| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
8. ப³ஹுகாரஸுத்தவண்ணனா
8. Bahukārasuttavaṇṇanā
107. அட்ட²மே ப்³ராஹ்மணக³ஹபதிகாதி ப்³ராஹ்மணா சேவ க³ஹபதிகா ச. ட²பெத்வா ப்³ராஹ்மணே யே கேசி அகா³ரங் அஜ்ஜா²வஸந்தா இத⁴ க³ஹபதிகாதி வேதி³தப்³பா³ . யேதி அனியமதோ நித்³தி³ட்ட²பராமஸனங். வோதி உபயோக³ப³ஹுவசனங். அயஞ்ஹெத்த² ஸங்கே²பத்தோ² – பி⁴க்க²வே, தும்ஹாகங் ப³ஹூபகாரா ப்³ராஹ்மணக³ஹபதிகா, யே ப்³ராஹ்மணா சேவ ஸேஸஅகா³ரிகா ச ‘‘தும்ஹே ஏவ அம்ஹாகங் புஞ்ஞக்கெ²த்தங், யத்த² மயங் உத்³த⁴க்³கி³கங் த³க்கி²ணங் பதிட்டா²பேம ஸோவக்³கி³கங் ஸுக²விபாகங் ஸக்³க³ஸங்வத்தனிக’’ந்தி சீவராதீ³ஹி பச்சயேஹி பதிஉபட்டி²தாதி.
107. Aṭṭhame brāhmaṇagahapatikāti brāhmaṇā ceva gahapatikā ca. Ṭhapetvā brāhmaṇe ye keci agāraṃ ajjhāvasantā idha gahapatikāti veditabbā . Yeti aniyamato niddiṭṭhaparāmasanaṃ. Voti upayogabahuvacanaṃ. Ayañhettha saṅkhepattho – bhikkhave, tumhākaṃ bahūpakārā brāhmaṇagahapatikā, ye brāhmaṇā ceva sesaagārikā ca ‘‘tumhe eva amhākaṃ puññakkhettaṃ, yattha mayaṃ uddhaggikaṃ dakkhiṇaṃ patiṭṭhāpema sovaggikaṃ sukhavipākaṃ saggasaṃvattanika’’nti cīvarādīhi paccayehi patiupaṭṭhitāti.
ஏவங் ‘‘ஆமிஸதா³னேன ஆமிஸஸங்விபா⁴கே³ன ஆமிஸானுக்³க³ஹேன க³ஹட்டா² பி⁴க்கூ²னங் உபகாரவந்தோ’’தி த³ஸ்ஸெத்வா இதா³னி த⁴ம்மதா³னேன த⁴ம்மஸங்விபா⁴கே³ன த⁴ம்மானுக்³க³ஹேன பி⁴க்கூ²னம்பி தேஸங் உபகாரவந்ததங் த³ஸ்ஸேதுங் ‘‘தும்ஹேபி, பி⁴க்க²வே,’’திஆதி³ வுத்தங், தங் வுத்தனயமேவ.
Evaṃ ‘‘āmisadānena āmisasaṃvibhāgena āmisānuggahena gahaṭṭhā bhikkhūnaṃ upakāravanto’’ti dassetvā idāni dhammadānena dhammasaṃvibhāgena dhammānuggahena bhikkhūnampi tesaṃ upakāravantataṃ dassetuṃ ‘‘tumhepi, bhikkhave,’’tiādi vuttaṃ, taṃ vuttanayameva.
இமினா கிங் கதி²தங்? பிண்டா³பசாயனங் நாம கதி²தங். அயஞ்ஹெத்த² அதி⁴ப்பாயோ – பி⁴க்க²வே, யஸ்மா இமே ப்³ராஹ்மணக³ஹபதிகா நேவ தும்ஹாகங் ஞாதகா, ந மித்தா, ந இணங் வா தா⁴ரெந்தி, அத² கோ² ‘‘இமே ஸமணா ஸம்மக்³க³தா ஸம்மா படிபன்னா, எத்த² நோ காரா மஹப்ப²லா ப⁴விஸ்ஸந்தி மஹானிஸங்ஸா’’தி ப²லவிஸேஸங் ஆகங்க²ந்தா தும்ஹே சீவராதீ³ஹி உபட்ட²ஹந்தி. தஸ்மா தங் தேஸங் அதி⁴ப்பாயங் பரிபூரெந்தா அப்பமாதே³ன ஸம்பாதே³த², த⁴ம்மதே³ஸனாபி வோ காரகானங்யேவ ஸோப⁴தி, ஆதெ³ய்யா ச ஹோதி, ந இதரேஸந்தி ஏவங் ஸம்மாபடிபத்தியங் அப்பமாதோ³ கரணீயோதி.
