| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
4. அவிஜ்ஜானீவரணஸுத்தவண்ணனா
4. Avijjānīvaraṇasuttavaṇṇanā
14. சதுத்தே² – ‘‘நாஹங், பி⁴க்க²வே’’திஆதீ³ஸு ந-காரோ படிஸேத⁴த்தோ². அஹந்தி ப⁴க³வா அத்தானங் நித்³தி³ஸதி. அஞ்ஞந்தி இதா³னி வத்தப்³ப³அவிஜ்ஜானீவரணதோ அஞ்ஞங். ஏகனீவரணம்பீதி ஏகனீவரணத⁴ம்மம்பி. ஸமனுபஸ்ஸாமீதி த்³வே ஸமனுபஸ்ஸனா – தி³ட்டி²ஸமனுபஸ்ஸனா ச ஞாணஸமனுபஸ்ஸனா ச. தத்த² ‘‘ரூபங் அத்ததோ ஸமனுபஸ்ஸதீ’’திஆதி³னா (அ॰ நி॰ 4.200; படி॰ ம॰ 1.130) ஆக³தா அயங் தி³ட்டி²ஸமனுபஸ்ஸனா நாம. ‘‘அனிச்சதோ ஸமனுபஸ்ஸதி, நோ நிச்சதோ’’திஆதி³னா (படி॰ ம॰ 3.35) பன ஆக³தா அயங் ஞாணஸமனுபஸ்ஸனா நாம. இதா⁴பி ஞாணஸமனுபஸ்ஸனாவ அதி⁴ப்பேதா. ‘‘ஸமனுபஸ்ஸாமீ’’தி ச பத³ஸ்ஸ ந-காரேன ஸம்ப³ந்தோ⁴. இத³ங் வுத்தங் ஹோதி – ‘‘அஹங், பி⁴க்க²வே, ஸப்³ப³ஞ்ஞுதஞ்ஞாணஸங்கா²தேன ஸமந்தசக்கு²னா ஸப்³ப³த⁴ம்மே ஹத்தா²மலகங் விய ஓலோகெந்தோபி அஞ்ஞங் ஏகனீவரணம்பி ந ஸமனுபஸ்ஸாமீ’’தி.
14. Catutthe – ‘‘nāhaṃ, bhikkhave’’tiādīsu na-kāro paṭisedhattho. Ahanti bhagavā attānaṃ niddisati. Aññanti idāni vattabbaavijjānīvaraṇato aññaṃ. Ekanīvaraṇampīti ekanīvaraṇadhammampi. Samanupassāmīti dve samanupassanā – diṭṭhisamanupassanā ca ñāṇasamanupassanā ca. Tattha ‘‘rūpaṃ attato samanupassatī’’tiādinā (a. ni. 4.200; paṭi. ma. 1.130) āgatā ayaṃ diṭṭhisamanupassanā nāma. ‘‘Aniccato samanupassati, no niccato’’tiādinā (paṭi. ma. 3.35) pana āgatā ayaṃ ñāṇasamanupassanā nāma. Idhāpi ñāṇasamanupassanāva adhippetā. ‘‘Samanupassāmī’’ti ca padassa na-kārena sambandho. Idaṃ vuttaṃ hoti – ‘‘ahaṃ, bhikkhave, sabbaññutaññāṇasaṅkhātena samantacakkhunā sabbadhamme hatthāmalakaṃ viya olokentopi aññaṃ ekanīvaraṇampi na samanupassāmī’’ti.
