| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૨. અય્યિકાસુત્તં
2. Ayyikāsuttaṃ
૧૩૩. સાવત્થિનિદાનં . એકમન્તં નિસિન્નં ખો રાજાનં પસેનદિં કોસલં ભગવા એતદવોચ – ‘‘હન્દ, કુતો નુ ત્વં, મહારાજ, આગચ્છસિ દિવાદિવસ્સા’’તિ?
133. Sāvatthinidānaṃ . Ekamantaṃ nisinnaṃ kho rājānaṃ pasenadiṃ kosalaṃ bhagavā etadavoca – ‘‘handa, kuto nu tvaṃ, mahārāja, āgacchasi divādivassā’’ti?
‘‘અય્યિકા મે, ભન્તે, કાલઙ્કતા જિણ્ણા વુડ્ઢા મહલ્લિકા અદ્ધગતા વયોઅનુપ્પત્તા વીસવસ્સસતિકા જાતિયા. અય્યિકા ખો પન મે, ભન્તે, પિયા હોતિ મનાપા. હત્થિરતનેન ચેપાહં, ભન્તે, લભેય્યં ‘મા મે અય્યિકા કાલમકાસી’તિ, હત્થિરતનમ્પાહં દદેય્યં – ‘મા મે અય્યિકા કાલમકાસી’તિ. અસ્સરતનેન ચેપાહં, ભન્તે, લભેય્યં ‘મા મે અય્યિકા કાલમકાસી’તિ, અસ્સરતનમ્પાહં દદેય્યં – ‘મા મે અય્યિકા કાલમકાસી’તિ. ગામવરેન ચેપાહં ભન્તે, લભેય્યં ‘મા મે અય્યિકા કાલમકાસી’તિ, ગામવરમ્પાહં દદેય્યં – ‘મા મે અય્યિકા કાલમકાસી’તિ. જનપદપદેસેન 1 ચેપાહં, ભન્તે, લભેય્યં ‘મા મે અય્યિકા કાલમકાસી’તિ, જનપદપદેસમ્પાહં દદેય્યં – ‘મા મે અય્યિકા કાલમકાસી’તિ. ‘સબ્બે સત્તા, મહારાજ, મરણધમ્મા મરણપરિયોસાના મરણં અનતીતા’તિ. ‘અચ્છરિયં, ભન્તે, અબ્ભુતં, ભન્તે! યાવસુભાસિતમિદં, ભન્તે, ભગવતા – સબ્બે સત્તા મરણધમ્મા મરણપરિયોસાના મરણં અનતીતા’’’તિ.
‘‘Ayyikā me, bhante, kālaṅkatā jiṇṇā vuḍḍhā mahallikā addhagatā vayoanuppattā vīsavassasatikā jātiyā. Ayyikā kho pana me, bhante, piyā hoti manāpā. Hatthiratanena cepāhaṃ, bhante, labheyyaṃ ‘mā me ayyikā kālamakāsī’ti, hatthiratanampāhaṃ dadeyyaṃ – ‘mā me ayyikā kālamakāsī’ti. Assaratanena cepāhaṃ, bhante, labheyyaṃ ‘mā me ayyikā kālamakāsī’ti, assaratanampāhaṃ dadeyyaṃ – ‘mā me ayyikā kālamakāsī’ti. Gāmavarena cepāhaṃ bhante, labheyyaṃ ‘mā me ayyikā kālamakāsī’ti, gāmavarampāhaṃ dadeyyaṃ – ‘mā me ayyikā kālamakāsī’ti. Janapadapadesena 2 cepāhaṃ, bhante, labheyyaṃ ‘mā me ayyikā kālamakāsī’ti, janapadapadesampāhaṃ dadeyyaṃ – ‘mā me ayyikā kālamakāsī’ti. ‘Sabbe sattā, mahārāja, maraṇadhammā maraṇapariyosānā maraṇaṃ anatītā’ti. ‘Acchariyaṃ, bhante, abbhutaṃ, bhante! Yāvasubhāsitamidaṃ, bhante, bhagavatā – sabbe sattā maraṇadhammā maraṇapariyosānā maraṇaṃ anatītā’’’ti.
‘‘એવમેતં, મહારાજ, એવમેતં, મહારાજ! સબ્બે સત્તા મરણધમ્મા મરણપરિયોસાના મરણં અનતીતા. સેય્યથાપિ, મહારાજ, યાનિ કાનિચિ કુમ્ભકારભાજનાનિ આમકાનિ ચેવ પક્કાનિ ચ સબ્બાનિ તાનિ ભેદનધમ્માનિ ભેદનપરિયોસાનાનિ ભેદનં અનતીતાનિ; એવમેવ ખો, મહારાજ, સબ્બે સત્તા મરણધમ્મા મરણપરિયોસાના મરણં અનતીતા’’તિ. ઇદમવોચ…પે॰…
‘‘Evametaṃ, mahārāja, evametaṃ, mahārāja! Sabbe sattā maraṇadhammā maraṇapariyosānā maraṇaṃ anatītā. Seyyathāpi, mahārāja, yāni kānici kumbhakārabhājanāni āmakāni ceva pakkāni ca sabbāni tāni bhedanadhammāni bhedanapariyosānāni bhedanaṃ anatītāni; evameva kho, mahārāja, sabbe sattā maraṇadhammā maraṇapariyosānā maraṇaṃ anatītā’’ti. Idamavoca…pe…
‘‘સબ્બે સત્તા મરિસ્સન્તિ, મરણન્તઞ્હિ જીવિતં;
‘‘Sabbe sattā marissanti, maraṇantañhi jīvitaṃ;
યથાકમ્મં ગમિસ્સન્તિ, પુઞ્ઞપાપફલૂપગા;
Yathākammaṃ gamissanti, puññapāpaphalūpagā;
નિરયં પાપકમ્મન્તા, પુઞ્ઞકમ્મા ચ સુગ્ગતિં.
Nirayaṃ pāpakammantā, puññakammā ca suggatiṃ.
‘‘તસ્મા કરેય્ય કલ્યાણં, નિચયં સમ્પરાયિકં;
‘‘Tasmā kareyya kalyāṇaṃ, nicayaṃ samparāyikaṃ;
પુઞ્ઞાનિ પરલોકસ્મિં, પતિટ્ઠા હોન્તિ પાણિન’’ન્તિ.
Puññāni paralokasmiṃ, patiṭṭhā honti pāṇina’’nti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૨. અય્યિકાસુત્તવણ્ણના • 2. Ayyikāsuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૨. અય્યિકાસુત્તવણ્ણના • 2. Ayyikāsuttavaṇṇanā
