| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. பா³ஹிதிகஸுத்தவண்ணனா
8. Bāhitikasuttavaṇṇanā
358. ஏவங் மே ஸுதந்தி பா³ஹிதிகஸுத்தங். தத்த² ஏகபுண்ட³ரீகங் நாக³ந்தி ஏவங்னாமகங் ஹத்தி²ங். தஸ்ஸ கிர பா²ஸுகானங் உபரி தாலப²லமத்தங் பண்ட³ரட்டா²னங் அத்தி² , தேனஸ்ஸ ஏகபுண்ட³ரீகோதி நாமங் அகங்ஸு. ஸிரிவட்³ட⁴ங் மஹாமத்தந்தி பச்சேகஹத்தி²ங் அபி⁴ருஹித்வா கதா²பா²ஸுகத்த²ங் ஸத்³தி⁴ங் க³ச்ச²ந்தங் ஏவங்னாமகங் மஹாமத்தங். ஆயஸ்மானோதி எத்த² நோதி புச்சா²ய நிபாதோ. மஹாமத்தோ தே²ரஸ்ஸ ஸங்கா⁴டிபத்ததா⁴ரணாகாரங் ஸல்லக்கெ²த்வா ‘‘ஏவங், மஹாராஜா’’தி ஆஹ.
358.Evaṃme sutanti bāhitikasuttaṃ. Tattha ekapuṇḍarīkaṃ nāganti evaṃnāmakaṃ hatthiṃ. Tassa kira phāsukānaṃ upari tālaphalamattaṃ paṇḍaraṭṭhānaṃ atthi , tenassa ekapuṇḍarīkoti nāmaṃ akaṃsu. Sirivaḍḍhaṃ mahāmattanti paccekahatthiṃ abhiruhitvā kathāphāsukatthaṃ saddhiṃ gacchantaṃ evaṃnāmakaṃ mahāmattaṃ. Āyasmānoti ettha noti pucchāya nipāto. Mahāmatto therassa saṅghāṭipattadhāraṇākāraṃ sallakkhetvā ‘‘evaṃ, mahārājā’’ti āha.
359. ஓபாரம்போ⁴தி உபாரம்ப⁴ங் தோ³ஸங் ஆரோபனாரஹோ. கிங் புச்சா²மீதி ராஜா புச்ச²தி. ஸுந்த³ரிவத்து²ஸ்மிங் உப்பன்னமித³ங் ஸுத்தங், தங் புச்சா²மீதி புச்ச²தி. யஞ்ஹி மயங், ப⁴ந்தேதி, ப⁴ந்தே, யங் மயங் விஞ்ஞூஹீதி இத³ங் பத³ங் க³ஹெத்வா பஞ்ஹேன பரிபூரேதுங் நாஸக்கி²ம்ஹா, தங் காரணங் ஆயஸ்மதா ஏவங் வத³ந்தேன பரிபூரிதங்.
359.Opārambhoti upārambhaṃ dosaṃ āropanāraho. Kiṃ pucchāmīti rājā pucchati. Sundarivatthusmiṃ uppannamidaṃ suttaṃ, taṃ pucchāmīti pucchati. Yañhi mayaṃ, bhanteti, bhante, yaṃ mayaṃ viññūhīti idaṃ padaṃ gahetvā pañhena paripūretuṃ nāsakkhimhā, taṃ kāraṇaṃ āyasmatā evaṃ vadantena paripūritaṃ.
360. அகுஸலோதி அகோஸல்லஸம்பூ⁴தோ. ஸாவஜ்ஜோதி ஸதோ³ஸோ. ஸப்³யாப³ஜ்ஜோ²தி ஸது³க்கோ². து³க்க²விபாகோதி இத⁴ நிஸ்ஸந்த³விபாகோ கதி²தோ. தஸ்ஸாதி தஸ்ஸ ஏவங் அத்தப்³யாபா³தா⁴தீ³னங் அத்தா²ய பவத்தகாயஸமாசாரஸ்ஸ.
