| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
5. ப³ஹுஜனஹிதஸுத்தவண்ணனா
5. Bahujanahitasuttavaṇṇanā
84. பஞ்சமே லோகேதி எத்த² தயோ லோகா – ஸத்தலோகோ, ஸங்கா²ரலோகோ, ஓகாஸலோகோதி. தேஸு இந்த்³ரியப³த்³தா⁴னங் ரூபத⁴ம்மானங் அரூபத⁴ம்மானங் ரூபாரூபத⁴ம்மானஞ்ச ஸந்தானவஸேன வத்தமானானங் ஸமூஹோ ஸத்தலோகோ, பத²வீபப்³ப³தாதி³பே⁴தோ³ ஓகாஸலோகோ, உப⁴யேபி க²ந்தா⁴ ஸங்கா²ரலோகோ. தேஸு ஸத்தலோகோ இத⁴ அதி⁴ப்பேதோ. தஸ்மா லோகேதி ஸத்தலோகே. தத்தா²பி ந தே³வலோகே, ந ப்³ரஹ்மலோகே, மனுஸ்ஸலோகே. மனுஸ்ஸலோகேபி ந அஞ்ஞஸ்மிங் சக்கவாளே, இமஸ்மிங்யேவ சக்கவாளே. தத்ராபி ந ஸப்³ப³ட்டா²னேஸு, ‘‘புரத்தி²மாய தி³ஸாய க³ஜங்க³லங் நாம நிக³மோ, தஸ்ஸ அபரேன மஹாஸாலா, ததோ பரங் பச்சந்திமா ஜனபதா³, ஓரதோ மஜ்ஜே²; புரத்தி²மத³க்கி²ணாய தி³ஸாய ஸல்லவதீ நாம நதீ³, ததோ பரங் பச்சந்திமா ஜனபதா³, ஓரதோ மஜ்ஜே²; த³க்கி²ணாய தி³ஸாய ஸேதகண்ணிகங் நாம நிக³மோ, ததோ பரங் பச்சந்திமா ஜனபதா³ , ஓரதோ மஜ்ஜே²; பச்சி²மாய தி³ஸாய தூ²ணங் நாம ப்³ராஹ்மணகா³மோ, ததோ பரங் பச்சந்திமா ஜனபதா³, ஓரதோ மஜ்ஜே²; உத்தராய தி³ஸாய உஸிரத்³த⁴ஜோ நாம பப்³ப³தோ, ததோ பரங் பச்சந்திமா ஜனபதா³, ஓரதோ மஜ்ஜே²’’தி (மஹாவ॰ 259) ஏவங் பரிச்சி²ன்னே ஆயாமதோ தியோஜனஸதே வித்தா²ரதோ அட்³ட⁴தெய்யயோஜனஸதே பரிக்கே²பதோ நவயோஜனஸதே மஜ்ஜி²மதே³ஸே உப்பஜ்ஜதி ததா²க³தோ. ந கேவலஞ்ச ததா²க³தோவ பச்சேகபு³த்³தா⁴ அக்³க³ஸாவகா அஸீதிமஹாதே²ரா பு³த்³த⁴மாதா பு³த்³த⁴பிதா சக்கவத்திராஜா அஞ்ஞே ச ஸாரப்பத்தா ப்³ராஹ்மணக³ஹபதிகா எத்தே²வ உப்பஜ்ஜந்தி. இத⁴ பன ததா²க³தவாரேயேவ ஸப்³ப³த்த²கவஸேன அயங் நயோ லப்³ப⁴தி, இதரேஸு ஏகதே³ஸவஸேன.
84. Pañcame loketi ettha tayo lokā – sattaloko, saṅkhāraloko, okāsalokoti. Tesu indriyabaddhānaṃ rūpadhammānaṃ arūpadhammānaṃ rūpārūpadhammānañca santānavasena vattamānānaṃ samūho sattaloko, pathavīpabbatādibhedo okāsaloko, ubhayepi khandhā saṅkhāraloko. Tesu sattaloko idha adhippeto. Tasmā loketi sattaloke. Tatthāpi na devaloke, na brahmaloke, manussaloke. Manussalokepi na aññasmiṃ cakkavāḷe, imasmiṃyeva cakkavāḷe. Tatrāpi na sabbaṭṭhānesu, ‘‘puratthimāya disāya gajaṅgalaṃ nāma nigamo, tassa aparena mahāsālā, tato paraṃ paccantimā janapadā, orato majjhe; puratthimadakkhiṇāya disāya sallavatī nāma nadī, tato paraṃ paccantimā janapadā, orato majjhe; dakkhiṇāya disāya setakaṇṇikaṃ nāma nigamo, tato paraṃ paccantimā janapadā , orato majjhe; pacchimāya disāya thūṇaṃ nāma brāhmaṇagāmo, tato paraṃ paccantimā janapadā, orato majjhe; uttarāya disāya usiraddhajo nāma pabbato, tato paraṃ paccantimā janapadā, orato majjhe’’ti (mahāva. 259) evaṃ paricchinne āyāmato tiyojanasate vitthārato aḍḍhateyyayojanasate parikkhepato navayojanasate majjhimadese uppajjati tathāgato. Na kevalañca tathāgatova paccekabuddhā aggasāvakā asītimahātherā buddhamātā buddhapitā cakkavattirājā aññe ca sārappattā brāhmaṇagahapatikā ettheva uppajjanti. Idha pana tathāgatavāreyeva sabbatthakavasena ayaṃ nayo labbhati, itaresu ekadesavasena.
