| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. பா³குலஸுத்தவண்ணனா
4. Bākulasuttavaṇṇanā
209. ஏவங் மே ஸுதந்தி பா³குலஸுத்தங். தத்த² பா³குலோதி யதா² த்³வாவீஸதி த்³வத்திங்ஸாதிஆதி³ம்ஹி வத்தப்³பே³ பா³வீஸதி பா³த்திங்ஸாதிஆதீ³னி வுச்சந்தி, ஏவமேவ த்³விகுலோதி வத்தப்³பே³ பா³குலோதி வுத்தங். தஸ்ஸ ஹி தே²ரஸ்ஸ த்³வே குலானி அஹேஸுங். ஸோ கிர தே³வலோகோ சவித்வா கோஸம்பி³னக³ரே நாம மஹாஸெட்டி²குலே நிப்³ப³த்தோ, தமேனங் பஞ்சமே தி³வஸே ஸீஸங் ந்ஹாபெத்வா க³ங்கா³கீளங் அகங்ஸு. தா⁴தியா தா³ரகங் உத³கே நிமுஜ்ஜனும்முஜ்ஜனவஸேன கீளாபெந்தியா ஏகோ மச்சோ² தா³ரகங் தி³ஸ்வா ‘‘ப⁴க்கோ² மே அய’’ந்தி மஞ்ஞமானோ முக²ங் விவரித்வா உபக³தோ. தா⁴தீ தா³ரகங் ச²ட்³டெ³த்வா பலாதா. மச்சோ² தங் கி³லி. புஞ்ஞவா ஸத்தோ து³க்க²ங் ந பாபுணி, ஸயனக³ப்³ப⁴ங் பவிஸித்வா நிபன்னோ விய அஹோஸி. மச்சோ² தா³ரகஸ்ஸ தேஜேன தத்தகபல்லங் கி³லித்வா த³ய்ஹமானோ விய வேகே³ன திங்ஸயோஜனமக்³க³ங் க³ந்த்வா பா³ராணஸினக³ரவாஸினோ மச்ச²ப³ந்த⁴ஸ்ஸ ஜாலங் பாவிஸி, மஹாமச்சா² நாம ஜாலப³த்³தா⁴ பஹரியமானா மரந்தி. அயங் பன தா³ரகஸ்ஸ தேஜேன ஜாலதோ நீஹடமத்தோவ மதோ. மச்ச²ப³ந்தா⁴ ச மஹந்தங் மச்ச²ங் லபி⁴த்வா பா²லெத்வா விக்கிணந்தி. தங் பன தா³ரகஸ்ஸ ஆனுபா⁴வேன அபா²லெத்வா ஸகலமேவ காஜேன ஹரித்வா ஸஹஸ்ஸேன தே³மாதி வத³ந்தா நக³ரே விசரிங்ஸு. கோசி ந க³ண்ஹாதி.
209.Evaṃme sutanti bākulasuttaṃ. Tattha bākuloti yathā dvāvīsati dvattiṃsātiādimhi vattabbe bāvīsati bāttiṃsātiādīni vuccanti, evameva dvikuloti vattabbe bākuloti vuttaṃ. Tassa hi therassa dve kulāni ahesuṃ. So kira devaloko cavitvā kosambinagare nāma mahāseṭṭhikule nibbatto, tamenaṃ pañcame divase sīsaṃ nhāpetvā gaṅgākīḷaṃ akaṃsu. Dhātiyā dārakaṃ udake nimujjanummujjanavasena kīḷāpentiyā eko maccho dārakaṃ disvā ‘‘bhakkho me aya’’nti maññamāno mukhaṃ vivaritvā upagato. Dhātī dārakaṃ chaḍḍetvā palātā. Maccho taṃ gili. Puññavā satto dukkhaṃ na pāpuṇi, sayanagabbhaṃ pavisitvā nipanno viya ahosi. Maccho dārakassa tejena tattakapallaṃ gilitvā dayhamāno viya vegena tiṃsayojanamaggaṃ gantvā bārāṇasinagaravāsino macchabandhassa jālaṃ pāvisi, mahāmacchā nāma jālabaddhā pahariyamānā maranti. Ayaṃ pana dārakassa tejena jālato nīhaṭamattova mato. Macchabandhā ca mahantaṃ macchaṃ labhitvā phāletvā vikkiṇanti. Taṃ pana dārakassa ānubhāvena aphāletvā sakalameva kājena haritvā sahassena demāti vadantā nagare vicariṃsu. Koci na gaṇhāti.
