| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. அவுட்டி²கஸுத்தவண்ணனா
6. Avuṭṭhikasuttavaṇṇanā
75. ச²ட்டே² அவுட்டி²கஸமோதி அவுட்டி²கமேக⁴ஸமோ. ஏகச்சோ ஹி மேகோ⁴ ஸதபடலஸஹஸ்ஸபடலோ ஹுத்வா உட்ட²ஹித்வா த²னந்தோ க³ஜ்ஜந்தோ விஜ்ஜோதந்தோ ஏகங் உத³கபி³ந்து³ம்பி அபாதெத்வா விக³ச்ச²தி, ததூ²பமோ ஏகச்சோ புக்³க³லோதி த³ஸ்ஸெந்தோ ஆஹ ‘‘அவுட்டி²கஸமோ’’தி. பதே³ஸவஸ்ஸீதி ஏகதே³ஸவஸ்ஸிமேக⁴ஸமோ. பதே³ஸவஸ்ஸீ வியாதி ஹி பதே³ஸவஸ்ஸீ. ஏகச்சோ ஏகஸ்மிங்யேவ டா²னே டி²தேஸு மனுஸ்ஸேஸு யதா² ஏகச்சே தேமெந்தி, ஏகச்சே ந தேமெந்தி, ஏவங் மந்த³ங் வஸ்ஸதி, ததூ²பமங் ஏகச்சங் புக்³க³லங் த³ஸ்ஸேதி ‘‘பதே³ஸவஸ்ஸீ’’தி. ஸப்³ப³த்தா²பி⁴வஸ்ஸீதி ஸப்³ப³ஸ்மிங் பத²வீபப்³ப³தஸமுத்³தா³தி³கே ஜக³திப்பதே³ஸே அபி⁴வஸ்ஸிமேக⁴ஸமோ. ஏகச்சோ ஹி ஸகலசக்கவாளக³ப்³ப⁴ங் பத்த²ரித்வா ஸப்³ப³த்த²கமேவ அபி⁴வஸ்ஸதி, தங் சாதுத்³தீ³பிகமஹாமேக⁴ங் ஏகச்சஸ்ஸ புக்³க³லஸ்ஸ உபமங் கத்வா வுத்தங் ‘‘ஸப்³ப³த்தா²பி⁴வஸ்ஸீ’’தி.
75. Chaṭṭhe avuṭṭhikasamoti avuṭṭhikameghasamo. Ekacco hi megho satapaṭalasahassapaṭalo hutvā uṭṭhahitvā thananto gajjanto vijjotanto ekaṃ udakabindumpi apātetvā vigacchati, tathūpamo ekacco puggaloti dassento āha ‘‘avuṭṭhikasamo’’ti. Padesavassīti ekadesavassimeghasamo. Padesavassī viyāti hi padesavassī. Ekacco ekasmiṃyeva ṭhāne ṭhitesu manussesu yathā ekacce tementi, ekacce na tementi, evaṃ mandaṃ vassati, tathūpamaṃ ekaccaṃ puggalaṃ dasseti ‘‘padesavassī’’ti. Sabbatthābhivassīti sabbasmiṃ pathavīpabbatasamuddādike jagatippadese abhivassimeghasamo. Ekacco hi sakalacakkavāḷagabbhaṃ pattharitvā sabbatthakameva abhivassati, taṃ cātuddīpikamahāmeghaṃ ekaccassa puggalassa upamaṃ katvā vuttaṃ ‘‘sabbatthābhivassī’’ti.