உப்பஜ்ஜமானா உப்பஜ்ஜந்தீதி இத³ங் பன உப⁴யம்பி விப்பகதவசனமேவ, உப்பஜ்ஜந்தா ப³ஹுஜனஹிதத்தா²ய உப்பஜ்ஜந்தி, ந அஞ்ஞேன காரணேனாதி ஏவமெத்த² அத்தோ² வேதி³தப்³போ³. ஏவரூபஞ்ஹெத்த² ஸத்³த³லக்க²ணங் ந ஸக்கா அஞ்ஞேன ஸத்³த³லக்க²ணேன படிபா³ஹிதுங்.
Uppajjamānāuppajjantīti idaṃ pana ubhayampi vippakatavacanameva, uppajjantā bahujanahitatthāya uppajjanti, na aññena kāraṇenāti evamettha attho veditabbo. Evarūpañhettha saddalakkhaṇaṃ na sakkā aññena saddalakkhaṇena paṭibāhituṃ.
அபிச உப்பஜ்ஜமானோ நாம உப்பஜ்ஜதி நாம உப்பன்னோ நாமாதி அயங் பபே⁴தோ³ வேதி³தப்³போ³. ததா²க³தோ ஹி மஹாபி⁴னீஹாரங் கரொந்தோ, பு³த்³த⁴கரே த⁴ம்மே பரியேஸந்தோ, பாரமியோ பூரெந்தோ, பஞ்ச மஹாபரிச்சாகே³ பரிச்சஜந்தோ, ஞாதத்த²சரியங் சரந்தோ, லோகத்த²சரியங், பு³த்³த⁴த்த²சரியங் கோடிங் பாபெந்தோ, பாரமியோ பூரெத்வா துஸிதப⁴வனே திட்ட²ந்தோ, ததோ ஓதரித்வா சரிமப⁴வே படிஸந்தி⁴ங் க³ண்ஹந்தோ, அகா³ரமஜ்ஜே² வஸந்தோ, அபி⁴னிக்க²மந்தோ, மஹாபதா⁴னங் பத³ஹந்தோ, பரிபக்கஞாணோ போ³தி⁴மண்ட³ங் ஆருய்ஹ மாரப³லங் வித⁴மெந்தோ பட²மயாமே புப்³பே³னிவாஸங் அனுஸ்ஸரந்தோ, மஜ்ஜி²மயாமே தி³ப்³ப³சக்கு²ங் விஸோதெ⁴ந்தோ, பச்சி²மயாமே படிச்சஸமுப்பாதே³ ஞாணங் ஓதாரெத்வா அனேகாகாரங் ஸப்³ப³ஸங்கா²ரே ஸம்மஸித்வா ஸோதாபத்திமக்³க³ங் படிவிஜ்ஜ²ந்தோ யாவ அனாகா³மிப²லங் ஸச்சி²கரொந்தோபி உப்பஜ்ஜமானோ ஏவ நாம, அரஹத்தமக்³க³க்க²ணே உப்பஜ்ஜதி நாம, அரஹத்தப²லக்க²ணே பன உப்பன்னோ நாம. பு³த்³தா⁴னஞ்ஹி ஸாவகானங் விய ந படிபாடியா இத்³தி⁴வித⁴ஞாணாதீ³னங் உப்பாத³னகிச்சங் அத்தி², ஸஹேவ பன அரஹத்தமக்³கே³ன ஸகலோபி பு³த்³த⁴கு³ணராஸி ஆக³தோவ நாம ஹோதி. தஸ்மா தே நிப்³ப³த்தஸப்³ப³கிச்சத்தா அரஹத்தப²லக்க²ணே உப்பன்னா நாம ஹொந்தி. இத⁴ அரஹத்தப²லக்க²ணங் ஸந்தா⁴ய ‘‘உப்பஜ்ஜதீ’’தி வுத்தோ. உப்பன்னோ ஹோதீதி அயஞ்ஹெத்த² அத்தோ².
Apica uppajjamāno nāma uppajjati nāma uppanno nāmāti ayaṃ pabhedo veditabbo. Tathāgato hi mahābhinīhāraṃ karonto, buddhakare dhamme pariyesanto, pāramiyo pūrento, pañca mahāpariccāge pariccajanto, ñātatthacariyaṃ caranto, lokatthacariyaṃ, buddhatthacariyaṃ koṭiṃ pāpento, pāramiyo pūretvā tusitabhavane tiṭṭhanto, tato otaritvā carimabhave paṭisandhiṃ gaṇhanto, agāramajjhe vasanto, abhinikkhamanto, mahāpadhānaṃ padahanto, paripakkañāṇo bodhimaṇḍaṃ āruyha mārabalaṃ vidhamento paṭhamayāme pubbenivāsaṃ anussaranto, majjhimayāme dibbacakkhuṃ visodhento, pacchimayāme paṭiccasamuppāde ñāṇaṃ otāretvā anekākāraṃ sabbasaṅkhāre sammasitvā sotāpattimaggaṃ paṭivijjhanto yāva anāgāmiphalaṃ sacchikarontopi uppajjamāno eva nāma, arahattamaggakkhaṇe uppajjati nāma, arahattaphalakkhaṇe pana uppanno nāma. Buddhānañhi sāvakānaṃ viya na paṭipāṭiyā iddhividhañāṇādīnaṃ uppādanakiccaṃ atthi, saheva pana arahattamaggena sakalopi buddhaguṇarāsi āgatova nāma hoti. Tasmā te nibbattasabbakiccattā arahattaphalakkhaṇe uppannā nāma honti. Idha arahattaphalakkhaṇaṃ sandhāya ‘‘uppajjatī’’ti vutto. Uppanno hotīti ayañhettha attho.
