| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ப³கப்³ரஹ்மஸுத்தவண்ணனா
4. Bakabrahmasuttavaṇṇanā
175. ‘‘ஸஸ்ஸதோ அத்தா ச லோகோ சா’’தி ஏவங் பவத்தா தி³ட்டி² ஸஸ்ஸததி³ட்டி². ஸஹ காயேனாதி ஸஹ தேன ப்³ரஹ்மத்தபா⁴வேன. ப்³ரஹ்மட்டா²னந்தி அத்தனோ ப்³ரஹ்மவத்து²ங். அனிச்சங் ‘‘நிச்ச’’ந்தி வத³தி அனிச்சதாய அத்தனோ அபஞ்ஞாயமானத்தா. தி²ரந்தி த³ள்ஹங், வினாஸாபா⁴வதோ ஸாரபூ⁴தந்தி அத்தோ². உப்பாத³விபரிணாமாபா⁴வதோ ஸதா³ விஜ்ஜமானங். கேவலந்தி பரிபுண்ணங். தேனாஹ ‘‘அக²ண்ட³’’ந்தி. கேவலந்தி வா ஜாதிஆதீ³ஹி அஸம்மிஸ்ஸங், விரஹிதந்தி அதி⁴ப்பாயோ. உப்பாதா³தீ³னங் அபா⁴வதோ ஏவ அசவனத⁴ம்மங். கோசி ஜாயனகோ…பே॰… உபபஜ்ஜனகோ வா நத்தி² நிச்சபா⁴வதோ டா²னேன ஸத்³தி⁴ங் தன்னிவாஸீனங். நிச்சபா⁴வஞ்ஹி ஸோ படிஜானாதி. திஸ்ஸோ ஜா²னபூ⁴மியோதி து³தியததியசதுத்த²ஜ்ஜா²னபூ⁴மியோ. சதுத்த²ஜ்ஜா²னபூ⁴மிவிஸேஸா ஹி அஸஞ்ஞஸுத்³தா⁴வாஸாருப்பப⁴வா. நிப்³பா³னந்தி வா எத்த² இதி-ஸத்³தோ³ ஆதி³அத்தோ², ந பரிஸமாபனத்தோ², தஸ்மா ‘‘ஸப்³ப³’’ந்தி இமினா ‘‘அஸஞ்ஞ…பே॰… ப⁴வா’’தி வுத்தங் ஸங்க³ண்ஹாதி. படிபா³ஹதீதி ஸந்தங்யேவ ஸமானங் அஜானந்தோவ ‘‘நத்தீ²’’தி படிக்கி²பதி. ஏகே உத்தரவிஹாரவாஸினோ.
175. ‘‘Sassato attā ca loko cā’’ti evaṃ pavattā diṭṭhi sassatadiṭṭhi. Saha kāyenāti saha tena brahmattabhāvena. Brahmaṭṭhānanti attano brahmavatthuṃ. Aniccaṃ ‘‘nicca’’nti vadati aniccatāya attano apaññāyamānattā. Thiranti daḷhaṃ, vināsābhāvato sārabhūtanti attho. Uppādavipariṇāmābhāvato sadā vijjamānaṃ. Kevalanti paripuṇṇaṃ. Tenāha ‘‘akhaṇḍa’’nti. Kevalanti vā jātiādīhi asammissaṃ, virahitanti adhippāyo. Uppādādīnaṃ abhāvato eva acavanadhammaṃ. Koci jāyanako…pe… upapajjanako vā natthi niccabhāvato ṭhānena saddhiṃ tannivāsīnaṃ. Niccabhāvañhi so paṭijānāti. Tisso jhānabhūmiyoti dutiyatatiyacatutthajjhānabhūmiyo. Catutthajjhānabhūmivisesā hi asaññasuddhāvāsāruppabhavā. Nibbānanti vā ettha iti-saddo ādiattho, na parisamāpanattho, tasmā ‘‘sabba’’nti iminā ‘‘asañña…pe… bhavā’’ti vuttaṃ saṅgaṇhāti. Paṭibāhatīti santaṃyeva samānaṃ ajānantova ‘‘natthī’’ti paṭikkhipati. Eke uttaravihāravāsino.