Iminā kiṃ kathitaṃ? Piṇḍāpacāyanaṃ nāma kathitaṃ. Ayañhettha adhippāyo – bhikkhave, yasmā ime brāhmaṇagahapatikā neva tumhākaṃ ñātakā, na mittā, na iṇaṃ vā dhārenti, atha kho ‘‘ime samaṇā sammaggatā sammā paṭipannā, ettha no kārā mahapphalā bhavissanti mahānisaṃsā’’ti phalavisesaṃ ākaṅkhantā tumhe cīvarādīhi upaṭṭhahanti. Tasmā taṃ tesaṃ adhippāyaṃ paripūrentā appamādena sampādetha, dhammadesanāpi vo kārakānaṃyeva sobhati, ādeyyā ca hoti, na itaresanti evaṃ sammāpaṭipattiyaṃ appamādo karaṇīyoti.
ஏவமித³ங், பி⁴க்க²வேதிஆதீ³ஸு அயங் ஸங்கே²பத்தோ² – பி⁴க்க²வே, ஏவங் இமினா வுத்தப்பகாரேன க³ஹட்ட²பப்³ப³ஜிதேஹி ஆமிஸதா³னத⁴ம்மதா³னவஸேன அஞ்ஞமஞ்ஞங் ஸன்னிஸ்ஸாய காமாதி³வஸேன சதுப்³பி³த⁴ஸ்ஸபி ஓக⁴ஸ்ஸ நித்த²ரணத்தா²ய ஸகலஸ்ஸபி வட்டது³க்க²ஸ்ஸ ஸம்மதே³வ பரியோஸானகரணாய உபோஸத²ஸீலனியமாதி³வஸேன சதுபாரிஸுத்³தி⁴ஸீலாதி³வஸேன வா இத³ங் ஸாஸனப்³ரஹ்மசரியங் மக்³க³ப்³ரஹ்மசரியஞ்ச வுஸ்ஸதி சரீயதீதி.
Evamidaṃ, bhikkhavetiādīsu ayaṃ saṅkhepattho – bhikkhave, evaṃ iminā vuttappakārena gahaṭṭhapabbajitehi āmisadānadhammadānavasena aññamaññaṃ sannissāya kāmādivasena catubbidhassapi oghassa nittharaṇatthāya sakalassapi vaṭṭadukkhassa sammadeva pariyosānakaraṇāya uposathasīlaniyamādivasena catupārisuddhisīlādivasena vā idaṃ sāsanabrahmacariyaṃ maggabrahmacariyañca vussati carīyatīti.
கா³தா²ஸு ஸாகா³ராதி க³ஹட்டா². அனகா³ராதி பரிச்சத்தஅகா³ரா பப்³ப³ஜிதா. உபோ⁴ அஞ்ஞோஞ்ஞனிஸ்ஸிதாதி தே உபோ⁴பி அஞ்ஞமஞ்ஞஸன்னிஸ்ஸிதா. ஸாகா³ரா ஹி அனகா³ரானங் த⁴ம்மதா³னஸன்னிஸ்ஸிதா, அனகா³ரா ச ஸாகா³ரானங் பச்சயதா³னஸன்னிஸ்ஸிதா. ஆராத⁴யந்தீதி ஸாதெ⁴ந்தி ஸம்பாதெ³ந்தி. ஸத்³த⁴ம்மந்தி படிபத்திஸத்³த⁴ம்மங் படிவேத⁴ஸத்³த⁴ம்மஞ்ச. தத்த² யங் உத்தமங், தங் த³ஸ்ஸெந்தோ ஆஹ ‘‘யோக³க்கே²மங் அனுத்தர’’ந்தி அரஹத்தங் நிப்³பா³னஞ்ச. ஸாகா³ரேஸூதி ஸாகா³ரேஹி, நிஸ்ஸக்கே இத³ங் பு⁴ம்மவசனங், ஸாகா³ரானங் வா ஸந்திகே. பச்சயந்தி வுத்தாவஸேஸங் து³வித⁴ங் பச்சயங் பிண்ட³பாதங் பே⁴ஸஜ்ஜஞ்ச. பரிஸ்ஸயவினோத³னந்தி உதுபரிஸ்ஸயாதி³பரிஸ்ஸயஹரணங் விஹாராதி³ஆவஸத²ங். ஸுக³தந்தி ஸம்மா படிபன்னங் கல்யாணபுது²ஜ்ஜனேன ஸத்³தி⁴ங் அட்ட²வித⁴ங் அரியபுக்³க³லங். ஸாவகோ ஹி இத⁴ ஸுக³தோதி அதி⁴ப்பேதோ. க⁴ரமேஸினோதி க⁴ரங் ஏஸினோ, கே³ஹே ட²த்வா க⁴ராவாஸங் வஸந்தா போ⁴கூ³பகரணானி சேவ க³ஹட்ட²ஸீலாதீ³னி ச ஏஸனஸீலாதி அத்தோ². ஸத்³த³ஹானோ அரஹதந்தி அரஹந்தானங் அரியானங் வசனங், தேஸங் வா ஸம்மாபடிபத்திங் ஸத்³த³ஹந்தா. ‘‘அத்³தா⁴ இமே ஸம்மா படிபன்னா, யதா² இமே கதெ²ந்தி, ததா² படிபஜ்ஜந்தானங் ஸா படிபத்தி ஸக்³க³மொக்க²ஸம்பத்தியா ஸங்வத்ததீ’’தி அபி⁴ஸத்³த³ஹந்தாதி அத்தோ². ‘‘ஸத்³த³ஹந்தா’’திபி பாடோ². அரியபஞ்ஞாயாதி ஸுவிஸுத்³த⁴பஞ்ஞாய. ஜா²யினோதி ஆரம்மணலக்க²ணூபனிஜ்ஜா²னவஸேன து³விதே⁴னபி ஜா²னேன ஜா²யினோ.
