| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. அவஸ்ஸுதபரியாயஸுத்தவண்ணனா
6. Avassutapariyāyasuttavaṇṇanā
243. ஸந்தா²கா³ரந்தி ஸஞ்ஞாபனாகா³ரங். தேனாஹ ‘‘உய்யோக³காலாதீ³ஸூ’’திஆதி³. ஆதி³-ஸத்³தே³ன மங்க³லமஹாதீ³னங் ஸங்க³ஹோ த³ட்ட²ப்³போ³. ஸந்த²ரந்தீதி விஸ்ஸமந்தி , பரிஸ்ஸமங் வினோதெ³ந்தீதி அத்தோ². ஸஹாதி ஸன்னிபாதவஸேன ஏகஜ்ஜ²ங். ஸஹ அத்தா²னுஸாஸனங் அகா³ரந்தி தஸ்மிங் அத்தே² த்த²-காரஸ்ஸ ந்த²-காரங் கத்வா ‘‘ஸந்தா²கா³ர’’ந்தி வுச்சதீதி த³ட்ட²ப்³ப³ங், பட²மங் தத்த² ஸம்மந்தனவஸேன ஸந்த²ரந்தி விசாரெந்தீதி அத்தோ².
243.Santhāgāranti saññāpanāgāraṃ. Tenāha ‘‘uyyogakālādīsū’’tiādi. Ādi-saddena maṅgalamahādīnaṃ saṅgaho daṭṭhabbo. Santharantīti vissamanti , parissamaṃ vinodentīti attho. Sahāti sannipātavasena ekajjhaṃ. Saha atthānusāsanaṃ agāranti tasmiṃ atthe ttha-kārassa ntha-kāraṃ katvā ‘‘santhāgāra’’nti vuccatīti daṭṭhabbaṃ, paṭhamaṃ tattha sammantanavasena santharanti vicārentīti attho.
தேபிடகங் பு³த்³த⁴வசனங் ஆக³தமேவ ப⁴விஸ்ஸதீதி பு³த்³த⁴வசனஸ்ஸ ஆக³மனஸீஸேன அரியப²லத⁴ம்மானம்பி ஆக³மனங் வுத்தமேவ. தியாமரத்திங் தத்த² வஸந்தானங் ப²லஸமாபத்திவளஞ்ஜனங் ஹோதீதி. தஸ்மிஞ்ச பி⁴க்கு²ஸங்கே⁴ கல்யாணத⁴ம்மா கல்யாணபுது²ஜ்ஜனா விபஸ்ஸனங் உஸ்ஸுக்காபெந்தா ஹொந்தீதி அரியமக்³க³த⁴ம்மானம்பி தத்த² ஆக³மனங் ஹோதியேவ.
Tepiṭakaṃ buddhavacanaṃ āgatameva bhavissatīti buddhavacanassa āgamanasīsena ariyaphaladhammānampi āgamanaṃ vuttameva. Tiyāmarattiṃ tattha vasantānaṃ phalasamāpattivaḷañjanaṃ hotīti. Tasmiñca bhikkhusaṅghe kalyāṇadhammā kalyāṇaputhujjanā vipassanaṃ ussukkāpentā hontīti ariyamaggadhammānampi tattha āgamanaṃ hotiyeva.
அல்லகோ³மயேனாதி அச்சே²ன அல்லகோ³மயரஸேன. ஓபுஞ்ஜாபெத்வாதி விலிம்பெத்வா. சதுஜ்ஜாதியக³ந்தே⁴ஹீதி குங்குமதுருக்க²யவனபுப்ப²தமாலபத்தக³ந்தே⁴ஹி. நானாவண்ணேதி நீலாதி³வஸேன நானாவண்ணே, பி⁴த்திவிஸேஸவஸேன நானாஸண்டா²னரூபே. ‘‘மஹாபிட்டி²ககோஜவேதி ஹத்தி²பிட்டி²ஆதீ³ஸு அத்த²ரிதப்³ப³தாய ‘மஹாபிட்டி²கா’தி லத்³த⁴ஸமஞ்ஞே கோஜவே’’தி வத³ந்தி. குத்தகே பன ஸந்தா⁴யேதங் வுத்தங், ‘‘சதுரங்கு³லாதி⁴கபுப்பா² மஹாபிட்டி²ககோஜவா’’திபி வத³ந்தி. ஹத்த²த்த²ரஅஸ்ஸத்த²ரா ஹத்தி²அஸ்ஸபிட்டீ²ஸு அத்த²ரிதப்³பா³ ஹத்தி²அஸ்ஸரூபவிசித்தா ச அத்த²ரகா. ஸீஹத்த²ரகாத³யோ பன ஸீஹரூபாதி³விசித்தா ஏவ அத்த²ரகா. சித்தத்த²ரகங் நானாவித⁴ரூபேஹி சேவ நானாவித⁴மாலாகம்மாதீ³ஹி ச விசித்தங் அத்த²ரகங்.
Allagomayenāti acchena allagomayarasena. Opuñjāpetvāti vilimpetvā. Catujjātiyagandhehīti kuṅkumaturukkhayavanapupphatamālapattagandhehi. Nānāvaṇṇeti nīlādivasena nānāvaṇṇe, bhittivisesavasena nānāsaṇṭhānarūpe. ‘‘Mahāpiṭṭhikakojaveti hatthipiṭṭhiādīsu attharitabbatāya ‘mahāpiṭṭhikā’ti laddhasamaññe kojave’’ti vadanti. Kuttake pana sandhāyetaṃ vuttaṃ, ‘‘caturaṅgulādhikapupphā mahāpiṭṭhikakojavā’’tipi vadanti. Hatthattharaassattharā hatthiassapiṭṭhīsu attharitabbā hatthiassarūpavicittā ca attharakā. Sīhattharakādayo pana sīharūpādivicittā eva attharakā. Cittattharakaṃ nānāvidharūpehi ceva nānāvidhamālākammādīhi ca vicittaṃ attharakaṃ.