யேன நீவரணேன நிவுதா பஜா தீ³க⁴ரத்தங் ஸந்தா⁴வந்தி ஸங்ஸரந்தீதி யேன நீவரணகஸபா⁴வத்தா நீவரணேன த⁴ம்மஸபா⁴வங் ஜானிதுங் பஸ்ஸிதுங் படிவிஜ்ஜி²துங் அத³த்வா சா²தெ³த்வா பரியோனந்தி⁴த்வா டா²னேன அந்த⁴காரேன நிவுதா ஸத்தா அனாதி³மதஸங்ஸாரே அபரிமாணே கப்பே மஹந்தேஸு சேவ கு²த்³த³கேஸு ச ப⁴வாதீ³ஸு அபராபருப்பத்திவஸேன ஸப்³ப³தோ தா⁴வந்தி சேவ ஸங்ஸரந்தி, ச. ஆரம்மணந்தரஸங்கமனவஸேன வா ஸந்தா⁴வனங், ப⁴வந்தரஸங்கமனவஸேன ஸங்ஸரணங். கிலேஸானங் ப³லவபா⁴வேன வா ஸந்தா⁴வனங், து³ப்³ப³லபா⁴வேன ஸங்ஸரணங். க²ணிகமரணவஸேன வா ஏகஜாதியங் ஸந்தா⁴வனங், வோஹாரமரணவஸேன அனேகாஸு ஜாதீஸு ஸங்ஸரணங். சித்தவஸேன வா ஸந்தா⁴வனங், ‘‘சித்தமஸ்ஸ விதா⁴வதீ’’தி ஹி வுத்தங், கம்மவஸேன ஸங்ஸரணங். ஏவங் ஸந்தா⁴வனஸங்ஸரணானங் விஸேஸோ வேதி³தப்³போ³.
Yena nīvaraṇena nivutā pajā dīgharattaṃ sandhāvanti saṃsarantīti yena nīvaraṇakasabhāvattā nīvaraṇena dhammasabhāvaṃ jānituṃ passituṃ paṭivijjhituṃ adatvā chādetvā pariyonandhitvā ṭhānena andhakārena nivutā sattā anādimatasaṃsāre aparimāṇe kappe mahantesu ceva khuddakesu ca bhavādīsu aparāparuppattivasena sabbato dhāvanti ceva saṃsaranti, ca. Ārammaṇantarasaṅkamanavasena vā sandhāvanaṃ, bhavantarasaṅkamanavasena saṃsaraṇaṃ. Kilesānaṃ balavabhāvena vā sandhāvanaṃ, dubbalabhāvena saṃsaraṇaṃ. Khaṇikamaraṇavasena vā ekajātiyaṃ sandhāvanaṃ, vohāramaraṇavasena anekāsu jātīsu saṃsaraṇaṃ. Cittavasena vā sandhāvanaṃ, ‘‘cittamassa vidhāvatī’’ti hi vuttaṃ, kammavasena saṃsaraṇaṃ. Evaṃ sandhāvanasaṃsaraṇānaṃ viseso veditabbo.
யத²யித³ந்தி யதா² இத³ங். ய-காரோ பத³ஸந்தி⁴கரோ, ஸந்தி⁴வஸேன ரஸ்ஸத்தங். அவிஜ்ஜானீவரணந்தி எத்த² பூரேதுங் அயுத்தட்டே²ன காயது³ச்சரிதாதி³ அவிந்தி³யங் நாம, அலத்³த⁴ப்³ப³ந்தி அத்தோ². தங் அவிந்தி³யங் விந்த³தீதி அவிஜ்ஜா. விபரீததோ காயஸுசரிதாதி³ விந்தி³யங் நாம, தங் விந்தி³யங் ந விந்த³தீதி அவிஜ்ஜா. க²ந்தா⁴னங் ராஸட்ட²ங், ஆயதனானங் ஆயதனட்ட²ங், தா⁴தூனங் ஸுஞ்ஞட்ட²ங், இந்த்³ரியானங் ஆதி⁴பதெய்யட்ட²ங், ஸச்சானங் தத²ட்ட²ங் து³க்கா²தீ³னங் பீளனாதி³வஸேன வுத்தங் சதுப்³பி³த⁴ங் அத்த²ங் அவிதி³தங் கரோதீதிபி அவிஜ்ஜா. அந்தவிரஹிதே ஸங்ஸாரே ஸத்தே ஜவாபேதீதி வா அவிஜ்ஜா, பரமத்த²தோ வா அவிஜ்ஜமானேஸு இத்தி²புரிஸாதீ³ஸு ஜவதி பவத்ததி, விஜ்ஜமானேஸு க²ந்தா⁴தீ³ஸு ந ஜவதி, ந பவத்ததீதி அவிஜ்ஜா. அபிச சக்கு²விஞ்ஞாணாதீ³னங் வத்தா²ரம்மணானங் படிச்சஸமுப்பாத³படிச்சஸமுப்பன்னானஞ்ச த⁴ம்மானங் சா²த³னதோபி அவிஜ்ஜா. அவிஜ்ஜாவ நீவரணந்தி அவிஜ்ஜானீவரணங்.
