| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. பா³ஹிரப²ஸ்ஸனானத்தஸுத்தாதி³வண்ணனா
9. Bāhiraphassanānattasuttādivaṇṇanā
93. வுத்தப்பகாரே ஆரம்மணேதி ‘‘ஆபாதே² பதித’’ந்திஆதி³னா ஹெட்டா² வுத்தப்பகாரே ரூபாரம்மணே. ஸஞ்ஞாதி ரூபஸஞ்ஞாவ. அரூபத⁴ம்மோபி ஸமானோ யஸ்மிங் ஆரம்மணே பவத்ததி, தங் பு²ஸந்தோ விய ஹோதீதி வுத்தங் ‘‘ஆரம்மணங் பு²ஸமானோ’’தி. தண்ஹாய வத்து²பூ⁴தங்யேவ ரூபாரம்மணங் லப்³ப⁴தீதி கத்வா ‘‘ரூபலாபோ⁴’’தி அதி⁴ப்பேதந்தி ஆஹ ‘‘ஸஹ தண்ஹாய ஆரம்மணங் ரூபலாபோ⁴’’தி. ஸப்³ப³ஸங்கா³ஹிகனயோதி ஏகஸ்மிங்யேவ ஆரம்மணே ஸப்³பே³ஸங் ஸஞ்ஞாதீ³னங் த⁴ம்மானங் உப்பத்தியா ஸப்³ப³ஸங்க³ண்ஹனவஸேன த³ஸ்ஸிதனயோ. தேனாஹ ‘‘ஏகஸ்மிங்யேவா’’திஆதி³. ஸப்³ப³ஸங்கா³ஹிகனயோதி வா து⁴வபரிபோ⁴க³வஸேன நிப³த்³தா⁴ரம்மணந்தி வா ஆக³ந்துகாரம்மணந்தி வா விபா⁴க³ங் அகத்வா ஸப்³ப³ஸங்கா³ஹிகனயோ. அபரோ நயோ. மிஸ்ஸகோதி ஆக³ந்துகாரம்மணே நிப³த்³தா⁴ரம்மணே ச விஸயதோ நிப³த்³தா⁴ரம்மணேன மிஸ்ஸகோ. நிப³த்³தா⁴ரம்மணே ஸத்தானங் கிலேஸோ மந்தோ³ ஹோதி. ததா² ஹி ஸஞ்ஞாஸங்கப்பப²ஸ்ஸவேத³னாவ த³ஸ்ஸிதா. யங் கிஞ்சி வியாதி யங் கிஞ்சி அஞ்ஞமஞ்ஞங் விய. கோ²பெ⁴த்வாதி குதூஹலுப்பாத³னவஸேன சித்தங் கோ²பெ⁴த்வா.
93.Vuttappakāreārammaṇeti ‘‘āpāthe patita’’ntiādinā heṭṭhā vuttappakāre rūpārammaṇe. Saññāti rūpasaññāva. Arūpadhammopi samāno yasmiṃ ārammaṇe pavattati, taṃ phusanto viya hotīti vuttaṃ ‘‘ārammaṇaṃ phusamāno’’ti. Taṇhāya vatthubhūtaṃyeva rūpārammaṇaṃ labbhatīti katvā ‘‘rūpalābho’’ti adhippetanti āha ‘‘saha taṇhāya ārammaṇaṃ rūpalābho’’ti. Sabbasaṅgāhikanayoti ekasmiṃyeva ārammaṇe sabbesaṃ saññādīnaṃ dhammānaṃ uppattiyā sabbasaṅgaṇhanavasena dassitanayo. Tenāha ‘‘ekasmiṃyevā’’tiādi. Sabbasaṅgāhikanayoti vā dhuvaparibhogavasena nibaddhārammaṇanti vā āgantukārammaṇanti vā vibhāgaṃ akatvā sabbasaṅgāhikanayo. Aparo nayo. Missakoti āgantukārammaṇe nibaddhārammaṇe ca visayato nibaddhārammaṇena missako. Nibaddhārammaṇe sattānaṃ kileso mando hoti. Tathā hi saññāsaṅkappaphassavedanāva dassitā. Yaṃ kiñci viyāti yaṃ kiñci aññamaññaṃ viya. Khobhetvāti kutūhaluppādanavasena cittaṃ khobhetvā.