ஸாவகோபி கீ²ணாஸவோ ஸாவகபோ³தி⁴யா ஹேதுபூ⁴தே புஞ்ஞஸம்பா⁴ரே ஸம்ப⁴ரந்தோ புப்³ப³யோக³ங் புப்³ப³சரியங் க³தபச்சாக³தவத்தங் பூரெந்தோ சரிமப⁴வே நிப்³ப³த்தந்தோ அனுக்கமேன விஞ்ஞுதங் பத்வா ஸங்ஸாரே ஆதீ³னவங் தி³ஸ்வா பப்³ப³ஜ்ஜாய சேதயமானோ பப்³ப³ஜ்ஜங் மத்த²கங் பாபெத்வா ஸீலாதீ³னி பரிபூரெந்தோ து⁴தத⁴ம்மே ஸமாதா³ய வத்தமானோ ஜாக³ரியங் அனுயுஞ்ஜந்தோ ஞாணானி நிப்³ப³த்தெந்தோ விபஸ்ஸனங் பட்ட²பெத்வா ஹெட்டி²மமக்³கே³ அதி⁴க³ச்ச²ந்தோபி உப்பஜ்ஜமானோ ஏவ நாம, அரஹத்தமக்³க³க்க²ணே உப்பஜ்ஜதி நாம, அரஹத்தப²லக்க²ணே பன உப்பன்னோ நாம. ஸெக்கோ² பன புப்³பூ³பனிஸ்ஸயதோ பட்டா²ய யாவ கொ³த்ரபு⁴ஞாணா உப்பஜ்ஜமானோ நாம, பட²மமக்³க³க்க²ணே உப்பஜ்ஜதி நாம, பட²மப²லக்க²ணதோ பட்டா²ய உப்பன்னோ நாம. எத்தாவதா ‘‘தயோமே, பி⁴க்க²வே, புக்³க³லா லோகே உப்பஜ்ஜமானா உப்பஜ்ஜந்தீ’’தி பதா³னங் அத்தோ² வுத்தோ ஹோதி.
Sāvakopi khīṇāsavo sāvakabodhiyā hetubhūte puññasambhāre sambharanto pubbayogaṃ pubbacariyaṃ gatapaccāgatavattaṃ pūrento carimabhave nibbattanto anukkamena viññutaṃ patvā saṃsāre ādīnavaṃ disvā pabbajjāya cetayamāno pabbajjaṃ matthakaṃ pāpetvā sīlādīni paripūrento dhutadhamme samādāya vattamāno jāgariyaṃ anuyuñjanto ñāṇāni nibbattento vipassanaṃ paṭṭhapetvā heṭṭhimamagge adhigacchantopi uppajjamāno eva nāma, arahattamaggakkhaṇe uppajjati nāma, arahattaphalakkhaṇe pana uppanno nāma. Sekkho pana pubbūpanissayato paṭṭhāya yāva gotrabhuñāṇā uppajjamāno nāma, paṭhamamaggakkhaṇe uppajjati nāma, paṭhamaphalakkhaṇato paṭṭhāya uppanno nāma. Ettāvatā ‘‘tayome, bhikkhave, puggalā loke uppajjamānā uppajjantī’’ti padānaṃ attho vutto hoti.
இதா³னி ப³ஹுஜனஹிதாயாதிஆதீ³ஸு ப³ஹுஜனஹிதாயாதி மஹாஜனஸ்ஸ ஹிதத்தா²ய. ப³ஹுஜனஸுகா²யாதி மஹாஜனஸ்ஸ ஸுக²த்தா²ய. லோகானுகம்பாயாதி ஸத்தலோகஸ்ஸ அனுகம்பங் படிச்ச. கதரஸத்தலோகஸ்ஸாதி ? யோ ததா²க³தஸ்ஸ த⁴ம்மதே³ஸனங் ஸுத்வா த⁴ம்மங் படிவிஜ்ஜ²தி, அமதபானங் பிவதி, தஸ்ஸ. ப⁴க³வதோ ஹி த⁴ம்மசக்கப்பவத்தனஸுத்தந்ததே³ஸனாய அஞ்ஞாதகொண்ட³ஞ்ஞப்பமுகா² அட்டா²ரஸ ப்³ரஹ்மகோடியோ த⁴ம்மங் படிவிஜ்ஜி²ங்ஸு. ஏவங் யாவ ஸுப⁴த்³த³பரிப்³பா³ஜகவினயனா த⁴ம்மங் படிவித்³த⁴ஸத்தானங் க³ணனா நத்தி², மஹாஸமயஸுத்தந்ததே³ஸனாயங் மங்க³லஸுத்தங், சூளராஹுலோவாத³ங், ஸமசித்ததே³ஸனாயந்தி இமேஸு சதூஸு டா²னேஸு அபி⁴ஸமயங் பத்தஸத்தானங் பரிச்சே²தோ³ நத்தி². ஏவமேதஸ்ஸ அபரிமாணஸ்ஸ ஸத்தலோகஸ்ஸ அனுகம்பாய. ஸாவகஸ்ஸ பன அரஹதோ ஸெக்க²ஸ்ஸ ச லோகானுகம்பாய உப்பத்தி த⁴ம்மஸேனாபதிஆதீ³ஹி த⁴ம்மப⁴ண்டா³கா³ரிகாதீ³ஹி ச தே³ஸிததே³ஸனாய படிவேத⁴ப்பத்தஸத்தானங் வஸேன, அபரபா⁴கே³ ச மஹாமஹிந்த³த்தே²ராதீ³ஹி தே³ஸிததே³ஸனாய படிவித்³த⁴ஸச்சானங் வஸேன, யாவஜ்ஜதனா இதோ பரங் அனாக³தே ச ஸாஸனங் நிஸ்ஸாய ஸக்³க³மொக்க²மக்³கே³ஸு பதிட்ட²ஹந்தானங் வஸேனபி அயமத்தோ² விபா⁴வேதப்³போ³.