தஸ்மிங் பன நக³ரே அபுத்தகங் அஸீதிகோடிவிப⁴வங் ஸெட்டி²குலங் அத்தி², தஸ்ஸ த்³வாரமூலங் பத்வா ‘‘கிங் க³ஹெத்வா தே³தா²’’தி வுத்தா கஹாபணந்தி ஆஹங்ஸு. தேஹி கஹாபணங் த³த்வா க³ஹிதோ. ஸெட்டி²ப⁴ரியாபி அஞ்ஞேஸு தி³வஸேஸு மச்சே² ந கேலாயதி, தங் தி³வஸங் பன மச்ச²ங் ப²லகே ட²பெத்வா ஸயமேவ பா²லேஸி. மச்ச²ஞ்ச நாம குச்சி²தோ பா²லெந்தி, ஸா பன பிட்டி²தோ பா²லெந்தீ மச்ச²குச்சி²யங் ஸுவண்ணவண்ணங் தா³ரகங் தி³ஸ்வா – ‘‘மச்ச²குச்சி²யங் மே புத்தோ லத்³தோ⁴’’தி நாத³ங் நதி³த்வா தா³ரகங் ஆதா³ய ஸாமிகஸ்ஸ ஸந்திகங் அக³மாஸி. ஸெட்டி² தாவதே³வ பே⁴ரிங் சராபெத்வா தா³ரகங் ஆதா³ய ரஞ்ஞோ ஸந்திகங் க³ந்த்வா – ‘‘மச்ச²குச்சி²யங் மே தே³வ தா³ரகோ லத்³தோ⁴, கிங் கரோமீ’’தி ஆஹ. புஞ்ஞவா ஏஸ, யோ மச்ச²குச்சி²யங் அரோகோ³ வஸி, போஸேஹி நந்தி.
Tasmiṃ pana nagare aputtakaṃ asītikoṭivibhavaṃ seṭṭhikulaṃ atthi, tassa dvāramūlaṃ patvā ‘‘kiṃ gahetvā dethā’’ti vuttā kahāpaṇanti āhaṃsu. Tehi kahāpaṇaṃ datvā gahito. Seṭṭhibhariyāpi aññesu divasesu macche na kelāyati, taṃ divasaṃ pana macchaṃ phalake ṭhapetvā sayameva phālesi. Macchañca nāma kucchito phālenti, sā pana piṭṭhito phālentī macchakucchiyaṃ suvaṇṇavaṇṇaṃ dārakaṃ disvā – ‘‘macchakucchiyaṃ me putto laddho’’ti nādaṃ naditvā dārakaṃ ādāya sāmikassa santikaṃ agamāsi. Seṭṭhi tāvadeva bheriṃ carāpetvā dārakaṃ ādāya rañño santikaṃ gantvā – ‘‘macchakucchiyaṃ me deva dārako laddho, kiṃ karomī’’ti āha. Puññavā esa, yo macchakucchiyaṃ arogo vasi, posehi nanti.
அஸ்ஸோஸி கோ² இதரங் குலங் – ‘‘பா³ராணஸியங் கிர ஏகங் ஸெட்டி²குலங் மச்ச²குச்சி²யங் தா³ரகங் லப⁴தீ’’தி, தே தத்த² அக³மங்ஸு. அத²ஸ்ஸ மாதா தா³ரகங் அலங்கரித்வா கீளாபியமானங் தி³ஸ்வாவ ‘‘மனாபோ வதாயங் தா³ரகோ’’தி க³ந்த்வா பவதிங் ஆசிக்கி². இதரா மய்ஹங் புத்தோதிஆதி³மாஹ. கஹங் தே லத்³தோ⁴தி? மச்ச²குச்சி²யந்தி. நோ துய்ஹங் புத்தோ, மய்ஹங் புத்தோதி. கஹங் தே லத்³தோ⁴தி? மயா த³ஸமாஸே குச்சி²யா தா⁴ரிதோ, அத² நங் நதி³யா கீளாபியமானங் மச்சோ² கி³லீதி. துய்ஹங் புத்தோ அஞ்ஞேன மச்சே²ன கி³லிதோ ப⁴விஸ்ஸதி, அயங் பன மயா மச்ச²குச்சி²யங் லத்³தோ⁴தி, உபோ⁴பி ராஜகுலங் அக³மங்ஸு. ராஜா ஆஹ – ‘‘அயங் த³ஸ மாஸே குச்சி²யா தா⁴ரிதத்தா அமாதா காதுங் ந ஸக்கா, மச்ச²ங் க³ண்ஹந்தாபி வக்கயகனாதீ³னி ப³ஹி கத்வா க³ண்ஹந்தா நாம நத்தீ²தி மச்ச²குச்சி²யங் லத்³த⁴த்தா அயம்பி அமாதா காதுங் ந ஸக்கா, தா³ரகோ உபி⁴ன்னம்பி குலானங் தா³யாதோ³ ஹோது, உபோ⁴பி நங் ஜக்³க³தா²’’தி உபோ⁴பி ஜக்³கி³ங்ஸு.