உபதா⁴னந்தி அபஸ்ஸயனங். உபத³ஹித்வாதி அபஸ்ஸயயொக்³க³பா⁴வேன ட²பெத்வா. க³ந்தே⁴ஹி கதமாலா க³ந்த⁴தா³மங். தமாலபத்தாதீ³ஹி கதமாலா பத்ததா³மங். ஆதி³-ஸத்³தே³ன ஹிங்கு³லதக்கோலஜாதிப²லஜாதிபுப்பா²தீ³ஹி கததா³மங் ஸங்க³ண்ஹாதி. பல்லங்காகாரேன கதபீட²ங் பல்லங்கபீட²ங். தீஸு பஸ்ஸேஸு ஏகபஸ்ஸே ஏவ வா ஸஉபஸ்ஸயங் அபஸ்ஸயபீட²ங். அனபஸ்ஸயங் முண்ட³பீட²ங். யோஜனாவட்டேதி யோஜனபரிக்கே²போகாஸே.
Upadhānanti apassayanaṃ. Upadahitvāti apassayayoggabhāvena ṭhapetvā. Gandhehi katamālā gandhadāmaṃ. Tamālapattādīhi katamālā pattadāmaṃ. Ādi-saddena hiṅgulatakkolajātiphalajātipupphādīhi katadāmaṃ saṅgaṇhāti. Pallaṅkākārena katapīṭhaṃ pallaṅkapīṭhaṃ. Tīsu passesu ekapasse eva vā saupassayaṃ apassayapīṭhaṃ. Anapassayaṃ muṇḍapīṭhaṃ. Yojanāvaṭṭeti yojanaparikkhepokāse.
ஸங்விதா⁴யாதி அந்தரவாஸகஸ்ஸ கோணபதே³ஸங் இதரபதே³ஸஞ்ச ஸமங் கத்வா விதா⁴ய. தேனாஹ – ‘‘கத்தரியா பது³மங் கந்தெந்தோ வியா’’தி, ‘‘திமண்ட³லங் படிச்சா²தெ³ந்தோ’’தி ச. யஸ்மா பு³த்³தா⁴னங் ரூபஸம்பதா³ விய ஆகப்பஸம்பதா³பி பரமுக்கங்ஸதங் க³தா, தஸ்மா ததா³ ப⁴க³வா ஏவங் ஸோபெ⁴ய்யாதி த³ஸ்ஸெந்தோ ‘‘ஸுவண்ணபாமங்கே³னா’’திஆதி³மாஹ. தத்த² ‘‘அஸமேன பு³த்³த⁴வேஸேனா’’திஆதி³னா ததா³ ப⁴க³வா பு³த்³தா⁴னுபா⁴வஸ்ஸ நிகு³ஹனே காரணாபா⁴வதோ தத்த² ஸன்னிபதிததே³வமனுஸ்ஸனாக³யக்க²க³ந்த⁴ப்³பா³தீ³னங் பஸாத³ஜனநத்த²ங் அத்தனோ ஸபா⁴வபகதியாவ கபிலவத்து²ங் பாவிஸீதி த³ஸ்ஸேதி. பு³த்³தா⁴னங் காயபபா⁴ நாம பகதியா அஸீதிஹத்த²மத்தபதே³ஸங் விஸரதீதி ஆஹ ‘‘அஸீதிஹத்த²ட்டா²னங் அக்³க³ஹேஸீ’’தி. நீலபீதலோஹிதோதா³தமஞ்ஜிட்ட²பப⁴ஸ்ஸரானங் வஸேன ச²ப்³ப³ண்ணா பு³த்³த⁴ரஸ்மியோ.
Saṃvidhāyāti antaravāsakassa koṇapadesaṃ itarapadesañca samaṃ katvā vidhāya. Tenāha – ‘‘kattariyā padumaṃ kantento viyā’’ti, ‘‘timaṇḍalaṃ paṭicchādento’’ti ca. Yasmā buddhānaṃ rūpasampadā viya ākappasampadāpi paramukkaṃsataṃ gatā, tasmā tadā bhagavā evaṃ sobheyyāti dassento ‘‘suvaṇṇapāmaṅgenā’’tiādimāha. Tattha ‘‘asamena buddhavesenā’’tiādinā tadā bhagavā buddhānubhāvassa niguhane kāraṇābhāvato tattha sannipatitadevamanussanāgayakkhagandhabbādīnaṃ pasādajananatthaṃ attano sabhāvapakatiyāva kapilavatthuṃ pāvisīti dasseti. Buddhānaṃ kāyapabhā nāma pakatiyā asītihatthamattapadesaṃ visaratīti āha ‘‘asītihatthaṭṭhānaṃ aggahesī’’ti. Nīlapītalohitodātamañjiṭṭhapabhassarānaṃ vasena chabbaṇṇā buddharasmiyo.
ஸப்³ப³பாலிபு²ல்லோதி மூலதோ பட்டா²ய யாவ ஸாக²க்³கா³ ஸமந்ததோ பு²ல்லோ விகஸிதோ. படிபாடியா ட²பிதானந்திஆதி³ பரிகப்பூபமா, யதா² தங்…பே॰… அலங்கதங் அஞ்ஞங் விரோசதி, ஏவங் விரோசித்த², ஸமதிங்ஸாய பாரமிதாஹி அபி⁴ஸங்க²தத்தா ஏவங் விரோசித்தா²தி வுத்தங் ஹோதி. ‘‘பஞ்சவீஸதியா க³ங்கா³னந்தி ஸதமுகா² ஹுத்வா ஸமுத்³த³ங் பவிட்டா²ய மஹாக³ங்கா³ய மஹந்தமஹந்தானங் க³ங்கா³னங் பஞ்சவீஸதீ’’தி வத³ந்தி. பபஞ்சஸூத³னியங் (ம॰ நி॰ அட்ட²॰ 2.22) ‘‘பஞ்சவீஸதியா நதீ³ன’’ந்தி வுத்தங், க³ங்கா³தீ³னங் சந்த³பா⁴கா³பரியோஸானானங் பஞ்சவீஸதியா மஹானதீ³னந்தி அத்தோ². பரிகப்பவசனஞ்ஹேதங். ஸம்பி⁴ஜ்ஜாதி ஸம்பே⁴த³ங் மிஸ்ஸீபா⁴வங் பத்வா முக²த்³வாரேதி ஸமுத்³த³ங் பவிட்ட²ட்டா²னே.