Idāni bahujanahitāyātiādīsu bahujanahitāyāti mahājanassa hitatthāya. Bahujanasukhāyāti mahājanassa sukhatthāya. Lokānukampāyāti sattalokassa anukampaṃ paṭicca. Katarasattalokassāti ? Yo tathāgatassa dhammadesanaṃ sutvā dhammaṃ paṭivijjhati, amatapānaṃ pivati, tassa. Bhagavato hi dhammacakkappavattanasuttantadesanāya aññātakoṇḍaññappamukhā aṭṭhārasa brahmakoṭiyo dhammaṃ paṭivijjhiṃsu. Evaṃ yāva subhaddaparibbājakavinayanā dhammaṃ paṭividdhasattānaṃ gaṇanā natthi, mahāsamayasuttantadesanāyaṃ maṅgalasuttaṃ, cūḷarāhulovādaṃ, samacittadesanāyanti imesu catūsu ṭhānesu abhisamayaṃ pattasattānaṃ paricchedo natthi. Evametassa aparimāṇassa sattalokassa anukampāya. Sāvakassa pana arahato sekkhassa ca lokānukampāya uppatti dhammasenāpatiādīhi dhammabhaṇḍāgārikādīhi ca desitadesanāya paṭivedhappattasattānaṃ vasena, aparabhāge ca mahāmahindattherādīhi desitadesanāya paṭividdhasaccānaṃ vasena, yāvajjatanā ito paraṃ anāgate ca sāsanaṃ nissāya saggamokkhamaggesu patiṭṭhahantānaṃ vasenapi ayamattho vibhāvetabbo.
அபிச ப³ஹுஜனஹிதாயாதி ப³ஹுஜனஸ்ஸ ஹிதத்தா²ய, நேஸங் பஞ்ஞாஸம்பத்தியா தி³ட்ட²த⁴ம்மிகஸம்பராயிகஹிதூபதே³ஸகோதி. ப³ஹுஜனஸுகா²யாதி ப³ஹுஜனஸ்ஸ ஸுக²த்தா²ய, சாக³ஸம்பத்தியா உபகரணஸுக²ஸம்பதா³யகோதி. லோகானுகம்பாயாதி லோகஸ்ஸ அனுகம்பனத்தா²ய, மெத்தாகருணாஸம்பத்தியா மாதாபிதரோ விய லோகஸ்ஸ ரக்கி²தா கோ³பிதாதி. அத்தா²ய ஹிதாய ஸுகா²ய தே³வமனுஸ்ஸானந்தி இத⁴ தே³வமனுஸ்ஸக்³க³ஹணேன ப⁴ப்³ப³புக்³க³லே வேனெய்யஸத்தே ஏவ க³ஹெத்வா தேஸங் நிப்³பா³னமக்³க³ப²லாதி⁴க³மாய ததா²க³தஸ்ஸ உப்பத்தி த³ஸ்ஸிதா பட²மவாரே, து³தியததியவாரேஸு பன அரஹதோ ஸெக்க²ஸ்ஸ ச வஸேன யோஜேதப்³ப³ங். தத்த² அத்தா²யாதி இமினா பரமத்தா²ய, நிப்³பா³னாயாதி வுத்தங் ஹோதி. ஹிதாயாதி தங்ஸம்பாபகமக்³க³த்தா²யாதி வுத்தங் ஹோதி. நிப்³பா³னஸம்பாபகமக்³க³தோ ஹி உத்தரிங் ஹிதங் நாம நத்தி². ஸுகா²யாதி ப²லஸமாபத்திஸுக²த்தா²யாதி வுத்தங் ஹோதி, ததோ உத்தரி ஸுகா²பா⁴வதோ. வுத்தஞ்ஹேதங் ‘‘அயங் ஸமாதி⁴ பச்சுப்பன்னஸுகோ² சேவ ஆயதிஞ்ச ஸுக²விபாகோ’’தி (தீ³॰ நி॰ 3.355; அ॰ நி॰ 5.27; விப⁴॰ 804).
