| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
ஸங்யுத்தனிகாயே
Saṃyuttanikāye
மஹாவக்³க³டீகா
Mahāvaggaṭīkā
1. மக்³க³ஸங்யுத்தங்
1. Maggasaṃyuttaṃ
1. அவிஜ்ஜாவக்³கோ³
1. Avijjāvaggo
1-2. அவிஜ்ஜாஸுத்தாதி³வண்ணனா
1-2. Avijjāsuttādivaṇṇanā
1-2. புப்³ப³ங்க³மாதி புப்³பே³சரா. அவிஜ்ஜா ஹி அஞ்ஞாணலக்க²ணா ஸம்முய்ஹனாகாரேன ஆரம்மணே பவத்ததீதி ஸம்பயுத்தத⁴ம்மானம்பி ததா³காரானுவிதா⁴னதாய பச்சயோ ஹோதி. ததா² ஹி தே அனிச்சாஸுப⁴து³க்கா²னத்தஸபா⁴வேபி த⁴ம்மே நிச்சாதி³தோ க³ண்ஹந்தி, அயமஸ்ஸா தேஸங் ஸஹஜாதவஸேன புப்³ப³ங்க³மதா. யங் பன மோஹேன அபி⁴பூ⁴தோ பாபகிரியாய ஆதீ³னவங் அபஸ்ஸந்தோ பாணங் ஹனதி, அதி³ன்னங் ஆதி³யதி, காமேஸு மிச்சா² சரதி, முஸா ப⁴ணதி, அஞ்ஞம்பி விவித⁴ங் து³ஸ்ஸீல்யங் ஆசரதி, அயமஸ்ஸ ஸஹஜாதவஸேன ச உபனிஸ்ஸயவஸேன ச புப்³ப³ங்க³மதா. ஸமாபஜ்ஜனாயாதி தப்³பா⁴வாபஜ்ஜனாய அகுஸலப்பத்தியா. ஸபா⁴வபடிலாபா⁴யாதி அத்தலாபா⁴ய. தேனாஹ ‘‘உப்பத்தியா’’தி. ஸா பனேஸா வுத்தாகாரேன அகுஸலானங் புப்³ப³ங்க³மபூ⁴தா அவிஜ்ஜா உப்பஜ்ஜதீதி ஸம்ப³ந்தோ⁴. யதே³தந்தி யங் ஏதங் பாபாஜிகு³ச்ச²னதாய பாபதோ அலஜ்ஜனாகாரஸண்டி²தங் அஹிரிகங், பாபானுத்ராஸதாய பாபதோ அபா⁴யனாகாரஸண்டி²தஞ்ச அனொத்தப்பங், ஏதங் த்³வயங் அனுதே³வ அன்வாக³தமேவ. அனு-ஸத்³தே³ன செத்த² ஏதந்தி உபயோக³வசனங். அனுதே³வாதி ஏதஸ்ஸ அத்தோ² ஸஹேவ ஏகதோதி. எத்த² அவிஜ்ஜாய வுத்தனயானுஸாரேன தப்படிபக்க²தோ ச அத்தோ² வேதி³தப்³போ³. அயங் பன விஸேஸோ – தத்த² யதா² அகுஸலகம்மபத²வஸேன பவத்தியங் புப்³ப³ங்க³மதா அவிஜ்ஜாய, ஏவங் குஸலகம்மபத²வஸேன புஞ்ஞகிரியவத்து²வஸேன ச பவத்தியங் விஜ்ஜாய புப்³ப³ங்க³மதா வத்தப்³பா³. வீமங்ஸாதி⁴பதிவஸேன பவத்தியங் ஆதி⁴பச்சாகாரவஸேன ச புப்³ப³ங்க³மதா வேதி³தப்³பா³. த்³வீஹேவாதி ச அவதா⁴ரணங் ஆதி⁴பச்சாகாரஸ்ஸ ஸஹஜாதேனேவ ஸங்க³ஹேதப்³ப³தோ.
