| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. ப³ஹுகாரஸுத்தங்
4. Bahukārasuttaṃ
24. ‘‘தயோமே , பி⁴க்க²வே, புக்³க³லா புக்³க³லஸ்ஸ ப³ஹுகாரா. கதமே தயோ? யங், பி⁴க்க²வே, புக்³க³லங் ஆக³ம்ம புக்³க³லோ பு³த்³த⁴ங் ஸரணங் க³தோ ஹோதி, த⁴ம்மங் ஸரணங் க³தோ ஹோதி, ஸங்க⁴ங் ஸரணங் க³தோ ஹோதி; அயங், பி⁴க்க²வே, புக்³க³லோ இமஸ்ஸ புக்³க³லஸ்ஸ ப³ஹுகாரோ.
24. ‘‘Tayome , bhikkhave, puggalā puggalassa bahukārā. Katame tayo? Yaṃ, bhikkhave, puggalaṃ āgamma puggalo buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti; ayaṃ, bhikkhave, puggalo imassa puggalassa bahukāro.
‘‘புன சபரங், பி⁴க்க²வே, யங் புக்³க³லங் ஆக³ம்ம புக்³க³லோ ‘இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி; அயங், பி⁴க்க²வே, புக்³க³லோ இமஸ்ஸ புக்³க³லஸ்ஸ ப³ஹுகாரோ.
‘‘Puna caparaṃ, bhikkhave, yaṃ puggalaṃ āgamma puggalo ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti; ayaṃ, bhikkhave, puggalo imassa puggalassa bahukāro.
‘‘புன சபரங், பி⁴க்க²வே, யங் புக்³க³லங் ஆக³ம்ம புக்³க³லோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி; அயங், பி⁴க்க²வே, புக்³க³லோ இமஸ்ஸ புக்³க³லஸ்ஸ ப³ஹுகாரோ. இமே கோ², பி⁴க்க²வே, தயோ புக்³க³லா புக்³க³லஸ்ஸ ப³ஹுகாரா.
‘‘Puna caparaṃ, bhikkhave, yaṃ puggalaṃ āgamma puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ayaṃ, bhikkhave, puggalo imassa puggalassa bahukāro. Ime kho, bhikkhave, tayo puggalā puggalassa bahukārā.
‘‘இமேஹி ச பன, பி⁴க்க²வே, தீஹி புக்³க³லேஹி இமஸ்ஸ புக்³க³லஸ்ஸ நத்த²ஞ்ஞோ புக்³க³லோ ப³ஹுகாரோதி வதா³மி. இமேஸங் பன, பி⁴க்க²வே, திண்ணங் புக்³க³லானங் இமினா புக்³க³லேன ந ஸுப்பதிகாரங் வதா³மி, யதி³த³ங் அபி⁴வாத³னபச்சுட்டா²னஅஞ்ஜலிகம்மஸாமீசிகம்மசீவரபிண்ட³பாதஸேனாஸன-கி³லானபச்சயபே⁴ஸஜ்ஜபரிக்கா²ரானுப்பதா³னேனா’’தி. சதுத்த²ங்.
‘‘Imehi ca pana, bhikkhave, tīhi puggalehi imassa puggalassa natthañño puggalo bahukāroti vadāmi. Imesaṃ pana, bhikkhave, tiṇṇaṃ puggalānaṃ iminā puggalena na suppatikāraṃ vadāmi, yadidaṃ abhivādanapaccuṭṭhānaañjalikammasāmīcikammacīvarapiṇḍapātasenāsana-gilānapaccayabhesajjaparikkhārānuppadānenā’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. ப³ஹுகாரஸுத்தவண்ணனா • 4. Bahukārasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. ப³ஹுகாரஸுத்தவண்ணனா • 4. Bahukārasuttavaṇṇanā