Apica bahujanahitāyāti bahujanassa hitatthāya, nesaṃ paññāsampattiyā diṭṭhadhammikasamparāyikahitūpadesakoti. Bahujanasukhāyāti bahujanassa sukhatthāya, cāgasampattiyā upakaraṇasukhasampadāyakoti. Lokānukampāyāti lokassa anukampanatthāya, mettākaruṇāsampattiyā mātāpitaro viya lokassa rakkhitā gopitāti. Atthāya hitāya sukhāya devamanussānanti idha devamanussaggahaṇena bhabbapuggale veneyyasatte eva gahetvā tesaṃ nibbānamaggaphalādhigamāya tathāgatassa uppatti dassitā paṭhamavāre, dutiyatatiyavāresu pana arahato sekkhassa ca vasena yojetabbaṃ. Tattha atthāyāti iminā paramatthāya, nibbānāyāti vuttaṃ hoti. Hitāyāti taṃsampāpakamaggatthāyāti vuttaṃ hoti. Nibbānasampāpakamaggato hi uttariṃ hitaṃ nāma natthi. Sukhāyāti phalasamāpattisukhatthāyāti vuttaṃ hoti, tato uttari sukhābhāvato. Vuttañhetaṃ ‘‘ayaṃ samādhi paccuppannasukho ceva āyatiñca sukhavipāko’’ti (dī. ni. 3.355; a. ni. 5.27; vibha. 804).
ததா²க³தோதிஆதீ³னங் பதா³னங் அத்தோ² ஹெட்டா² வுத்தோ. விஜ்ஜாசரணஸம்பன்னோதிஆதீ³ஸு திஸ்ஸோபி விஜ்ஜா ப⁴யபே⁴ரவே (ம॰ நி॰ 1.34 ஆத³யோ) ஆக³தனயேன, ச²பி விஜ்ஜா ச²ளபி⁴ஞ்ஞாவஸேன, அட்ட²பி விஜ்ஜா அம்ப³ட்ட²ஸுத்தே ஆக³தாதி விஜ்ஜாஹி, ஸீலஸங்வராதீ³ஹி, பன்னரஸஹி சரணத⁴ம்மேஹி ச, அனஞ்ஞஸாதா⁴ரணேஹி ஸம்பன்னோ ஸமன்னாக³தோதி விஜ்ஜாசரணஸம்பன்னோ. ஸோப⁴னக³மனத்தா, ஸுந்த³ரங் டா²னங் க³தத்தா, ஸம்மா க³தத்தா, ஸம்மா க³த³த்தா ச ஸுக³தோ. ஸப்³ப³தா² விதி³தலோகத்தா லோகவிதூ³. நத்தி² ஏதஸ்ஸ உத்தரோதி அனுத்தரோ. புரிஸத³ம்மே புரிஸவேனெய்யே ஸாரேதி வினேதீதி புரிஸத³ம்மஸாரதி². தி³ட்ட²த⁴ம்மிகஸம்பராயிகபரமத்தே²ஹி யதா²ரஹங் அனுஸாஸதீதி ஸத்தா². ஸப்³ப³ஸ்ஸாபி நெய்யஸ்ஸ ஸப்³ப³ப்பகாரேன ஸயம்பு⁴ஞாணேன பு³த்³த⁴த்தா பு³த்³தோ⁴தி அயமெத்த² ஸங்கே²போ, வித்தா²ரோ பன விஸுத்³தி⁴மக்³க³தோ (விஸுத்³தி⁴॰ 1.132-133) க³ஹேதப்³போ³.
Tathāgatotiādīnaṃ padānaṃ attho heṭṭhā vutto. Vijjācaraṇasampannotiādīsu tissopi vijjā bhayabherave (ma. ni. 1.34 ādayo) āgatanayena, chapi vijjā chaḷabhiññāvasena, aṭṭhapi vijjā ambaṭṭhasutte āgatāti vijjāhi, sīlasaṃvarādīhi, pannarasahi caraṇadhammehi ca, anaññasādhāraṇehi sampanno samannāgatoti vijjācaraṇasampanno. Sobhanagamanattā, sundaraṃ ṭhānaṃ gatattā, sammā gatattā, sammā gadattā ca sugato. Sabbathā viditalokattā lokavidū. Natthi etassa uttaroti anuttaro. Purisadamme purisaveneyye sāreti vinetīti purisadammasārathi. Diṭṭhadhammikasamparāyikaparamatthehi yathārahaṃ anusāsatīti satthā. Sabbassāpi neyyassa sabbappakārena sayambhuñāṇena buddhattā buddhoti ayamettha saṅkhepo, vitthāro pana visuddhimaggato (visuddhi. 1.132-133) gahetabbo.