ஹெட்டூ²பபத்திகோதி ஹெட்டா² பூ⁴மீஸு உப்பன்னஉபபத்திகோ. இதா³னி தமத்த²ங் விவரிதுங் ‘‘அனுப்பன்னே’’திஆதி³ வுத்தங். ஹெட்டு²பபத்திகங் கத்வாதி யதா²டி²தபூ⁴மிதோ ஹெட்டா² ததியஜ்ஜா²னபூ⁴மியங் உபபத்திஜா²னங் கத்வா, ந உபரிஜா²னஸ்ஸ விய பத்த²னாமத்தந்தி அதி⁴ப்பாயோ. பட²மகாலேதி தஸ்மிங் ப⁴வே பட²மகாலே. அஞ்ஞாஸி ஆஸன்னபா⁴வதோ. உப⁴யந்தி தங் தங் அத்தனா கதகம்மஞ்சேவ நிப்³ப³த்தட்டா²னஞ்சாதி உப⁴யங். பமுஸ்ஸித்வா நிப்³ப³த்திங் அனுபதா⁴ரெந்தோ.
Heṭṭhūpapattikoti heṭṭhā bhūmīsu uppannaupapattiko. Idāni tamatthaṃ vivarituṃ ‘‘anuppanne’’tiādi vuttaṃ. Heṭṭhupapattikaṃ katvāti yathāṭhitabhūmito heṭṭhā tatiyajjhānabhūmiyaṃ upapattijhānaṃ katvā, na uparijhānassa viya patthanāmattanti adhippāyo. Paṭhamakāleti tasmiṃ bhave paṭhamakāle. Aññāsi āsannabhāvato. Ubhayanti taṃ taṃ attanā katakammañceva nibbattaṭṭhānañcāti ubhayaṃ. Pamussitvā nibbattiṃ anupadhārento.
அவிஜ்ஜாய க³தோதி அவிஜ்ஜாய ஸஹ பவத்தோ. ஸஹயோகே³ ஹி இத³ங் கரணவசனங். தேனாஹ ‘‘ஸமன்னாக³தோ’’தி. அஞ்ஞாணீதி அவித்³வா. பஞ்ஞாசக்கு²விரஹதோ அந்தீ⁴பூ⁴தோ, அந்த⁴பா⁴வங் ஆபன்னோதி அத்தோ². அனாக³தே ஸத்³தோ³ ஹோதாயங் ‘‘வக்க²தீ’’தி யத்ரஸத்³த³பயோகே³ன, அத்தோ² பன வத்தமானகாலிகோ. தேனாஹ ‘‘ப⁴ணதீ’’தி. தேனாஹ ‘‘யத்ரா’’திஆதி³.
Avijjāya gatoti avijjāya saha pavatto. Sahayoge hi idaṃ karaṇavacanaṃ. Tenāha ‘‘samannāgato’’ti. Aññāṇīti avidvā. Paññācakkhuvirahato andhībhūto, andhabhāvaṃ āpannoti attho. Anāgate saddo hotāyaṃ ‘‘vakkhatī’’ti yatrasaddapayogena, attho pana vattamānakāliko. Tenāha ‘‘bhaṇatī’’ti. Tenāha ‘‘yatrā’’tiādi.
