| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. ப³ஹுவேத³னீயஸுத்தவண்ணனா
9. Bahuvedanīyasuttavaṇṇanā
88. ஏவங் மே ஸுதந்தி ப³ஹுவேத³னீயஸுத்தங். தத்த² பஞ்சகங்கோ³ த²பதீதி பஞ்சகங்கோ³தி தஸ்ஸ நாமங். வாஸிப²ரஸுனிகா²த³னத³ண்ட³முக்³க³ரகாளஸுத்தனாளிஸங்கா²தேஹி வா அங்கே³ஹி ஸமன்னாக³தத்தா ஸோ பஞ்சங்கோ³தி பஞ்ஞாதோ. த²பதீதி வட்³ட⁴கீஜெட்ட²கோ. உதா³யீதி பண்டி³தஉதா³யித்தே²ரோ.
88.Evaṃme sutanti bahuvedanīyasuttaṃ. Tattha pañcakaṅgo thapatīti pañcakaṅgoti tassa nāmaṃ. Vāsipharasunikhādanadaṇḍamuggarakāḷasuttanāḷisaṅkhātehi vā aṅgehi samannāgatattā so pañcaṅgoti paññāto. Thapatīti vaḍḍhakījeṭṭhako. Udāyīti paṇḍitaudāyitthero.
89. பரியாயந்தி காரணங். த்³வேபானந்தா³தி த்³வேபி, ஆனந்த³. பரியாயேனாதி காரணேன. எத்த² ச காயிகசேதஸிகவஸேன த்³வே வேதி³தப்³பா³. ஸுகா²தி³வஸேன திஸ்ஸோ, இந்த்³ரியவஸேன ஸுகி²ந்த்³ரியாதி³கா பஞ்ச, த்³வாரவஸேன சக்கு²ஸம்ப²ஸ்ஸஜாதி³கா ச², உபவிசாரவஸேன ‘‘சக்கு²னா ரூபங் தி³ஸ்வா ஸோமனஸ்ஸட்டா²னியங் ரூபங் உபவிசரதீ’’திஆதி³கா அட்டா²ரஸ, ச² கே³ஹஸ்ஸிதானி ஸோமனஸ்ஸானி, ச² நெக்க²ம்மஸிதானி ஸோமனஸ்ஸானி, ச² கே³ஹஸ்ஸிதானி தோ³மனஸ்ஸானி, ச² நெக்க²ம்மஸிதானி தோ³மனஸ்ஸானி, ச² கே³ஹஸ்ஸிதா உபெக்கா², ச² நெக்க²ம்மஸிதாதி ஏவங் ச²த்திங்ஸ, தா அதீதே ச²த்திங்ஸ, அனாக³தே ச²த்திங்ஸ, பச்சுப்பன்னே ச²த்திங்ஸாதி ஏவங் அட்ட²வேத³னாஸதங் வேதி³தப்³ப³ங்.
89.Pariyāyanti kāraṇaṃ. Dvepānandāti dvepi, ānanda. Pariyāyenāti kāraṇena. Ettha ca kāyikacetasikavasena dve veditabbā. Sukhādivasena tisso, indriyavasena sukhindriyādikā pañca, dvāravasena cakkhusamphassajādikā cha, upavicāravasena ‘‘cakkhunā rūpaṃ disvā somanassaṭṭhāniyaṃ rūpaṃ upavicaratī’’tiādikā aṭṭhārasa, cha gehassitāni somanassāni, cha nekkhammasitāni somanassāni, cha gehassitāni domanassāni, cha nekkhammasitāni domanassāni, cha gehassitā upekkhā, cha nekkhammasitāti evaṃ chattiṃsa, tā atīte chattiṃsa, anāgate chattiṃsa, paccuppanne chattiṃsāti evaṃ aṭṭhavedanāsataṃ veditabbaṃ.
90. பஞ்ச கோ² இமே, ஆனந்த³, காமகு³ணாதி அயங் பாடிஏக்கோ அனுஸந்தி⁴. ந கேவலம்பி த்³வே ஆதி³ங் கத்வா வேத³னா ப⁴க³வதா பஞ்ஞத்தா, பரியாயேன ஏகாபி வேத³னா கதி²தா. தங் த³ஸ்ஸெந்தோ பஞ்சகங்க³ஸ்ஸ த²பதினோ வாத³ங் உபத்த²ம்பே⁴துங் இமங் தே³ஸனங் ஆரபி⁴.