ஸப்³பே³ஸானந்தி ஸப்³பே³ஸங், அயமேவ வா பாடோ². ந தா³தா ஹோதீதி அதா³னஸீலோ ஹோதி, த²த்³த⁴மச்ச²ரிதாய ந கஸ்ஸசி கிஞ்சி தே³தீதி அத்தோ². இதா³னி தா³னஸ்ஸ கெ²த்தங் தெ³ய்யத⁴ம்மஞ்ச விபா⁴கே³ன த³ஸ்ஸேதுங் ‘‘ஸமணப்³ராஹ்மணா’’திஆதி³மாஹ. தத்த² ஸமிதபாபஸமணா சேவ பப்³ப³ஜ்ஜமத்தஸமணா ச பா³ஹிதபாபப்³ராஹ்மணா சேவ ஜாதிமத்தப்³ராஹ்மணா ச இத⁴ ‘‘ஸமணப்³ராஹ்மணா’’தி அதி⁴ப்பேதா. கபணா நாம து³க்³க³தா த³லித்³த³மனுஸ்ஸா. அத்³தி⁴கா நாம பதா²வினோ பரிப்³ப³யவிஹீனா. வனிப்³ப³கா நாம யே ‘‘இட்ட²ங் தே³த² கந்தங் மனாபங் காலேன அனவஜ்ஜங் உத³க்³க³சித்தா பஸன்னசித்தா, ஏவங் தெ³ந்தா க³ச்ச²த² ஸுக³திங், க³ச்ச²த² ப்³ரஹ்மலோக’’ந்திஆதி³னா நயேன தா³னே நியோஜெந்தா தா³னஸ்ஸ வண்ணங் தோ²மெந்தா விசரந்தி. யாசகா நாம யே கேவலங் ‘‘முட்டி²மத்தங் தே³த², பஸதமத்தங் தே³த², ஸராவமத்தங் தே³தா²’’தி அப்பகம்பி யாசமானா விசரந்தி. தத்த² ஸமணப்³ராஹ்மணக்³க³ஹணேன கு³ணகெ²த்தங் உபகாரிகெ²த்தஞ்ச த³ஸ்ஸேதி, கபணாதி³க்³க³ஹணேன கருணாகெ²த்தங். அன்னந்தி யங்கிஞ்சி கா²த³னீயங் போ⁴ஜனீயங். பானந்தி அம்ப³பானாதி³பானகங். வத்த²ந்தி நிவாஸனபாருபனாதி³அச்சா²த³னங். யானந்தி ரத²வய்ஹாதி³ அந்தமஸோ உபாஹனங் உபாதா³ய க³மனஸாத⁴னங். மாலாதி க³ந்தி²தாக³ந்தி²தபே⁴த³ங் ஸப்³ப³ங் புப்ப²ங். க³ந்த⁴ந்தி யங்கிஞ்சி க³ந்த⁴ஜாதங் பிஸிதங் அபிஸிதங் க³ந்தூ⁴பகரணஞ்ச. விலேபனந்தி ச²விராக³கரணங். ஸெய்யாதி மஞ்சபீடா²தி³ சேவ பாவாரகோஜவாதி³ ச ஸயிதப்³ப³வத்து². ஸெய்யக்³க³ஹணேன செத்த² ஆஸனம்பி க³ஹிதந்தி த³ட்ட²ப்³ப³ங். ஆவஸத²ந்தி வாதாதபாதி³பரிஸ்ஸயவினோத³னங் பதிஸ்ஸயங். பதீ³பெய்யந்தி தீ³பகபல்லிகாதி³பதீ³பூபகரணங்.