மக்³க³சோரோதி மக்³க³பரிபு³ந்த⁴கசோரோ. ஸந்தஜ்ஜியமானோதி ‘‘அவிஜ்ஜாக³தோ வத, போ⁴, ப³கோ ப்³ரஹ்மா’’திஆதி³னா ஸந்தஜ்ஜியமானோ. ஸதிங் லபி⁴த்வாதி தேனேவ ஸந்தஜ்ஜனேன யோனிஸோ உம்முஜ்ஜித்வா புரிமஜாதிவிஸயங் ஸதிங் லபி⁴த்வா. நிப்பீளிதுகாமோதி க⁴ங்ஸேதுகாமோ தோ³ஸங் த³ஸ்ஸேதுகாமோ ‘‘இத³ங் பஸ்ஸ யாவஞ்ச தே அபரத்³த⁴’’ந்தி. புஞ்ஞகம்மாதி புஞ்ஞகாரினோ. வேதே³ஹி ஞாணேஹி க³தத்தா பவத்தத்தா. அந்திமா ப்³ரஹ்முபபத்தீதி ஸப்³ப³பச்சி²மா ப்³ரஹ்மபா⁴வப்பத்தி. அஸ்மாபி⁴ஜப்பந்தீதி அஸ்மே அபி⁴ஜப்பந்தி. ஆயுவண்ணாதி³வஸேன ப்³ரூஹிதகு³ணத்தா ப்³ரஹ்மா. அஞ்ஞேஹி மஹந்தா ப்³ரஹ்மா மஹாப்³ரஹ்மா. அபி⁴பூ⁴தி தங் ப்³ரஹ்மலோகங் ஜெட்ட²கபா⁴வேன அபி⁴ப⁴வித்வா டி²தோ. அனபி⁴பூ⁴தோதி அஞ்ஞேஹி ந அபி⁴பூ⁴தோ. அஞ்ஞத³த்தூ²தி ஏகங்ஸவசனமேதங். த³ஸ்ஸனவஸேன த³ஸோ, ஸப்³ப³ங் பஸ்ஸதீதி அதி⁴ப்பாயோ. வஸவத்தீதி ஸப்³ப³ஜனங் வஸே வத்தேதி. இஸ்ஸரோதி லோகே இஸ்ஸரோ. கத்தா நிம்மாதாதி லோகஸ்ஸ கத்தா நிம்மாதா. ஸெட்டோ² ஸஜிதாதி அயங் லோகஸ்ஸ உத்தமோ ஸங்விப⁴ஜிதா ச. வஸீ பிதா பூ⁴தப⁴ப்³யானந்தி ஆசிண்ணவஸித்தா வஸீ, அயங் பிதா பூ⁴தானங் நிப்³ப³த்தானங் ப⁴ப்³யானங் ஸம்ப⁴வேஸீனந்தி பத்தெ²ந்தி விகத்தெ²ந்தி பிஹெந்தி மானெந்தி.
Maggacoroti maggaparibundhakacoro. Santajjiyamānoti ‘‘avijjāgato vata, bho, bako brahmā’’tiādinā santajjiyamāno. Satiṃ labhitvāti teneva santajjanena yoniso ummujjitvā purimajātivisayaṃ satiṃ labhitvā. Nippīḷitukāmoti ghaṃsetukāmo dosaṃ dassetukāmo ‘‘idaṃ passa yāvañca te aparaddha’’nti. Puññakammāti puññakārino. Vedehi ñāṇehi gatattā pavattattā. Antimā brahmupapattīti sabbapacchimā brahmabhāvappatti. Asmābhijappantīti asme abhijappanti. Āyuvaṇṇādivasena brūhitaguṇattā brahmā. Aññehi mahantā brahmā mahābrahmā. Abhibhūti taṃ brahmalokaṃ jeṭṭhakabhāvena abhibhavitvā ṭhito. Anabhibhūtoti aññehi na abhibhūto. Aññadatthūti ekaṃsavacanametaṃ. Dassanavasena daso, sabbaṃ passatīti adhippāyo. Vasavattīti sabbajanaṃ vase vatteti. Issaroti loke issaro. Kattā nimmātāti lokassa kattā nimmātā. Seṭṭho sajitāti ayaṃ lokassa uttamo saṃvibhajitā ca. Vasī pitā bhūtabhabyānanti āciṇṇavasittā vasī, ayaṃ pitā bhūtānaṃ nibbattānaṃ bhabyānaṃ sambhavesīnanti patthenti vikatthenti pihenti mānenti.