உபாஸிகாதி தஸ்ஸ அமச்சபுத்தஸ்ஸ ப⁴ரியங் ஸந்தா⁴யாஹ. தஸ்மிந்தி ஆக³ந்துகாரம்மணே. லாபோ⁴ நாம ‘‘லப்³ப⁴தீ’’தி கத்வா.
Upāsikāti tassa amaccaputtassa bhariyaṃ sandhāyāha. Tasminti āgantukārammaṇe. Lābho nāma ‘‘labbhatī’’ti katvā.
உருவல்லியவாஸீதி உருவல்லியலேணவாஸீ, உருவல்லியவிஹாரவாஸீதி வத³ந்தி. பாளியாதி ‘‘தா⁴துனானத்தங், பி⁴க்க²வே, படிச்ச உப்பஜ்ஜதீ’’திஆதி³னயபவத்தாய இமிஸ்ஸா ஸுத்தபாளியா. பரிவட்டெத்வாதி மஜ்ஜே² க³ஹிதப²ஸ்ஸவேத³னாபரியோஸானே ட²பனவஸேன பாளிங் பரிவட்டெத்வா. வுத்தப்பகாரேதிஆதி³ பரிவத்தேதப்³பா³காரத³ஸ்ஸனங். தத்த² வுத்தப்பகாரேதி ஆபாத²க³தரூபாரம்மணே. அவிபூ⁴தவாரந்தி அவிபூ⁴தாரம்மணவாரங். அயமேவ வா பாடோ². க³ண்ஹந்தி கதெ²ந்தி. ஏகஜவனவாரேபி லப்³ப⁴ந்தி சிரதரனிவேஸாபா⁴வா. நானாஜவனவாரேயேவ த³ள்ஹதரனிவேஸதாய.
Uruvalliyavāsīti uruvalliyaleṇavāsī, uruvalliyavihāravāsīti vadanti. Pāḷiyāti ‘‘dhātunānattaṃ, bhikkhave, paṭicca uppajjatī’’tiādinayapavattāya imissā suttapāḷiyā. Parivaṭṭetvāti majjhe gahitaphassavedanāpariyosāne ṭhapanavasena pāḷiṃ parivaṭṭetvā. Vuttappakāretiādi parivattetabbākāradassanaṃ. Tattha vuttappakāreti āpāthagatarūpārammaṇe. Avibhūtavāranti avibhūtārammaṇavāraṃ. Ayameva vā pāṭho. Gaṇhanti kathenti. Ekajavanavārepi labbhanti cirataranivesābhāvā. Nānājavanavāreyeva daḷhataranivesatāya.
94. த³ஸமங் உத்தானமேவ நவமே வுத்தனயத்தா. படிஸேத⁴மத்தமேவ ஹெத்த² நானத்தந்தி.
94.Dasamaṃ uttānameva navame vuttanayattā. Paṭisedhamattameva hettha nānattanti.
பா³ஹிரப²ஸ்ஸனானத்தஸுத்தாதி³வண்ணனா நிட்டி²தா.
Bāhiraphassanānattasuttādivaṇṇanā niṭṭhitā.
நானத்தவக்³க³வண்ணனா நிட்டி²தா.
Nānattavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
9. பா³ஹிரப²ஸ்ஸனானத்தஸுத்தங் • 9. Bāhiraphassanānattasuttaṃ
10. து³தியபா³ஹிரப²ஸ்ஸனானத்தஸுத்தங் • 10. Dutiyabāhiraphassanānattasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. பா³ஹிரப²ஸ்ஸனானத்தஸுத்தாதி³வண்ணனா • 9. Bāhiraphassanānattasuttādivaṇṇanā