Sabbesānanti sabbesaṃ, ayameva vā pāṭho. Na dātā hotīti adānasīlo hoti, thaddhamaccharitāya na kassaci kiñci detīti attho. Idāni dānassa khettaṃ deyyadhammañca vibhāgena dassetuṃ ‘‘samaṇabrāhmaṇā’’tiādimāha. Tattha samitapāpasamaṇā ceva pabbajjamattasamaṇā ca bāhitapāpabrāhmaṇā ceva jātimattabrāhmaṇā ca idha ‘‘samaṇabrāhmaṇā’’ti adhippetā. Kapaṇā nāma duggatā daliddamanussā. Addhikā nāma pathāvino paribbayavihīnā. Vanibbakā nāma ye ‘‘iṭṭhaṃ detha kantaṃ manāpaṃ kālena anavajjaṃ udaggacittā pasannacittā, evaṃ dentā gacchatha sugatiṃ, gacchatha brahmaloka’’ntiādinā nayena dāne niyojentā dānassa vaṇṇaṃ thomentā vicaranti. Yācakā nāma ye kevalaṃ ‘‘muṭṭhimattaṃ detha, pasatamattaṃ detha, sarāvamattaṃ dethā’’ti appakampi yācamānā vicaranti. Tattha samaṇabrāhmaṇaggahaṇena guṇakhettaṃ upakārikhettañca dasseti, kapaṇādiggahaṇena karuṇākhettaṃ. Annanti yaṃkiñci khādanīyaṃ bhojanīyaṃ. Pānanti ambapānādipānakaṃ. Vatthanti nivāsanapārupanādiacchādanaṃ. Yānanti rathavayhādi antamaso upāhanaṃ upādāya gamanasādhanaṃ. Mālāti ganthitāganthitabhedaṃ sabbaṃ pupphaṃ. Gandhanti yaṃkiñci gandhajātaṃ pisitaṃ apisitaṃ gandhūpakaraṇañca. Vilepananti chavirāgakaraṇaṃ. Seyyāti mañcapīṭhādi ceva pāvārakojavādi ca sayitabbavatthu. Seyyaggahaṇena cettha āsanampi gahitanti daṭṭhabbaṃ. Āvasathanti vātātapādiparissayavinodanaṃ patissayaṃ. Padīpeyyanti dīpakapallikādipadīpūpakaraṇaṃ.
ஏவங் கோ², பி⁴க்க²வேதி விஜ்ஜமானேபி தெ³ய்யத⁴ம்மே படிக்³கா³ஹகானங் ஏவங் தா³தப்³ப³வத்து²ங் ஸப்³பே³ன ஸப்³ப³ங் அதெ³ந்தோ புக்³க³லோ அவஸ்ஸிகமேக⁴ஸதி³ஸோ ஹோதி. இத³ங் வுத்தங் ஹோதி – பி⁴க்க²வே, யதா² ஸோ மேகோ⁴ ஸதபடலஸஹஸ்ஸபடலோ ஹுத்வா உட்ட²ஹித்வா ந கிஞ்சி வஸ்ஸி விக³ச்ச²தி, ஏவமேவ யோ உளாரங் விபுலஞ்ச போ⁴க³ங் ஸங்ஹரித்வா கே³ஹங் ஆவஸந்தோ கஸ்ஸசி கடச்சு²மத்தங் பி⁴க்க²ங் வா உளுங்கமத்தங் யாகு³ங் வா அத³த்வா விக³ச்ச²தி, விவஸோ மச்சுவஸங் க³ச்ச²தி, ஸோ அவுட்டி²கஸமோ நாம ஹோதீதி. இமினா நயேன ஸேஸேஸுபி நிக³மனங் வேதி³தப்³ப³ங். இமேஸு ச தீஸு புக்³க³லேஸு பட²மோ ஏகங்ஸேனேவ க³ரஹிதப்³போ³, து³தியோ பஸங்ஸனீயோ, ததியோ, பஸங்ஸனீயதரோ. பட²மோ வா ஏகந்தேனேவ ஸப்³ப³னிஹீனோ, து³தியோ மஜ்ஜி²மோ, ததியோ உத்தமோதி வேதி³தப்³போ³.
Evaṃkho, bhikkhaveti vijjamānepi deyyadhamme paṭiggāhakānaṃ evaṃ dātabbavatthuṃ sabbena sabbaṃ adento puggalo avassikameghasadiso hoti. Idaṃ vuttaṃ hoti – bhikkhave, yathā so megho satapaṭalasahassapaṭalo hutvā uṭṭhahitvā na kiñci vassi vigacchati, evameva yo uḷāraṃ vipulañca bhogaṃ saṃharitvā gehaṃ āvasanto kassaci kaṭacchumattaṃ bhikkhaṃ vā uḷuṅkamattaṃ yāguṃ vā adatvā vigacchati, vivaso maccuvasaṃ gacchati, so avuṭṭhikasamo nāma hotīti. Iminā nayena sesesupi nigamanaṃ veditabbaṃ. Imesu ca tīsu puggalesu paṭhamo ekaṃseneva garahitabbo, dutiyo pasaṃsanīyo, tatiyo, pasaṃsanīyataro. Paṭhamo vā ekanteneva sabbanihīno, dutiyo majjhimo, tatiyo uttamoti veditabbo.