Assosi kho itaraṃ kulaṃ – ‘‘bārāṇasiyaṃ kira ekaṃ seṭṭhikulaṃ macchakucchiyaṃ dārakaṃ labhatī’’ti, te tattha agamaṃsu. Athassa mātā dārakaṃ alaṅkaritvā kīḷāpiyamānaṃ disvāva ‘‘manāpo vatāyaṃ dārako’’ti gantvā pavatiṃ ācikkhi. Itarā mayhaṃ puttotiādimāha. Kahaṃ te laddhoti? Macchakucchiyanti. No tuyhaṃ putto, mayhaṃ puttoti. Kahaṃ te laddhoti? Mayā dasamāse kucchiyā dhārito, atha naṃ nadiyā kīḷāpiyamānaṃ maccho gilīti. Tuyhaṃ putto aññena macchena gilito bhavissati, ayaṃ pana mayā macchakucchiyaṃ laddhoti, ubhopi rājakulaṃ agamaṃsu. Rājā āha – ‘‘ayaṃ dasa māse kucchiyā dhāritattā amātā kātuṃ na sakkā, macchaṃ gaṇhantāpi vakkayakanādīni bahi katvā gaṇhantā nāma natthīti macchakucchiyaṃ laddhattā ayampi amātā kātuṃ na sakkā, dārako ubhinnampi kulānaṃ dāyādo hotu, ubhopi naṃ jaggathā’’ti ubhopi jaggiṃsu.
விஞ்ஞுதங் பத்தஸ்ஸ த்³வீஸுபி நக³ரேஸு பாஸாத³ங் காரெத்வா நாடகானி பச்சுபட்டா²பேஸுங். ஏகேகஸ்மிங் நக³ரே சத்தாரோ சத்தாரோ மாஸே வஸதி, ஏகஸ்மிங் நக³ரே சத்தாரோ மாஸே வுட்ட²ஸ்ஸ ஸங்கா⁴டனாவாய மண்ட³பங் காரெத்வா தத்த² நங் ஸத்³தி⁴ங் நாடகாஹி ஆரோபெந்தி. ஸோ ஸம்பத்திங் அனுப⁴வமானோ இதரங் நக³ரங் க³ச்ச²தி. தங்னக³ரவாஸினோ நாடகானி உபட்³ட⁴மக்³க³ங் அக³மங்ஸு. தே பச்சுக்³க³ந்த்வா தங் பரிவாரெத்வா அத்தனோ பாஸாத³ங் நயந்தி. இதரானி நாடகானி நிவத்தித்வா அத்தனோ நக³ரமேவ க³ச்ச²ந்தி. தத்த² சத்தாரோ மாஸே வஸித்வா தேனேவ நியாமேன புன இதரங் நக³ரங் க³ச்ச²தி. ஏவமஸ்ஸ ஸம்பத்திங் அனுப⁴வந்தஸ்ஸ அஸீதி வஸ்ஸானி பரிபுண்ணானி.