360.Akusaloti akosallasambhūto. Sāvajjoti sadoso. Sabyābajjhoti sadukkho. Dukkhavipākoti idha nissandavipāko kathito. Tassāti tassa evaṃ attabyābādhādīnaṃ atthāya pavattakāyasamācārassa.
ஸப்³பா³குஸலத⁴ம்மபஹீனோ கோ², மஹாராஜ, ததா²க³தோ குஸலத⁴ம்மஸமன்னாக³தோதி எத்த² ஸப்³பே³ஸங்யேவ அகுஸலானங் த⁴ம்மானங் பஹானங் வண்ணேதீதி. ஆம வண்ணேதீதி வுத்தே யதா² புச்சா², ததா² அத்தோ² வுத்தோ ப⁴வெய்ய. ஏவங் ப்³யாகரணங் பன ந பா⁴ரியங். அப்பஹீனஅகுஸலோபி ஹி பஹானங் வண்ணெய்ய, ப⁴க³வா பன பஹீனாகுஸலதாய யதா²காரீ ததா²வாதீ³தி த³ஸ்ஸேதுங் ஏவங் ப்³யாகாஸி. ஸுக்கபக்கே²பி ஏஸேவ நயோ.
Sabbākusaladhammapahīno kho, mahārāja, tathāgato kusaladhammasamannāgatoti ettha sabbesaṃyeva akusalānaṃ dhammānaṃ pahānaṃ vaṇṇetīti. Āma vaṇṇetīti vutte yathā pucchā, tathā attho vutto bhaveyya. Evaṃ byākaraṇaṃ pana na bhāriyaṃ. Appahīnaakusalopi hi pahānaṃ vaṇṇeyya, bhagavā pana pahīnākusalatāya yathākārī tathāvādīti dassetuṃ evaṃ byākāsi. Sukkapakkhepi eseva nayo.
362. பா³ஹிதிகாதி பா³ஹிதிரட்டே² உட்டி²தவத்த²ஸ்ஸேதங் நாமங். ஸோளஸஸமா ஆயாமேனாதி ஆயாமேன ஸமஸோளஸஹத்தா². அட்ட²ஸமா வித்தா²ரேனாதி வித்தா²ரேன ஸமஅட்ட²ஹத்தா².
362.Bāhitikāti bāhitiraṭṭhe uṭṭhitavatthassetaṃ nāmaṃ. Soḷasasamā āyāmenāti āyāmena samasoḷasahatthā. Aṭṭhasamā vitthārenāti vitthārena samaaṭṭhahatthā.
363. ப⁴க³வதோ பாதா³ஸீதி ப⁴க³வதோ நிய்யாதேஸி. த³த்வா ச பன க³ந்த⁴குடியங் விதானங் கத்வா ப³ந்தி⁴. ததோ பட்டா²ய க³ந்த⁴குடி பி⁴ய்யோஸோமத்தாய ஸோபி⁴. ஸேஸங் ஸப்³ப³த்த² உத்தானமேவ. நெய்யபுக்³க³லஸ்ஸ பன வஸேன அயங் தே³ஸனா நிட்டி²தாதி.
363.Bhagavatopādāsīti bhagavato niyyātesi. Datvā ca pana gandhakuṭiyaṃ vitānaṃ katvā bandhi. Tato paṭṭhāya gandhakuṭi bhiyyosomattāya sobhi. Sesaṃ sabbattha uttānameva. Neyyapuggalassa pana vasena ayaṃ desanā niṭṭhitāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
பா³ஹிதிகஸுத்தவண்ணனா நிட்டி²தா.
Bāhitikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. பா³ஹிதிகஸுத்தங் • 8. Bāhitikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. பா³ஹிதிகஸுத்தவண்ணனா • 8. Bāhitikasuttavaṇṇanā