1-2.Pubbaṅgamāti pubbecarā. Avijjā hi aññāṇalakkhaṇā sammuyhanākārena ārammaṇe pavattatīti sampayuttadhammānampi tadākārānuvidhānatāya paccayo hoti. Tathā hi te aniccāsubhadukkhānattasabhāvepi dhamme niccādito gaṇhanti, ayamassā tesaṃ sahajātavasena pubbaṅgamatā. Yaṃ pana mohena abhibhūto pāpakiriyāya ādīnavaṃ apassanto pāṇaṃ hanati, adinnaṃ ādiyati, kāmesu micchā carati, musā bhaṇati, aññampi vividhaṃ dussīlyaṃ ācarati, ayamassa sahajātavasena ca upanissayavasena ca pubbaṅgamatā. Samāpajjanāyāti tabbhāvāpajjanāya akusalappattiyā. Sabhāvapaṭilābhāyāti attalābhāya. Tenāha ‘‘uppattiyā’’ti. Sā panesā vuttākārena akusalānaṃ pubbaṅgamabhūtā avijjā uppajjatīti sambandho. Yadetanti yaṃ etaṃ pāpājigucchanatāya pāpato alajjanākārasaṇṭhitaṃ ahirikaṃ, pāpānutrāsatāya pāpato abhāyanākārasaṇṭhitañca anottappaṃ, etaṃ dvayaṃ anudeva anvāgatameva. Anu-saddena cettha etanti upayogavacanaṃ. Anudevāti etassa attho saheva ekatoti. Ettha avijjāya vuttanayānusārena tappaṭipakkhato ca attho veditabbo. Ayaṃ pana viseso – tattha yathā akusalakammapathavasena pavattiyaṃ pubbaṅgamatā avijjāya, evaṃ kusalakammapathavasena puññakiriyavatthuvasena ca pavattiyaṃ vijjāya pubbaṅgamatā vattabbā. Vīmaṃsādhipativasena pavattiyaṃ ādhipaccākāravasena ca pubbaṅgamatā veditabbā. Dvīhevāti ca avadhāraṇaṃ ādhipaccākārassa sahajāteneva saṅgahetabbato.
லஜ்ஜனாகாரஸண்டி²தாதி பாபதோ ஜிகு³ச்ச²னாகாரஸண்டி²தா. பா⁴யனாகாரஸண்டி²தந்தி உத்தஸனாகாரஸண்டி²தங். எத்தா²தி ஹிரிஒத்தப்பே. வித³தி, விந்த³தீதி வா விஜ்ஜா. வித்³த³ஸூதி ச ஸப்பஞ்ஞபரியாயோதி ஆஹ ‘‘வித்³த³ஸுனோதி விது³னோ’’தி. யாதா²வதி³ட்டீ²தி அவிபரீதா தி³ட்டி², ஸங்கிலேஸதோ நிய்யானிகதி³ட்டி². ஸம்மாதி³ட்டி² பஹோதீதி எத்த² ஸா விஜ்ஜா ஸம்மாதி³ட்டி² வேதி³தப்³பா³. ந ஏகதோ ஸப்³பா³னி லப்³ப⁴ந்தி ஸம்மாவாசாகம்மந்தாஜீவானங் புப்³பா³பி⁴ஸங்கா²ரஸ்ஸ அனேகரூபத்தா. லோகுத்தரமக்³க³க்க²ணே ஏகதோ லப்³ப⁴ந்தி கிச்சதோ பி⁴ன்னானம்பி தாஸங் தத்த² ஸரூபதோ அபி⁴ன்னத்தா. ஏகா ஏவ ஹி விரதி மக்³க³க்க²ணே திஸ்ஸன்னம்பி விரதீனங் கிச்சங் ஸாதெ⁴ந்தீ பவத்ததி, யதா² ஏகா ஏவ ஸம்மாதி³ட்டி² பரிஜானநாதி³வஸேன சதுப்³பி³த⁴கிச்சங் ஸாதெ⁴ந்தீ பவத்ததி. தானி ச கோ² ஸப்³பா³னி அட்ட²பி பட²மஜ்ஜா²னிகே மக்³கே³ லப்³ப⁴ந்தீதி யோஜனா. பட²மஜ்ஜா²னிகேதி பட²மஜா²னவந்தே.