Viññutaṃ pattassa dvīsupi nagaresu pāsādaṃ kāretvā nāṭakāni paccupaṭṭhāpesuṃ. Ekekasmiṃ nagare cattāro cattāro māse vasati, ekasmiṃ nagare cattāro māse vuṭṭhassa saṅghāṭanāvāya maṇḍapaṃ kāretvā tattha naṃ saddhiṃ nāṭakāhi āropenti. So sampattiṃ anubhavamāno itaraṃ nagaraṃ gacchati. Taṃnagaravāsino nāṭakāni upaḍḍhamaggaṃ agamaṃsu. Te paccuggantvā taṃ parivāretvā attano pāsādaṃ nayanti. Itarāni nāṭakāni nivattitvā attano nagarameva gacchanti. Tattha cattāro māse vasitvā teneva niyāmena puna itaraṃ nagaraṃ gacchati. Evamassa sampattiṃ anubhavantassa asīti vassāni paripuṇṇāni.
அத² ப⁴க³வா சாரிகங் சரமானோ பா³ராணஸிங் பத்தோ. ஸோ ப⁴க³வதோ ஸந்திகே த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜிதோ. பப்³ப³ஜித்வா ஸத்தாஹமேவ புது²ஜ்ஜனோ அஹோஸி, அட்ட²மே பன ஸோ ஸஹ படிஸம்பி⁴தா³ஹி அரஹத்தங் பாபுணீதி ஏவமஸ்ஸ த்³வே குலானி அஹேஸுங். தஸ்மா பா³குலோதி ஸங்க²ங் அக³மாஸீதி.
Atha bhagavā cārikaṃ caramāno bārāṇasiṃ patto. So bhagavato santike dhammaṃ sutvā paṭiladdhasaddho pabbajito. Pabbajitvā sattāhameva puthujjano ahosi, aṭṭhame pana so saha paṭisambhidāhi arahattaṃ pāpuṇīti evamassa dve kulāni ahesuṃ. Tasmā bākuloti saṅkhaṃ agamāsīti.
புராணகி³ஹிஸஹாயோதி புப்³பே³ கி³ஹிகாலே ஸஹாயோ. அயம்பி தீ³கா⁴யுகோவ தே²ரங் பப்³ப³ஜிதங் பஸ்ஸிதுங் க³ச்ச²ந்தோ அஸீதிமே வஸ்ஸே க³தோ. மேது²னோ த⁴ம்மோதி பா³லோ நக்³க³ஸமணகோ பா³லபுச்ச²ங் புச்ச²தி, ந ஸாஸனவசனங், இதா³னி தே²ரேன தி³ன்னநயே டி²தோ இமேஹி பன தேதி புச்சி².
Purāṇagihisahāyoti pubbe gihikāle sahāyo. Ayampi dīghāyukova theraṃ pabbajitaṃ passituṃ gacchanto asītime vasse gato. Methuno dhammoti bālo naggasamaṇako bālapucchaṃ pucchati, na sāsanavacanaṃ, idāni therena dinnanaye ṭhito imehi pana teti pucchi.
210. யங்பாயஸ்மாதிஆதீ³னி பதா³னி ஸப்³ப³வாரேஸு த⁴ம்மஸங்கா³ஹகத்தே²ரேஹி நியமெத்வா ட²பிதானி. தத்த² ஸஞ்ஞா உப்பன்னமத்தாவ, விதக்கோ கம்மபத²பே⁴த³கோதி . தே²ரோ பனாஹ – ‘‘கஸ்மா விஸுங் கரோத², உப⁴யம்பேதங் கம்மபத²பே⁴த³கமேவா’’தி.
210.Yaṃpāyasmātiādīni padāni sabbavāresu dhammasaṅgāhakattherehi niyametvā ṭhapitāni. Tattha saññā uppannamattāva, vitakko kammapathabhedakoti . Thero panāha – ‘‘kasmā visuṃ karotha, ubhayampetaṃ kammapathabhedakamevā’’ti.
211. க³ஹபதிசீவரந்தி வஸ்ஸாவாஸிகங் சீவரங். ஸத்தே²னாதி பிப்ப²லகேன. ஸூசியாதி ஸூசிங் க³ஹெத்வா ஸிப்³பி³தபா⁴வங் ந ஸராமீதி அத்தோ². கதி²னே சீவரந்தி கதி²னசீவரங், கதி²னசீவரம்பி ஹி வஸ்ஸாவாஸிகக³திகமேவ. தஸ்மா தத்த² ‘‘ஸிப்³பி³தா நாபி⁴ஜானாமீ’’தி ஆஹ.
