³ப³லீகரணே பஹாய, ப³லவதியா பஞ்ஞாய அத்தத்த²ங் வா ஞஸ்ஸதி பரத்த²ங் வா ஞஸ்ஸதி உப⁴யத்த²ங் வா ஞஸ்ஸதி உத்தரி வா மனுஸ்ஸத⁴ம்மா அலமரியஞாணத³ஸ்ஸனவிஸேஸங் ஸச்சி²கரிஸ்ஸதீதி டா²னமேதங் விஜ்ஜதி. ஸெய்யதா²பி, பி⁴க்க²வே, நதீ³ பப்³ப³தெய்யா தூ³ரங்க³மா ஸீக⁴ஸோதா ஹாரஹாரினீ. தஸ்ஸா புரிஸோ உப⁴தோ நங்க³லமுகா²னி பித³ஹெய்ய. ஏவஞ்ஹி ஸோ, பி⁴க்க²வே, மஜ்ஜே² நதி³யா ஸோதோ அவிக்கி²த்தோ அவிஸடோ அப்³யாதி³ண்ணோ தூ³ரங்க³மோ சேவ அஸ்ஸ ஸீக⁴ஸோதோ ச ஹாரஹாரீ ச. ஏவமேவங் கோ², பி⁴க்க²வே, ஸோ வத பி⁴க்கு² இமே பஞ்ச ஆவரணே நீவரணே சேதஸோ அஜ்ஜா²ருஹே பஞ்ஞாய து³ப்³ப³லீகரணே பஹாய, ப³லவதியா பஞ்ஞாய அத்தத்த²ங் வா ஞஸ்ஸதி பரத்த²ங் வா ஞஸ்ஸதி உப⁴யத்த²ங் வா ஞஸ்ஸதி உத்தரி வா மனுஸ்ஸத⁴ம்மா அலமரியஞாணத³ஸ்ஸனவிஸேஸங் ஸச்சி²கரிஸ்ஸதீதி டா²னமேதங் விஜ்ஜதீ’’தி. பட²மங்.
‘‘So vata, bhikkhave, bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe pahāya, balavatiyā paññāya attatthaṃ vā ñassati paratthaṃ vā ñassati ubhayatthaṃ vā ñassati uttari vā manussadhammā alamariyañāṇadassanavisesaṃ sacchikarissatīti ṭhānametaṃ vijjati. Seyyathāpi, bhikkhave, nadī pabbateyyā dūraṅgamā sīghasotā hārahārinī. Tassā puriso ubhato naṅgalamukhāni pidaheyya. Evañhi so, bhikkhave, majjhe nadiyā soto avikkhitto avisaṭo abyādiṇṇo dūraṅgamo ceva assa sīghasoto ca hārahārī ca. Evamevaṃ kho, bhikkhave, so vata bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe pahāya, balavatiyā paññāya attatthaṃ vā ñassati paratthaṃ vā ñassati ubhayatthaṃ vā ñassati uttari vā manussadhammā alamariyañāṇadassanavisesaṃ sacchikarissatīti ṭhānametaṃ vijjatī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஆவரணஸுத்தவண்ணனா • 1. Āvaraṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. ஆவரணஸுத்தாதி³வண்ணனா • 1-2. Āvaraṇasuttādivaṇṇanā