Sabbapāliphulloti mūlato paṭṭhāya yāva sākhaggā samantato phullo vikasito. Paṭipāṭiyā ṭhapitānantiādi parikappūpamā, yathā taṃ…pe… alaṅkataṃ aññaṃ virocati, evaṃ virocittha, samatiṃsāya pāramitāhi abhisaṅkhatattā evaṃ virocitthāti vuttaṃ hoti. ‘‘Pañcavīsatiyā gaṅgānanti satamukhā hutvā samuddaṃ paviṭṭhāya mahāgaṅgāya mahantamahantānaṃ gaṅgānaṃ pañcavīsatī’’ti vadanti. Papañcasūdaniyaṃ (ma. ni. aṭṭha. 2.22) ‘‘pañcavīsatiyā nadīna’’nti vuttaṃ, gaṅgādīnaṃ candabhāgāpariyosānānaṃ pañcavīsatiyā mahānadīnanti attho. Parikappavacanañhetaṃ. Sambhijjāti sambhedaṃ missībhāvaṃ patvā mukhadvāreti samuddaṃ paviṭṭhaṭṭhāne.
நாக³ஸுபண்ணக³ந்த⁴ப்³ப³யக்கா²தீ³னந்திஆதி³ பரிகப்பவஸேன வுத்தங். ஸஹஸ்ஸேனாதி பத³ஸஹஸ்ஸேன, பா⁴ணவாரப்பமாணேன க³ந்தே²னாதி அத்தோ².
Nāgasupaṇṇagandhabbayakkhādīnantiādi parikappavasena vuttaṃ. Sahassenāti padasahassena, bhāṇavārappamāṇena ganthenāti attho.
கம்பயந்தோ வஸுந்த⁴ரந்தி அத்தனோ கு³ணவிஸேஸேஹி பத²வீகம்மங் உன்னாதெ³ந்தோ, ஏவங்பூ⁴தோபி அஹேட²யந்தோ பாணானி. ஸப்³ப³பத³க்கி²ணத்தா பு³த்³தா⁴னங் த³க்கி²ணங் பட²மங் பாத³ங் உத்³த⁴ரந்தோ. ஸமங் ஸம்பு²ஸதே பூ⁴மிங் ஸுப்பதிட்டி²தபாத³தாய. யதி³பி பூ⁴மிங் ஸமங் பு²ஸதி, ரஜஸா நுபலிப்பதி ஸுகு²மத்தா ச²வியா. நின்னட்டா²னங் உன்னமதீதிஆதி³ பு³த்³தா⁴னங் ஸுப்பதிட்டி²தபாத³தாஸங்கா²தமஹாபுரிஸலக்க²ணபடிலாப⁴ஸ்ஸ நிஸ்ஸந்த³ப²லங். நாதிதூ³ரே உத்³த⁴ரதீதி அதிதூ³ரே ட²பேதுங் ந உத்³த⁴ரதி. நச்சாஸன்னே ச நிக்கி²பந்தி அச்சாஸன்னே ச டா²னே அனிக்கி²பந்தோ நிய்யாதி. ஹாஸயந்தோ ஸதே³வகே லோகே தோஸெந்தோ. சதூஹி பாதே³ஹி சரதீதி சதுசாரீ.
Kampayanto vasundharanti attano guṇavisesehi pathavīkammaṃ unnādento, evaṃbhūtopi aheṭhayanto pāṇāni. Sabbapadakkhiṇattā buddhānaṃ dakkhiṇaṃ paṭhamaṃ pādaṃ uddharanto. Samaṃ samphusate bhūmiṃ suppatiṭṭhitapādatāya. Yadipi bhūmiṃ samaṃ phusati, rajasā nupalippati sukhumattā chaviyā. Ninnaṭṭhānaṃ unnamatītiādi buddhānaṃ suppatiṭṭhitapādatāsaṅkhātamahāpurisalakkhaṇapaṭilābhassa nissandaphalaṃ. Nātidūre uddharatīti atidūre ṭhapetuṃ na uddharati. Naccāsanne ca nikkhipanti accāsanne ca ṭhāne anikkhipanto niyyāti. Hāsayanto sadevake loke tosento. Catūhi pādehi caratīti catucārī.
பு³த்³தா⁴னுபா⁴வஸ்ஸ பகாஸனவஸேன க³தத்தா வண்ணகாலோ நாம ஏஸ. ஸரீரவண்ணே வா கு³ணவண்ணே வா கதி²யமானே து³க்கதி²தந்தி ந வத்தப்³ப³ங். கஸ்மா? அப்பமாணவண்ணா ஹி பு³த்³தா⁴ ப⁴க³வந்தோ, பு³த்³த⁴கு³ணஸங்வண்ணனா ஜானந்தஸ்ஸ யதா²ரத்³த⁴ஸங்வண்ணனங்யேவ அனுபவிஸதி. து³கூலசும்ப³டகேனாதி க³ந்தி²த்வா க³ஹிதது³கூலவத்தே²ன.