211.Gahapaticīvaranti vassāvāsikaṃ cīvaraṃ. Satthenāti pipphalakena. Sūciyāti sūciṃ gahetvā sibbitabhāvaṃ na sarāmīti attho. Kathine cīvaranti kathinacīvaraṃ, kathinacīvarampi hi vassāvāsikagatikameva. Tasmā tattha ‘‘sibbitā nābhijānāmī’’ti āha.
எத்தகங் பனஸ்ஸ காலங் க³ஹபதிசீவரங் அஸாதி³யந்தஸ்ஸ சி²ந்த³னஸிப்³ப³னாதீ³னி அகரொந்தஸ்ஸ குதோ சீவரங் உப்பஜ்ஜதீதி. த்³வீஹி நக³ரேஹி. தே²ரோ ஹி மஹாயஸஸ்ஸீ, தஸ்ஸ புத்ததீ⁴தரோ நத்தபனத்தகா ஸுகு²மஸாடகேஹி சீவரானி காரெத்வா ரஜாபெத்வா ஸமுக்³கே³ பக்கி²பித்வா பஹிணந்தி. தே²ரஸ்ஸ ந்ஹானகாலே ந்ஹானகொட்ட²கே ட²பெந்தி. தே²ரோ தானி நிவாஸேதி சேவ பாருபதி ச, புராணசீவரானி ஸம்பத்தபப்³ப³ஜிதானங் தே³தி. தே²ரோ தானி நிவாஸெத்வா ச பாருபித்வா ச நவகம்மங் ந கரோதி, கிஞ்சி ஆயூஹனகம்மங் நத்தி². ப²லஸமாபத்திங் அப்பெத்வா அப்பெத்வா நிஸீத³தி. சதூஸு மாஸேஸு பத்தேஸு லோமகிலிட்டா²னி ஹொந்தி, அத²ஸ்ஸ புன தேனேவ நியாமேன பஹிணித்வா தெ³ந்தி. அட்³ட⁴மாஸே அட்³ட⁴மாஸே பரிவத்ததீதிபி வத³ந்தியேவ.
Ettakaṃ panassa kālaṃ gahapaticīvaraṃ asādiyantassa chindanasibbanādīni akarontassa kuto cīvaraṃ uppajjatīti. Dvīhi nagarehi. Thero hi mahāyasassī, tassa puttadhītaro nattapanattakā sukhumasāṭakehi cīvarāni kāretvā rajāpetvā samugge pakkhipitvā pahiṇanti. Therassa nhānakāle nhānakoṭṭhake ṭhapenti. Thero tāni nivāseti ceva pārupati ca, purāṇacīvarāni sampattapabbajitānaṃ deti. Thero tāni nivāsetvā ca pārupitvā ca navakammaṃ na karoti, kiñci āyūhanakammaṃ natthi. Phalasamāpattiṃ appetvā appetvā nisīdati. Catūsu māsesu pattesu lomakiliṭṭhāni honti, athassa puna teneva niyāmena pahiṇitvā denti. Aḍḍhamāse aḍḍhamāse parivattatītipi vadantiyeva.
அனச்ச²ரியஞ்சேதங் தே²ரஸ்ஸ மஹாபுஞ்ஞஸ்ஸ மஹாபி⁴ஞ்ஞஸ்ஸ ஸதஸஹஸ்ஸகப்பே பூரிதபாரமிஸ்ஸ, அஸோகத⁴ம்மரஞ்ஞோ குலூபகோ நிக்³ரோத⁴த்தே²ரோ தி³வஸஸ்ஸ நிக்க²த்துங் சீவரங் பரிவத்தேஸி. தஸ்ஸ ஹி திசீவரங் ஹத்தி²க்க²ந்தே⁴ ட²பெத்வா பஞ்சஹி ச க³ந்த⁴ஸமுக்³க³ஸதேஹி பஞ்சஹி ச மாலாஸமுக்³க³ஸதேஹி ஸத்³தி⁴ங் பாதோவ ஆஹரியித்த², ததா² தி³வா சேவ ஸாயஞ்ச. ராஜா கிர தி³வஸஸ்ஸ நிக்க²த்துங் ஸாடகே பரிவத்தெந்தோ ‘‘தே²ரஸ்ஸ சீவரங் நீத’’ந்தி புச்சி²த்வா ‘‘ஆம நீத’’ந்தி ஸுத்வாவ பரிவத்தேஸி. தே²ரோபி ந ப⁴ண்டி³கங் ப³ந்தி⁴த்வா ட²பேஸி, ஸம்பத்தஸப்³ரஹ்மசாரீனங் அதா³ஸி. ததா³ கிர ஜம்பு³தீ³பே பி⁴க்கு²ஸங்க⁴ஸ்ஸ யேபு⁴ய்யேன நிக்³ரோத⁴ஸ்ஸேவ ஸந்தகங் சீவரங் அஹோஸி.