ஏதந்தி விபரீதஸஞ்ஞாவஸேன ‘‘இத³ங் நிச்சங் இத³ங் து⁴வங் இத³ங் ஸஸ்ஸத’’ந்திஆதி³னா வுத்தங் ஏதங் அப்பங் பரித்தகந்தி தங் ப⁴க³வா பரிச்சி²ந்தி³த்வா த³ஸ்ஸேதி. தங் பன ‘‘ஏகஸ்மிங் கோஸலகே திலவாஹே வஸ்ஸஸதே வஸ்ஸஸதே ஏகேகதிலுத்³தா⁴ரே கயிரமானே திலானி பரிக்க²யங் க³ச்ச²ந்தி, ந த்வேவ அப்³பு³தே³ ஆயூ’’தி ஏவங் வுத்தோ அப்³பு³தோ³, தங்வஸேன வீஸதிகு³ணங் நிரப்³பு³தோ³, தேஸங் நிரப்³பு³தா³னங் வஸேன நிரப்³பு³த³ஸதஸஹஸ்ஸங். அயமெத்த² ஸங்கே²போ, வித்தா²ரதோ பன பது³மே ஆயுனோ வஸ்ஸக³ணனா இமஸ்மிங்யேவ ஸங்யுத்தே பரதோ ஆக³மிஸ்ஸதி. அனந்தத³ஸ்ஸீதி அனந்தஸ்ஸ ஞெய்யஸ்ஸ அனவஸேஸதோ த³ஸ்ஸீ. வதஸீலவத்தந்தி ஸமாதா³னவஸேன வதபூ⁴தங் சாரித்தஸீலவஸேன ஸமாசிண்ணத்தா ஸீலவத்தங். தங் பன ஏகமேவாதி ஆஹ ‘‘ஸீலமேவா’’தி.
Etanti viparītasaññāvasena ‘‘idaṃ niccaṃ idaṃ dhuvaṃ idaṃ sassata’’ntiādinā vuttaṃ etaṃ appaṃ parittakanti taṃ bhagavā paricchinditvā dasseti. Taṃ pana ‘‘ekasmiṃ kosalake tilavāhe vassasate vassasate ekekatiluddhāre kayiramāne tilāni parikkhayaṃ gacchanti, na tveva abbude āyū’’ti evaṃ vutto abbudo, taṃvasena vīsatiguṇaṃ nirabbudo, tesaṃ nirabbudānaṃ vasena nirabbudasatasahassaṃ. Ayamettha saṅkhepo, vitthārato pana padume āyuno vassagaṇanā imasmiṃyeva saṃyutte parato āgamissati. Anantadassīti anantassa ñeyyassa anavasesato dassī. Vatasīlavattanti samādānavasena vatabhūtaṃ cārittasīlavasena samāciṇṇattā sīlavattaṃ. Taṃ pana ekamevāti āha ‘‘sīlamevā’’ti.
அபாயேஸீதி எத்த² யதா³ ஸோ பிபாஸிதே மனுஸ்ஸே பானீயங் பாயேஸி, தங் ஸமுதா³க³மதோ பட்டா²ய த³ஸ்ஸேதுங் ‘‘தத்ரா’’திஆதி³ ஆரத்³த⁴ங். புப்³பே³தி புரிமஜாதியங். ஏஸ ப்³ரஹ்மா ‘‘ஜராமரணஸ்ஸ அந்தங் கரிஸ்ஸாமீ’’தி அஜ்ஜா²ஸயவஸேன ஜா²னங் நிப்³ப³த்தெத்வா ப்³ரஹ்மலோகே நிப்³ப³த்தி, ஸோ தத்த² நிப்³பா³னஸஞ்ஞீ அஹோஸி. ஜா²னரதியா வீதினாமேதீதி ததா³ தஸ்ஸா கிரியாய அவிச்சே²த³தோ பவத்திங் உபாதா³ய வத்தமானபயோகோ³. ரத்தந்த⁴காரே புரதோ புரதோ க³ச்ச²ந்தஸ்ஸ ஸகடஸ்ஸ அனுஸ்ஸரணவஸேன க³ச்ச²ந்தானங் ஸகடானங் நிவத்தனங் ஹோதீதி ‘‘ஸப்³ப³ஸகடானி ததே²வ நிவத்தித்வா’’தி வுத்தங்.