Buddhānubhāvassa pakāsanavasena gatattā vaṇṇakālo nāma esa. Sarīravaṇṇe vā guṇavaṇṇe vā kathiyamāne dukkathitanti na vattabbaṃ. Kasmā? Appamāṇavaṇṇā hi buddhā bhagavanto, buddhaguṇasaṃvaṇṇanā jānantassa yathāraddhasaṃvaṇṇanaṃyeva anupavisati. Dukūlacumbaṭakenāti ganthitvā gahitadukūlavatthena.
நாக³விக்கந்தசாரணோதி ஹத்தி²னாக³ஸதி³ஸபத³னிக்கே²போ. ஸதபுஞ்ஞலக்க²ணோதி அனேகஸதபுஞ்ஞாபி⁴னிப்³ப³த்தமஹாபுரிஸலக்க²ணோ. மணிவேரோசனோ யதா²தி சதுராஸீதிஸஹஸ்ஸமணிபரிவாரிதோ அதிவிய விரோசமானோ விஜ்ஜோதமானோ மணி விய. ‘‘வேரோசனோ நாம ஏகோ மணீ’’தி கேசி. மஹாஸாலோவாதி மஹந்தோ ஸாலருக்கோ² விய, ஸுத்³த⁴ட்டி²தோ கோவிளாராதி³ மஹாருக்கோ² விய வா. பது³மோ கோகனதோ³ யதா²தி கோகனத³ஸங்கா²தங் மஹாபது³மங் விய, விகஸமானபது³மங் விய வா.
Nāgavikkantacāraṇoti hatthināgasadisapadanikkhepo. Satapuññalakkhaṇoti anekasatapuññābhinibbattamahāpurisalakkhaṇo. Maṇiverocano yathāti caturāsītisahassamaṇiparivārito ativiya virocamāno vijjotamāno maṇi viya. ‘‘Verocano nāma eko maṇī’’ti keci. Mahāsālovāti mahanto sālarukkho viya, suddhaṭṭhito koviḷārādi mahārukkho viya vā. Padumo kokanado yathāti kokanadasaṅkhātaṃ mahāpadumaṃ viya, vikasamānapadumaṃ viya vā.
ஆகாஸக³ங்க³ங் ஓதாரெந்தோ வியாதிஆதி³ தஸ்ஸா பகிண்ணககதா²ய அஞ்ஞேஸங் ஸுது³க்கரபா⁴வத³ஸ்ஸனஞ்சேவ ஸுணந்தானங் அச்சந்தஸுகா²வஹபா⁴வத³ஸ்ஸனஞ்ச. பத²வோஜங் ஆகட்³ட⁴ந்தோ வியாதி நாளியந்தங் யோஜெத்வா மஹாபத²வியா ஹெட்டி²மதலே பப்படகோஜங் உத்³த⁴ங் முக²ங் கத்வா ஆகட்³ட⁴ந்தோ விய. யோஜனிகந்தி யோஜனபமாணங். மது⁴ப⁴ண்ட³ந்தி மது⁴படலங்.
Ākāsagaṅgaṃ otārento viyātiādi tassā pakiṇṇakakathāya aññesaṃ sudukkarabhāvadassanañceva suṇantānaṃ accantasukhāvahabhāvadassanañca. Pathavojaṃ ākaḍḍhanto viyāti nāḷiyantaṃ yojetvā mahāpathaviyā heṭṭhimatale pappaṭakojaṃ uddhaṃ mukhaṃ katvā ākaḍḍhanto viya. Yojanikanti yojanapamāṇaṃ. Madhubhaṇḍanti madhupaṭalaṃ.
மஹந்தந்தி விபுலங் உளாரபுஞ்ஞங். ஸப்³ப³தா³னங் தி³ன்னமேவ ஹோதீதி ஸப்³ப³மேவ பச்சயஜாதங் ஆவாஸதா³யகேன தி³ன்னமேவ ஹோதி. ததா² ஹி த்³வே தயோ கா³மே பிண்டா³ய சரித்வா கிஞ்சி அலத்³தா⁴ ஆக³தஸ்ஸபி சா²யூத³கஸம்பன்னங் ஆராமங் பவிஸித்வா ந்ஹாயித்வா படிஸ்ஸயே முஹுத்தங் நிபஜ்ஜித்வா உட்டா²ய நிஸின்னஸ்ஸ காயே ப³லங் ஆஹரித்வா பக்கி²த்தங் விய ஹோதி. ப³ஹி விசரந்தஸ்ஸ ச காயே வண்ணதா⁴து வாதாதபேஹி கிலமதி, படிஸ்ஸயங் பவிஸித்வா த்³வாரங் பிதா⁴ய முஹுத்தங் நிஸின்னஸ்ஸ விஸபா⁴க³ஸந்ததி வூபஸம்மதி, ஸபா⁴க³ஸந்ததி பதிட்டா²தி, வண்ணதா⁴து ஆஹரித்வா பக்கி²த்தா விய ஹோதி, ப³ஹி விசரந்தஸ்ஸ ச பாதே³ கண்டகா விஜ்ஜ²ந்தி, கா²ணு பஹரதி, ஸரீஸபாதி³பரிஸ்ஸயா சேவ சோரப⁴யஞ்ச உப்பஜ்ஜதி, படிஸ்ஸயங் பவிஸித்வா த்³வாரங் பிதா⁴ய நிஸின்னஸ்ஸ பன ஸப்³பே³பேதே பரிஸ்ஸயா ந ஹொந்தி. ஸஜ்ஜா²யந்தஸ்ஸ த⁴ம்மபீதிஸுக²ங், கம்மட்டா²னங் மனஸிகரொந்தஸ்ஸ உபஸமஸுக²ங் உப்பஜ்ஜதி ப³ஹித்³தா⁴ விக்கே²பாபா⁴வதோ. ப³ஹி விசரந்தஸ்ஸ ச காயே ஸேதா³ முச்சந்தி, அக்கீ²னி ப²ந்த³ந்தி, ஸேனாஸனங் பவிஸனக்க²ணே மஞ்சபீடா²தீ³னி ந பஞ்ஞாயந்தி, முஹுத்தங் நிஸின்னஸ்ஸ பன அக்கி²பஸாதோ³ ஆஹரித்வா பக்கி²த்தோ விய ஹோதி, த்³வாரவாதபானமஞ்சபீடா²தீ³னி பஞ்ஞாயந்தி. ஏதஸ்மிஞ்ச ஆவாஸே வஸந்தங் தி³ஸ்வா மனுஸ்ஸா சதூஹி பச்சயேஹி ஸக்கச்சங் உபட்ட²ஹந்தி. தேன வுத்தங் – ‘‘ஆவாஸதா³னஸ்மிஞ்ஹி தி³ன்னே ஸப்³ப³தா³னங் தி³ன்னமேவ ஹோதீ’’தி. பூ⁴மட்ட²க…பே॰… ந ஸக்காதி அயமத்தோ² மஹாஸுத³ஸ்ஸனவத்து²னா (தீ³॰ நி॰ 2.241 ஆத³யோ) தீ³பேதப்³போ³. மாதுகுச்சி² அஸம்பா³தோ⁴வ ஹோதீதி அயமத்தோ² அந்திமப⁴விகானங் மஹாபோ³தி⁴ஸத்தானங் படிஸந்தி⁴வஸேன தீ³பேதப்³போ³.