Lajjanākārasaṇṭhitāti pāpato jigucchanākārasaṇṭhitā. Bhāyanākārasaṇṭhitanti uttasanākārasaṇṭhitaṃ. Etthāti hiriottappe. Vidati, vindatīti vā vijjā. Viddasūti ca sappaññapariyāyoti āha ‘‘viddasunoti viduno’’ti. Yāthāvadiṭṭhīti aviparītā diṭṭhi, saṃkilesato niyyānikadiṭṭhi. Sammādiṭṭhi pahotīti ettha sā vijjā sammādiṭṭhi veditabbā. Na ekato sabbāni labbhanti sammāvācākammantājīvānaṃ pubbābhisaṅkhārassa anekarūpattā. Lokuttaramaggakkhaṇe ekato labbhanti kiccato bhinnānampi tāsaṃ tattha sarūpato abhinnattā. Ekā eva hi virati maggakkhaṇe tissannampi viratīnaṃ kiccaṃ sādhentī pavattati, yathā ekā eva sammādiṭṭhi parijānanādivasena catubbidhakiccaṃ sādhentī pavattati. Tāni ca kho sabbāni aṭṭhapi paṭhamajjhānike magge labbhantīti yojanā. Paṭhamajjhāniketi paṭhamajhānavante.
ததா²பூ⁴தஸ்ஸாதி அரியமக்³க³ஸமங்கி³னோ. யஸ்மா மஹாஸளாயதனஸுத்தே வுத்தங் ‘‘ஸம்மாதி³ட்டி²ஆதீ³னங் பஞ்சன்னங் ஏவ அங்கா³னங் வஸேனா’’தி, தஸ்மா பஞ்சங்கி³கோ லோகுத்தரமக்³கோ³ ஹோதி. ‘‘புப்³பே³வ கோ² பனா’’தி ஹி வசனங் ததா³ மக்³க³க்க²ணே விரதீனங் அபா⁴வங் ஞாபேதி, தஸ்மா காமாவசரசித்தேஸு விய லோகுத்தரசித்தேஸு விரதி அனியதாதி அதி⁴ப்பாயோ. பரிஸுத்³த⁴பா⁴வத³ஸ்ஸனந்தி பரிஸுத்³த⁴ஸீலபா⁴வத³ஸ்ஸனத்த²ங். அயமத்தோ² தீ³பிதோ, ந அரியமக்³கே³ விரதீனங் அபா⁴வோ.
Tathābhūtassāti ariyamaggasamaṅgino. Yasmā mahāsaḷāyatanasutte vuttaṃ ‘‘sammādiṭṭhiādīnaṃ pañcannaṃ eva aṅgānaṃ vasenā’’ti, tasmā pañcaṅgiko lokuttaramaggo hoti. ‘‘Pubbeva kho panā’’ti hi vacanaṃ tadā maggakkhaṇe viratīnaṃ abhāvaṃ ñāpeti, tasmā kāmāvacaracittesu viya lokuttaracittesu virati aniyatāti adhippāyo. Parisuddhabhāvadassananti parisuddhasīlabhāvadassanatthaṃ. Ayamattho dīpito, na ariyamagge viratīnaṃ abhāvo.