Anacchariyañcetaṃ therassa mahāpuññassa mahābhiññassa satasahassakappe pūritapāramissa, asokadhammarañño kulūpako nigrodhatthero divasassa nikkhattuṃ cīvaraṃ parivattesi. Tassa hi ticīvaraṃ hatthikkhandhe ṭhapetvā pañcahi ca gandhasamuggasatehi pañcahi ca mālāsamuggasatehi saddhiṃ pātova āhariyittha, tathā divā ceva sāyañca. Rājā kira divasassa nikkhattuṃ sāṭake parivattento ‘‘therassa cīvaraṃ nīta’’nti pucchitvā ‘‘āma nīta’’nti sutvāva parivattesi. Theropi na bhaṇḍikaṃ bandhitvā ṭhapesi, sampattasabrahmacārīnaṃ adāsi. Tadā kira jambudīpe bhikkhusaṅghassa yebhuyyena nigrodhasseva santakaṃ cīvaraṃ ahosi.
அஹோ வத மங் கோசி நிமந்தெய்யாதி கிங் பன சித்தஸ்ஸ அனுப்பாத³னங் பா⁴ரியங், உப்பன்னஸ்ஸ பஹானந்தி. சித்தங் நாம லஹுகபரிவத்தங், தஸ்மா அனுப்பாத³னங் பா⁴ரியங் , உப்பன்னஸ்ஸ பஹானம்பி பா⁴ரியமேவ . அந்தரக⁴ரேதி மஹாஸகுலுதா³யிஸுத்தே (ம॰ நி॰ 2.237) இந்த³கீ²லதோ பட்டா²ய அந்தரக⁴ரங் நாம இத⁴ நிம்போ³த³கபதனட்டா²னங் அதி⁴ப்பேதங். குதோ பனஸ்ஸ பி⁴க்கா² உப்பஜ்ஜித்தா²தி. தே²ரோ த்³வீஸு நக³ரேஸு அபி⁴ஞ்ஞாதோ, கே³ஹத்³வாரங் ஆக³தஸ்ஸேவஸ்ஸ பத்தங் க³ஹெத்வா நானாரஸபோ⁴ஜனஸ்ஸ பூரெத்வா தெ³ந்தி. ஸோ லத்³த⁴ட்டா²னதோ நிவத்ததி, ப⁴த்தகிச்சகரணட்டா²னங் பனஸ்ஸ நிப³த்³த⁴மேவ அஹோஸி. அனுப்³யஞ்ஜனஸோதி தே²ரேன கிர ரூபே நிமித்தங் க³ஹெத்வா மாதுகா³மோ ந ஓலோகிதபுப்³போ³. மாதுகா³மஸ்ஸ த⁴ம்மந்தி மாதுகா³மஸ்ஸ ச²ப்பஞ்சவாசாஹி த⁴ம்மங் தே³ஸேதுங் வட்டதி, பஞ்ஹங் புட்டே²ன கா³தா²ஸஹஸ்ஸம்பி வத்துங் வட்டதியேவ. தே²ரோ பன கப்பியமேவ ந அகாஸி. யேபு⁴ய்யேன ஹி குலூபகதே²ரானமேதங் கம்மங் ஹோதி. பி⁴க்கு²னுபஸ்ஸயந்தி பி⁴க்கு²னிஉபஸ்ஸயங். தங் பன கி³லானபுச்ச²கேன க³ந்துங் வட்டதி, தே²ரோ பன கப்பியமேவ ந அகாஸி. ஏஸ நயோ ஸப்³ப³த்த². சுண்ணேனாதி கோஸம்ப³சுண்ணாதி³னா. க³த்தபரிகம்மேதி ஸரீரஸம்பா³ஹனகம்மே. விசாரிதாதி பயோஜயிதா. க³த்³தூ³ஹனமத்தந்தி கா³விங் த²னே க³ஹெத்வா ஏகங் கீ²ரபி³ந்து³ங் தூ³ஹனகாலமத்தம்பி.