Mahantanti vipulaṃ uḷārapuññaṃ. Sabbadānaṃ dinnameva hotīti sabbameva paccayajātaṃ āvāsadāyakena dinnameva hoti. Tathā hi dve tayo gāme piṇḍāya caritvā kiñci aladdhā āgatassapi chāyūdakasampannaṃ ārāmaṃ pavisitvā nhāyitvā paṭissaye muhuttaṃ nipajjitvā uṭṭhāya nisinnassa kāye balaṃ āharitvā pakkhittaṃ viya hoti. Bahi vicarantassa ca kāye vaṇṇadhātu vātātapehi kilamati, paṭissayaṃ pavisitvā dvāraṃ pidhāya muhuttaṃ nisinnassa visabhāgasantati vūpasammati, sabhāgasantati patiṭṭhāti, vaṇṇadhātu āharitvā pakkhittā viya hoti, bahi vicarantassa ca pāde kaṇṭakā vijjhanti, khāṇu paharati, sarīsapādiparissayā ceva corabhayañca uppajjati, paṭissayaṃ pavisitvā dvāraṃ pidhāya nisinnassa pana sabbepete parissayā na honti. Sajjhāyantassa dhammapītisukhaṃ, kammaṭṭhānaṃ manasikarontassa upasamasukhaṃ uppajjati bahiddhā vikkhepābhāvato. Bahi vicarantassa ca kāye sedā muccanti, akkhīni phandanti, senāsanaṃ pavisanakkhaṇe mañcapīṭhādīni na paññāyanti, muhuttaṃ nisinnassa pana akkhipasādo āharitvā pakkhitto viya hoti, dvāravātapānamañcapīṭhādīni paññāyanti. Etasmiñca āvāse vasantaṃ disvā manussā catūhi paccayehi sakkaccaṃ upaṭṭhahanti. Tena vuttaṃ – ‘‘āvāsadānasmiñhi dinne sabbadānaṃ dinnameva hotī’’ti. Bhūmaṭṭhaka…pe… nasakkāti ayamattho mahāsudassanavatthunā (dī. ni. 2.241 ādayo) dīpetabbo. Mātukucchi asambādhova hotīti ayamattho antimabhavikānaṃ mahābodhisattānaṃ paṭisandhivasena dīpetabbo.
ஸீதந்தி அஜ்ஜ²த்தங் தா⁴துக்கோ²ப⁴வஸேன வா ப³ஹித்³தா⁴ உதுவிபரிணாமவஸேன வா உப்பஜ்ஜனகஸீதங். உண்ஹந்தி அக்³கி³ஸந்தாபங், தஸ்ஸ ச த³வதா³ஹாதீ³ஸு ஸம்ப⁴வோ த³ட்ட²ப்³போ³. படிஹந்தீதி படிஹனதி. யதா² தது³ப⁴யவஸேன காயசித்தானங் ஆபா³தோ⁴ ந ஹனதி, ஏவங் கரோதி. ஸீதுண்ஹப்³பா⁴ஹதே ஹி ஸரீரே விக்கி²த்தசித்தோ பி⁴க்கு² யோனிஸோ பத³ஹிதுங் ந ஸக்கோதி. வாளமிகா³னீதி ஸீஹப்³யக்³கா⁴தி³வாளமிகே³. கு³த்தஸேனாஸனஞ்ஹி பவிஸித்வா த்³வாரங் பிதா⁴ய நிஸின்னஸ்ஸ தே பரிஸ்ஸயா ந ஹொந்தி. ஸரீஸபேதி யே கேசி ஸரந்தா க³ச்ச²ந்தே தீ³க⁴ஜாதிகே ஸப்பாதி³கே அஞ்ஞே ச ததா²ரூபே. மகஸேதி நித³ஸ்ஸனமத்தமேதங், ட³ங்ஸாதீ³னங் ஏதேனேவ ஸங்க³ஹோ த³ட்ட²ப்³போ³. ஸிஸிரேதி ஸீதகாலவஸேன ஸத்தாஹவத்³த³லிகாதி³வஸேன ச உப்பன்னே ஸிஸிரஸம்ப²ஸ்ஸே. வுட்டி²யோதி யதா³ ததா³ உப்பன்னா வஸ்ஸவுட்டி²யோ படிஹனதீதி யோஜனா.