90.Pañca kho ime, ānanda, kāmaguṇāti ayaṃ pāṭiekko anusandhi. Na kevalampi dve ādiṃ katvā vedanā bhagavatā paññattā, pariyāyena ekāpi vedanā kathitā. Taṃ dassento pañcakaṅgassa thapatino vādaṃ upatthambhetuṃ imaṃ desanaṃ ārabhi.
அபி⁴க்கந்ததரந்தி ஸுந்த³ரதரங். பணீததரந்தி அதப்பகதரங். எத்த² ச சதுத்த²ஜ்ஜா²னதோ பட்டா²ய அது³க்க²மஸுகா² வேத³னா, ஸாபி ஸந்தட்டே²ன பணீதட்டே²ன ச ஸுக²ந்தி வுத்தா. ச² கே³ஹஸ்ஸிதானி ஸுக²ந்தி வுத்தானி. நிரோதோ⁴ அவேத³யிதஸுக²வஸேன ஸுக²ங் நாம ஜாதோ. பஞ்சகாமகு³ணவஸேன ஹி அட்ட²ஸமாபத்திவஸேன ச உப்பன்னங் வேத³யிதஸுக²ங் நாம. நிரோதோ⁴ அவேத³யிதஸுக²ங் நாம. இதி வேத³யிதஸுக²ங் வா ஹோது அவேத³யிதஸுக²ங் வா, தங் நித்³து³க்க²பா⁴வஸங்கா²தேன ஸுக²ட்டே²ன ஏகந்தஸுக²மேவ ஜாதங்.
Abhikkantataranti sundarataraṃ. Paṇītataranti atappakataraṃ. Ettha ca catutthajjhānato paṭṭhāya adukkhamasukhā vedanā, sāpi santaṭṭhena paṇītaṭṭhena ca sukhanti vuttā. Cha gehassitāni sukhanti vuttāni. Nirodho avedayitasukhavasena sukhaṃ nāma jāto. Pañcakāmaguṇavasena hi aṭṭhasamāpattivasena ca uppannaṃ vedayitasukhaṃ nāma. Nirodho avedayitasukhaṃ nāma. Iti vedayitasukhaṃ vā hotu avedayitasukhaṃ vā, taṃ niddukkhabhāvasaṅkhātena sukhaṭṭhena ekantasukhameva jātaṃ.
91. யத்த² யத்தா²தி யஸ்மிங் யஸ்மிங் டா²னே. ஸுக²ங் உபலப்³ப⁴தீதி வேத³யிதஸுக²ங் வா அவேத³யிதஸுக²ங் வா உபலப்³ப⁴தி. தங் தங் ததா²க³தோ ஸுக²ஸ்மிங் பஞ்ஞபேதீதி தங் ஸப்³ப³ங் ததா²க³தோ நித்³து³க்க²பா⁴வங் ஸுக²ஸ்மிங்யேவ பஞ்ஞபேதீதி. இத⁴ ப⁴க³வா நிரோத⁴ஸமாபத்திங் ஸீஸங் கத்வா நெய்யபுக்³க³லவஸேன அரஹத்தனிகூடேனேவ தே³ஸனங் நிட்டா²பேஸீதி.
91.Yatthayatthāti yasmiṃ yasmiṃ ṭhāne. Sukhaṃ upalabbhatīti vedayitasukhaṃ vā avedayitasukhaṃ vā upalabbhati. Taṃ taṃ tathāgato sukhasmiṃ paññapetīti taṃ sabbaṃ tathāgato niddukkhabhāvaṃ sukhasmiṃyeva paññapetīti. Idha bhagavā nirodhasamāpattiṃ sīsaṃ katvā neyyapuggalavasena arahattanikūṭeneva desanaṃ niṭṭhāpesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ப³ஹுவேத³னீயஸுத்தவண்ணனா நிட்டி²தா.
Bahuvedanīyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. ப³ஹுவேத³னீயஸுத்தங் • 9. Bahuvedanīyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. ப³ஹுவேத³னியஸுத்தவண்ணனா • 9. Bahuvedaniyasuttavaṇṇanā