Aho vata maṃ koci nimanteyyāti kiṃ pana cittassa anuppādanaṃ bhāriyaṃ, uppannassa pahānanti. Cittaṃ nāma lahukaparivattaṃ, tasmā anuppādanaṃ bhāriyaṃ , uppannassa pahānampi bhāriyameva . Antaraghareti mahāsakuludāyisutte (ma. ni. 2.237) indakhīlato paṭṭhāya antaragharaṃ nāma idha nimbodakapatanaṭṭhānaṃ adhippetaṃ. Kuto panassa bhikkhā uppajjitthāti. Thero dvīsu nagaresu abhiññāto, gehadvāraṃ āgatassevassa pattaṃ gahetvā nānārasabhojanassa pūretvā denti. So laddhaṭṭhānato nivattati, bhattakiccakaraṇaṭṭhānaṃ panassa nibaddhameva ahosi. Anubyañjanasoti therena kira rūpe nimittaṃ gahetvā mātugāmo na olokitapubbo. Mātugāmassa dhammanti mātugāmassa chappañcavācāhi dhammaṃ desetuṃ vaṭṭati, pañhaṃ puṭṭhena gāthāsahassampi vattuṃ vaṭṭatiyeva. Thero pana kappiyameva na akāsi. Yebhuyyena hi kulūpakatherānametaṃ kammaṃ hoti. Bhikkhunupassayanti bhikkhuniupassayaṃ. Taṃ pana gilānapucchakena gantuṃ vaṭṭati, thero pana kappiyameva na akāsi. Esa nayo sabbattha. Cuṇṇenāti kosambacuṇṇādinā. Gattaparikammeti sarīrasambāhanakamme. Vicāritāti payojayitā. Gaddūhanamattanti gāviṃ thane gahetvā ekaṃ khīrabinduṃ dūhanakālamattampi.
கேன பன காரணேன தே²ரோ நிராபா³தோ⁴ அஹோஸி. பது³முத்தரே கிர ப⁴க³வதி ஸதஸஹஸ்ஸபி⁴க்கு²பரிவாரே சாரிகங் சரமானே ஹிமவதி விஸருக்கா² புப்பி²ங்ஸு. பி⁴க்கு²ஸதஸஹஸ்ஸானம்பி திணபுப்ப²கரோகோ³ உப்பஜ்ஜதி. தே²ரோ தஸ்மிங் ஸமயே இத்³தி⁴மா தாபஸோ ஹோதி, ஸோ ஆகாஸேன க³ச்ச²ந்தோ பி⁴க்கு²ஸங்க⁴ங் தி³ஸ்வா ஓதரித்வா ரோக³ங் புச்சி²த்வா ஹிமவந்ததோ ஓஸத⁴ங் ஆஹரித்வா அதா³ஸி. உபஸிங்க⁴னமத்தேனேவ ரோகோ³ வூபஸமி. கஸ்ஸபஸம்மாஸம்பு³த்³த⁴காலேபி பட²மவப்பதி³வஸே வப்பங் ட²பெத்வா பி⁴க்கு²ஸங்க⁴ஸ்ஸ பரிபோ⁴க³ங் அக்³கி³ஸாலஞ்சேவ வச்சகுடிஞ்ச காரெத்வா பி⁴க்கு²ஸங்க⁴ஸ்ஸ பே⁴ஸஜ்ஜவத்தங் நிப³ந்தி⁴, இமினா கம்மேன நிராபா³தோ⁴ அஹோஸி. உக்கட்ட²னேஸஜ்ஜிகோ பனேஸ உக்கட்டா²ரஞ்ஞகோ ச தஸ்மா ‘‘நாபி⁴ஜானாமி அபஸ்ஸேனகங் அபஸ்ஸயிதா’’திஆதி³மாஹ.