கா³தா²ஸு ஸமணேதி உபயோக³வஸேன ப³ஹுவசனங் ததா² ஸேஸேஸுபி. லத்³தா⁴னாதி லபி⁴த்வா, ஸமணே த³க்கி²ணெய்யே பவாரெத்வா புட்டோ² ந ஸங்விப⁴ஜதி. அன்னங் பானஞ்ச போ⁴ஜனந்தி அன்னங் வா பானங் வா அஞ்ஞங் வா பு⁴ஞ்ஜிதப்³ப³யுத்தகங் போ⁴ஜனங், தங் ந ஸங்விப⁴ஜதி. அயஞ்ஹெத்த² ஸங்கே²பத்தோ² – யோ அத்தி²கபா⁴வேன உபக³தே ஸம்படிக்³கா³ஹகே லபி⁴த்வா அன்னாதி³னா ஸங்விபா⁴க³மத்தம்பி ந கரோதி, கிங் ஸோ அஞ்ஞங் தா³னங் த³ஸ்ஸதி, தங் ஏவரூபங் த²த்³த⁴மச்ச²ரியங் புரிஸாத⁴மங் நிஹீனபுக்³க³லங் பண்டி³தா அவுட்டி²கஸமோதி ஆஹு கத²யந்தீதி.
Gāthāsu samaṇeti upayogavasena bahuvacanaṃ tathā sesesupi. Laddhānāti labhitvā, samaṇe dakkhiṇeyye pavāretvā puṭṭho na saṃvibhajati. Annaṃ pānañca bhojananti annaṃ vā pānaṃ vā aññaṃ vā bhuñjitabbayuttakaṃ bhojanaṃ, taṃ na saṃvibhajati. Ayañhettha saṅkhepattho – yo atthikabhāvena upagate sampaṭiggāhake labhitvā annādinā saṃvibhāgamattampi na karoti, kiṃ so aññaṃ dānaṃ dassati, taṃ evarūpaṃ thaddhamacchariyaṃ purisādhamaṃ nihīnapuggalaṃ paṇḍitā avuṭṭhikasamoti āhu kathayantīti.
ஏகச்சானங் ந த³தா³தீதி விஜ்ஜமானேபி மஹதி தா³தப்³ப³த⁴ம்மே ஏகேஸங் ஸத்தானங் தேஸு கோத⁴வஸேன வா, தெ³ய்யத⁴ம்மே லோப⁴வஸேன வா ந த³தா³தி. ஏகச்சானங் பவெச்ச²தீதி ஏகேஸங்யேவ பன த³தா³தி. மேதா⁴வினோதி பஞ்ஞவந்தோ பண்டி³தா ஜனா.
Ekaccānaṃna dadātīti vijjamānepi mahati dātabbadhamme ekesaṃ sattānaṃ tesu kodhavasena vā, deyyadhamme lobhavasena vā na dadāti. Ekaccānaṃ pavecchatīti ekesaṃyeva pana dadāti. Medhāvinoti paññavanto paṇḍitā janā.
ஸுபி⁴க்க²வாசோதி யோ உபக³தானங் யாசகானங் ‘‘அன்னங் தே³த², பானங் தே³தா²’’திஆதி³னா தங் தங் தா³பேதி, ஸோ ஸுலப⁴பி⁴க்க²தாய ஸுபி⁴க்கா² வாசா ஏதஸ்ஸாதி ஸுபி⁴க்க²வாசோ. ‘‘ஸுபி⁴க்க²வஸ்ஸீ’’திபி பட²ந்தி. யதா² லோகோ ஸுபி⁴க்கோ² ஹோதி, ஏவங் ஸப்³ப³த்தா²பி⁴வஸ்ஸிதமஹாமேகோ⁴ ஸுபி⁴க்க²வஸ்ஸீ நாம ஹோதி. ஏவமயம்பி மஹாதா³னேஹி ஸப்³ப³த்தா²பி⁴வஸ்ஸீ ஸுபி⁴க்க²வஸ்ஸீதி. ஆமோத³மானோ பகிரேதீதி துட்ட²ஹட்ட²மானஸோ ஸஹத்தே²ன தா³னங் தெ³ந்தோ படிக்³கா³ஹககெ²த்தே தெ³ய்யத⁴ம்மங் பகிரெந்தோ விய ஹோதி, வாசாயபி ‘‘தே³த² தே³தா²’’தி பா⁴ஸதி.