Gāthāsu sāgārāti gahaṭṭhā. Anagārāti pariccattaagārā pabbajitā. Ubho aññoññanissitāti te ubhopi aññamaññasannissitā. Sāgārā hi anagārānaṃ dhammadānasannissitā, anagārā ca sāgārānaṃ paccayadānasannissitā. Ārādhayantīti sādhenti sampādenti. Saddhammanti paṭipattisaddhammaṃ paṭivedhasaddhammañca. Tattha yaṃ uttamaṃ, taṃ dassento āha ‘‘yogakkhemaṃanuttara’’nti arahattaṃ nibbānañca. Sāgāresūti sāgārehi, nissakke idaṃ bhummavacanaṃ, sāgārānaṃ vā santike. Paccayanti vuttāvasesaṃ duvidhaṃ paccayaṃ piṇḍapātaṃ bhesajjañca. Parissayavinodananti utuparissayādiparissayaharaṇaṃ vihārādiāvasathaṃ. Sugatanti sammā paṭipannaṃ kalyāṇaputhujjanena saddhiṃ aṭṭhavidhaṃ ariyapuggalaṃ. Sāvako hi idha sugatoti adhippeto. Gharamesinoti gharaṃ esino, gehe ṭhatvā gharāvāsaṃ vasantā bhogūpakaraṇāni ceva gahaṭṭhasīlādīni ca esanasīlāti attho. Saddahāno arahatanti arahantānaṃ ariyānaṃ vacanaṃ, tesaṃ vā sammāpaṭipattiṃ saddahantā. ‘‘Addhā ime sammā paṭipannā, yathā ime kathenti, tathā paṭipajjantānaṃ sā paṭipatti saggamokkhasampattiyā saṃvattatī’’ti abhisaddahantāti attho. ‘‘Saddahantā’’tipi pāṭho. Ariyapaññāyāti suvisuddhapaññāya. Jhāyinoti ārammaṇalakkhaṇūpanijjhānavasena duvidhenapi jhānena jhāyino.
இத⁴ த⁴ம்மங் சரித்வானாதி இமஸ்மிங் அத்தபா⁴வே, இமஸ்மிங் வா ஸாஸனே லோகியலோகுத்தரஸுக²ஸ்ஸ மக்³க³பூ⁴தங் ஸீலாதி³த⁴ம்மங் படிபஜ்ஜித்வா யாவ பரினிப்³பா³னங் ந பாபுணந்தி, தாவதே³வ ஸுக³திகா³மினோ. நந்தி³னோதி பீதிஸோமனஸ்ஸயோகே³ன நந்த³னஸீலா. கேசி பன ‘‘த⁴ம்மங் சரித்வான மக்³க³ந்தி ஸோதாபத்திமக்³க³ங் பாபுணித்வா’’தி வத³ந்தி. தே³வலோகஸ்மிந்தி ச²ப்³பி³தே⁴பி காமாவசரதே³வலோகே. மோத³ந்தி காமகாமினோதி யதி²ச்சி²தவத்து²னிப்ப²த்திதோ காமகாமினோ காமவந்தோ ஹுத்வா பமோத³ந்தீதி.
Idha dhammaṃ caritvānāti imasmiṃ attabhāve, imasmiṃ vā sāsane lokiyalokuttarasukhassa maggabhūtaṃ sīlādidhammaṃ paṭipajjitvā yāva parinibbānaṃ na pāpuṇanti, tāvadeva sugatigāmino. Nandinoti pītisomanassayogena nandanasīlā. Keci pana ‘‘dhammaṃ caritvāna magganti sotāpattimaggaṃ pāpuṇitvā’’ti vadanti. Devalokasminti chabbidhepi kāmāvacaradevaloke. Modanti kāmakāminoti yathicchitavatthunipphattito kāmakāmino kāmavanto hutvā pamodantīti.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 8. ப³ஹுகாரஸுத்தங் • 8. Bahukārasuttaṃ