யதி³ ஏவங் கஸ்மா அபி⁴த⁴ம்மே மக்³க³விப⁴ங்கே³ பஞ்சங்கி³கவாரோ ஆக³தோதி ஆஹ ‘‘யம்பி அபி⁴த⁴ம்மே’’திஆதி³. தந்தி ‘‘பஞ்சங்கி³கோ மக்³கோ³ ஹோதீ’’தி வசனங். ‘‘ஏகங் கிச்சந்தரங் த³ஸ்ஸேதுங் வுத்த’’ந்தி வத்வா தங் த³ஸ்ஸேதுங் ‘‘யஸ்மிஞ்ஹி காலே’’திஆதி³ வுத்தங். யஸ்மிஞ்ஹி காலேதி லோகியகாலே . தேன ‘‘ஏகங் கிச்சந்தர’’ந்தி வுத்தங் அட்ட²ங்கி³ககிச்சங் த³ஸ்ஸேதி. விரதிஉப்பாத³னேன மிச்சா²வாசாதீ³னி புக்³க³லேன மக்³க³ஸமயே பஜஹாபெந்தீதி ஸம்மாதி³ட்டி²ஆதீ³னி ‘‘பஞ்ச காரகங்கா³னீ’’தி வுத்தானி. ஸம்மாவாசாதி³கிரியா ஹி விரதி, தஞ்ச ஏதானி காராபெந்தீதி. விரதிவஸேனாதி விரமணகிரியாவஸேன காராபகபா⁴வேன, கத்துபா⁴வேன வாதி அத்தோ². ‘‘விரதித்தயவஸேனா’’தி வா பாடோ².
Yadi evaṃ kasmā abhidhamme maggavibhaṅge pañcaṅgikavāro āgatoti āha ‘‘yampi abhidhamme’’tiādi. Tanti ‘‘pañcaṅgiko maggo hotī’’ti vacanaṃ. ‘‘Ekaṃkiccantaraṃ dassetuṃ vutta’’nti vatvā taṃ dassetuṃ ‘‘yasmiñhi kāle’’tiādi vuttaṃ. Yasmiñhi kāleti lokiyakāle . Tena ‘‘ekaṃ kiccantara’’nti vuttaṃ aṭṭhaṅgikakiccaṃ dasseti. Viratiuppādanena micchāvācādīni puggalena maggasamaye pajahāpentīti sammādiṭṭhiādīni ‘‘pañca kārakaṅgānī’’ti vuttāni. Sammāvācādikiriyā hi virati, tañca etāni kārāpentīti. Virativasenāti viramaṇakiriyāvasena kārāpakabhāvena, kattubhāvena vāti attho. ‘‘Viratittayavasenā’’ti vā pāṭho.
ஸம்மாகம்மந்தோ பூரதீதி இமேஹி ஸம்மாதி³ட்டி²ஆதீ³ஹி ஸம்மாகம்மந்தகிச்சங் பூரதி நாம தேஹி வீரியாதி³கேஹி தத³த்த²ஸித்³தி⁴தோ. தம்பி ஸந்தா⁴ய ‘‘ஏகங் கிச்சந்தரங் த³ஸ்ஸேது’’ந்தி வுத்தங். இமங் கிச்சந்தரங் த³ஸ்ஸேதுந்தி லோகுத்தரமக்³க³க்க²ணேபி இமானேவ பஞ்ச ஸம்மாவாசாதி³விரதித்தயஸ்ஸ ஏகக்க²ணே காராபகங்கா³னீதி த³ஸ்ஸேதுங். ஏவங் வுத்தந்தி ‘‘தஸ்மிங் ஸமயே பஞ்சங்கி³கோ மக்³கோ³ ஹோதீ’’தி (விப⁴॰ 494) ஏவங் வுத்தங். லோகியமக்³க³க்க²ணே பஞ்சேவ ஹொந்தி, விரதி பன அனியதா, தஸ்மா ‘‘ச²அங்கி³கோ’’தி அவத்வா ‘‘பஞ்சங்கி³கோ’’இச்சேவ வுத்தங். தயித³ங் அபி⁴த⁴ம்மே பஞ்சங்கி³கவாரதே³ஸனாய காரணகித்தனமக்³கோ³, அரியமக்³கோ³ பன அட்ட²ங்கி³கோவாதி த³ஸ்ஸேதுங், ‘‘யா ச, பி⁴க்க²வே’’திஆதி³மாஹ, தங் ஸுவிஞ்ஞெய்யமேவ. மிச்சா²தி³ட்டி²ஆதி³கா த³ஸ, தப்பச்சயா அகுஸலா ச த³ஸாதி வீஸதி அகுஸலபக்கி²யா, ஸம்மாதி³ட்டி²ஆதி³கா த³ஸ, தப்பச்சயா குஸலா ச த³ஸாதி வீஸதி குஸலபக்கி²யா மஹாசத்தாரீஸகஸுத்தே வுத்தா. மஹாசத்தாரீஸகந்தி தஸ்ஸேதங் நாமங். மிஸ்ஸகோவ கதி²தோ லோகுத்தரஸ்ஸபி இத⁴ லப்³ப⁴மானத்தா.