Apāyesīti ettha yadā so pipāsite manusse pānīyaṃ pāyesi, taṃ samudāgamato paṭṭhāya dassetuṃ ‘‘tatrā’’tiādi āraddhaṃ. Pubbeti purimajātiyaṃ. Esa brahmā ‘‘jarāmaraṇassa antaṃ karissāmī’’ti ajjhāsayavasena jhānaṃ nibbattetvā brahmaloke nibbatti, so tattha nibbānasaññī ahosi. Jhānaratiyā vītināmetīti tadā tassā kiriyāya avicchedato pavattiṃ upādāya vattamānapayogo. Rattandhakāre purato purato gacchantassa sakaṭassa anussaraṇavasena gacchantānaṃ sakaṭānaṃ nivattanaṃ hotīti ‘‘sabbasakaṭāni tatheva nivattitvā’’ti vuttaṃ.
கம்மஸஜ்ஜாதி யுத்³த⁴ஸஜ்ஜா. விலோபந்தி விலுத்தப⁴ண்ட³ங். ஏணிகூலஸ்மிந்தி எத்த² ‘‘பனிஹதாய நிச்சக³ங்கா³ய நாம’’ந்தி கேசி. ‘‘ஏணிமிக³ப³ஹுலதாய ஸோ க³ங்கா³ய தீரப்பதே³ஸோ ஏணிகூலந்தி வுத்த’’ந்தி அபரே. க³ங்கெ³ய்யகோதி க³ங்கா³ஸன்னிவாஸீ.
Kammasajjāti yuddhasajjā. Vilopanti viluttabhaṇḍaṃ. Eṇikūlasminti ettha ‘‘panihatāya niccagaṅgāya nāma’’nti keci. ‘‘Eṇimigabahulatāya so gaṅgāya tīrappadeso eṇikūlanti vutta’’nti apare. Gaṅgeyyakoti gaṅgāsannivāsī.
ப³த்³த⁴சரோதி படிப³த்³த⁴சரியோ. தேனாஹ ‘‘அந்தேவாஸிகோ’’தி. யஸ்மா பு³த்³தோ⁴ ஸப்³ப³ஞ்ஞூ, தஸ்மா அஞ்ஞாஸி, இத⁴ மய்ஹங் பமுட்ட²ஞ்ச ஸப்³ப³ங் ஜானாஸீதி அதி⁴ப்பாயோ. ஸப்³ப³ங் ப்³ரஹ்மலோகங் ஓபா⁴ஸயந்தோ ஸப்³ப³ம்பிமங் ப்³ரஹ்மலோகங் ப⁴க³வா ஓபா⁴ஸங் அபி⁴ப⁴வித்வா அனஞ்ஞஸாதா⁴ரணங் அத்தனோ ஓபா⁴ஸங் ஓபா⁴ஸெந்தோ திட்ட²தி.
Baddhacaroti paṭibaddhacariyo. Tenāha ‘‘antevāsiko’’ti. Yasmā buddho sabbaññū, tasmā aññāsi, idha mayhaṃ pamuṭṭhañca sabbaṃ jānāsīti adhippāyo. Sabbaṃ brahmalokaṃ obhāsayanto sabbampimaṃ brahmalokaṃ bhagavā obhāsaṃ abhibhavitvā anaññasādhāraṇaṃ attano obhāsaṃ obhāsento tiṭṭhati.
ப³கப்³ரஹ்மஸுத்தவண்ணனா நிட்டி²தா.
Bakabrahmasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ப³கப்³ரஹ்மஸுத்தங் • 4. Bakabrahmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ப³கப்³ரஹ்மஸுத்தவண்ணனா • 4. Bakabrahmasuttavaṇṇanā