ஸோ த⁴ம்மங் தே³ஸேதி ஆதி³…பே॰… பரியோஸானகல்யாணந்தி ஸோ ப⁴க³வா ஸத்தேஸு காருஞ்ஞங் படிச்ச ஹித்வாபி அனுத்தரங் விவேகஸுக²ங் த⁴ம்மங் தே³ஸேதி. தஞ்ச கோ² அப்பங் வா ப³ஹுங் வா தே³ஸெந்தோ ஆதி³கல்யாணாதி³ப்பகாரமேவ தே³ஸேதி. கத²ங்? ஏககா³தா²பி ஹி ஸமந்தப⁴த்³த³கத்தா த⁴ம்மஸ்ஸ பட²மபாதே³ன ஆதி³கல்யாணா, து³தியததியேஹி மஜ்ஜே²கல்யாணா, பச்சி²மேன பரியோஸானகல்யாணா. ஏகானுஸந்தி⁴கங் ஸுத்தங் நிதா³னேன ஆதி³கல்யாணங், நிக³மனேன பரியோஸானகல்யாணங், ஸேஸேன மஜ்ஜே²கல்யாணங். நானானுஸந்தி⁴கங் ஸுத்தங் பட²மேன அனுஸந்தி⁴னா ஆதி³கல்யாணங், பச்சி²மேன பரியோஸானகல்யாணங், ஸேஸேஹி மஜ்ஜே²கல்யாணங். ஸகலோபி வா ஸாஸனத⁴ம்மோ அத்தனோ அத்த²பூ⁴தேன ஸீலேன ஆதி³கல்யாணோ, ஸமத²விபஸ்ஸனாமக்³க³ப²லேஹி மஜ்ஜே²கல்யாணோ, நிப்³பா³னேன பரியோஸானகல்யாணோ. ஸீலஸமாதீ⁴ஹி வா ஆதி³கல்யாணோ, விபஸ்ஸனாமக்³கே³ஹி மஜ்ஜே²கல்யாணோ, ப²லனிப்³பா³னேஹி பரியோஸானகல்யாணோ. பு³த்³த⁴ஸுபு³த்³த⁴தாய வா ஆதி³கல்யாணோ, த⁴ம்மஸுத⁴ம்மதாய மஜ்ஜே²கல்யாணோ, ஸங்க⁴ஸுப்படிபத்தியா பரியோஸானகல்யாணோ. தங் ஸுத்வா தத²த்தாய படிபன்னேன அதி⁴க³ந்தப்³பா³ய அபி⁴ஸம்போ³தி⁴யா வா ஆதி³கல்யாணோ, பச்சேகபோ³தி⁴யா மஜ்ஜே²கல்யாணோ, ஸாவகபோ³தி⁴யா பரியோஸானகல்யாணோ. ஸுய்யமானோ சேஸ நீவரணவிக்க²ம்ப⁴னதோ ஸவனேனபி கல்யாணமேவ ஆவஹதீதி ஆதி³கல்யாணோ, படிபஜ்ஜியமானோ ஸமத²விபஸ்ஸனாஸுகா²வஹனதோ படிபத்தியாபி ஸுக²மேவ ஆவஹதீதி மஜ்ஜே²கல்யாணோ, ததா²படிபன்னோ ச படிபத்திப²லே நிட்டி²தே தாதி³பா⁴வாவஹனதோ படிபத்திப²லேனபி கல்யாணமேவ ஆவஹதீதி பரியோஸானகல்யாணோ. நாத²ப்பப⁴வத்தா ச பப⁴வஸுத்³தி⁴யா ஆதி³கல்யாணோ, அத்த²ஸுத்³தி⁴யா மஜ்ஜே²கல்யாணோ, கிச்சஸுத்³தி⁴யா பரியோஸானகல்யாணோ. தேன வுத்தங் ‘‘ஸோ த⁴ம்மங் தே³ஸேதி ஆதி³…பே॰… பரியோஸானகல்யாண’’ந்தி.
So dhammaṃ deseti ādi…pe… pariyosānakalyāṇanti so bhagavā sattesu kāruññaṃ paṭicca hitvāpi anuttaraṃ vivekasukhaṃ dhammaṃ deseti. Tañca kho appaṃ vā bahuṃ vā desento ādikalyāṇādippakārameva deseti. Kathaṃ? Ekagāthāpi hi samantabhaddakattā dhammassa paṭhamapādena ādikalyāṇā, dutiyatatiyehi majjhekalyāṇā, pacchimena pariyosānakalyāṇā. Ekānusandhikaṃ suttaṃ nidānena ādikalyāṇaṃ, nigamanena pariyosānakalyāṇaṃ, sesena majjhekalyāṇaṃ. Nānānusandhikaṃ suttaṃ paṭhamena anusandhinā ādikalyāṇaṃ, pacchimena pariyosānakalyāṇaṃ, sesehi majjhekalyāṇaṃ. Sakalopi vā sāsanadhammo attano atthabhūtena sīlena ādikalyāṇo, samathavipassanāmaggaphalehi majjhekalyāṇo, nibbānena pariyosānakalyāṇo. Sīlasamādhīhi vā ādikalyāṇo, vipassanāmaggehi majjhekalyāṇo, phalanibbānehi pariyosānakalyāṇo. Buddhasubuddhatāya vā ādikalyāṇo, dhammasudhammatāya majjhekalyāṇo, saṅghasuppaṭipattiyā pariyosānakalyāṇo. Taṃ sutvā tathattāya paṭipannena adhigantabbāya abhisambodhiyā vā ādikalyāṇo, paccekabodhiyā majjhekalyāṇo, sāvakabodhiyā pariyosānakalyāṇo. Suyyamāno cesa nīvaraṇavikkhambhanato savanenapi kalyāṇameva āvahatīti ādikalyāṇo, paṭipajjiyamāno samathavipassanāsukhāvahanato paṭipattiyāpi sukhameva āvahatīti majjhekalyāṇo, tathāpaṭipanno ca paṭipattiphale niṭṭhite tādibhāvāvahanato paṭipattiphalenapi kalyāṇameva āvahatīti pariyosānakalyāṇo. Nāthappabhavattā ca pabhavasuddhiyā ādikalyāṇo, atthasuddhiyā majjhekalyāṇo, kiccasuddhiyā pariyosānakalyāṇo. Tena vuttaṃ ‘‘so dhammaṃ deseti ādi…pe… pariyosānakalyāṇa’’nti.