Subhikkhavācoti yo upagatānaṃ yācakānaṃ ‘‘annaṃ detha, pānaṃ dethā’’tiādinā taṃ taṃ dāpeti, so sulabhabhikkhatāya subhikkhā vācā etassāti subhikkhavāco. ‘‘Subhikkhavassī’’tipi paṭhanti. Yathā loko subhikkho hoti, evaṃ sabbatthābhivassitamahāmegho subhikkhavassī nāma hoti. Evamayampi mahādānehi sabbatthābhivassī subhikkhavassīti. Āmodamāno pakiretīti tuṭṭhahaṭṭhamānaso sahatthena dānaṃ dento paṭiggāhakakhette deyyadhammaṃ pakirento viya hoti, vācāyapi ‘‘detha dethā’’ti bhāsati.
இதா³னி நங் ஸுபி⁴க்க²வஸ்ஸிதபா⁴வங் த³ஸ்ஸேதுங் ‘‘யதா²பி மேகோ⁴’’திஆதி³ வுத்தங். தத்ராயங் ஸங்கே²பத்தோ² – யதா² மஹாமேகோ⁴ பட²மங் மந்த³னிக்³கோ⁴ஸேன த²னயித்வா புன ஸகலனதீ³கந்த³ரானி ஏகனின்னாத³ங் கரொந்தோ க³ஜ்ஜயித்வா பவஸ்ஸதி, ஸப்³ப³த்த²கமேவ வாரினா உத³கேன த²லங் நின்னஞ்ச அபி⁴ஸந்த³ந்தோ பூரேதி ஏகோக⁴ங் கரோதி, ஏவமேவ இத⁴ இமஸ்மிங் ஸத்தலோகே ஏகச்சோ உளாரபுக்³க³லோ ஸப்³ப³ஸமதாய ஸோ மஹாமேகோ⁴ விய வஸ்ஸிதப்³ப³த்தா தாதி³ஸோ யதா² த⁴னங் உட்டா²னாதி⁴க³தங் அத்தனோ உட்டா²னவீரியாபி⁴னிப்³ப³த்தங் ஹோதி, ஏவங் அனலஸோ ஹுத்வா தஞ்ச த⁴ம்மேன ஞாயேன ஸங்ஹரித்வா தன்னிப்³ப³த்தேன அன்னேன பானேன அஞ்ஞேன ச தெ³ய்யத⁴ம்மேன பத்தே ஸம்பத்தே வனிப்³ப³கே ஸம்மா ஸம்மதே³வ தே³ஸகாலானுரூபஞ்சேவ இச்சா²னுரூபஞ்ச தப்பேதி ஸம்பவாரேதீதி.
Idāni naṃ subhikkhavassitabhāvaṃ dassetuṃ ‘‘yathāpi megho’’tiādi vuttaṃ. Tatrāyaṃ saṅkhepattho – yathā mahāmegho paṭhamaṃ mandanigghosena thanayitvā puna sakalanadīkandarāni ekaninnādaṃ karonto gajjayitvā pavassati, sabbatthakameva vārinā udakena thalaṃ ninnañca abhisandanto pūreti ekoghaṃ karoti, evameva idha imasmiṃ sattaloke ekacco uḷārapuggalo sabbasamatāya so mahāmegho viya vassitabbattā tādiso yathā dhanaṃ uṭṭhānādhigataṃ attano uṭṭhānavīriyābhinibbattaṃ hoti, evaṃ analaso hutvā tañca dhammena ñāyena saṃharitvā tannibbattena annena pānena aññena ca deyyadhammena patte sampatte vanibbake sammā sammadeva desakālānurūpañceva icchānurūpañca tappeti sampavāretīti.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. அவுட்டி²கஸுத்தங் • 6. Avuṭṭhikasuttaṃ