Kena pana kāraṇena thero nirābādho ahosi. Padumuttare kira bhagavati satasahassabhikkhuparivāre cārikaṃ caramāne himavati visarukkhā pupphiṃsu. Bhikkhusatasahassānampi tiṇapupphakarogo uppajjati. Thero tasmiṃ samaye iddhimā tāpaso hoti, so ākāsena gacchanto bhikkhusaṅghaṃ disvā otaritvā rogaṃ pucchitvā himavantato osadhaṃ āharitvā adāsi. Upasiṅghanamatteneva rogo vūpasami. Kassapasammāsambuddhakālepi paṭhamavappadivase vappaṃ ṭhapetvā bhikkhusaṅghassa paribhogaṃ aggisālañceva vaccakuṭiñca kāretvā bhikkhusaṅghassa bhesajjavattaṃ nibandhi, iminā kammena nirābādho ahosi. Ukkaṭṭhanesajjiko panesa ukkaṭṭhāraññako ca tasmā ‘‘nābhijānāmi apassenakaṃ apassayitā’’tiādimāha.
ஸரணோதி ஸகிலேஸோ. அஞ்ஞா உத³பாதீ³தி அனுபஸம்பன்னஸ்ஸ அஞ்ஞங் ப்³யாகாதுங் ந வட்டதி. தே²ரோ கஸ்மா ப்³யாகாஸி? ந தே²ரோ அஹங் அரஹாதி ஆஹ, அஞ்ஞா உத³பாதீ³தி பனாஹ. அபிச தே²ரோ அரஹாதி பாகடோ, தஸ்மா ஏவமாஹ.
Saraṇoti sakileso. Aññā udapādīti anupasampannassa aññaṃ byākātuṃ na vaṭṭati. Thero kasmā byākāsi? Na thero ahaṃ arahāti āha, aññā udapādīti panāha. Apica thero arahāti pākaṭo, tasmā evamāha.
212. பப்³ப³ஜ்ஜந்தி தே²ரோ ஸயங் நேவ பப்³பா³ஜேஸி, ந உபஸம்பாதே³ஸி அஞ்ஞேஹி பன பி⁴க்கூ²ஹி ஏவங் காராபேஸி. அவாபுரணங் ஆதா³யாதி குஞ்சிகங் க³ஹெத்வா.
212.Pabbajjanti thero sayaṃ neva pabbājesi, na upasampādesi aññehi pana bhikkhūhi evaṃ kārāpesi. Avāpuraṇaṃ ādāyāti kuñcikaṃ gahetvā.
நிஸின்னகோவ பரினிப்³பா³யீதி அஹங் த⁴ரமானோபி ந அஞ்ஞஸ்ஸ பி⁴க்கு²ஸ்ஸ பா⁴ரோ அஹோஸிங், பரினிப்³பு³தஸ்ஸாபி மே ஸரீரங் பி⁴க்கு²ஸங்க⁴ஸ்ஸ பலிபோ³தோ⁴ மா அஹோஸீதி தேஜோதா⁴துங் ஸமாபஜ்ஜித்வா பரினிப்³பா³யி. ஸரீரதோ ஜாலா உட்ட²ஹி, ச²விமங்ஸலோஹிதங் ஸப்பி விய ஜா²யமானங் பரிக்க²யங் க³தங், ஸுமனமகுலஸதி³ஸா தா⁴துயோவ அவஸேஸிங்ஸு. ஸேஸங் ஸப்³ப³த்த² பாகடமேவ. இத³ங் பன ஸுத்தங் து³தியஸங்க³ஹே ஸங்கீ³தந்தி.
Nisinnakovaparinibbāyīti ahaṃ dharamānopi na aññassa bhikkhussa bhāro ahosiṃ, parinibbutassāpi me sarīraṃ bhikkhusaṅghassa palibodho mā ahosīti tejodhātuṃ samāpajjitvā parinibbāyi. Sarīrato jālā uṭṭhahi, chavimaṃsalohitaṃ sappi viya jhāyamānaṃ parikkhayaṃ gataṃ, sumanamakulasadisā dhātuyova avasesiṃsu. Sesaṃ sabbattha pākaṭameva. Idaṃ pana suttaṃ dutiyasaṅgahe saṅgītanti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
பா³குலஸுத்தவண்ணனா நிட்டி²தா.
Bākulasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. பா³குலஸுத்தங் • 4. Bākulasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. பா³குலஸுத்தவண்ணனா • 4. Bākulasuttavaṇṇanā