யங் பன ப⁴க³வா த⁴ம்மங் தே³ஸெந்தோ ஸாஸனப்³ரஹ்மசரியங் மக்³க³ப்³ரஹ்மசரியஞ்ச பகாஸேதி, நானானயேஹி தீ³பேதி, தங் யதா²னுரூபங் அத்த²ஸம்பத்தியா ஸாத்த²ங், ப்³யஞ்ஜனஸம்பத்தியா ஸப்³யஞ்ஜனங். ஸங்காஸன, பகாஸன, விவரண, விப⁴ஜன, உத்தானீகரண பஞ்ஞத்திஅத்த²பத³ஸமாயோக³தோ ஸாத்த²ங், அக்க²ரபத³ப்³யஞ்ஜனாகாரனிருத்தினித்³தே³ஸஸம்பத்தியா ஸப்³யஞ்ஜனங், அத்த²க³ம்பீ⁴ரதாபடிவேத⁴க³ம்பீ⁴ரதாஹி வா ஸாத்த²ங், த⁴ம்மக³ம்பீ⁴ரதாதே³ஸனாக³ம்பீ⁴ரதாஹி ஸப்³யஞ்ஜனங். அத்த²படிபா⁴னபடிஸம்பி⁴தா³விஸயதோ வா ஸாத்த²ங், த⁴ம்மனிருத்திபடிஸம்பி⁴தா³விஸயதோ ஸப்³யஞ்ஜனங். பண்டி³தவேத³னீயதோ பரிக்க²கஜனப்பஸாத³கந்தி ஸாத்த²ங், ஸத்³தெ⁴ய்யதோ லோகியஜனப்பஸாத³கந்தி ஸப்³யஞ்ஜனங். க³ம்பீ⁴ராதி⁴ப்பாயதோ ஸாத்த²ங், உத்தானபத³தோ ஸப்³யஞ்ஜனங். உபனேதப்³ப³ஸ்ஸ அபா⁴வதோ ஸகலபரிபுண்ணபா⁴வேன கேவலபரிபுண்ணங், அபனேதப்³ப³ஸ்ஸ அபா⁴வதோ நித்³தோ³ஸபா⁴வேன பரிஸுத்³த⁴ங், அபிச படிபத்தியா அதி⁴க³மப்³யத்திதோ ஸாத்த²ங், பரியத்தியா ஆக³மப்³யத்திதோ ஸப்³யஞ்ஜனங், ஸீலாதி³பஞ்சத⁴ம்மக்க²ந்த⁴பாரிபூரியா பரிபுண்ணங், நிருபக்கிலேஸதோ நித்த²ரணத்தா²ய பவத்திதோ லோகாமிஸனிரபெக்க²தோ ச பரிஸுத்³த⁴ங், ஸிக்க²த்தயபரிக்³க³ஹிதத்தா ப்³ரஹ்மபூ⁴தேஹி ஸெட்டே²ஹி சரிதப்³ப³தோ தேஸங் சரியபா⁴வதோ ச ப்³ரஹ்மசரியங். தஸ்மா ‘‘ஸாத்த²ங் ஸப்³யஞ்ஜனங்…பே॰… பகாஸேதீ’’தி வுச்சதி. பட²மோதி க³ணனானுபுப்³ப³தோ ஸப்³ப³லோகுத்தமபா⁴வதோ ச பட²மோ புக்³க³லோ.
Yaṃ pana bhagavā dhammaṃ desento sāsanabrahmacariyaṃ maggabrahmacariyañca pakāseti, nānānayehi dīpeti, taṃ yathānurūpaṃ atthasampattiyā sātthaṃ, byañjanasampattiyā sabyañjanaṃ. Saṅkāsana, pakāsana, vivaraṇa, vibhajana, uttānīkaraṇa paññattiatthapadasamāyogato sātthaṃ, akkharapadabyañjanākāraniruttiniddesasampattiyā sabyañjanaṃ, atthagambhīratāpaṭivedhagambhīratāhi vā sātthaṃ, dhammagambhīratādesanāgambhīratāhi sabyañjanaṃ. Atthapaṭibhānapaṭisambhidāvisayato vā sātthaṃ, dhammaniruttipaṭisambhidāvisayato sabyañjanaṃ. Paṇḍitavedanīyato parikkhakajanappasādakanti sātthaṃ, saddheyyato lokiyajanappasādakanti sabyañjanaṃ. Gambhīrādhippāyato sātthaṃ, uttānapadato sabyañjanaṃ. Upanetabbassa abhāvato sakalaparipuṇṇabhāvena kevalaparipuṇṇaṃ, apanetabbassa abhāvato niddosabhāvena parisuddhaṃ, apica paṭipattiyā adhigamabyattito sātthaṃ, pariyattiyā āgamabyattito sabyañjanaṃ, sīlādipañcadhammakkhandhapāripūriyā paripuṇṇaṃ, nirupakkilesato nittharaṇatthāya pavattito lokāmisanirapekkhato ca parisuddhaṃ, sikkhattayapariggahitattā brahmabhūtehi seṭṭhehi caritabbato tesaṃ cariyabhāvato ca brahmacariyaṃ. Tasmā ‘‘sātthaṃ sabyañjanaṃ…pe… pakāsetī’’ti vuccati. Paṭhamoti gaṇanānupubbato sabbalokuttamabhāvato ca paṭhamo puggalo.