Sītanti ajjhattaṃ dhātukkhobhavasena vā bahiddhā utuvipariṇāmavasena vā uppajjanakasītaṃ. Uṇhanti aggisantāpaṃ, tassa ca davadāhādīsu sambhavo daṭṭhabbo. Paṭihantīti paṭihanati. Yathā tadubhayavasena kāyacittānaṃ ābādho na hanati, evaṃ karoti. Sītuṇhabbhāhate hi sarīre vikkhittacitto bhikkhu yoniso padahituṃ na sakkoti. Vāḷamigānīti sīhabyagghādivāḷamige. Guttasenāsanañhi pavisitvā dvāraṃ pidhāya nisinnassa te parissayā na honti. Sarīsapeti ye keci sarantā gacchante dīghajātike sappādike aññe ca tathārūpe. Makaseti nidassanamattametaṃ, ḍaṃsādīnaṃ eteneva saṅgaho daṭṭhabbo. Sisireti sītakālavasena sattāhavaddalikādivasena ca uppanne sisirasamphasse. Vuṭṭhiyoti yadā tadā uppannā vassavuṭṭhiyo paṭihanatīti yojanā.
வாதாதபோ கோ⁴ரோதி ருக்க²க³ச்சா²தீ³னங் உப்³ப³ஹனப⁴ஞ்ஜனாதி³வஸேன பவத்தியா கோ⁴ரோ ஸரஜஅரஜாதி³பே⁴தோ³ வாதோ சேவ கி³ம்ஹபரிளாஹஸமயேஸு உப்பத்தியா கோ⁴ரோ ஸூரியாதபோ ச. படிஹஞ்ஞதீதி படிபா³ஹீயதி. லேணத்த²ந்தி நானாரம்மணதோ சித்தங் நிவத்தித்வா படிஸல்லாணாராமத்த²ங். ஸுக²த்த²ந்தி வுத்தபரிஸ்ஸயாபா⁴வேன பா²ஸுவிஹாரத்த²ங். ஜா²யிதுந்தி அட்ட²திங்ஸாய ஆரம்மணேஸு யத்த² கத்த²சி சித்தங் உபனிப³ந்தி⁴த்வா ஸமாத³ஹனவஸேன ஜா²யிதுங். விபஸ்ஸிதுந்தி அனிச்சாதி³வஸேன ஸங்கா²ரே ஸம்மஸிதுங்.
Vātātapo ghoroti rukkhagacchādīnaṃ ubbahanabhañjanādivasena pavattiyā ghoro sarajaarajādibhedo vāto ceva gimhapariḷāhasamayesu uppattiyā ghoro sūriyātapo ca. Paṭihaññatīti paṭibāhīyati. Leṇatthanti nānārammaṇato cittaṃ nivattitvā paṭisallāṇārāmatthaṃ. Sukhatthanti vuttaparissayābhāvena phāsuvihāratthaṃ. Jhāyitunti aṭṭhatiṃsāya ārammaṇesu yattha katthaci cittaṃ upanibandhitvā samādahanavasena jhāyituṃ. Vipassitunti aniccādivasena saṅkhāre sammasituṃ.
விஹாரேதி படிஸ்ஸயே. காரயேதி காராபெய்ய. ரம்மேதி மனோரமே. வாஸயெத்த² ப³ஹுஸ்ஸுதேதி காரெத்வா பன எத்த² விஹாரேஸு ப³ஹுஸ்ஸுதே ஸீலவந்தே கல்யாணத⁴ம்மே நிவாஸெய்ய. தே நிவாஸெந்தோ பன தேஸங் ப³ஹுஸ்ஸுதானங் யதா² பச்சயேஹி கிலமதோ² ந ஹோதி. ஏவங் அன்னஞ்ச பானஞ்ச வத்த²ஸேனாஸனானி ச த³தெ³ய்ய உஜுபூ⁴தேஸு அஜ்ஜா²ஸயஸம்பன்னேஸு கம்மப²லானங் ரதனத்தயகு³ணானஞ்ச ஸத்³த³ஹனேன விப்பஸன்னேன சேதஸா. இதா³னி க³ஹட்ட²பப்³ப³ஜிதானங் அஞ்ஞமஞ்ஞூபகாரதங் த³ஸ்ஸேதுங் ‘‘தே தஸ்ஸா’’தி கா³த²மாஹ. தத்த² தேதி ப³ஹுஸ்ஸுதா. தஸ்ஸாதி உபாஸகஸ்ஸ. த⁴ம்மங் தே³ஸெந்தீதி ஸகலவட்டது³க்க²பனூத³னங் நிய்யானிகங் த⁴ம்மங் கதெ²ந்தி. யங் ஸோ த⁴ம்மங் இத⁴ஞ்ஞாயாதி ஸோ புக்³க³லோ யங் ஸத்³த⁴ம்மங் இமஸ்மிங் ஸாஸனே ஸம்மாபடிபஜ்ஜனேன ஜானித்வா அக்³க³மக்³கா³தி⁴க³மேன அனாஸவோ ஹுத்வா பரினிப்³பா³யதி.
Vihāreti paṭissaye. Kārayeti kārāpeyya. Rammeti manorame. Vāsayettha bahussuteti kāretvā pana ettha vihāresu bahussute sīlavante kalyāṇadhamme nivāseyya. Te nivāsento pana tesaṃ bahussutānaṃ yathā paccayehi kilamatho na hoti. Evaṃ annañca pānañca vatthasenāsanāni ca dadeyya ujubhūtesu ajjhāsayasampannesu kammaphalānaṃ ratanattayaguṇānañca saddahanena vippasannena cetasā. Idāni gahaṭṭhapabbajitānaṃ aññamaññūpakārataṃ dassetuṃ ‘‘te tassā’’ti gāthamāha. Tattha teti bahussutā. Tassāti upāsakassa. Dhammaṃ desentīti sakalavaṭṭadukkhapanūdanaṃ niyyānikaṃ dhammaṃ kathenti. Yaṃ so dhammaṃ idhaññāyāti so puggalo yaṃ saddhammaṃ imasmiṃ sāsane sammāpaṭipajjanena jānitvā aggamaggādhigamena anāsavo hutvā parinibbāyati.