Yathayidanti yathā idaṃ. Ya-kāro padasandhikaro, sandhivasena rassattaṃ. Avijjānīvaraṇanti ettha pūretuṃ ayuttaṭṭhena kāyaduccaritādi avindiyaṃ nāma, aladdhabbanti attho. Taṃ avindiyaṃ vindatīti avijjā. Viparītato kāyasucaritādi vindiyaṃ nāma, taṃ vindiyaṃ na vindatīti avijjā. Khandhānaṃ rāsaṭṭhaṃ, āyatanānaṃ āyatanaṭṭhaṃ, dhātūnaṃ suññaṭṭhaṃ, indriyānaṃ ādhipateyyaṭṭhaṃ, saccānaṃ tathaṭṭhaṃ dukkhādīnaṃ pīḷanādivasena vuttaṃ catubbidhaṃ atthaṃ aviditaṃ karotītipi avijjā. Antavirahite saṃsāre satte javāpetīti vā avijjā, paramatthato vā avijjamānesu itthipurisādīsu javati pavattati, vijjamānesu khandhādīsu na javati, na pavattatīti avijjā. Apica cakkhuviññāṇādīnaṃ vatthārammaṇānaṃ paṭiccasamuppādapaṭiccasamuppannānañca dhammānaṃ chādanatopi avijjā. Avijjāva nīvaraṇanti avijjānīvaraṇaṃ.
அவிஜ்ஜானீவரணேன ஹி, பி⁴க்க²வே, நிவுதா பஜா தீ³க⁴ரத்தங் ஸந்தா⁴வந்தி ஸங்ஸரந்தீதி இத³ங் புரிமஸ்ஸேவ த³ள்ஹீகரணத்த²ங் வுத்தங். புரிமங் வா – ‘‘யத²யித³ங், பி⁴க்க²வே, அவிஜ்ஜானீவரண’’ந்தி ஏவங் ஓபம்மத³ஸ்ஸனவஸேன வுத்தங், இத³ங் நீவரணானுபா⁴வத³ஸ்ஸனவஸேன. கஸ்மா பனெத்த² அவிஜ்ஜாவ ஏவங் வுத்தா, ந அஞ்ஞே த⁴ம்மாதி? ஆதீ³னவபடிச்சா²த³னேன காமச்ச²ந்தா³தீ³னங் விஸேஸப்பச்சயபா⁴வதோ. ததா² ஹி தாய படிச்சா²தி³தாதீ³னவே விஸயே காமச்ச²ந்தா³த³யோ பவத்தந்தி.
Avijjānīvaraṇena hi, bhikkhave, nivutā pajā dīgharattaṃ sandhāvanti saṃsarantīti idaṃ purimasseva daḷhīkaraṇatthaṃ vuttaṃ. Purimaṃ vā – ‘‘yathayidaṃ, bhikkhave, avijjānīvaraṇa’’nti evaṃ opammadassanavasena vuttaṃ, idaṃ nīvaraṇānubhāvadassanavasena. Kasmā panettha avijjāva evaṃ vuttā, na aññe dhammāti? Ādīnavapaṭicchādanena kāmacchandādīnaṃ visesappaccayabhāvato. Tathā hi tāya paṭicchāditādīnave visaye kāmacchandādayo pavattanti.