தஸ்ஸேவ ஸத்து² ஸாவகோதி தஸ்ஸேவ யதா²வுத்தகு³ணஸ்ஸ ஸத்து² ஸம்மாஸம்பு³த்³த⁴ஸ்ஸ த⁴ம்மதே³ஸனாய ஸவனந்தே ஜாதோ த⁴ம்மஸேனாபதிஸதி³ஸோ ஸாவகோ, ந பூரணாதி³ விய படிஞ்ஞாமத்தேன ஸத்து² ஸாவகோ. பாடிபதோ³தி படிபதா³ஸங்கா²தேன அரியமக்³கே³ன அரியாய ஜாதியா ஜாதோ ப⁴வோதி பாடிபதோ³, அனிட்டி²தபடிபத்திகிச்சோ படிபஜ்ஜமானோதி அத்தோ². ஸுத்தகெ³ய்யாதி³ பரியத்தித⁴ம்மோ ப³ஹுங் ஸுதோ ஏதேனாதி ப³ஹுஸ்ஸுதோ. பாதிமொக்க²ஸங்வராதி³ஸீலேன சேவ ஆரஞ்ஞிகங்கா³தி³து⁴தங்க³வதேஹி ச உபபன்னோ ஸம்பன்னோ ஸமன்னாக³தோதி ஸீலவதூபபன்னோ. இதி ப⁴க³வா ‘‘லோகானுகம்பா நாம ஹிதஜ்ஜா²ஸயேன த⁴ம்மதே³ஸனா, ஸா ச இமேஸு ஏவ தீஸு புக்³க³லேஸு படிப³த்³தா⁴’’தி த³ஸ்ஸேதி. ஸேஸங் ஸுவிஞ்ஞெய்யமேவ.
Tasseva satthu sāvakoti tasseva yathāvuttaguṇassa satthu sammāsambuddhassa dhammadesanāya savanante jāto dhammasenāpatisadiso sāvako, na pūraṇādi viya paṭiññāmattena satthu sāvako. Pāṭipadoti paṭipadāsaṅkhātena ariyamaggena ariyāya jātiyā jāto bhavoti pāṭipado, aniṭṭhitapaṭipattikicco paṭipajjamānoti attho. Suttageyyādi pariyattidhammo bahuṃ suto etenāti bahussuto. Pātimokkhasaṃvarādisīlena ceva āraññikaṅgādidhutaṅgavatehi ca upapanno sampanno samannāgatoti sīlavatūpapanno. Iti bhagavā ‘‘lokānukampā nāma hitajjhāsayena dhammadesanā, sā ca imesu eva tīsu puggalesu paṭibaddhā’’ti dasseti. Sesaṃ suviññeyyameva.
கா³தா²ஸு தஸ்ஸன்வயோதி தஸ்ஸேவ ஸத்து² படிபத்தியா த⁴ம்மதே³ஸனாய ச அனுக³மனேன தஸ்ஸன்வயோ அனுஜாதோ. அவிஜ்ஜந்த⁴காரங் வித⁴மித்வா ஸபரஸந்தானேஸு த⁴ம்மாலோகஸங்கா²தாய பபா⁴ய கரணதோ பப⁴ங்கரா. த⁴ம்மமுதீ³ரயந்தாதி சதுஸச்சத⁴ம்மங் கதெ²ந்தா. அபாபுரந்தீதி உக்³கா⁴டெந்தி. அமதஸ்ஸ நிப்³பா³னஸ்ஸ. த்³வாரங் அரியமக்³க³ங். யோகா³தி காமயோகா³தி³தோ. ஸத்த²வாஹேனாதி வேனெய்யஸத்த²வாஹனதோ ப⁴வகந்தாரனித்த²ரணதோ ஸத்த²வாஹோ, ப⁴க³வா, தேன ஸத்த²வாஹேன. ஸுதே³ஸிதங் மக்³க³மனுக்கமந்தீதி தேன ஸம்மா தே³ஸிதங் அரியமக்³க³ங் தஸ்ஸ தே³ஸனானுஸாரேன அனுக³ச்ச²ந்தி படிபஜ்ஜந்தி. இதே⁴வாதி இமஸ்மிங்யேவ அத்தபா⁴வே. ஸேஸங் உத்தானமேவ.
Gāthāsu tassanvayoti tasseva satthu paṭipattiyā dhammadesanāya ca anugamanena tassanvayo anujāto. Avijjandhakāraṃ vidhamitvā saparasantānesu dhammālokasaṅkhātāya pabhāya karaṇato pabhaṅkarā. Dhammamudīrayantāti catusaccadhammaṃ kathentā. Apāpurantīti ugghāṭenti. Amatassa nibbānassa. Dvāraṃ ariyamaggaṃ. Yogāti kāmayogādito. Satthavāhenāti veneyyasatthavāhanato bhavakantāranittharaṇato satthavāho, bhagavā, tena satthavāhena. Sudesitaṃ maggamanukkamantīti tena sammā desitaṃ ariyamaggaṃ tassa desanānusārena anugacchanti paṭipajjanti. Idhevāti imasmiṃyeva attabhāve. Sesaṃ uttānameva.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 5. ப³ஹுஜனஹிதஸுத்தங் • 5. Bahujanahitasuttaṃ