ஆவாஸேதி ஆவாஸதா³னே. ஆனிஸங்ஸோதி உத்³ரயோ. பூஜாஸக்காரவஸேன பட²மயாமோ கே²பிதோ, ஸத்து² த⁴ம்மதே³ஸனாய அப்பாவஸேஸோ மஜ்ஜி²மயாமோ க³தோதி பாளியங் ‘‘ப³ஹுதே³வ ரத்தி’’ந்தி வுத்தந்தி ஆஹ ‘‘அதிரேகதரங் தி³யட்³ட⁴யாம’’ந்தி. ஸங்க³ஹங் நாரோஹதி விபுலவித்தா²ரபா⁴வதோ. பு³த்³தா⁴னஞ்ஹி ப⁴த்தானுமோத³னாபி தோ²கங் வட்³டெ⁴த்வா வுச்சமானா தீ³க⁴மஜ்ஜி²மபமாணாபி ஹோதி. ததா² ஹி ஸுபு²ஸிதங் த³ந்தாவரணங், ஜிவ்ஹா தனுகா, ப⁴வங்க³பரிவாஸோ பரித்தோ, நத்தி² வேகா³யிதங், நத்தி² வித்தா²யிதங், நத்தி² அப்³யாவடமனோ, ஸப்³ப³ஞ்ஞுதஞ்ஞாணங் ஸமுபப்³யூள்ஹங், அபரிக்க²யா படிஸம்பி⁴தா³.
Āvāseti āvāsadāne. Ānisaṃsoti udrayo. Pūjāsakkāravasena paṭhamayāmo khepito, satthu dhammadesanāya appāvaseso majjhimayāmo gatoti pāḷiyaṃ ‘‘bahudeva ratti’’nti vuttanti āha ‘‘atirekataraṃ diyaḍḍhayāma’’nti. Saṅgahaṃ nārohati vipulavitthārabhāvato. Buddhānañhi bhattānumodanāpi thokaṃ vaḍḍhetvā vuccamānā dīghamajjhimapamāṇāpi hoti. Tathā hi suphusitaṃ dantāvaraṇaṃ, jivhā tanukā, bhavaṅgaparivāso paritto, natthi vegāyitaṃ, natthi vitthāyitaṃ, natthi abyāvaṭamano, sabbaññutaññāṇaṃ samupabyūḷhaṃ, aparikkhayā paṭisambhidā.
ஸந்த³ஸ்ஸெத்வாதிஆதீ³ஸு ஸந்த³ஸ்ஸெத்வா ஆவாஸதா³னபடிஸங்யுத்தங் த⁴ம்மிங் கத²ங் கத்வா. ததோ பரங், மஹாராஜ, இதிபி ஸீலங், இதிபி ஸமாதி⁴, இதிபி பஞ்ஞாதி ஸீலாதி³கு³ணே தேஸங் ஸம்மா த³ஸ்ஸெத்வா ஹத்தே²ன க³ஹெத்வா விய பச்சக்க²தோ பகாஸெத்வா. ஸமாத³பெத்வாதி ஏவங் ஸீலங் ஸமாதா³தப்³ப³ங், ஸீலே பதிட்டி²தேன ஏவங் ஸமாதி⁴பஞ்ஞா பா⁴வேதப்³பா³தி யதா² தே ஸீலாதி³கு³ணே ஸம்மா ஆதி³யந்தி, ததா² க³ண்ஹாபெத்வா. ஸமுத்தேஜெத்வாதி யதா²ஸமாதி³ன்னங் ஸீலங் ஸுவிஸுத்³த⁴ங் ஹோதி, ஸமத²விபஸ்ஸனா ச பா⁴வியமானா யதா² ஸுட்டு² விஸோதி⁴தா உபரூபரி விஸேஸாவஹா ஹொந்தி, ஏவங் ஸமுத்தேஜெத்வா நிஸாமனவஸேன வோதா³பெத்வா. ஸம்பஹங்ஸெத்வாதி யதா²னுஸிட்ட²ங் டி²தஸீலாதி³கு³ணேஹி ஸம்பதி படிலத்³த⁴கு³ணானிஸங்ஸேஹி சேவ உபரிலத்³த⁴ப்³ப³ப²லவிஸேஸேஹி ச சித்தங் ஸம்பஹங்ஸெத்வா லத்³த⁴ஸ்ஸாஸவஸேன ஸுட்டு² தோஸெத்வா. ஏவமேதேஸங் பதா³னங் அத்தோ² வேதி³தப்³போ³. ஸக்யராஜானோ யேபு⁴ய்யேன ப⁴க³வதோ த⁴ம்மதே³ஸனாய ஸாஸனே லத்³த⁴ஸ்ஸாதா³ லத்³த⁴ப்பதிட்டா² ச.
Sandassetvātiādīsu sandassetvā āvāsadānapaṭisaṃyuttaṃ dhammiṃ kathaṃ katvā. Tato paraṃ, mahārāja, itipi sīlaṃ, itipi samādhi, itipi paññāti sīlādiguṇe tesaṃ sammā dassetvā hatthena gahetvā viya paccakkhato pakāsetvā. Samādapetvāti evaṃ sīlaṃ samādātabbaṃ, sīle patiṭṭhitena evaṃ samādhipaññā bhāvetabbāti yathā te sīlādiguṇe sammā ādiyanti, tathā gaṇhāpetvā. Samuttejetvāti yathāsamādinnaṃ sīlaṃ suvisuddhaṃ hoti, samathavipassanā ca bhāviyamānā yathā suṭṭhu visodhitā uparūpari visesāvahā honti, evaṃ samuttejetvā nisāmanavasena vodāpetvā. Sampahaṃsetvāti yathānusiṭṭhaṃ ṭhitasīlādiguṇehi sampati paṭiladdhaguṇānisaṃsehi ceva upariladdhabbaphalavisesehi ca cittaṃ sampahaṃsetvā laddhassāsavasena suṭṭhu tosetvā. Evametesaṃ padānaṃ attho veditabbo. Sakyarājāno yebhuyyena bhagavato dhammadesanāya sāsane laddhassādā laddhappatiṭṭhā ca.