நத்த²ஞ்ஞோதி ஆதி³கா கா³தா² வுத்தஸ்ஸ அவுத்தஸ்ஸ ச அத்த²ஸ்ஸ ஸங்க³ண்ஹனவஸேன பா⁴ஸிதா. தத்த² நிவுதாதி நிவாரிதா பலிகு³ண்டி²தா, படிச்சா²தி³தாதி அத்தோ². அஹோரத்தந்தி தி³வா சேவ ரத்திஞ்ச, ஸப்³ப³காலந்தி வுத்தங் ஹோதி. யதா² மோஹேன ஆவுதாதி யேன பகாரேன அவிஜ்ஜானீவரணஸங்கா²தேன மோஹேன ஆவுதா படிச்சா²தி³தா ஸுவிஞ்ஞெய்யம்பி அஜானந்தியோ பஜா ஸங்ஸாரே ஸங்ஸரந்தி, ததா²ரூபோ அஞ்ஞோ ஏகத⁴ம்மோபி ஏகனீவரணம்பி நத்தீ²தி யோஜேதப்³ப³ங். யே ச மோஹங் பஹந்த்வான, தமோக²ந்த⁴ங் பதா³லயுந்தி யே பன அரியஸாவகா புப்³ப³பா⁴கே³ தத³ங்கா³தி³ப்பஹானவஸேன, ஹெட்டி²மமக்³கே³ஹி வா தங்தங்மக்³க³வஜ்ஜ²ங் மோஹங் பஜஹித்வா அக்³க³மக்³கே³ன வஜிரூபமஞாணேன மோஹஸங்கா²தமேவ தமோராஸிங் பதா³லயிங்ஸு, அனவஸேஸதோ ஸமுச்சி²ந்தி³ங்ஸு. ந தே புன ஸங்ஸரந்தீதி தே அரஹந்தோ –
Natthaññoti ādikā gāthā vuttassa avuttassa ca atthassa saṅgaṇhanavasena bhāsitā. Tattha nivutāti nivāritā paliguṇṭhitā, paṭicchāditāti attho. Ahorattanti divā ceva rattiñca, sabbakālanti vuttaṃ hoti. Yathāmohena āvutāti yena pakārena avijjānīvaraṇasaṅkhātena mohena āvutā paṭicchāditā suviññeyyampi ajānantiyo pajā saṃsāre saṃsaranti, tathārūpo añño ekadhammopi ekanīvaraṇampi natthīti yojetabbaṃ. Ye ca mohaṃ pahantvāna, tamokhandhaṃ padālayunti ye pana ariyasāvakā pubbabhāge tadaṅgādippahānavasena, heṭṭhimamaggehi vā taṃtaṃmaggavajjhaṃ mohaṃ pajahitvā aggamaggena vajirūpamañāṇena mohasaṅkhātameva tamorāsiṃ padālayiṃsu, anavasesato samucchindiṃsu. Na te puna saṃsarantīti te arahanto –
‘‘க²ந்தா⁴னஞ்ச படிபாடி, தா⁴துஆயதனான ச;
‘‘Khandhānañca paṭipāṭi, dhātuāyatanāna ca;
அப்³பொ³ச்சி²ன்னங் வத்தமானா, ஸங்ஸாரோதி பவுச்சதீ’’தி. –
Abbocchinnaṃ vattamānā, saṃsāroti pavuccatī’’ti. –
ஏவங் வுத்தே இமஸ்மிங் ஸங்ஸாரே ந ஸங்ஸரந்தி ந பரிப்³ப⁴மந்தி. கிங் காரணா? ஹேது தேஸங் ந விஜ்ஜதி , யஸ்மா ஸங்ஸாரஸ்ஸ ஹேது மூலகாரணங் அவிஜ்ஜா, ஸா தேஸங் ந விஜ்ஜதி, ஸப்³ப³ஸோ நத்தி² ஸமுச்சி²ன்னத்தாதி.
Evaṃ vutte imasmiṃ saṃsāre na saṃsaranti na paribbhamanti. Kiṃ kāraṇā? Hetu tesaṃ na vijjati, yasmā saṃsārassa hetu mūlakāraṇaṃ avijjā, sā tesaṃ na vijjati, sabbaso natthi samucchinnattāti.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 4. அவிஜ்ஜானீவரணஸுத்தங் • 4. Avijjānīvaraṇasuttaṃ