Sammākammanto pūratīti imehi sammādiṭṭhiādīhi sammākammantakiccaṃ pūrati nāma tehi vīriyādikehi tadatthasiddhito. Tampi sandhāya ‘‘ekaṃ kiccantaraṃ dassetu’’nti vuttaṃ. Imaṃ kiccantaraṃ dassetunti lokuttaramaggakkhaṇepi imāneva pañca sammāvācādiviratittayassa ekakkhaṇe kārāpakaṅgānīti dassetuṃ. Evaṃ vuttanti ‘‘tasmiṃ samaye pañcaṅgiko maggo hotī’’ti (vibha. 494) evaṃ vuttaṃ. Lokiyamaggakkhaṇe pañceva honti, virati pana aniyatā, tasmā ‘‘chaaṅgiko’’ti avatvā ‘‘pañcaṅgiko’’icceva vuttaṃ. Tayidaṃ abhidhamme pañcaṅgikavāradesanāya kāraṇakittanamaggo, ariyamaggo pana aṭṭhaṅgikovāti dassetuṃ, ‘‘yā ca, bhikkhave’’tiādimāha, taṃ suviññeyyameva. Micchādiṭṭhiādikā dasa, tappaccayā akusalā ca dasāti vīsati akusalapakkhiyā, sammādiṭṭhiādikā dasa, tappaccayā kusalā ca dasāti vīsati kusalapakkhiyā mahācattārīsakasutte vuttā. Mahācattārīsakanti tassetaṃ nāmaṃ. Missakova kathito lokuttarassapi idha labbhamānattā.
யஸ்மா கோஸலஸங்யுத்தேபி இத⁴ ச தே²ரேன ‘‘உபட்³ட⁴மித³ங், ப⁴ந்தே, ப்³ரஹ்மசரியஸ்ஸா’’திஆதி³னா வுத்தங் ‘‘மா ஹேவங் ஆனந்தா³’’திஆதி³னா படிக்கி²பித்வா ‘‘ஸகலமேவித³ங் ஆனந்தா³’’திஆதி³னா ப⁴க³வதா தே³ஸிதங் ஸுத்தங் ஆக³தங். தஸ்ஸத்தோ² கோஸலஸங்யுத்தவண்ணனாயங் வுத்தோ, தஸ்மா வுத்தங் ‘‘கோஸலஸங்யுத்தே வுத்தத்த²மேவா’’தி.
Yasmā kosalasaṃyuttepi idha ca therena ‘‘upaḍḍhamidaṃ, bhante, brahmacariyassā’’tiādinā vuttaṃ ‘‘mā hevaṃ ānandā’’tiādinā paṭikkhipitvā ‘‘sakalamevidaṃ ānandā’’tiādinā bhagavatā desitaṃ suttaṃ āgataṃ. Tassattho kosalasaṃyuttavaṇṇanāyaṃ vutto, tasmā vuttaṃ ‘‘kosalasaṃyutte vuttatthamevā’’ti.
அவிஜ்ஜாஸுத்தாதி³வண்ணனா நிட்டி²தா.
Avijjāsuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. அவிஜ்ஜாஸுத்தங் • 1. Avijjāsuttaṃ
2. உபட்³ட⁴ஸுத்தங் • 2. Upaḍḍhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-2. அவிஜ்ஜாஸுத்தாதி³வண்ணனா • 1-2. Avijjāsuttādivaṇṇanā