உபஸக்³க³ஸத்³தா³னங் அனேகத்த²த்தா அபி⁴-ஸத்³தோ³ அதி-ஸத்³தே³ன ஸமானத்தோ²பி ஹோதீதி வுத்தங் ‘‘அபி⁴க்கந்தாதி அதிக்கந்தா’’தி.
Upasaggasaddānaṃ anekatthattā abhi-saddo ati-saddena samānatthopi hotīti vuttaṃ ‘‘abhikkantāti atikkantā’’ti.
தத்ர கிராதிஆதி³ கேசிவாதோ³தி ப³த்³தோ⁴பி ந ஹோதி. தேனாஹ ‘‘அகாரணமேத’’ந்திஆதி³. காயசித்தலஹுதாத³யோ உப்பஜ்ஜந்தீதி இத³ங் காயிகசேதஸிகஅஞ்ஞதா²பா⁴வஸ்ஸ காரணவசனங், லஹுதாதி³உப்பன்னே ஸவனானுத்தரியபடிலாபே⁴ன லத்³த⁴ப்³ப³த⁴ம்மத்த²வேத³ஸமதி⁴க³மதோ. வுத்தஞ்ஹேதங் –
Tatra kirātiādi kecivādoti baddhopi na hoti. Tenāha ‘‘akāraṇameta’’ntiādi. Kāyacittalahutādayo uppajjantīti idaṃ kāyikacetasikaaññathābhāvassa kāraṇavacanaṃ, lahutādiuppanne savanānuttariyapaṭilābhena laddhabbadhammatthavedasamadhigamato. Vuttañhetaṃ –
‘‘யதா² , யதா²வுஸோ, பி⁴க்கு²னோ ஸத்தா² வா த⁴ம்மங் தே³ஸேதி அஞ்ஞதரோ வா க³ருட்டா²னிகோ ஸப்³ரஹ்மசாரீ, ததா² ததா² ஸோ தஸ்மிங் த⁴ம்மே லப⁴தி அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங் பாமோஜ்ஜ’’ந்திஆதி³ (தீ³॰ நி॰ 3.322, 355; அ॰ நி॰ 5.26).
‘‘Yathā , yathāvuso, bhikkhuno satthā vā dhammaṃ deseti aññataro vā garuṭṭhāniko sabrahmacārī, tathā tathā so tasmiṃ dhamme labhati atthavedaṃ, labhati dhammavedaṃ, labhati dhammūpasaṃhitaṃ pāmojja’’ntiādi (dī. ni. 3.322, 355; a. ni. 5.26).
பிட்டி²வாதோ உப்பஜ்ஜி உபாதி³ன்னஸரீரஸ்ஸ ததா²ரூபத்தா ஸங்கா²ரானஞ்ச அனிச்சதாய து³க்கா²னுப³ந்த⁴த்தா. அகாரணங் வா ஏதந்தி யேனாதி⁴ப்பாயேன வுத்தங், தமேவ அதி⁴ப்பாயங் விவரிதுங் ‘‘பஹோதீ’’திஆதி³ வுத்தங். ஏகபல்லங்கேன நிஸீதி³துங் பஹோதி யதா² தங் வேலுவகா³மகே. எத்தகே டா²னேதி எத்தகே டா²னே டா²னங் நிப்ப²ன்னந்தி யோஜனா. தஞ்ச கோ²தி வுட்டா²னஸஞ்ஞங் சித்தே ட²பனங். த⁴ம்மகத²ங் ஸுணமானோ த⁴ம்மகா³ரவேன.
Piṭṭhivāto uppajji upādinnasarīrassa tathārūpattā saṅkhārānañca aniccatāya dukkhānubandhattā. Akāraṇaṃ vā etanti yenādhippāyena vuttaṃ, tameva adhippāyaṃ vivarituṃ ‘‘pahotī’’tiādi vuttaṃ. Ekapallaṅkena nisīdituṃ pahoti yathā taṃ veluvagāmake. Ettake ṭhāneti ettake ṭhāne ṭhānaṃ nipphannanti yojanā. Tañca khoti vuṭṭhānasaññaṃ citte ṭhapanaṃ. Dhammakathaṃ suṇamāno dhammagāravena.
அவஸ்ஸுதஸ்ஸாதி அவஸ்ஸுதபா⁴வஸ்ஸ ராகா³தி³வஸேன. அவஸ்ஸுதஸ்ஸ காரணந்தி திந்தபா⁴வகாரணங். கிலேஸாதி⁴முச்சனேனாதி கிலேஸவஸேன பரிப்ப²ந்தி³தவஸேன. நிப்³பா³பனங் வியாதி வூபஸமோ விய. நிப்³பி³ஸேவனானந்தி பரிப்ப²ந்த³னரஹிதானங்.
Avassutassāti avassutabhāvassa rāgādivasena. Avassutassa kāraṇanti tintabhāvakāraṇaṃ. Kilesādhimuccanenāti kilesavasena paripphanditavasena. Nibbāpanaṃ viyāti vūpasamo viya. Nibbisevanānanti paripphandanarahitānaṃ.
அவஸ்ஸுதபரியாயஸுத்தவண்ணனா நிட்டி²தா.
Avassutapariyāyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. அவஸ்ஸுதபரியாயஸுத்தங் • 6. Avassutapariyāyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. அவஸ்ஸுதபரியாயஸுத்தவண்ணனா • 6. Avassutapariyāyasuttavaṇṇanā
